miércoles, 15 de febrero de 2017

Bueida (Quirós) - Puertu Güeria - La Cigacha - Puertu Ventana - Torbaniel.lu

11 d'Avientu de 2016

Track: Bueida (Quirós) - Puertu Güeria - Cigal.la - Puertu Ventana - Torbaniel.lu


Última ruta del añu 2016 del GM Xuan de la Borrina, pero por dalgún motivu cayóse de la convocatoria mediu mundiu y pensándolo bien, pa esta ruta qu'escoyimos en cuestión, casi que nos xuntamos muncha más xente... nun sé como podría acabar la cosa.

A la fín, allá que fuímos Haritz y yo, más Pepa y Jóse que tan finando tolos dosmiles del macizu de Penubina y venía-yos al pelo acompañamos a esta ruta. Ye más, Pepa posiblemente seya la primer muyer que faiga los 58 dosmiles lo que presta más tovía.

Digo que salimos de Bueida en Quirós, pero na realidá xubiremos colos coches dos kms alantre pela pista qu'aporta al Puertu Ventana pasando per Torbaniel.lu, hasta una curva a la mandrecha onde hai bon sitiu p'aparcar y que nómase Les Garrafes.

Salimos dende Les Garrafes (922 m) cerquina de Bueida

P'aportar a Bueida salimos de Xixón y garramos la AS-I hasta topanos en Mieres del Camín cola A-66 que nos dexaría na Pola de L.lena. Ellí garramos la As-230 que nos fadrá xubir a la Col.la la Cobertoria dempués de pasar pelos pueblos l.lenizos de Palaciós, Piedracea y Armá.

Na Cobertoria entraremos nel conceyu de Quirós y siguimos per esta carretera hasta Santa Marina, onde garraremos la Qu-3 pasando pelos pueblos de L'Aguadina, Ricao y Bueida, onde como ya dixe xubiremos un pelín más hasta Les Garrafes.

Equí entamaremos a caleyar a les 9 con un día fresquín como ye vezu pa la dómina del añu na que tamos. Fadremos el camín tranquilamente pegaínos al ríu Buxalve hasta'l crucie de Las Infiestas, nel que tomamos direición al Prau Melchor pa siguir a bon ritmu hacia'l L.laseiru.

Facemos el camín davezu pelas Infiestas hasta'l L.laseiru

Nun me paro muncho a desplicar la belleza del llugar porque ye un de los paseos más guapos pa senderistes pa conocer el Puertu Güeria, más cómodu quiciás que pela Foiz Grande dende L.lindes y muncho más guapu que bordiando la Pena Ruea dende Cortes.

El casu ye que plantámonos nel Puertu Güeria, más en concretu na Campa L.larga (1658 m), baxo'l Cuitu Pachón, nun pelín menos de dos hores de camín, a bon ritmu, lo cual fainos llevar a Jose cola llingua fuera.

Pasiamos per L.lingleo empbinándonos hacia'l Canalón Baxeru

Darréu, tocarános baxar hacia la Veiga'l Retuertu primeru y dempués pasar pela Veiga L.longa, enantes d'acometer lo que sedría'l primer puntu perimportante del día: El Canalón Baxeru. Personalmente, tenía munchísimu interés en meteme nesta fastera, ya que nun conocía la parte baxa del Puertu Güeria, con eses precioses vegues y muncho menos les canales d'ascensu hacia la fastera de la Cigal.la.

A dicir verdá, los collacios baxaron a estes vegues de Retuertu y L.longa, pero yo siguí per un senderín colgáu ensin perder altor, pero finalmente sí que perdí tiempu, por travesar lleres de mal andar... asina que meyor baxar y esfrutar de la guapura de les vegues del Puertu Güeria.

Metémonos l'entepechu del Canalón Baxeru saliendo a asoleyar felizmente

A ellos da-yos tiempu hasta pa picar daqué y yo sigo mi travesía particular hasta aportar al canalón Baxeru alcontrándome unes decenes de metros penriba de los demás. Vamos xuntándonos y ponemos la reductora pa dir ganándo-y tarrén y altor a esta guapa formación enmediu d'esti mundiu calizu.

El senderu ta bien marcáu pero l'amiestu de peña suelto y ñeve nun faen bona combinación y cuesta enforma avanzar. Aún así, ascendemos los casi 300 m de desnivel y salimos al senderu qu'aporta dende la salida del Canalón Cimeru demientres axuntámonos toos baxo los parés de les Torres.

Avanzamos cola vista puesta na Pena La Cigacha

Caleyamos apriesa, ya que tenemos ganes de garrar el sol de nuevu, nun fai falta dicir la temperatura a la solombra, y metémonos na fastera de los Fuexos de Colines, onde vamos topando delles torques, poro estremamos les precauciones ya qu'un resbarión ensin crampones y a saber onde acabamos.

Pasamos esti tramu más delicáu y a puntu d'aportar a la Muezca la Cigacha decidimos parar a xintar dalgo, ya que llevamos 4 hores ensin parar. Al sol recuperamos fuercies y renaudamos el camín xubiendo un canalizu y descendiendo a una muezca (pasu pente dos peñes).

Atacamos el cumal de la Cigacha col grupu del Ranchón detrás

Dende equí, entamaremos a la fín, l'ascensión al primer cumal del día, la Cigacha y faese bordiando la paré sur pela manzorga y garrando l'arista SO, que con dalguna pequeña trepada y buscando'l meyor camín pa Kíla, somos a encumar tol grupu sin problemes.

Les vistes como siempre brutales nesta fastera de Penubina, alcordándonos munchísimu d'otru gloriosu día de monte que ficiéramos nel ascensu a la pena'l Ranchón, que ta xustu enfrente nuesa, convidándonos a volver.

Cume na Pena la Cigacha (2065 m)

Miramos el reló y son les dos menos cuartu y nesta dómina del añu el sol nun va más allá de les 5 y media, poro tenemos qu'entainar y lo primeru ye baxar de la Cigacha pela cara norte, la cual tien un amiestu de roca húmeda, ñeve duro y xelu en dalgún puntu ya que nun-y da'l sol en tol día.

Aportaremos con curiáu a la Muezca la Cigacha (1960 m) na que vemos marques colloraes que baxen hacia'l Puertu Güeria, quedándome con ganes de conocer otru día esti accesu más curtiu anque más pindiu si cabe.

Ascensión al Cuitu Pachón

De la muezca la Cigacha, tenemos como oxetivu siguiente el Cuitu Pachón y tenemos oyío que tien dalguna trepadina curiosa, poro xubimos de primeres sin esmolecemos muncho hasta aportar a un canalizu onde doime cuenta, que Kíla nun va poder xubir per ellí.

Dexo a la perrina pente lladríos y lloros col grupu y métome una trepada esprés a la mandrecha del canalizu ya que véolo más rápidu y cenciellu de trepar. Disfrute total, per tubos d'órganu y salgo a un antecumal... dende'l que veo la naguada cume.

Nel cuitu Pachón (2104 m) col Ranchón detrás

Destrepe a una h.orcadina y trepe divertidísimu nun murete, algamando los 2104 m del Cuitu Pachón, nel que faigo la semeya de turnu, echo un vistazu a una posible baxada y a salir corriendo p'abaxo. En diez minutinos toi de nuevu con Kíla y ya pueden xubir los collacios, pero dígo-yos que dexen les mochiles onde yo, puesto que nun ta la baxada en condiciones, con xelu costra nes peñes y munches posibilidades de fostiase.

Tirámonos Kila y yo a asoleyar un ratín y tengo que dicir que casi soi a durmime y cuando baxen ponémonos en marcha, teniendo unes tres hores de lluz pa facer el restu de la ruta qu'entá nun sabemos nin la rialidá de la so llargura.

Empobinámonos pela Veiga'l Chanchal pa siguir a la Pena L'Arca

Lleguen los collacios encantaos pol ascensu y apúrolos pa siguir alantre, descendiendo un pocu del Pachón hacia'l sur, pa facer una envuelta a la mandrecha y garrar camín pela Veiga'l Canchal, dexando a la manzorga la Moyonera primeru y llueu el propiu Ranchón.

Dende'l colláu, onde tenemos a tiru'l Ranchón, vamos descender como ficiéramos naquella ruta y siguimos camín hacia la Pena L'Arca, caberu dosmil de 2082 m que-y faltaba a Pepa y Jose nesta fastera norte del macizu de Penubina.

Cume na Pena L'Arca de 2082 m

Colos deberes cumplios pero mui poca lluz nel día, nun podemos parar muncho más y proponémonos al menos llegar con lluz al Puertu Ventana. Nun ye'l final del nuesu viaxe, pero al menos ya sedría un viaxe muncho más seguro.

El camín a siguir ye'l davezu al menos por nosotros, baxando hasta la Veiga L'Arca y garrando ellí, el senderu que fai un bordéu a tol valle Formosa y que descubriéramos per primer vegada na nuesa ascensión al Picu'l Güertu'l Diablu.

Descendemos hasta la Veiga L'Arca y bordiamos tol valle de Campu Formosa

La primer vegada costáranos un pelín siguilu, pero conocémoslo bien ya y paezme que ta siendo de nuevu usáu pelos montañeros y caltiense en meyor estáu, poro somos a facer tola vueltona en 45 minutinos hasta aportar hasta la pista de les antigües torres llétriques.

Equí como siempre, toca xubir un pelí hasta'l puntu de la semeya mítica de Penubina y descender cola calma pela mandrecha del Penón de Ventana, hasta la pista que xube dende Torbaniel.lu y que nesti casu, a la escontra de les otres vegaes, toca siguila en baxada.

Aportando al Puertu Ventana y baxando pela pista Torbaniel.lu

En baxada ye lo que creíemos que yera, porque'l primer tramu caltiense en desnivel y hasta tien delles xubides, anque menos mal que díbemos entreteníos col atapecer penriba de la Ferreirúa. A dicir verdá, da gustu alcontrase con un grupu que ya sabe lo que nos espera cuando falamos de facer esta ruta y tol mundiu venía preparáu col frontal y cola mentalidá de zampar con patatines kilómetros de pista.

Kilómetros de pista, tantos como, 11,5 km que si diz ceo y que de primeres nun pasen mal, pero que col pasu del tiempu y el cansanciu nos pies y pates, van siendo un auténticu infiernu, sobremanera viendo les envueltes nel quintu coñu, demientres encamienteste a los degorrios pa que seya otra pista y non la tuya.

La nueche atrapónos y los frontales... güeyos allumantes y curuxes foron los protagonistes

Al final, cada envuelta que veíemos al otru llau del valle, yera de la nuesa pista y sólo el bon humor, les curuxes que facíen de compaña, los güeyos de Kíla dándonos sustos y los de dalgún raposín curiosu ficieron un pelín más sele una pista que nun pienso facela nin en bicicleta baxando jaja.

En resume, ruta increyíblemente guapa, pero escesívamente llarga pa la dómina del añu y por ello tuviemos que caleyar de nueche per una pista infumable durante más de dos hores, hasta completar los 27 km de percorríu y 1985 m de desnivel positivu acumuláu nun total de 10 hores y 25 minutinos, lo cual nun ta mal pa primeros d'Avientu jeje.

Camudando'l Camín en Penubina

8 comentarios:

  1. Una ruta tan larga como bonita,las ubiñas no defraudan.Que dolor de pies y que risas por esa pista infernal jajajaja eso si muy bien recompensada con unos huevinos fritos con chorizo en el chigre de Santamarina.Me encanta lo bien q la cuentas,la verda es que revivi cada momento.Precioso repoirtaxe

    ResponderEliminar
  2. Gracies Pepa... pasámoslo en grande

    ResponderEliminar
  3. Ruta muy interesante para nosotros porque nunca accedimos por ahí al parque y no tenemos la Cigacha además. Estupendo repor Berto. Un abracin!

    ResponderEliminar
    Respuestas
    1. Prestó muncho conocer esa fastera... taba con ganes dende cuantayá. Un abrazu

      Eliminar
  4. Vaya forma de acabar el año!! Menudo rutón. Parecida la hicimos este verano y para nosotros ye una zona guapona, guapona!
    Saludos!

    ResponderEliminar
    Respuestas
    1. Si, ya vos lo comenté que la ruta vuesa paeciérame una barbaridá... y llevaba'l vuesu track... pero de nueche nun podíemos baxar por onde lo ficisteis. Tocaba asegurar. Un abrazu

      Eliminar
  5. Un saludo, soy del sur peninsular, y he conocido el blog mediante Haritz. Bonita zona para caminar. Gracias por darla a conocer.
    Un abrazu.

    ResponderEliminar
    Respuestas
    1. Ye uno de los llugares más impresionantes de Asturies. Cuando visites esta tierra, échate les botes de monte y a conocer jeje.

      Un abrazu

      Eliminar