viernes, 26 de diciembre de 2014

Áliva (Camaleñu - Cantabria) - Covarrobres - San Luis - Las Nieves - Asotín - La Rienda - Cordiñanes (Valdión - Llión)

6 de Xunetu de 2014

Track: Áliva (Camaleñu - Cantabria) - Cordiñanes (Valdión - Llión)


Una vegada más, una travesera más... tamos nel refuxu d'Áliva a casi 1700 m d'altor y tamos recién almorzaos mirando pal cielu. Un cielu que nun para d'echar agua, un cielu que nun tien pinta de dexar d'orbayar y de moyar la mole de la Peña Vieh.a dándo-y un toque amenazante dafechu.

Somos cuatru los que continuamos na Travesera 2013-2014 pero sólo dos vamos a echá-y ganes al día de güei y vamos moyanos p'aportar al siguiente finxu nel nuesu camín particular d'esta travesera: Cordiñanes.

Día malísimu en Picos... orbayu y borrina n'Áliva (1668 m)

Bittor y Fernan van acompañar a tolos collacios del GM Xuan de la Borrina hasta Sotres de nuevu, onde tendrán un día más plácidu con vermús y xinta nel chigre de la Central nel valle altu de Peñamellera.

Nós, ponémonos el gore tex y agachamos la tiesta caleyando hacia la h.orcadina Covarrobres (1923 m) baxo les aguh.es que caen dende la fastera sur de Pena Vieh.a. Dende ellí, baxaremos a los h.oyos de Lloroza col envís d'entamar l'ascensu pela canal de San Luis.

Facemos camín hacia la H.orcadina Covarrobres pa empobinanos hacia la canal de San Luis

Les vistes dan pa lo xusto, que ye dir contándo-y a Alberto que picu ye cuál, pero onde xúbese a esti, que fastera ye más guapa que la otra... pero too ello, envuelto nun sentimientu de cumplir col día, de pasar lo meyor posible esta estaya ensín perder l'ánimu pa les siguientes nes que'l tiempu paez ser qu'ameyoraba.

Aún así, nin tan malo, ya qu'hasta la final de la canal de San Luis, faciendo toda ella entreteníos mirando pa les Torres de San Carlos y Altaiz, l'orbayu fué continuu pero sele cuanto menos. Nel intre, antes d'abandonar la canal ficimos una ascensión esprés hasta un altu con mayúscules... el de la H.elada.

Al final de la canal fadremos l'ascensión del día al Altu la H.elada (2145 m)

Y digo con mayúscules, porque esta ascensión llevónos dalgo más de media horina superando más de 150 ms de desnivel. El casu ye que camentábemos xubir a un tayuelu y tuviemos que trepar per un sistema de llambries moyaes en dalgún casu pero hasta en moyáu la caliza de Picos tien una adherencia superior.

La H.elada ye un tarrén colgáu so la canal del Embudu, más conocida como los Tornos de Lliordes, que tien un par de torques importantes y xelaos quedamos dende'l so cumal cuando sintimos desprendese delles peñes dende lo alto de la Torre d'Altaiz hasta'l final de la canal de San Luis... menos mal que nun andábemos per ellí, porque vaya mieu.

Caleyamos hacia la colladina Las Nieves pasando pol hombru sur de la Torre'l H.ou Oscuru (2303 m)

Coles mesmes, baxamos hacia les mochiles que dexáramos na final de la canal y siguimos camín hacia la colladina Las Nieves, al llau del picu La Padiorna, pero esta vegada pente la ñebla, vamos averanos hasta un hombru sur de la Torre del H.ou Oscuru col envís de comprobar si ye un d'eses cotes dosmileres perdíes.

Son d'eses coses qu'a falta de grandes cotes... pues restolamos tachueles estúpides que vienen en llistes más estúpides inda. La verdá, ye que tengo un trabayu pendiente de facer p'algamar un llistáu de cotes que quiero ascender a lo llargo de la mió carrera nel monte... qu'espero seya durante munchísimos años.

Baxo fuerte lluvia baxamos con curiáu pel sedu La Padiorna

Magar de la baxada del hombru, pasamos per ún de los piores momentos del día, poniéndose a orbayar abondo y metíendose la borrina enforma. Amás, va pillanos nel tramu quiciás más comprometíu del día, por tar a la gueta del sedu la Padiorna.

Con bona vista nun tien mayor problema, ya que siguiendo los h.itos aportes al desvíu pa Colláu H.ermosu o garres estupéndamente'l sedu pa baxar hacia Lliordes. Pero nós, perdimos un pelín los h.itos qu'a la escontra de lo que sería de camentar, xúbente un pelín más hasta garrar el bon camín.

Averámonos a otru altu sol Llagu Bah.eru y el día entama a portase nel descensu d'Asotín

Baxo la lluvia, dime cuenta que nun díbemos bien y al borde d'un desbentíu penriba'l sedu, tocó trepar hasta alcontrar el pasu correutu. Llueu de garrar el sedu, baxamos sele hacia Lliordes p'ascender otru pequeñu altu (el del Llagu Bah.eru (2018 m) que ye hermanu d'un más pequeñu y más cercanu al propiu llagu que nin vimos cola borrina.

Pente borrina y lluz acolumbramos l'enorme argayu y la vega d'Asotín

Con suerte, averándonos a la cabecera de la canal d'Asotín el día fué abriendo un pelín y diónos una sele, guapa y gayolera baxada hacia Cordiñanes. El primer tramu, bono pa correr y esfrutar d'un descensu rápidu hasta aportar a la vega d'Asotín onde paramos a quitar ropa a la fín y a continuar con calma'l restu del camín.

Tamos encantaos col fayéu d'Asotín y la sienda la Rienda

Agora, tamos nel meyor momentu del día, miramos pal descomanáu argayu que baxó dende los parés del Frieru, agüeyo per primer vegada'l desvíu al Argayu Congostu que xube hacia colláu H.ermosu y tengo por conocer inda ya esfruto de los parés que caen dende la Pica d'Asotín y colláu Solanu.

Seguimos baxando y pasamos pel fayéu d'Asotín, averándonos a la increyible sienda de la Rienda la cual conocemos ensín priesa, esfrutando de cada pasu, de cada sedu talláu na peñe, de cada pasu colgáu sol vacíu.

Esfrutamos del tramu más ablucante del día baxando a Cordiñanes


El día nun fué buenu, nun tuviemos les grandes ascensiones que tenía planiaes pa esta estaya (Torre Salinas y Lliordes) teniendo que facer pequeñes cotes pa facer más entreteníu un camín baxo l'orbayu y la borrina, un camín que ya conocía en parte sacante del final pela canal d'Asotín y esta sienda de la Rienda que ye ablucante na so totalidá.

Tan guapa ye que Fernan al aportar a Cordiñanes con Bitto,r nun pudo desdexar la oportunidá de percorrela un ratín y enseñásela a Bittor, quitándose un pelín d'esi monu de monte que más qu'un monu será un gorila lo menos, magar de dos díes mochileru nesta travesera.

Pasín a pasu descendemos hasta Cordiñanes (836 m)

En resume, perguapa escursión dende Áliva hasta Cordiñanes, apta pa tolos públicos que durante 7 h y 40 min llevónos a travesar el macizu central d'oriente a occidente nun percorríu de 15,5 km, nel que superamos un desnivel acumuláu de 1040 m.

Que vos preste y si tenéis meyor día que nós... muncho meyor!

Camudando'l Camín pente la borrina

No hay comentarios:

Publicar un comentario