Track: La Cueta (Babia) - Fuentes del Sil - Pena Orniz
Segunda vegada que visitábemos Somiedu esta temporada, a la gueta d'ascender un cumal en condiciones ivernales. Si apocayá, fuéramos hasta L'Altu la Farrapona pa facer una guapísima ruta a la Pena Calabazosa, ésta vegada queríemos conocer l'ascensión a la Pena Orniz dende la fastera llionesa, partiendo del pueblu de La Cueta.
Esti guapu pueblín, con escuelina d'escalada, caltién un toque montañeru pergrande, siendo llugar de pelegrinación d'esquiadores de montaña pudiendo ascender o facer travesíes pente milenta cumales del parque natural de Somiedu o de la fastera de Fuentes del Sil, que dalgo pudiéramos conocer, na nuesa visita y ruta al Montigüeru.
Partimos de la Cueta (1442 m)
Raspiando les 10 de la mañana, entamamos a caleyar per pista, xunto al rigu Sil, faciendo un ascensu cómodu y tendíu, perpasando varies pontes como la de Buspusil y siempre cola vista puesta nes lladeres ñevaes de dellos dosmiles que nos arrodien nel nuesu caminar, como los Picos Blancos o los de les cotes de los puertos de Vallinalluenga.
Bien ceo alcontrámonos colos prmeros pasos per ñeve nel valle'l Sil
Enantes d'aportar a les praderes de Cebol.léu, tenemos dos opciones, averános a éstas p'ascender hacia la Machadina y d'ehí hasta'l mayáu de Covalancha o conocer les fuentes del Sil, decidiéndonos per esta, poro desviámonos un pelín enantes hacia'l mayáu del Abeséu, teniendo que restolar con calma'l camín sola ñeve, sobretou nun primer tabayón que fai que tengamos qu'ascender a pinchu pa ganar el senderu.
Avanzamos col envís de conocer les dixebraes fuentes del Sil
A partir d'equí, entraremos ya en tarrén continuu de ñeve y diremos esfrutando d'una fastera más abierta nel valle del Sil. Les vistes son increyibles, el caleyar pela ñeve relaxáu y los cumales que cierren el valle: unos conocíos como'l Cuetalbo y otros que pienso conocer, quiciábes, la temporada que vien, como la Pena Chana o la Cervata nun me pueden atraer más.
Ascendemos dende'l valle'l Sil hacia'l colláu Orniz
Dacuando, alcontramos llugares que tienen toles condiciones pa qu'un seya a namorase y Babia ye ablucante, con montes de dosmil metros que son perfeutos pa les ivernales. Magar de dellos minutinos nos que nos separamos el grupu unos per un llau del valle y Benjamín y yo, pembaxo de los parés de la Cervata, tornaremos a alcontranos de nuevu nos Puertos del Cuetalbo col envís d'entamar l'ascensión al nuesu oxetivu: la Pena Orniz.
Ablucantes los montes del Sil n'iviernu
Nos dos 2063 m del colláu Orniz, el grupu nun puede facer otra cosa que parar a sacar una semeya y la mió tiesta, nun puede más que quedase mirando pa los montes que tenemos a les nueses espaldes. Con 3 hores de ruta, namái que nos quedaba esfrutar de la pindia pero prestosa pala ñevada que tien de llevanos hasta'l cumal.
Entamamos l'ascensu hacia'l nuesu oxetivu con vistes al valle Cebol.léu
Falaremos con dellos montañeros nel colláu, dalgunos fueron a encumar y a otros dió-yos poca confianza l'estáu de la ñeve pa nun llevar crampones. Nun soi muncho de xulgar, prefiero la xente sensato a los atrevíos asina que decidimos mirar l'estáu de la ñeve pela nuesa cuenta.
Perguapa ascensión hacia la Pena Orniz
Pali, pali, primero Haritz abriendo buelga y llueu más tarde yo, na parte cimera y más pindia, diremos ganándo-y tarrén hasta aportar a un pequeñu corredor, onde la ñeve quiciás ta más blando y con tendencia a esfarrapar, pero na del otru mundiu p'algamar la cume de la Pena Orniz (2192 m).
Cumal de la Pena Orniz (2192 m)
Segunda vegada que toi nesti cumal, que domina tola fastera de llagos de Saliencia y del Val.le y disfrútolo como la primera, ya que la ñeve cambia los paisaxes dafechu y anque pisara casi tolos cumales asturianos de la redolada, les vistes siempre son distintes d'un día pa otru y siempre presta igualmente, anque non tanto como a Pepa, que fuera la qu'escoyera la ruta y ta encantada con un día tan guapu como'l que tuviemos pa facer monte.
Descendemos de Pena Orniz hacia las Morteras del Coutu
Nun queremos forciar la máquina de más y anque ye una hora superafayaiza pa siguir intentando dalgún monte más, preferimos dar per zarrada les ascensiones y averámonos hacia'l picu'l Colláu Orniz, onde alcontramos una canalina perdivertía de ñeve que diba llevanos hacia las Morteras del Coutu.
Baxamos de Covalancha a la Machadina pa siguir hacia la Cueta
Dende esti caóticu llugar como ye una mortera, vamos navegar hacia pente pequeñes cotes de caliza, hacia la mayada de Covalancha, onde, como ya dixe enantes, descenderemos hacia la Machadina y ellí ganaremos de nuevu la pista qu'ensin perda denguna tien de llevanos de nuevu hasta'l pueblu de la Cueta.
En resume, ruta preciosa pa esta dómina del añu, pudiendo ser dafechu ampliable con cualesquier de les cotes qu'arrodien a la Pena Orniz. Pa nós, saldríen aproximádamente, ya que perdí'l track propiu, unes 7 hores de patéu ivernal con un total de casi 16 km y un desnivel positivu d'unos 800 m d'altor.
Camudando'l Camin nes Fuentes del Sil
No hay comentarios:
Publicar un comentario