lunes, 15 de diciembre de 2014

Sotres (Cabrales) - Vegas de Sotres - Canal de las Grah.as - Pozán - H.isu - Áliva (Camaleñu - Cantabria)

5 de Xunetu de 2014

Track: Sotres (Cabrales) - Áliva (Camaleñu - Cantabria)


Tamos na V Travesera Picos del GM Xuan de la Borrina y esti añu, diónos por entamar el nuesu camín dende'l pueblu cabraliegu de Sotres. Como siempre, p'aportar a Sotres saldríemos de Xixón garrando l'autovía del Cantábricu hasta Posada de Llanes onde tomaríemos direición a Cabrales al traviés del Altu d'Ortigueru, y ya baxar a los pueblos de Canales, Carreña, Poo y a la fin Arenas de Cabrales.

Nel nuesu casu, Pau y yo, durmimos en Colombres na casa de Fernan, así que fueron los demás collacios los que ficieron esti viaxe con madrugón incluyíu p'alcontranos en Sotres almorzando nel hostal onde durmieron Zori y Richar, que decidieron dir de vienres a pasar el día pel pueblu.

Saldremos de la curvona de Sotres (950 m)

Na nueche anterior, tuviéramos una cena a base de güevos fritos y delles hestories más, Tito, Bittor, Fernan, Pau y yo echándonos unes bones rises, así que tábemos con un xeitu montañeru bien prestosu, al igual que los collacios que vienen de Xixón col ánimu bien altu, siendo pa dalgunos d'ellos la primer travesera.

El camín a percorrer como delles vegaes más, sal de la curva anterior a Sotres, baxando a los Ivernales del Texu como suel facese p'aportar a la Vega Urriellu. Nós, siguimos alantre hacia la Vega Fresnidiellu onde prepárense delles cordaes col envís de pasar un día d'esguilaes alpines nes ablucantes plaques de la Peña Fresnidiellu o del Cuetu Pampín.

Empobinámonos pista riba pasando polas Vegas de Sotres camín d'Áliva

Les previsiones dan lluvia a partir de la tarde, pero tenemos munches hores soleyeres nel día. Aún así, yendo tanta xente nun quise facer la idega d'aniciu que tendría de llevanos dende Sotres al Picu Boru, crestiando a lo postreru hasta'l Valdemingueru.

Valía más asegurar y que nun mos pillase l'orbayu o la borrina penriba dalgún pericuetu, poro tiramos pista hacia la llende pente Asturies y Cantabria pasando pela Llosa la Cal, el Prau Noru y la Concha H.orniellu hasta aportar a la Vegas de Sotres

Descansamos un pelín y entamamos la amplia Canal de las Grah.as

Dempués, xubiremos pel Vau Los Rocines hasta la Raya pa llueu de Piedra Llé, xustu enantes d'entamar la Llomba'l Toru, empobinanos hacia la Canal de las Grah.as, que ya percorriéramos Fernan, César y yo na Travesera del 2010-2011.

Esta vegada Fernan abandona al grupu y tira a pasar un día relaxáu pel refuxu d'Áliva. Nun ta malo'l día, pero esa bronquitis nun desapaez y nun se fía nin un pelu poro despedímonos d'él y entamamos l'ascensión pela amplia llampa que ye esta canal.

Ascendemos averándonos a la mandrecha'l paré que baxa del picu Pozán

Muncha xente del grupu nunca nun xubiera una canal de Picos y cuésta-yos enforma garrar ritmu sobretou nuna canal d'esti estilu, que nun tien un senderu marcáu y caún tien de garrar la so propia sienda o traza de robezu nestos casos.

La primer parte sedrá teñía de verde pola yerba pero na méta de la canal predomina la piedra suelto y la tierra teniendo qu'andar sollerte de per onde nos lleven los nuesos pasos. Como falaba enantes, la canal ye peramplia pudiendo servir d'accesu a dellos h.orcaos pente los cumales del Cortés y Prau Cortes como fué aquel añu o desviándonos a la mandrecha hacia dos canalizos que dan pasu a los nuesos cumales d'esti añu: El Pozán y el H.isu.

Facemos el tramu final más guapu de canal hasta la h.orcada pente'l H.isu y el Pozán (2125 m)

P'ascender garraremos la canalina que dexa un espolón del picu Pozán a la mandrecha, algamando dempués una colladina enriba l'espolón con pasu pa los nuesos cumales y pa la canal de baxada. Esti llugar bien merecía un descansín pa picar daqué magar de dalgo más de 4 hores de ruta y 2 de canal de las Grah.as.

El grupu va ascender al H.isu que ye más cenciellu, demientres pego una escapadina y salgo hacia'l h.orcáu pente'l Pozán y un cumal de 2192 ms que paez un hombru del Prau Cortés. Enantes de garrar el h.orcáu metereme per un sistema de llambries qu'en siguíes trepaes llévame hasta los 2184 m del picu Pozán, el cuál tien un airosu cumal con cayida hacia les canales que xuben dende los pueblos de Camaleñu.

Vía d'ascensu al picu Pozán (2184 m)

Demientres los collacios ascendienden caminando hacia'l cumal del H.isu de 2171 m, faciéndonos delles semeyes d'un a otru picu. Nel intre, paez que'l día quier ponese pelín repunante, polo que baxo del Pozán y corriendo tiro hasta la colladina que dame accesu al H.isu a mí tamién.

Grupu nel cumal del H.isu (2171 m)

Nun cuartu d'hora toi nel H.isu y en diez minutinos más, ya pillé al grupu pa reincorporame al descensu hacia la fastera del colláu Cámara. La baxada fadrémosla faldiando pembaxo de los Picos de Cámara, los cuales tamién taben nel menú del día, pero nun quise abandonar más vegaes el grupu y dexélos pa otru día.

Garramos el canalizu pente ambos cumales ya iniciamos el sele descensu baxo los picos de Cámara

Magar d'un primer tramu pindiu de canalizu, llueu tendremos sienda cómoda travesando pedreros hacia'l colláu Roh.u (1930 m), xustu pembaxo d'un espolón que cae dende'l picu de Cámara Sur y penriba de la Mesa Cimera.

Baxamos el tramu final del colláu Roh.u hacia los puertos con una paradina

Al igual que nel ascensu, camudaremos de nuevu de peñe a yerba aportando a unes praderíes ensín tener qu'averanos en nengún momentu al colláu Cámara. A unos 1790 m, unos cuantos decidimos parar a xintar ya que la soba de ruta pa muncha xente yera perimportante.


Tamos falando d'una primer canal de Picos con sus 750 m de desnivel direutu hasta'l H.isu y eso págase enforma. Los más avezaos quisieron tirar al refuxu cuanto antes pa nun moyase, mientres los demás tiramos un ratín nel prau a xintar, echar unes rises y esfrutar d'esti primer día de Travesera.

Sofrimos la xuba final cola amenaza d'orbayu hasta'l refuxu d'Áliva

Con pocu más, baxamos hasta la parte más fonda del Puertu d'Áliva (1455 m) saludando al guapu Coriscáu al final del valle y baxo un finu orpín, entamamos el penosu ascensu hasta'l refuxu qu'anque paeza poca cosa, los 200 m de desnivel hasta él, ficiéronse pelín pesadinos pa unes pates ya cansaes de caleyar.

En resume, guapa estaya de la Travesera Picos 2013-2014, que durante casi 9 hores, tendríanos nes llendes pente'l macizu Central y l'Oriental perpasando los 18,5 km andaos y superando los 1500 ms de desnivel acumuláu... que nun ta nada mal.

Camudando'l Camín nos puertos d'Áliva

Na primer estaya de la Travesera ficimos un par de dosmiles del Oriental: Picu Pozán (2184 m) y El H.isu (2171 m)

Ver progresos en: Retos montañeros

No hay comentarios:

Publicar un comentario