jueves, 23 de junio de 2022

L'Ampriu (Ribagorza) - Tuca Gallinero - Tuca d'es Cebollers - Ibón de Basibé

11 de Xunu de 2022

Track: L'Ampriu (Ribagorza) - Tuca Gallinero - Tuca d'es Cebollers - Ibón de Basibé

Como ya comentáremos na entrada resume del viaxe al Pirinéu 2021 - 2022, aportábemos al Ball de Benás en Ribagorza, con toles estayes montañeres bien afitaes, siendo'l primer día, el d'aclimatación a l'altor y de paso, echar una güeyada dende lo alto a los oxetivos cimeros d'esti valle, que nun yeren otros que'l Ballibierna y Aneto.

Alborecemos en Benás, magar de descansar bastante bien hasta que l'speaker del trail, tien a bien, llevantános a les 7 y media la mañana. Nun tenemos priesa esti día, asina que vemos la salida de la maratón y vamos almorzar con calma en dalgún hotel de la cai principal.

Entamos nel aparcaderu de L'Ampriu na estación de Sarllé/Cerler (1909 m)

Ente nervios de corredores, danos tiempu a ver la salida de la carrera intermedia de 28 km y decidimos que va siendo hora de ponenos en marcha, así que garramos agua, la furgo y tiramos hacia'l pueblu Sarllé, onde ta la perconocida estación d'esquí de Cerler (Sarllé n'aragonés), pa siguir carretera alantre hasta la parte alta de la estación, conocida como L'Ampríu.


Garramos pista hacia la Colladeta del Gallinero
 
La ruta saldrá del enorme aparcaderu y a la mandrecha del últimu edificiu saldremos per una pista, que n'envueltes tien que dexanos na colladeta'l Gallinero, puntu nel que podríemos tamién ascender al pico Sarllé. Equí les vistes son brutales, con tol macizu del Llardana a la nuesa espalda, ampliándose pasín a pasu según vamos ganándo-y tarrén al nuesu primer oxetivu: la Tuca Gallinero de 2726 m.

Ascendemos hasta la Tuca Gallinero (2726 m)

En 1h y 50 min, encumamos el finxu del Gallinero y anque nun haya pérdida, lo pindio de la xubida con más de 800 de desnivel direutu, fai que baxemos un pelín pa llibrar una brisina fresca y descansemos unos minutinos xintando daqué, enantes de continuar el nuesu camín hacia'l puntu más alto de la ruta: la Tuca d'es Cebollers.

Facemos camín pente'l Gallinero y es Cebollers con vistes hacia la Maladeta

Al igual que pal Gallinero, namás tendremos que caleyar y superar el desnivel, teniendo un pocu más diversión na parte alta, pudiendo dir pel crestéu y sobretou, ganando les vistes que tábemos deseyando con tol macizu de la Maladeta enfrente nuesa, pudiendo comprobar que l'oxetivu del siguiente día, la Tuca Ballibierna, taba escosa de ñeve y podríemos dir en zapas de trail.

 
Cumal de la Tuca d'es Cebollers (2749 m)

El día, caltiénse fresquín na parte alta y esfrutamos tanto de les vistes a 2750 como de comentar la xugada pal día siguiente. Ensin perder res de tiempu, continuamos pela arista, alcontrándonos un crestéu perentreteníu con dalgún pasín aéreu y dalgún trepe prestosu, hasta arribar al Tozal del Portet de 2723 m, onde vamos entamar la baxada final.

Divertíu crestéu dende Cebollers hacia'l Tozal de Portet

Pa ello, tendremos de desfacer un pocu camín y buscanos la vida al alcuentru d'un pasu que llibre la fastera oeste d'esti tozal, que ye dafechu vertical. Alcontramos pasu y diremos per una cincha, hasta aportar al Plan L'Están, onde nel colláu cola Tuca de Basibé, vamos alcontrar una pindia pero factible baxada per tarrén herbosu hacia l'Ibón de Basibé.

Baxamos del Plan L'Están al Ibon de Basibé

Fadremos tol descensu hasta l'ibón, onde pararemos un ratín a descansar ya que llevábemos dalgo más de 4 hores y media sin parar. Magar de xintar y beber daqué, vamos faldear al alcuentru de la pista que vien de la cabaña de Castanesa xustu na collada Basibé.

Baxada peles pistes de la estación de Sarllé
 
Dende equí, ya diremos per pista en innumerables envueltes penmediu de les distintes pistes de Cerler, perdiendo esi vientín que nos llibraba del calorón reinante y ye que ya teníemos los 30 graos presentes nel nuesu primer día de monte, aportando pelín sofocaos al aparcader de L'Ampriu.

En resume, ruta perfeuta pa dir caleciendo pates y sobretou p'acolumbrar l'estáu la ñeve nes cotes más altes del parque de Llardana-Maladeta, saliéndonos un total de 5 hores y 50 min pa percorrer los 12,3 km con unos +/- 1075 m de desnivel.

Camudando'l Camín col macizu Maladeta nel puntu de mira

No hay comentarios:

Publicar un comentario