Díes de branu en Xixón y nun tengo plan pa salir a esguilar por falta de tiempu o de collacios o quien sabe por qué. El casu ye que fai bon tiempu y hai ganes de dase un bañín, poro que meyor qu'averase hasta los dominios de la Lloca'l Rinconín a facer unes traves y entrenar un pelín.
Panorámica de la travesía de la Lloca'l Rinconín
La primer vegada que tuvieramos Alberto y yo l'añu pasáu, fuéramos a la escalera 24 y nun mos diera muncho más l'asuntu, pero na escalera 23 pude comprobar que les traves tan muncho más guapes y son munchos los trepamuros qu'anden per elli en bañador pasando d'un llau a otru de la parede.
Paulina entrenando y ñapeando enforma
Nun soi muncho de poner croquis nestos temes... el bloque y les travesíes pa mí son entrenamientos namái, así qu'o salen o nun salen, esa ye la meyor cotación de toes. Dicir, qu'estes traves de la Lloca sobremanera son d'agarres planos y pequeños, perfeutos pa facer deos y prauticar l'agarre en regletes.
De travesía en travesía tomamos el solín y entrenamos
Asina qu'un día con Orlando qu'enseñóme les traves d'esta escalera, otru día con Pau y l'últimu en temporada perruna con Kíla, tuve per ellí faciendo trave tres trave. Les rises van ser l'añu que vien cuando pueda tar esguilando y bañándome con Kíla na sablera ya qu'al fín vamos tener un llugar onde bañanos colos nuesos collacios peludos en Xixón.
31 d'Avientu de 2014
Tamos nel día de Fin d'Añu y tenemos ganes d'esguilar, pero entre pitos y flautes faísenos tardi cuando xuntámonos, asína que decidimos dar un paseín con Kíla hasta la sablera de San Llorienzu, onde esisten delles travesíes en munches de les muries pente les caberes escaleres dende'l Piles, pasando pola Lloca, hasta'l Rinconín.
Nun voi poner croquis ya que nes condiciones nes que fuímos tampoco-y dimos muncha importancia a encadenar traves (anque dalguna cayó) y lo que más nos prestó ye entrenar un ratín, anque nesta dómina del añu y a la solombra pasamos un pelín de fríu.
Alberto pegándose colos mínimos agarres de les travesíes
Poro, déxovos la información d'estes travesíes que podemos atopar n'interné nestes páxines:
por Pura Escalada Asturias
por Asturwaterman
por el Lance Perfecto
Por comentar daqué más, dicir que dalgunos de los bloques propuestos, fuera de lo que ye les muries del paséu, nesa peña estraña costera son peligrosos enforma, ya que la roca ye probe y ta frayada poles embestíes de la mar... asína que munchu güeyu con xugásela con agarres pocu consistentes.
L'últimu día que quixi intentar esguilar nestes traves del Rinconín, La Lloca o el Piles, acabé dando un paséu con Kíla per tol pedreru, buscando al mió pa qu'andaba a pulpos y nin siquiera saqué los gatos a la fín, pero bono pa otra vegada sedrá.
No hay comentarios:
Publicar un comentario