lunes, 15 de febrero de 2016

L.lindes (Quirós) - Pena Ruea - Foiz Grande

31 de Xineru de 2016

Track: L.lindes (Quirós) - Pena Ruea - Foiz Grande



Quinta vegada, que se diz aína, que voi intentar la Pena Ruea, teniendo namái qu'un triste porcentaxe d'aciertu d'un cumal, pero bono como dicen per ehí, ye'l camín lo importante y non la cume, anque seyamos sinceros lo que nos presta a los montañeros ye facer cume, sentanos y alcordanos de caún de los pasos llevaos hasta riba y non dándonos la vuelta a metá de camín.

Son les 10 menos venti de la mañana y tamos nel pueblu quirosanu de L.lindes. P'aportar a él, salimos de Xixón y garramos la AS-I hasta topanos en Mieres del Camín cola A-66 que nos dexaría en la Pola de L.lena. Ellí garramos la As-230 que nos fadrá xubir a la Col.la la Cobertoria dempués de pasar pelos pueblos l.lenizos de Palaciós, Piedracea y Armá.

Entamu de ruta en L.lindes (923 m)

Na Cobertoria entraremos nel conceyu de Quirós y siguimos per esta carretera hasta Santa Marina, onde perdemos unos kilómetros p'almorzar en Bárzana, tornando al camín pela Qu-4 pasando por Fresneo de Cortes, Cortes y a la fín dexaremos el coche al llau de la Ilesia de L.lindes.

Y d'esti xeitu, preparaos pa la batalla ivernal, según baxábemos pela Cobertoria veíamos que nun quedaba res d'esi mantu blancu, poro dexamos trastos nos coches (crampones y piolé) y salimos con menos pesu pel míticu camín hacia la Veiga Manín.

Ascendemos hasta la Veiga Manín

Perpasaremos a bon ritmu pela Machá Viecha y pel Manín, entrando nesi guapu fayéu que da pasu a salir a la Veiga Manín onde fadremos un primer descansu. Llevamos una hora de camin ensin sintir una plizca de vientu y na Veiga oyemos a lo lloñe como'l vientu esmena toles fayes pa la Foiz Grande.

Quédome paráu, nun me lo pueu creyer, otra vegada non... nun podemos tener tanta mala suerte pa que la Ruea nos mande pa casa ensín cumal. Nestos camientos, veo que'l grupu tira p'alantre con xeitu, asína qu'anímome y tiramos canalizu arriba pa salir al Praón.

Averámonos hacia l'entamu del Cuchillar de Pena Ruea

Col camín perconocíu de pocu más d'un mes atrás, siguimos pela Val.lina Grande hasta un collaín a 1715 m onde pudiera decise qu'entama'l Cuchillar de Ruea. De les cincu intentones a Pena Ruea, denguna lu intenté pel Cuchillar asína que voi sollerte a esta guapa ruta.

Por suerte, nel día de güei tenemos noroeste asina que'l mesmu Cuchillar va protexéndonos d'ésti, qu'anque molestu, nun ye a torganos l'avance y muncho menos a refuganos el esfrute de xubir per una arista, cenciella per guapísima como les semeyes lu amuesen.

Esfrutando durante tola xubida pel Cuchillar

Asina que pali pali, vamos llibrando y superando los numerosos resaltes d'esti preciosu Cuchillar, que va tenenos entreteníos dalgo más de dos hores, pero casi se fai curtiu sobretou con un día tan increyible como'l que tenemos, esfrutando de les vistes hacia la fastera central d'Asturies.

Y falando de vistes... la llegada al cumal. Equí sí, equí daste cuenta qu'Asturies en xeneral y el macizu de Penubina en particular son preciosos, poro nun soi a parar de cuntar cumal a cumal, munchos dellos ya visitaos.

Cumal de la Pena Ruea (2153 m)

Caún ye distintu nel so sentir pa col monte, pa como cellebrar un cumal. A mí préstame sentame sólu y mirar el paisaxe durante un bon ratu, enumerando los montes que ya fice y sobretou los que non fice y pueu acolumbrar preparando mentalmente una posible futura ruta pa conocelos.

Dende la nuesa posición.... quédome mirando dende la Pena Sol Tambarón hasta la Penubina pasando pela Pena'l Ranchón o los Picos del Fontán nos que sal otru ramal hasta'l Tapinón con grandes cumales como'l Fariñentu.

Baxamos pel Canalón de los Mirios al Puertu Güeria

Con esti paisaxe, xintamos durante media horina llarga, hasta qu'apesar d'allargar muncho la ruta decidimos baxar hacia'l Puertu Güeria pel canalón de los Mirios. Yera imposible dafechu non querer pasiar penriba d'esos praos verdes col blancu y calizu como fondu de pantalla.

Abaxo tirámonos, esfrutando d'un cómodu descensu, nel que tan sólo tenemos que dexanos llevar pel senderu que tórnase en dalgún puntu en pedreru, lo cual fai más rápida si cabe la baxada, aportando al col.léu Las Fontes casi ensín danos cuenta.

Siguimos baxando de Las Fontes hacia la Veiga la Foiz

Durante tola baxada nun paro de mirar al canalón Cimeru y Baxeru que daríen pasu dende la Veiga L.longa hasta'l los Fuechos de Colines y L.longu y que pudieran aportame un rutón pa conocer dalgunos cumales más como'l Colines, Cigacha... qu'entá tengo pendientes.

Intentamos escaecer esta idega pa más alantre y siguimos na ruta de güei, que nel intre tien de llevanos hasta'l mayáu de la Cardosina, per siendes qu'entemécense pente viesques de carrascos y poro debemos tar sollertes de nun perdelos nin un segundu.

Empobinámonos hacia la Foiz Grande

Aportaremos a la Cardosina, pero nun debemos relaxanos porque tenemos qu'empobinanos hacia la Foiz Grande per siendes tapecíes pentes les viesques y la parte más difícil ye nun perdeles cuando aportamos a un mayáu.

Pali pali, pasaremos pel Chanu la Cereizal y Los Cuadros hasta topános na Veiga la Foiz con una cabaña con xente y fumu na so chimenea. Una pena que nun pudiéramos quedanos a durmir nun llugar tan guapu como paecía que diben facer.

Percorreremos la Foiz Grande p'ascender al Col.léu

Una vegada que pasamos per delantre d'estes cabañes, ya nun tendremos perda denguna y siguiendo les balices del PR, podremos encarar la parte final de la ruta, esfrutando de tol grandiosu espeutáculu que ye la Foiz Grande.

Nun me pararé en describir esti pequeñu Cares, nel qu'asómense les verticales parés de Penarpín, qu'intenten lluchar coles ablucantes canales qu'ascienden hacia'l Baxu Ruea. Too ello, vivímoslo con más tranquilidá na ruta a la Penarpín.

Tramu final pente guapos fayeos per Las Escomeras

Perpasiaremos al llau del rigu hasta cruzalu na ponte y tocarános sofrir l'ascensu hasta'l Col.léu onde ya sólo tendremos que descender pente agradables fayeos per L'Argañal y Las Escomeros, empatando pembaxo de la Machá Viecha col camín que garráremos munches hores enantes.

En resume, segunda ascensión completa a la Pena Ruea, na que caleyamos 13,5 km, ascendiendo un total de 1460 m acumulaos durante pocu más de 8 hores y media, lo que diznos a les clares que la ruta a esti enorme monte ye curiosina.

Que vos preste!!!

Kila y Sua camudando'l so camín

6 comentarios:

  1. Desafortunadamente yo solo miro las fotos. Y son bonitos paisajes. Para mi sobre todo las que estáis a punto de alcanzar la cima.

    Saludos.

    ResponderEliminar
    Respuestas
    1. Si nun la conoces... Pena Ruea ye'l meyor mirador del macizu con diferencia y ye impresionante como corten sobre'l Puertu Güeria montes como'l Ranchón. Gracies pol comentariu. Un abrazu

      Eliminar
  2. Hola Berto! Hemos hecho varias veces Peña Rueda pero nunca hemos regresado por la Foiz Grande y es una propuesta preciosa.
    Las vistas desde la cima son impresionantes!!
    Un abrazo!!

    ResponderEliminar
    Respuestas
    1. Con más ñeve... diba ser crema, pero esti añu de momentu ye lo qu'hai jeje. Un abrazu

      Eliminar
  3. Una ruta de las guapas de verdad! La hicimos hace un par de años, creo. No debió faltar mucho para cruzanos, porque tuvimos a finales de Enero haciendo la Peña Arpín, pegada a Peña Rueda, y subimos por la impresionante Foix Grande y bajamos por la pequeña, algo más brava.

    Un saludo!

    ResponderEliminar
    Respuestas
    1. Va convertise nun clásicu la Penarpín coles dos foces... ficímosla va unos añinos y son una pasada si señor.

      Saludos

      Eliminar