La Matosa (Piloña) - Picu Torre

6 de Xineru de 2021

Track: La Matosa (Piloña) - Picu Torre

Día de reis na ñevada más grande de los últimos años y como somos republicanos, pues tiramos pal monte. Alcuérdome d'una ñevadona así, fai diez años, cuando ficiéramos n'ivernal el Picu Fariu nes llendes de Xixón, Siero, Sariegu y Villaviciosa, más menos.

Ta tol mundiu más menos igual, esquiando, saliendo a correr pel ñeve, una llocura, pero ente tanto plan, alcontrámonos Kíla y yo, preparando a les 9 la mañana una ruta que nos pudiera prestar. Vueltes y más vueltes de tracks y decídome a tirar pa Piloña, a facer dalgún de los vértices xeodésicos que tengo per facer nesa fastera.

Vistes de la Matosa, el nuesu puntu de partida (284 m)

Salgo de Xixón tarde y tovía paro en Nava, a tomar un cafetín con collacios que diben pisar ñeve per Peñamayor. El resultáu, pues entamar a caleyar magar de les 12 la mañana, dempués de perdeme p'arribar a la Matosa (284 m), puntu d'aniciu de la ruta.

Dexo la furgo, ensin molestar, ya que nun atopé muncho sitio y saldremos per pista, descendiendo al pocu per un senderu hacia'l rigu Color. Esti valle, nun lo conozo, poro alcuéntrome con ún d'esos díes nos que de xuru voi esfrutar, anque seya en solitariu.

Descendermos pa cruciar el rigu Color hacia la Llosa'l Monte

 

Travesaremos la ponte con cuidadín y entamamos ascensu a pinchu y a fueu hacia la Llosa'l Monte. Voi pertarde y xubo con bota de ñeve, como si tuviera nuna carrera de monte. Kíla, va encantada a lo suyu, teniendo muncho menos problemes pa saltar les milenta sebes y allambraes, qu'atopamos nel nuesu camín.

 

A dicir verdá, el tramu de praos pel Llanu y la Llosa ye un pocu enguedeyosu, pero llueu saldremos monte arriba hacia'l colláu la Espina, onde alcontramos les primeres falisgues de ñeve. Dende la Espina, con pocu más qu'ascendemos ya tenemos ñeve de continuu, sobretou a partir de les Llanes onde damos vista al nuesu oxetivu: El Picu Torre.

Camudamos el color verdi pol brutal mantu blancu nel colláu la Espina

 

Tamos a pocu más de 600 m y la visión de la fastera Este del picu Torre, casi acoyona. Asturies ta preciosa, nun día perfríu pero con una claridá y unes vistes increyibles. Abrimos buelga, sele, primeru Kíla y llueu yo hasta l'enllaz cola pista que vien de Pesquerín, onde charramos con un paisanu, comentando la xugada y diciéndome que voi tener muncha ñeve arriba.

 

L'ascensión a esti piquín de pocu más de 800 m diba ser más cómoda dende Pesquerín, pero quería dame caña y yendo en solitariu, pueu dame más cera y facer un bon entrenu. Metémonos a bregar pela arista Este y a mitá de l'ascension ya voi abriendo buelga penriba de la rodiya, poro Kíla va como puede la probe, ascendiendo casi enterrada detrás mía.

Ablucante'l cumal ivernal del Picu Torre (817 m)

 

Con una sudada como un burru, ensin barayones, abriendo buelga a pelo, aportamos a los 817 m del Picu Torre, que nos amuesa l'espeutáculu de l'Asturies ivernal. Acolumbramos el Sueve ñeváu al norte, el cordal de Peñamayor y la Xamoca al Oeste, montes de Piloña como'l Sopiedra o la xerra d'El Sellón... toos ellos con una bona manta blanca.

Les miós intenciones yeren mui ambicioses, pero mirando la hora, veo que nun va tar el día pa muncho más, asína que facemos la travesía hacia la peña la Riestra, onde paramos un segundín a mirar pal oriente, teniendo los Picos medio tapaos, pero quedándonos con una guapa visión de la cara norte del Pierzu, la pica Cetín o el picu'l Cuniu pente otros.

 Dende la xerra de Pesquerín, l'Asturies blanca amuésanos tola so belleza

Continuamos, bregando pero dalgo más amable cola ñeve venteada, onde fundímonos menos, averándonos hacia'l sur, cola increyible vista del picu Vizcares, el cual me llama enórmemente a repetilu dende'l norte, per estos guapos y pocu transitaos valles de Piloña.

En munches de les rutes, siempre digo que Piloña ye'l gran desconocíu, tapáu quiciás pola fama del parque de Reres y del de Ponga. Defechu, voi feliz, conociendo un pelín más del conceyu, baxando hacia'l Corralín, otra guapa braña, onde empataremos col GR de los Peregrinos que vien dende Uviéu a Cuadonga.

Descendemos hacia'l Corralín col envís de garrar el GR de los Peregrinos

Nin más, nin menos, son les 3 de la tarde y toca retirada. Tenía pensáu siguir hacia Tebrandi y posíblemente hasta'l Niañu, pero nin les hores de lluz animen a ello, nin l'estáu de la ñeve me fai progresar rápidu pa tal xabazada.

 

Despedímonos del restu del cordal de Pesquerín pa otra vegada y entamamos a descender per un GR, del que nun hai res de rastru. Ye claro que tará marcáu y en condiciones "normales" sedrá cenciellu de siguir, pero voi mirando'l mapa del gps ya intentando albidrar per onde debería dir, baxando pelos Praixones y cruciando dos riegues hasta'l porru Caruño, onde al llau d'una cabaña, alcuentro la primer marca mariella nun árbol.

Travesamos pela Zorea y Les Camperes hasta la riega los Baselinos onde garramos pista

Nun ye que se faiga más fácil, bregar cola vexetación, ñeve pel todiellu y blimes y árboles francíos per uqueira, pero al menos nun tengo que tar mirando'l gps cada tres pasos, ya que les marques van empobinándome per una guapa viesca, pasando pela Zorea y les Camperes hasta salir del senderu y topanos con una enorme pista al altor de la riega los Baselinos.

Nun debemos enxamás menospreciar una ruta, nin un monte baxo n'altor, ya que tamos nun tarrén complexu, con munches riegues y si equivocámonos un pelín de vallina, podemos metenos nun embarque curiosu pa baxar hacia'l rigu Color.

Baxamos per cómoda pista hacia'l rigu Color pa tornar a la Matosa

Darréu, per pista cómoda, diremos esfrutando del descensu pegaos a la riega los Baselinos y per una viesca realmente guapa. Nun para de sorprendeme Piloña y son munches les ganes que tengo de conocer el valle'l rigu Color hasta'l so final nes Cuerries.

Esta vegada, tuvimos que conformanos con crucialu de nuevu nel Llanu la Foz y garrar de nuevu la pista hacia la Matosa, completando una circular de 8,7 km con casi 700 m desnivel positivu, que me tuvo bregando casi 4 hores y media.

 

Lo dicho, munches vegaes, les condiciones son les que faen qu'una ruta seya buena o mala. Esta vegada, la bregada pela ñeve con Kíla, el día ablucante, les vistes d'Asturies ñevada, ficieron qu'esfrutara como un neñu, d'una ruta que quiciás ye una maraviyosa mañanera ensin ñeve pa dir a xintar perende.

 

Que vos preste!

Camudando'l Camín pela Piloña blanca