viernes, 28 de octubre de 2016

Cuetu La Corona (Cabrales)

23 de Xunu de 2016

Tamos ya en plenu branu, teniendo ya un bon ritmu d'escadala, faciendo sesiones pente los 4 y 5 díes, con dalguna selmana lloca qu'esguilo hasta 6. Por un llau, tamos con muncha confianza, pero por otru andamos más cansaos que la hostia, entre monte, carreres y trepar.

Esta vegada nun tengo nin mui claru, por qué toi de vacaciones un 23 de Xunu, pero bono, equí tamos y paez ser que tan sólo daben bon tiempu pal oriente, asina que Richar y yo, afamiáos de conocer nueves escueles fuimos hasta'l Cuetu La Corona en Cabrales.

Xubiendo a la Corona dende Carreña

Ya lo pensáramos el día que xubimos a Pó y supongo que la tiesta llevónos ensin danos cuenta. Plantámonos en Carreña, más bien tarde y entamamos la llarguísima ascensión al Cuetu La Corona, del que podemos dicir que vien nos llibros, pero que l'accesu ta más bien enrevesosu.

Poro, con una pateada importante y pocu cenciella de siguir, aportaremos al paré onde tan un par de foriatos, que deben tar pensando, manda coyones xubir hasta equí, p'alcontrar tan poques víes que se puedan trepar.

Probando la parte de la mandrecha de La Corona

Y digo poques víes trepables, porque de primeres tiramos a la mandrecha faciendo unos cuartinos mui guapos y perbien equipaos, una pena nun hubiese otres cuatru o cincu, ya que sería un seutor d'iniciación xenial.

Llueu tiramos a un 6c, con entrada a vía per chorreres y una salida a placa durina, durina... que saquela dos vegaes colgando pero que finalmente nun pude enchufar. A vegaes... faen falta más de tres pegues pa una vía de 6c, anque rondes el grau a vista y sobretou cuando hai dalgún alloñe pelín peligrosu volando escontra un árbol.

Nel 6c... apretando con munchu curiáu de nun volar

Dexé la vía pa otru día... a saber cuando vuelvo... y tiramos con ganes d'aprovechar lo que restábanos de tiempu, enantes de qu'una tormenta viniese a echanos, a un V+ y un 6a+ que nin pudimos golelos... porque nun yeramos a pescanciar per onde diben les víes y sólo veíemos chapes ferruñentes onde cristo perdió l'alpargata.

Con pocu más, que tira tú, tira yo, mira per ehí, mira entrando dende nun se onde... quitáronsenos les ganes de facer na y colamos d'ellí cola ñubona enriba y la truena restallando soles nueses cabeces, lo que llevó qu'al cuartu d'hora de dir baxando, entamara a esbastiar pillando una moyadura de les d'alcordase pa tola vida.

Kíla descansando dempués de nun parar de correr pela Corona

Pa cuando aportamos al coche como dos pitinos parara de llover y al menos pudimos secanos y cambiar de ropa colo que teníemos de casualidá pel coche. La verdá que pica volver y probar les víes que taben sanes (camiento qu'unos 6bs veíense bien equipaos) pero pente la patiada y pelín desilusión por tar víes de grau cenciellu pocu encomendables... costará volver.

Al menos... Kíla pasólo teta corriendo d'un llau a otru ya que'l sitiu ye guapu enforma pa tar con un día con solín... pero claro... fai falta un pocu de motivación pa xubir hasta ellí arriba.

 
Croquis modificaos de Las Cábadas por mor del blogue del guía de montaña Victor Sánchez. Gracies y col so permisu.


-----------------------------------------------------------------------------------

miércoles, 26 de octubre de 2016

Trail de Reres (Sobrescobiu)

16 d'Ochobre de 2016

Track: Reres Trail (Sobrescobiu)



Web del Trail: Seronda Trails - Reres

 
Clasificaciones: Clasificaciones 2016  


Segunda carrera pel monte de les Seronda Trails, siendo esta vegada nel conceyu de Sobrescobiu, nel Parque Natural de Reres. L'eventu entama na capital coyana, Rusecu y entama perceo, teniendo que tar ellí más menos a les 7 y media la mañana.

El madrugón ye d'escándalu, pero al menos les previsiones nun se cumplen y magar de pillar el dorsal y vestime nel coche, el día alborez con cielos entemecíos de ñubes y claros, pero ensin pinta de ponese a llover lo cual anima un pelín pa esta la mió primer carrera en solitariu.

En solitariu d'asistir a la carrera porque la primera Seronda en Sayambre, tamién acabé corriendo solu, porque Alberto taba con sinusitis y pasábesles bien putes nes xubides. Esta vegada púnxose malu del estómagu y taba más floxu qu'una pelusa'l día anterior, poro meyor quedar en casina a descansar y durmir la mañana como fizo.

Rusecu dende penriba del banzáu

Asina, qu'ellí plántome, sólo, cautivu y desarmáu... na salida de la prueba, llevando'l nome del GM Xuan de la Borrina lo más arriba posible jeje. Nin tan siquiera soi capaz a alcontrar, cuando va dar el pistoletazu, al Asgaya Team de Illán, Rubén y Leticia, con lo que colócome más menos nel centru y a dexame llevar.

Como siempre, salgo de la metá p'atrás y voi dexándome dir peles cais de Rusecu, intentando nun ser trincháu per milenta bastones, a la vegada que póngome a un ritmu mediánamente cómodu, alcontrando nel mió pasu a Rubén y Leticia qu'al final lloñe d'animar y acompañar Rubén a Leticia fué ella la que fizo un carrerón entrando completamente sobrada.

Yo sigo a lo mío, charro un pelín con ellos y sigo alantre hasta garrar a Illán, con el que faigo los primeros kilómetros pasando per Villamoréi, abandonándolu pocu dempués na xubida penriba del banzáu de Rusecu, onde llévome un picotazu d'una abeya... anque enmediu la carrera nun tenía nin idega de que fuera. 

Perguapes vistes y munchu ánimu nel intre
 
Xubiremos hacia la xerra'l Crespón, pa garrar un guapu canal que fainos correr con curiáu poles cayides, pero con unes vistes increyibles. Finaremos tol faldéu al Crespón, p'alcontranos el primer avituallamientu en Prieya, onde pillo agua y a siguir corriendo, adelantando nesti puntu a xente que llevaba de referencia superior n'anterior carrera.

Demasiáu ceo, dígome pa mín, pero bono... voi bien así qu'a siguir. Según escucho a los del avituallamientu, al colar va nada que pasó la primer clasificada y sigo dándo-y vueltes a la tiesta, voi mui fuerte... verás que bien lo vamos a pasar al final. 

Voi finu y sigo corriendo munchísimu, pasando pembaxo'l Guanalón, empobinándonos adulces hacia l'ascensión al Cogullu, el cuál tórnase increyible cuando garramos l'arista hacia'l so cumal. Equí adelanto a unos cuantos más, quitándome d'enriba a unos castrones llioneses con banderes roxigualdes hasta nel nabu yo creo. 
El cansanciu va faciendo presencia

Dame tal perceguera que sáco-y les pegatines na baxada téunica del Guanalón y sigo como un tiru hacia la Campera Perugues baxo l'atenta mirada del Picu Corvellusu que tan bones alcordances traime a la memoria.

D'esta campa entama la primer de les grandes baxaes, pasando pel avituallamientu de la Trapa, onde xinto daqué, bebo agua enforma y sigo tirando p'abaxo cómodamente, durante munchísimos minutos hasta aportar a otru avituallamientu na senda L'Alba... diciéndome que van xustamente 17,4 km.

La metá de la carrera, ye increyible lo qu'aguanta'l cuerpu mentalmente y físicamente. Queda otru tantu y pa entamar una xubida que dirá pegadina a la riega d'Agues hasta les Argamosielles, onde viramos a la manzorga en direición Fresnu, adelantando a dellos compañeros colos que tengo unos ratinos de charra p'amatagar un pelín l'esfuerciu.

Llego a meta lo que vien siendo reventáu

Penúltimu avituallamientu, nel que vuelvo a xintar frutos secos, chicolate y bebo y cargo agua, metiéndonos dafechu nel monte Felguerúa, onde más barru hai de tola carrera, pero ye tema que nun me va mal y adelanto a unos puquiñinos más, hasta entrar n'ascensión final del día.

Ésta, sedrá pela faldera la Peña Argayos y nun aportamos al cumal, pero sedrá un tarrén de xubides de llomba a llomba, que veo como pasa factura a la xente, ya qu'acércome a unos cuantos adelantando a dalgunu más.

Esti tramu faígolo quiciás demasiáu rápidu y nes carreres per cuestes inclinaes ya veo qu'entamo a dir cargáu de pates enforma. Ye la mió primer carrera de 35 km, me digo, tengo que pagalo sí o sí, pero tiro p'alantre, animándome los voluntarios diciéndome que llueu diba fartame de baxada... cuanta razón teníen.


Con Illán nel mural de la carrera
Dende l'últimu repechu veo, que nun voi bien baxando. Primeru per senderu y llueu per pista, nun soi a llevar ritmos curiosos y voi pendiente de que nun se me xuba nada, nin xemelos nin cuadriceps a poder ser y consígolo, pero a cambiu de baxar los ritmos durante'l restu de la carrera.

Ésto fai que durante la rápida baxada per pistes hacia Llaíñes, quítenme les pegadielles de la camiseta un grupín de tres que fué a reservase muncho meyor que yo, adelantándome tamién xustu antes del pueblín, Zacarías del Quebrapates, col que compartiera xubida al H.ariu.

El restu la carrera hasta Rusecu, faíseme llarguísimu, anque na realidá nun fueron los últimos 5 sinon 10 km los que van sobrándome dende cuantayá. Aún así, caltengo les posiciones y gano una por mor d'un mancáu col que paro a falar.

Camudando'l Camín a la carrera pel parque de Reres

Sigo tirando lo meyor que puedo y veo que vien la segunda clasificada como un tiru... vaya máquines estes moces, como anden. Toi entrando en Rusecu, paso al llau d'onde aparqué'l coche y pica p'arriba, camentando qu'anque seya un desnivel mínimu nun voi aguantar y va xubíseme tolo xubible.

Nun ye así, aguanto y algamo la meta pente una animación ablucante nel pueblu y baxo un solín bien agradeciu, sintiéndome cansadísimu pero mui contentu por dalo too nun carrera tan llarga pa mín, baxando al final de les 5 hores y na posición 37 lo que ye un trunfu total pa ser la segunda carrera que tómome en seriu competir.

Con tastiu amargu, por nun llegar tan bien como en Sayambre y por alcontrame solu na meta, voi duchame con agua caliente, premiu por llegar prontín y torno pa la meta a tomame una cervecina y esperar pelos Asgayeros, entrando Illán con perbones sensaciones y un tiempu mui bono tamién.

Llueu llegaríen más cerveces con ellos duchaos y a esperar la próxima carrera... en Nava... onde tou entamó fai un añu.

Como siempre dar les gracies a los fotógrafos: Jose Luis Lastra, Mariaw y Lucia LuNa

martes, 25 de octubre de 2016

Oseya (Sayambre) - Picu H.ariu

28 d'Agostu de 2016

Track: Oseya (Sayambre) - Picu H.ariu


Siguimos en Sayambre y dempués de palizón de la vuelta al Niah.u, del día anterior, ta costándonos llevantar del sobre. Muncho tien que ver, que la nueche anterior, magar de la cena, lliáramosnos nun chigre tomando cerveces y chupitos y falando col dueñu hasta bien tarde.

Esa mesma nueche, ya decidiéramos que la xubida al Niah.u nun diba ser, porque la baxada pela pista dende Llaete fízosenos pesadísima. Asina, que suena'l despertador y al mal cuerpu súmase un borrín densu en tol valle que vemos dende la ventana l'habitación.

Partimos d'Oseya (753 m) en Sayambre

jueves, 20 de octubre de 2016

Trail de Sayambre (Sayambre)

2 d'Ochobre de 2016
Track: Trail de Sayambre (Sayambre)


Web del Trail: Seronda Trails - Sayambre
Clasificaciones: Clasificaciones 2016  


Primer carrera de la temporada 2016-2017 y nesta tengo decidíu dir en condiciones, non como nel Quebrapates que fue un horrorosu final de temporada, anque ya llevaba xugando nes últimes carreres ensin dir preparáu nin física nin mentalmente... lo que vien ser dir por dir... y así non se disfruta.

El finde de la carrera pintaba perinteresante, con espicha bloquera nel Indorwall de la que colé pa casa tan cansáu como con cerveces enriba. Esti llocal d'escalada ye un peligru, xuntes la comedia con esguilar y na bono pué salir d'ello.

Así que'l sábadu plantéme n'Amieva a trepar colos collacios con un cansanciu supremu, con dolores nes manes y el pié que lleva fadiándome dende Agostu. Pasamos un día estupendu, pero casi durmíame asegurando asína qu'en cuanto yera hora pa la tienda a sobar hasta'l día siguiente. 
 
Xubiendo al H.ariu a bon ritmu

Madrugón y pa Oseya de Sayambre, pelos Beyos p'arriba, onde alcontrámonos con Alberto, que vino col parte del grupu monte p'ascender al H.ariu, per onde díbemos pasar tamién los corredores, asina qu'al menes dalgo d'animación díbemos tener.

La carrera entama llanzada cuesta baxo y tenemos dempués un tramín quebrapates visitando los pueblos sayambriegos de Vierdes, Pío y Ribota, p'ascender hacia unos ivernales, onde tenemos la primer gran xubida, na qu'Alberto nun da más de sí, por mor d'una sinusitis y tiro en solitariu, pasando de grupu en grupu según voi alcontrándome cómodu de ritmu.

Alcanzo un grupín numberosu y caltengo la velocidá de baxada per pista hacia Sotu, demientres voi charrando con un participante. Normalmente, suelo parar abondo nos avituallamientos, pero sigo'l xeitu del grupu, garro agua y a siguir corriendo hacia Vegabañu, nun ascensu preciosu per fayeos.

Ruben, Alberto ya Illán... menudes vistes

Pa cuando aporto a Vegabañu, con otra pareya de corredores, adelantamos a dellos, dalgunos míticos como Ana Cristina Aguado, una gran campeona, quedándome ablucáu col ritmu que llevo y paez qu'anímome calculando que'l grupu monte con Kíla nun tarán mui lloñe.

De Vegabañu toca l'ascensión final al picu H.ariu y caltengo bon ritmu col restu de participantes, hasta que tópome con una perrina blanca que güelme a distancia y hasta que nun m'alcuentra nun para, lo que faiga que tea un ratín acariciándola y recibiendo llametones.

Haritz tien que garrala y toi oyendo los sos lladríos durante bon ratu, pero nun m'atrevo a llevala conmigo por si molesta a los corredores. Con semeyante dolor por abandonu a mi perrina, aumento'l ritmu tolo que pueu pa salir del radiu d'alcance de la so vista y olfatu... pasando a varios corredores y faciendo l'arista final con otru gran corredor veteranu del Quebrapates... Zacarías.

Aportando a la meta dempués d'una carrera preciosa

Facemos el tramu final del H.ariu xuntos llevándome a un ritmu brutal y sin parar entamamos el descensu diciéndome que pase si quiero, pero nun lo faigo hasta que veo que piérdese nunos banderinos y tómo-y el relevu.

Alcuéntrome bien y sin dame cuenta, faigo la baxada téunica como un tiru y pa cuando llego al caberu avituallamientu en Llabeñu, diz un rapaz que voi'l 46 o 47... nun lo pueu creyer, pero anímome más y sigo per tarrén más favoratible baxando ainda más rápidu.
Llevo otru corredor detrás, que va encantáu col ritmu, pero pa cuando aportamos a la pista, les pates siguen respondiéndome xenial y tiro a unos ritmos que nin me los creo, pasando a dalgún participante más.


Primera prueba de la Seronda Trails completada

Pa cuando aporto a la senda l'Arcedianu pa baxar definitívamente a Oseya de nuevu, alcuéntrome con un par de repechinos que camiento que pueu aguantar corriendo y el primer sí, pero'l segundu fai que se me xuba'l cuadriceps teniendo que parar un ratín.
 
Nesi tiempu, pierdo dos puestinos que ya nun volveré a recuperar y eso qu'acabo bastante fino de nuevu, pero dame igual, l'allegría d'entrar pente los 50 primeros nun trail de 25 km y 3800 m de desnivel nun me lo quita naide.
 
Acabar una carrera el 43 faciendo 3h y 34 minutos fué quiciás el cambiu de chip que necesitaba pa tomame más en seriu mi participación en carreres pel monte. Ver veremos hacia onde vamos tirar, si entreno más o sigo confiando na esperiencia d'andar pel monte como principal puntu fuerte.
 
Como siempre, lo meyor... l'ambiente y compartir rises y sufrimientu con Alberto, Rubén ya Illán que son ya como dos compañeros más d'alcontranos de carrera en carrera... dar les gracies a Noe, Wifre y Gael pol recibimientu y les semeyes na meta, los ánimos del GM Xuan de la Borrina y les semeyes a MV Fotos.

miércoles, 19 de octubre de 2016

Cobarcil (Sayambre) - Tolivia - Llué - Llaete - Ribota

27 d'Agostu de 2016

Track: Cobarcil (Sayambre) - Tolivia - Llué - Llaete - Ribota


Munches vegaes si restolamos pente'l mundiu blogueru de monte, vemos como ta entrándose nuna especie de profesionalización de los blogues de la xente. Ya nun entro si queremos sacar perres o non, si la nuesa afición acaba convirtiéndose nun trabayu o en daqué monetariu, eso ya caún tien qu'estudiar si-y renta o non.

Cuantes vegaes dixéronme, que por qué nun escribía en castellán, que diba tener milenta visites más y de xuru que yera ricu y famosu. Pues non, esti blogue ye mi pequeñu requexu pa contar lo que me peta pel alma y cuéntolo n'asturiano o al menos nel asturiano más curiosu que pueu ufrecer, que nun tuve la oportunidá d'estudialu nel cole y tampoco mamalo en casa... que mi Pa ye soriano y mi ma d'Ortigueira en Cuaña y ellí fálase l'eonaviego.

Con too esto, quiero remembrar y destacar, qu'esta ruta que ficimos el mió collaciu Charly y yo, ta clavada, calcada y copiada de la que ficieron dos de los blogues que sigo con más enfotu: Los de las Claras y Caleyando con Cienfuegos.

Tamos en momentos cafiantes pa los blogues que llevamos bien d'años (dende'l 2 de Xineru de 2009 nesta xera), con cambeos en blogger, con cierre de portales onde aloxar semeyes y con ciertu cansanciu d'escribir y nel casu del collaciu Cienfuegos ver como otros "profesionales" con llibros a cuestes, cópiente'l trabayu que'l nuesu tiempu nos lleva y nada de perres nos da.

Asina, qu'en tiempos de falta d'orixinalidá na conceición de rutes, muncha profesionalidá y llistaos de los meyores blogues en fala hispana, d'aventures o la de su madre en calzonciellos, quiero dedicá-yos y da-yos les gracies fonderes a Jonatan y Cienfuegos... porque son munches les rutes que-yos copié y llueu conté a la mió manera, pero que siempre puse d'au venía'l trabayu y búsqueda de percorríos.

Un abrazu collacios... espero conoceros dalgún día en presona, que tien coyones la cosa dempués de tantos años, a Monchu cola so biblioteca d'ascensiones que tien por blogue, ya tuvi la suerte unes cuantes vegaes... así que vémonos pronto espero.

Partimos de Cobarcil (503 m) nos Beyos

viernes, 14 de octubre de 2016

Po (Cabrales)

11 de Xunu de 2016

A primeros de Xunu, entamaba lo que diba ser una gran constante nel nuesu branu particular asturianu y nun fue otra cosa qu'esguilar y dir d'acampada los findes, p'aprovechar al máximu estos mesinos del añu.

Vista de la escuela de Pó en Cabrales

La primer escapada ficímosla hacia Cabrales, agospiándonos nel camping d'Arenas y yéndonos Richar y yo, el sábadu pela mañana hasta la escuela de Po, na qu'aparte d'esistir grandes víes y un grau que nos supera, lo que llama l'atención son les vistes de Picos dende'l paré.

Abulcando col increyible paré

Ye ablucante finar una vía, aportar a la reunión y tener al Urriellu, los Albos y la Torre Cerredu de frente, asina qu'anque seya a menease lo que se pueda nos poco graos asequible qu'hai, el paséu, el pie de vía y les vistes ya pagan la pena.

Aprovechando la tarde lo meyor posible... apretando fino

Nós, anduvimos entreteniéndonos cola Prima Juana (V+), una variante nomada Canorín que saldrá 6a, pa llueu facer Surprise y Harakir qu'anden pente'l 6a+ y el 6b y Nacho que ye un 6b+ bien curiosu, qu'a parte del tramu de techín duru, tien una placa de salida a reunión pa cagar trito.

Despedímonos col Picu, Albos, la Torre Cerredu... tela les vistes

Colos deberes fechos y l'atapecer avanzáu, baxamos a Arenas, onde tovía taben los traveseros aportando a les 10 de la nueche a meta magar d'un esfuerzu descomanáu. Lo nueso, ya yera más cenciello, sentanos a tomar unes cerveces demientres sumábense a la folixa nuecherniega Zori, Pepa y Jose.

Po
Croquis modificaos por mi de la escuela d'escalada de Po, por mor de Entretenimiento Vertical. Gracies y col so permisu.

miércoles, 5 de octubre de 2016

Beyo (Ayer) - Cordal de Cotobeyo

20 d'Agostu de 2016

Track: Beyo (Ayer) - Cordal de Cotobeyo


A la vuelta de les vacaciones per Soria, tuve dellos díes intentando cuidame mentalmente ya físicamente, pero ya tocaba intentar buscar les miós llendes otra vegada. Poro, restolé pente les milenta rutes preparaes que siempre tengo nuna carpetina polo que pudiera pasar y saqué de paséu la que meyor veníame pa entrename un pocu corriendo cola mió perrina, Kíla.

Salimos entós, Kíla y yo, col coche hacia Ayer, faciendo'l camín davezu dende Xixón, pela autovía minera hasta Mieres del Camín y desviándonos de camín hacia L.lena pel corredor del Ayer, pasando pelos pueblos de Morea, L'Escuyu, Los Estrul.lones, Cabanaquinta y L.levinco onde tendremos el desvíu a la mandrecha pela Ae-4 hasta Beyo.

Partimos del pueblu de Beyo n'Ayer (505 m)

domingo, 2 de octubre de 2016

La Ñora Bloque (Xixón)

27 de Mayu de 2016

Los xixoneses siempre andamos a la gueta d'un requexu onde poder trepar y ún d'ellos ye la sablera de la Ñora na llende pente Xixón y Villaviciosa. Pues bien, aparte de los bloques d'escalada con cuerda na fastera xixonesa, tenemos bloques pa bulder a ambos llaos del ríu Ñora.

A la gueta de bloques pa entretenese

Nos díes d'entrenu corriendo pela Costa Xixonesa, parábemos munches vegaes a garrar aliendu nesta sablera, enantes de siguir de vuelta y echando una güeyada paeciónos que dalgo podría salir, sobre tou nos afloramientos d'arenisca pente los bloques de conglomeráu.

Conglomeráu pero con dalgún florecimientu d'arenisca

El día que tuve pegándome una tarde per ellí, tan sólo tuviemos na fastera xixonesa nel cachin pequeñu que queda pente'l ríu y la mar, sacando dellos bloques bien entreníos, pero hai que dicir que pal cantil de Villaviciosa vense bloques con munches posibilidaes anque ye zona d'argayos y nun se cuanta seguridá p'andar per ellí tendríemos.

Seutor na fastera maliaya con bloques d'arenisca

Póngovos una especie de croquis de los pocos que probamos, a la espera de siguir pegándonos un pocu con estes peñes nos próximos branos y de pasu un vidiu d'un d'ellos, quiciás al más duru y espeutacular pol altor que gárrase y la salida guapa que tien.




La Ñora (Bloques visitaos) 

Croquis fechos ensin tener ni idega de cotaciones... o se xube o non se xube jeje.