sábado, 4 de febrero de 2017

Arenas (Cabrales) - Somas - Cabeza Llamedu - Calluenga

3 d'Avientu de 2016

Track: Arenas (Cabrales) - Somas - Cabeza Llamedu - Calluenga


A primeros d'Avientu cayeren delles ñevadines curioses y con un pocu fríu, tovía quedaba pelos altos, poro decidimos buscar una cota que nun fuera mui alta pero que diera munchu xuegu a la hora de tener bones vistes.

Portudera, yera perfeuta y les canales que la percorren yeren la cuenta, asína que tiramos p'Arenas en Cabrales pel camín davezu dende Xixón: Autovía'l Cantábricu hasta'l desvíu de Posada y dende ellí hacia l'Altu H.ortigueru pa baxar per Canales, Carreña, Po y Arenas onde almorzamos como tamién ye vezu.

Partimos d'Arenas (139 m) en Cabrales

Nun alarde d'eficacia, a les 9 y pocu, tamos entamando a caleyar dende'l ampliu aparcaderu hacia l'entamu de la Senda Caoru. Nun ye'l nuesu destín, pero los primeros pasos tendremos de dalos per ella, pa desvianos dempués en Valdelamadera hacia la mandrecha hacia la cotera H.ustameña.

Na faldera d'esta cotera, hai un cercáu de ganáu lo cual ye bon finxu, pa saber onde tenemos que buscar senderu qu'empobínese hacia la Canal de Somas. Pa xubir, garramos un senderu que fízonos trabayar muncho pente los felechos y cotoyes y pa la baxada, dímonos cuenta que yera meyor tirar faldiando la cotera, pa xubir per una pindia vallina, pero llimpia de felechos, que nos pon en ruta hacia Somas.

Empobinámonos hacia la canal de Somas

Yo ya conocía la canal de Somas del Trail de Portudera, pero como cambia xubila cola calma, esfrutando d'una canal y d'un senderu preciosu y charrando animádamente con collacios. Lo que tardamos n'aquella carrera una hora en facer mil metros de desnivel, dende Arenas a la mayada de Somas, tardamos casi dos hores y media.

Son otros ritmos y dafechu ye casi un deporte distintu, pero esfruto igualmente xubiendo corriendo y forciando'l físicu casi a la llende, que poniéndome una mochila, les botes de montaña envede los playerinos y caleyando con tiempu pa mirar pa tolos llaos y falando de mil coses.

Apretamos no más pindio pa salir a la mayada de Somas

El día qu'esto nun seya asína, dalgo tará yendo permal y será'l momentu de dexar de correr pel monte, porque taré perdiendo tol xacíu de lo que ye dir de monte. Un reflexu d'ello, ye tar embobáu na boquera de Somas mirando pa un de los mayaos más guapos de Picos.

La verdá ye que toos quedamos alloriaos cola guapura del llugar y esto nun fai más qu'acrecentase según siguimos ascendiendo hacia la Cabeza Polvorosa. Pa ellos, salimos del mayáu y pegaos a la riega de Llamedu, vamos ascendiendo a la Boquera Ardalomba.

Avanzamos bordiando la Cabeza Polvorosa pela mandrecha

Esti colláu ye la salida de la canal de las Palancas, nomada tamién por ser otru kilómetru vertical de les carreres de Portudera: el más duro, ensin dubia. Duro, pero viéndolu aportar al so final, vese vinir tol senderín por tanto transitable montañeramente falando.

Dexamos esta boquera, destacando'l paredón del picu L'Aliga y siguiremos boridando la Cabeza Polvorosa, pasando por dellos collaos como'l de Polvorosín primeru y la boquera del Toráu, salida de los canalizos del Toráu, los cuales son un bon retu a facer y xunir en circular col Aventón de las Palancas.

Ascendemos per un capa fina de ñeve a la Cabeza'l Robecu (1313 m)

Del Toráu, enfilaremos ya pisando una fina capa de ñeve duro, hacia'l primer piquín del día, como ye la Cabeza'l Robecu de 1313 m. Nun soi a describir la guapura de los Picos, dafechu ñevaos, tan solo soi a encomendar facer esta ruta y venir velos nun día guapu d'iviernu como'l que nosotros tuviemos.

Güei, nun tamos nun día de grandes ascensiones, ye más l'interés taba nesta, n'aportar a miradores increyibles como la Cabeza'l Robecu o el picu que daba fin a les nueses ascensiones: La Cabeza Llamedu de 1345m

Vistes increyibles pa tolos llaos dende la Cabeza Llamedu (1345 m)

P'aportar a Llamedu, siguimos la cuerda pente'l Robecu, baxando a un colláu penriba las Güertas del Cantu, praos colgaos, pelos que paez increyible que pueda andase, colos desventios qu'hai baxo los pies.

Llueu del colláu, toca trabayar un pocu pa garrar el meyor camín y aportamos a Llamedu, onde buscamos aloxamientu pa sentar el culu y zampar el bocadillu, na mayor de les tranquilidaes y nel meyor mirador que se puede tener colos tres macizos de los Picos enfrente y col xefe nel mediu la semeya: El Picu Urriellu.

Descendemos hacia'l H.uce Terreru

Más de media horina tiraos asoleyando y paez que naide quería movese, nin vascu (Fernan, Amaia, Juanan y Haritz) nin asturianu (Canta, Charly, César, Richar nin yo). Pero había qu'andar, asína qu'entamamos por descender pel mesmu llugar más menos col envís d'alcontrar pente la ñeve xelao un camín curiosu pa descender hacia'l H.uce Terreru.

Fadremos dalgún tramín que cuesta controlar los pasos por mor de les cuchielles calices pero ceo alcontramos bon senderu y descendemos ensín más hasta'l h.uce, qu'enmediu tien un pequeñu llagu xeláu, el cual preferimos non probar.

Despedímonos del Picu y descendemos a los mayaos de Tresmialma y Fuenteteya

Bordíamoslo pela manzorga, muncho meyor col solín presente y magar depasar al llau d'una bona fonte, siguimos ascendiendo hacia'l H.orcau La Garanda, a la mandrecha del cumal de la Cabeza Polvorosa.

Dende esti h.orcáu de 1238 m, despedímonos con calma del Picu y saludamos al siguiente tramu de camín que tien de llevanos a conocer guapos mayaos como'l de Tresmialma al qu'aportamos a traviés de colláu Estorgumusu.

Pasaremos per Espinas y Cuetu Rozáu hacia Calluenga

Llueu fadremos camín más evidente hacia'l mayáu de Fuenteteya, onde alcuéntrense marques pa enllazar col camín de Caoru o pa empobinanos hacia'l mayáu d'Espinas. Equí, divídese'l grupu, ya que xugaben Barça y Madrí y dalgunos teníen ganes de ver el partíu.

Yo, a pesar de que tenía carrera al día siguiente, quise siguir la ruta que tenía planiada y Richar apeteció-y acompañame. Poro, siguimos un guapu caleyar de mayáu en mayáu, conociendo Espinas, con enormes cabañes y más tarde tamién Cuetu Rozáu, últimu mayáu enantes d'ascender a la boquera de la Canal de Calluenga.

Descendemos la canal de Calluenga faciendo una visitina a la cuevona

La canal de Calluenga, forma tamién parte de les tres carreres verticales de Portudera y tenía ganes de conocela, anque hai que dicir que muncho más transitable y guapa la de Somas. Equí vamos baxando, ensin acabar de ser una canal evidente, siguiendo rastros de senderu hasta topanos cola enorme y guapa cueva de Calluenga.

Como veis nes semeyes, tuviemos un ratu divirtiéndonos cola cámara, sacando'l Cuerta tres de Richar nunos contrastes mui prestosos. Lloñe de ser una cueva típica d'estalactites y demás, ye un abrigu enorme pal ganáu y paga la pena la visita.

Dempués de la cueva, meterémonos nel tarrén más pindio de Calluenga, baxando dafechu pegaos a una riega y siempre mui atentos de nun trestabillar coles munchísimes piedres sueltes, descendemos muncho más apriesa de lo que camentábemos.

Entainaremos per esta pindia canal hacia H.ustameña y el final de Caoru

Tanto, que vemos non tan lloñe a los nuesos collacios baxar por Caoru, anque nun mos va dar tiempu a pillaos, ya que tovía quedábanos un tramu más tendíu que déxanos na cotera de H.ustameña, onde esta vegada sí, enllazamos bien col senderu que llimpiamente empatará col camín de Caoru.

Con un pocu más que caminar hasta l'aparcaderu d'Arenas, completamos ún de les rutes más prestoses del añu, ensín grandes cumales, pero faciendo dos canales de mil metros increyibles y descubriendo nueves alternatives y peñes con munchu valir montañeru qu'intentar ascender.

En resume, ruta perfeuta nos Picos más ganaderos, que fízonos trabayar durante casi 8 hores y 14.8 km faciéndonos superar un desnivel acumuláu positivu de 1490 m, cosa que queda en na, con un día tan espléndidu y unes vistes ablucantes.

Camudando'l Camín con gafes pa velo bien

2 comentarios:

  1. Vaya pintaza que tien esta ruta Berto! Pues será casualidá, pero tengola para ya...así que tu entrada me viene perfecta.
    Saludos!

    ResponderEliminar
    Respuestas
    1. Vais a disfrutala un montón... y tovía hai terrenu de xuegu per Portudera jeje. Saludos

      Eliminar