jueves, 28 de enero de 2016

La Cueva Deboyu (Casu)

17 de Setiembre de 2015

El branu va tocando a so fín y les tardes van apequeñando, aun así les ganes d'esguilar o al menos les de tar nesi ambiente motiváu nun son desapaecer, poro salgo de trabayar de la Felguera y plántome na Cueva Deboyu.

Ellí, aparte de la desapaición del Ríu Nalón durante dellos metros, lo cual ya ye prestosu de ver, hai una escuela d'escalada, onde los más fuertes trepadores d'Asturies lleven esguilando cuantayá, pero como digo hai que tar fuerte, ya que les víes cencielles tan escoses.

Cartelu informativu de la escuela de la Cueva Deboyu

Per ellí, andaben Orlando y Xurde, asína que dediqueme a facé-yos dalguna semeya y a pasar un ratín entreteníu viendo a xente apretar enforma. Ellos paezme que taben dándo-y a la vía Cueva Deboyu o a una variante que sedrá 7b o así.

Nel seutor de los Bombos... con desplomes perimportantes

Tamién, tuve la oportunidá de ver esguilar a Hector, qu'andaba probando Abstracción Total, un 8a increyible con una parte de chorrera guapísima, pero dicir probar ye quedase curtiu, ya que nun la enchufó de puru milagru.
Orlando n'acción...

Esti día, tuve más a gustu sacando semeyes y mirando pa los demás que trepando, así que tan sólo, púseme un ratín l'arnés pa conocer un seutor más afayadizu, el de Diedros, del cual pongo los croquis d'antaño, ya que nuevos tan sólo hai nes guíes, asína que si faigo más visites les diré modificando y ampliando.

Xurde progresando na vía


Con Madois (6a+) a vista y otru pegue al 6b d'al llau ya tuve abondo pa faceme una idega de como ye la escalada equí, con agarres romos y munchu movimientu p'avanzar peles víes, asína que tendré que volver pal branu, ya que pesie al calor equí esguílase estupéndamente a la solombra.

Tornaremos...

Cueva Deboyu
Croquis disponibles nun panel al llau de la carretera, anque tan mui desactualizaos

martes, 26 de enero de 2016

Antromero (Gozón) - Costa de Gozón - Cabu Peñes (Gozón)

16 de Xineru de 2016

Track: Antromero (Gozón) - Costa de Gozón - Cabu Peñes (Gozón)



Aportaron les ñeves y llegaron con fuercia, quiciábes con demasiada fuercia pa nós que nun tábemos preparaos mentalmente pa ponenos a trabayar, llevar trastos, usalos y usalos con seguridá. Asina que dempués de tola selmana dándo-y vueltes si meténos de lleno nes rutes ivernales, acabamos por decidir que yera un bon momentu pa facer la ruta costera que teníemos dende l'añu pasáu.

Ésta yera nin más nin menos la travesía dende Antromero y el Cabu Peñes, qu'enllaza cola que ficiéramos de Carreño l'añu pasáu. Pa ello, quedamos p'almorzar ensin madrugar muncho, sobretou porque nos durmimos, en Candás.

Alborecemos na sablera San Pedro n'Antromero

jueves, 21 de enero de 2016

Mergullu (Uviéu)

10 de Setiembre de 2015

Un vienres más, un día más que salimos a escape del trabayu pa dir a trepar en dalgún paré curiosu del centru d'Asturies, siempre aprovechando cualesquier resquiebra de bon tiempu y les hores de lluz que nos va dexando'l menguar de los díes.

Nesti casu, averámonos hasta un paré, una pequeña escuela na sienda verde que va dende'l Parque d'Iviernu hasta Fuso xustu enantes del túnel del Mergullu. Hasta ellí, alcontraremos la forma de llegar dende la rotonda d'El Caleyu hasta cerca del pueblu de Cellagú onde dexaremos el coche al llau d'una cementera.

Llueu baxamos per un caleyucu pasando al llau d'una casina con perros y aportamos per una ponte a la sienda verde, la cual tendremos que percorrer durante dalgo menos d'un kilómetru calculo, perpasando un túnel y al final d'este siguiremos una llarga recta hasta ver ya'l túnel de Mergullu y el preciosu paré a la so manzorga.

Paré al llau del túnel del Mergullu


Camiento que nun ye una escuela mui visitada anguaño, pero l'equipamientu caltiénse en perbon estáu, anque ta equipada a l'antigua y los alloñes son de meter mieu. Col grau que manexo esti branu, lo únicu que podía facer yera pegame col 6b+ (duru) nomáu como Mergullu.

Tres pegues fui a da-y y tengo que dicir que nel primeru casi quítenseme les ganes de volver, ya que pasé más mieu que vergoña, ya que nel pasu clave hai un distanciáu de coyones pente seguru y seguru, col xube-baxa típicu de tiro'l pasu o baxo o que mi madre faigo.

Al final, nun lo tiré y baxé volando un tramín y eso que destrepé un cachu jajaja. Pa cagase vivu, en fín ye lo qu'hai o vas bien de tiesta o meyor tira pa casa y últimamente, llevo un cestu por cabeza y asína nos va.

Ablucantes los desplomes... poques víes paecen mediu amañoses pa mín


Llueu, de descansar nun segundu pegue sí que llegué hasta la reunión, parando nel pasu de turnu y colocando una cinta llarguina, dexándomela preparada pa un pegue final gloriosu pero magar de sacar el pasu... llego petádisimu al siguiente y nun soi a encadenala.

Tanto tiempu colgáu nos pegues anteriores y un bon intentu en polea de Bertín qu'aportó a la reunión con un pelín d'aida mía, fizo gastase tol tiempu de que disponíemos nesta tarde casi serondiega, poro tuvimos que colar pa Xixón de vuelta colos bolsiellos vacíos.

Colos bolsiellos vacíos y con una sensación y una certeza... que mal se me dan les víes desplomaes y hai qu'entrenales pa saber movese... asína que tornaremos per Mergullu.

domingo, 17 de enero de 2016

Cuanxú (Grau)

20 y 26 d'Agostu de 2015

Siguimos apurando los últimos díes de xornada de branu del 2015, alcordándome de lo ceo que pasa la xornada continua lo cual dame muncha pena, anque agora nel nuevu trabayu tendré casi 3 meses lo cual faime feliz enforma y dame un toque d'esperanza pa tener un branu tan bono como'l del 2013.

Aquel branu, fué'l de xubir grau a base de confianza na Manzanea, algamando hasta mi primer 6c a vista lo cual fízome muncha ilusión. Siempre, ye muncho más cenciello xubir nivel cuando muéveste en sestos baxos, pero de sestos altos a los sétimos, ya toca venir con tola motivación y ganes d'apretar del mundiu cada día.

Conociendo Judas... quiciás el meyor 7a d'Asturies según munchos esguiladores

Por embargu, van dos branos con discontinuidá nes miós esguilaes, con dalgún picu d'emoción con bonos encadenes, más 6c a vista, dalgún sétimu sueltu, inclusu un 7b y otru que ye mui posible que lu ronde pero... fáltame dar el pasu y esti branu... faltóme ganes d'apretar y sufrir dafechu.

En delles intentones de meyorar motivación y nivel busqué la compañía de collacios que trepen más que yo, más motivaos y con una vida y ganes de vivir alrodiu la escalada, que nótesla nel ambiente y los ánimos y el bon rollu faente apretar anque nun seya nin tu estilu nin tu meyor puntu de forma.

Dellos momentos trepando... trabayando la continuidá en víes desplomaes


Poro, tuve un par de visitines a Cuanxú con Orlando y Mariño, el cual sacóme un book de semeyes impresionantes dafechu. La vía cola que tuve pegándome un par d'intentones fué Judas, que tol mundiu diz que ye'l 7a más guapu d'Asturies.

Nun digo yo que nun lo sea, pero a mí lo únicu que me paez difícil d'esta vía ye tener la resistencia al desplome, ya que los movimientos por separáu son cenciellos, con bonos agarres y sáquense ensin dengún problema.

La vía ye guapa enforma d'eso nun hai dubia

Pero ehí ta la gracia del desplome ya qu'anque les preses seyan impresionantes los músculos van dexando de tener fuercia abriéndose les manes anque teas agarráu del mayor cazu del mundiu. Tamién, esta vía tien 3 llances que pa la mió estatura supón un plus de dificultá, pero nun ye escusa denguna ya que debería salir.

Neso pensaba'l día que volví con Alberto y con tranquilidá tamién-y metí otru pegue de calentamientu poniendo les cintes y un segundu a muerte, nel que como siempre fallé nel llance clave y quitáronseme les ganes de siguir probando.

Reposando y.... a esnalar

Ensín ganes de más pegues, metíme nuna vieya conocida que tamién tengo por encadenar, Hoegergarden, un 6c con un pasu durete xusto penriba d'una chorrera que desploma de coyones y que la verdá anque nun me gustaba la vía cuando la probé, marché con bones sensaciones pa enchufar inclusu les dos víes nuna próxima visita.

A ver cuando sedrá... esperemos que nun seya pal branu como tolos años jeje

 ---------------------------------------------------

18 d'Agostu de 2014

Pol branu, seguía intentando algamar un ascensu de nivel o más bien un cambéu d'estilu d'escalada. Los míos puntos febles son la resistencia en víes verticales o desplomaes con cierta llargura de percorríu, poro había que trabayar nesti sen y pa ello una bona escuela ye la de Cuanxú en Gráu.

Na mió primer visita, trabayara Babaria faciéndola tres varios pegues y tamién la so compañera Hoegarde, la cuál prestónos muncho anque tampoco-y diéramos un pegue curiosu pal encadene.

Nesti día, con Alberto de compañía trabayé Leffe sacándola al segundu pegue me paez, quedándome tiempu pa facer un par d'ellos a Hoegarden, anque tampoco-y metí con toles ganes... viendo amás como'l baxón físicu qu'esperimentara nos siguientes meses ya taba golpiando na puerte.

Cuanxú
Croquis modificaos de Cuanxú por mor de  Piratas Free. Gracies y col so permisu.

---------------------------------------------------

24 de Febreru de 2014

Davezu dir a esguilar ye una aventura, pero nesti casu la mayor aventura del día fue alcontrar la escuela de Cuanxú en Grau, jajaja. Tuviemos dando vueltes en coche per mediu Grau y casi Yernes y Tameza, vaya llocura.

Poro, tuviemos el tiempu que tuviemos y la mañana diónos pa lo xustu, conocer una escuela ablucante pol sitiu, pol paré nel que tan les víes, pero con graos que práuticamente déxanos pa facer 3 o 4 víes.

Paré de la escuela d'esguilada de Cuanxú (Grau)

La esguilada ye dafechu a la escontra del nuesu xeitu, ya que tamos nun paré desplomáu con cantos grandes, cuando nós tamos avezaos a la plaquina ñapera y adherente. Pero bono, anovar o morrer y nel deporte de la escalada, namái que pasemos de los sextos baxos hacia'l sétimu grau, lleguen los desplomes y un xeitu más físicu d'esguilada.

Nesta mañana, pudimos da-y unos cuantos pegues pal encadene de Bavaria (6b). Vicen necesitó un par d'ellos y yo hasta tres pa encadenar una vía guapa de pasos llargos a cazos y bonos agarres, que camuda'l sen nuesu nel trepar al cien por cien.

Vicen encadenando Bavaria (6b)

Tamién tuvimos probando Hoegarden (6c), qu'entama per una chorrera pa tener so tramu más duru nun bloquéu a un cazu, saliendo mui continua hasta la cadena. Nun tuvimos más tiempu pal encadene, pero vímos-y collor con un pegue caún, asína que'l próximu día de xuru que cayerá nel sacu.

En resume, escuelina pequeña pero mui tranquila. Eso sí, los graos son duros, al menos pa nós, anque hasta la vía más cenciella paga la pena intentala y más cuando toles víes tienen nome de marca de cerveza, jeje.

viernes, 15 de enero de 2016

Tiós (L.lena) - Picu Brañavalera

9 de Xineru de 2015

Track: Tiós (L.lena) - Picu Brañavalera


Ya pasaron les Navidaes, los Reises y demás hestories... que más bien, impórtenme ceru y lo qu'a la fín consiguen ye que salga menos al monte por mor de xintes, cenes y demás fataes, asína que cola allegría d'un nuevu añu nun m'aguanto más y colo en solitariu a facer dalgo por ahí.

Diba venir conmigo Haritz, pero durmióse, asina que Kíla y yo, salimos a escape hacia una fastera intermedia d'Asturies onde nun mos llegue ceo les lluvies que camentaben los meteos p'a partir de la tarde.


D'esti xeitu garramos l'autovía minera dende Xixón hasta Mieres del Camín, onde siguimos autovía A-66 alantre, saliéndonos en Campumanes y empobinándonos pela As-242 como si fuéramos pa Tuíza Riba, pero al pocu salímonos a la manzorga nel desvíu hacia'l pueblu l.lenizu de Tiós.

Son poco más de les 9 y el día ta murniu, pero soi acolumbrar ciertos claros pente les ñubes, asína que tengo confianza nel día. Preparámonos y salimos Kíla y yo como tiros pa la parte alta del pueblu, ensin saber mui bien que vamos a alcontranos.

Ésto suel pasar, cuando nun prepares na, garres un mapa y marques penriba los caminos esistentes preparándote una especie de circular ensín saber como tan los caminos, les siendes o cualesquier pasu.

Salimos dende Tiós (560 m) con vistes a Brañavalera

miércoles, 13 de enero de 2016

Sablera de San Llorienzu Bloque (Xixón)

19 d'Agostu , 7 de Setiembre y 2 d'Ochobre de 2015

Díes de branu en Xixón y nun tengo plan pa salir a esguilar por falta de tiempu o de collacios o quien sabe por qué. El casu ye que fai bon tiempu y hai ganes de dase un bañín, poro que meyor qu'averase hasta los dominios de la Lloca'l Rinconín a facer unes traves y entrenar un pelín.

 Panorámica de la travesía de la Lloca'l Rinconín

La primer vegada que tuvieramos Alberto y yo l'añu pasáu, fuéramos a la escalera 24 y nun mos diera muncho más l'asuntu, pero na escalera 23 pude comprobar que les traves tan muncho más guapes y son munchos los trepamuros qu'anden per elli en bañador pasando d'un llau a otru de la parede.

Paulina entrenando y ñapeando enforma

Nun soi muncho de poner croquis nestos temes... el bloque y les travesíes pa mí son entrenamientos namái, así qu'o salen o nun salen, esa ye la meyor cotación de toes. Dicir, qu'estes traves de la Lloca sobremanera son d'agarres planos y pequeños, perfeutos pa facer deos y prauticar l'agarre en regletes.

De travesía en travesía tomamos el solín y entrenamos

Asina qu'un día con Orlando qu'enseñóme les traves d'esta escalera, otru día con Pau y l'últimu en temporada perruna con Kíla, tuve per ellí faciendo trave tres trave. Les rises van ser l'añu que vien cuando pueda tar esguilando y bañándome con Kíla na sablera ya qu'al fín vamos tener un llugar onde bañanos colos nuesos collacios peludos en Xixón.

lunes, 11 de enero de 2016

Muriel de la Fuente (Soria)

5 d'Agostu de 2015

Otru de los llugares onde dir en Soria a esguilar ye na redolada de la Fuentona de Muriel y más en concretu al llau de la pista que xune los pueblos de Muriel y Abioncillo, al par del ríu Abioncillo y por tanto nun sitiu bien guapu.

Como veis na semeya, plantámonos nel pié de vía... con un campu base que ya-y prestaría a los himalayistes. En fin... coses de familia y de tar nel pueblu, que xuntámonos toos y pases un día de sol, xinta familiar, trepes un pocu y báñeste nel ríu, lo cual dempués d'un día muncho calor ye mui d'agradecer.

Pié de vía... o campamentu base más bien

Falando d'escalada, tuviemos sobretou nel seutor Pirámide, ya que siendo tantos, pente'l pegue d'ún y el de l'otru, va pasando'l tiempu y cuando te quies dar cuenta, ye la hora de tomar una cerveza bien pasada la tarde.

La mayor parte de los pegues tuvieron centraos nel V nomáu como De todo menos dinero y en Cálida Trinchera, un IV+ llargu, perfeutu pa quitar mieos a los escolinos nesto de la escalada. Miguel y Río, tuvieron el so bautismu escalador nestos parés y nun lo pasaron mal del too, la verdá.

Pau y Sonia trepando en De todo menos dinero (V)

De todo menos dinero fué encadenáu de primeru por Pau y Sonia, lo cuál prestóme muncho ya que ye bono volver a atrevese a facer víes de primeru y tamién el IV+, facilín, facilín y mui prestosu pa facer dellos metros.

Personalmente, anduve intentando forzar el pocu grau d'esta escuela sacando a vista Dedica Acción (6b), La que has liao, Pudito (6b) y Abioncillo no es tan sencillo (6b+), aparte de les otres pa montar la vía pa los demás.

Miguel na so primer vía en Calida Trinchera (IV+)

Esta segunda visita, volvió a ser una maraviya y el grau baxu de la escuela, fai cenciellu que xente que nun ta d'esguilar atrévase a probar y qu'aficionaos ensin munchu grau, pueden fartase de facer una vía tres d'otra hasta reventar de cansanciu.

Volveremos de xuru...

Muriel de la Fuente
 
Croquis modificaos por mi de la escuela d'escalada de Muriel de la Fuente, por mor de Montañeros Burgaleses. Gracies y col so permisu.
 


-------------------------------------------------------------------

jueves, 7 de enero de 2016

Cuetu L'Abeyera (Caravia)

27 de Xunetu de 2015 

Si l'añu pasáu fuéramos dellos díes a Caravia, casi que siendo la escuela más visitada del branu, esti añu namái que pasamos un día per ellí, y como non, Haritz fue'l collaciu qu'acompañóme a trepar nesti pequeñu requexu del Sueve.

Pa entamar y ver la so evolución dende la vuelta a la peña d'Haritz volvió a da-y a los cuartos y pasó tranquilamente a los quintos, anque alcuérdome por mor de la lluvia nun tuvo tiempu a da-y un pegue al quintu que-y faltaba por probar.

Preparándonos pa trabayar duramente

Pente medies d'esguilar, sele pela mió parte nos quintos, metíme a probar l'únicu sestu que quédame nesta escuelina, que nun ye otru que Welcome to Tijuana (6c) con una variante a la manzorga a metá de vía qu'algama'l 7b.

Y cuando andaba pela cuarta chapa, más menos, tiritiando de pensar nun posible resbarión de pies, púnxose a orpinar, lo que fizo que fuera dafechu imposible siguir esguilando. Pa los que nun conocéis esta escuela, hai que dicir que ye fina enforma de pies y siempre tien pelín de mofu de cuerrer l'agua peles víes.

 Kíla tien menos ganes de trabayar... asína qu'aselar mientres tanto

Asina que... siempre hai una primer vegada... tocó abandonar material, un mayón, mi primer mayón jejeje. De toes formes, tovía tocó recuperar el restu de cintes, baxar y volver a xubir el quintu que quedara montáu pa qu'Haritz diera fín a los graos más baxos del Cuetu L'Abeyera.

La próxima vegada... intentaremos apretar con tolo que tenemos dientro.