lunes, 3 de marzo de 2014

La Espasa (Caravia) - Picu Pienzu

5 de Xineru de 2014

Track: La Espasa (Caravia) - Picu Pienzu


De xuru que'l Picu Pienzu, nel cordal costeru del Sueve, sedrá de los más visitaos polos montañeros asturianos. Ye una ascensión rápida na so ruta normal, tien perbones vistes y pudiera dicir que casi too montañeru astur tienla nel so bolsiellu.

Pero toos, toos non... los Carlos del GM Xuan de la Borrina, nun tuvieron la suerte de xubilo nes anteriores rutes nes que tuve ellí, así que tomando como idega a desendolcar l'ascensión de Fernan al Gorbeia dende la costa, siendo menos xabalinos, ascenderemos dende la sablera La Espasa.

Salimos de la mesma playa de la Espasa na vera la mar

Saldremos de Xixón a una hora prudente, ya que colos cálculos peores la ruta nun tien porque desmadrase mou xatada navidiega. Poro, autovía'l Cantábricu alantre y paramos a almorzar en Colunga, pa siguir llueu pela Isla hasta'l nuesu puntu de salida: La Espasa (0 m aprox).

Magar de los preparativos y d'algamar que Kíla, dexe de correr como una lloca pel sable, travesamos la N-632 na ponte'l ríu Espasa y garramos un camín a la vera d'esti que fadranos pasar pembaxo'l viaductu, averándonos al monte Farinéu.

Averámonos a la base del Sueve pel monte Farinéu

Hai que dicir qu'esti primer tramu yera de los que más esmolecíame, por mor, de travesar un ocalital y como non, nunca falla. Los caminos qu'al entamu van perfeutos, piérdense, les duldes espoxiguen y acabes mediu perdíu, per siendes casi imperceutibles.

El nuesu restolar nel monte Farinéu, dexónos nunos 15 minutinos de perda, pero aún así, fuimos empobinándonos dende la Rozona, hacia'l Prau Colás ya ensín metenos n'éste, salimos travesando la riega la Cueva'l Beyu a la As-260 que xube al Altu'l Fitu.

Travesamos un pelín de carretera hacia l'entamu real del ascensu al Pienzu

Nun llegará a 300 ms de carretera los que percorreremos, desdexando'l primer ramal de la mandrecha que va pa la mina'l Toniellu y garrando'l segundu que tien mui bon aparcaderu si nun queremos facer el tramu dende la Espasa.

Metíos nesta pista, pasaremos pela Llosa Quichi y la Roza'l Mazu, empobinándonos n'envueltes a un paré con ciertu aire artificial. Ye'l Pare'l Cuchillu, baxo'l Picu'l Toniellu, onde podemos descubrir restos de mines d'antaño, pasando per una cueva a la esplotación inclusu.

Empobinámonos pelo más xabaz de la fastera norte'l Sueve

Nun perdemos tiempu cola mina, y metémonos nuna clara vallina, formada pelos picos Foyuscuru y los Cabreros, zarrándola nel fondu la filera de cumales, dende'l Córcovu al Cordobana. Tamos naguando por conocer la fastera norte del Sueve, y bien ceo, magar de pasar el prau Les Cerezalines de Morán meterémonos nella dafechu.

Namái, tenemos que mirar la toponimia pa saber que nun va ser un llugar cenciello... Foyuscuru, Foyu L'Agua... dicen defechu onde tamos metíendonos. Hai qu'andar sollertes coles marques marielles, ya que por dalgún motivu despistámonos con unos filos colloraos ataos nes cotolles y enmarronámonos de más.

Dexamos atrás los foyos aportando a la Texera con más prau abiertu

D'esta miente, tuviemos que siguir el track con mayor interés y tornamos al bon camín, saliendo de los foyos p'alcontranos poquín a pocu, colos primeros exemplares de texu. Nun se puede comparar la fastera norte del Sueve, con otros cordales más calizos costeros, ya que a pesar del barru y los foyos, avánzase bien siendo guapu d'andar.

Sudando pola humedá, pero contentos de conocer la Texera del Sueve, siguimos per pequeños mayaos, hasta unu más grande con bebederu, onde aprovecho pa llavar a Kíla, que diba más marrón que blanca.

Del Cuetu La Texona alantre... perpindia ascensión al Pienzu

D'equí, aportaremos a un collaín al llau del Cuetu la Texona (677 m), onde camudamos el sen, pa entamar l'ascensu al Picu Pienzu. Fadrémoslo peles partes más despexaes qu'alcontremos, dexando la Viesca Espiniella a la manzorga y la Viescarreonda a la mandrecha.

El sitiu ye guapu a retorcer, nun tamos na fastera de mayor concentración de texos, pero caleyaremos pente carrascos, espineres y texos, cola vista puesta na cruz del Pienzu, qu'entá vese lloñe, pero muncho menos que va unes hores.

Siguimos ascendiendo con vistes costeres y de la Texera'l Sueve

Pali pali, diremos dexando la vexetación embaxo nuesa, y tan sólu tendremos per delantre una enorme ya interminable panda con unes ablucantes vistes de la costa oriental asturiana. Ye imposible nun esfrutar esta xuba pela fastera norte y más cuando sabemos que'l vientu azota fuerte del Sur.

Pasaremos pelos Saperos, cruciando la llende de los 1000 m y travesaremos la faza caliza de L'Escayu Pienzu, p'agora sí, topanos colos caberos 100 m de desnivel los cuales fadremos en llama, pa nun perpasar de les 4 hores d'ascensión.

Pali pali, aportamos al cumal del Picu Pienzu

Ya son varies vegaes que tuvi nesta cume y paezme la forma más guapa de xubila, dura, pero mui prestosa y quiciás impresiona más aportar al altu, y ver Picos de frente, que la costa, amestándo-y que dempués de sufrir xubiendo tenemos una baxada bien tranquila.

Pa los Carlos, nun pudieron tener meyor bautismu nel Pienzu, la pena como casi siempre, ye'l fuerte vientu, qu'obliga a parapetase tres del cabañu, o de la base de la cruz u onde meyor puédase, ya que siempre hai bien de xente.

Los Carlos nel Picu Pienzu... algamáu'l retu dende la sablera La Espasa

Magar d'abelluganos, xintar y saludar a xente conocío como Serxu y Lys, que tan faciendo tan bona campaña a favor de la llibertá de la esbarda Molina y de falar con xente ensín conocer, tiramos p'abaxo pela ruta normal.


Delles vistes demientres entamamos a baxar pela fastera sur

Ésta perconocía, llevarános nun rápidu descensu, hasta'l mayáu del Cuadru y Beluenzu, baxando llueu per Mermullines hasta les cabañes del Bustacu. Pocu más alantre, enantes del ascensu hacia'l Cantu la Teya, tomamos un desvíu a la manzorga que baxa pela Cuestona hacia'l Prau Perfeches.

Garramos el camín normal hasta'l Bustacu, onde salímonos hacia la Viescona

Ensín tocar Perfeches, siguimos esti bon camín, metíendonos dafechu, na parte más guapa de tola ruta, la Viescona. Nel intre, da igual si unu va más o menos cansáu,... agora ensín camientos siguimos la sienda y dedicámonos a esfrutar d'esti llugar tan máxicu, que ya conociera na integral al Sueve.

Pudiera dicir, que nun hai una meyor forma, de baxar del Sueve que per equí, ya que l'anterior vegada que tuviera nella, fue xubiendo y nun tuve les mesmes sensaciones. Quiciás, baxar tranquilos col día apagándose y los colores verdes más fuertes y escuros diéron-y un puntu si cabe más guapu.

Ablucante'l fayéu de la Viescona

Ye una ayalga esti llugar, y tando tan averada a rutes mui caminaes, paez mentira la tranquilidá, el silenciu y lo sólu que pues llegar a sentite. Charly y Canta, taben encantaos col final de ruta, yera la guinda'l pastel.

Finamos esta guapa viesca nel Tendeyón

Baxaremos curiosos con cada requexu de la viesca, pasando pola foz de la Estrencha y pelos pasos armaos d'antes del Tendeyón, onde aportamos a les muries esbarrumbaes de la Mina la Toya. Pocu más alantre, en Piedrallana la riega la Toya, camuda'l nome pol de la Cueva'l Beyu, anque sedrá d'igual manera, el nuesu acompañante, hasta'l Beyu.

Caleyamos hacia'l Beyu onde garramos un tramín de carretera hacia'l monte Duesos

Pasaremos al llau de casa Julia y tendremos un ratín de carretera, más pesáu y llargu de lo albidráo. Sera'l tramu d'As-260 hasta'l desvíu hacia Caravia y un par d'envueltes hasta la pista que va hacia la Cantera.

Esta pista, meteráse nel monte los Duesos y darréu de travesar la riega'l mesmu nome, xubirá hacia'l pueblu de Duesos, onde daremos vista al fín, a la mar. Nun fue guapu esti últimu tramu del Beyu a Duesos, y menos sedrá pasar al llau de milenta cases vacíes pente Duesos, El Visu y la Espasa... atristayante cuanto menos.

Travesamos el pueblu de Duesos y aportamos a la Espasa col Sueve xixilante

Ye horrible, ver cartelos anunciando urbanizaciones, y al empar, pasar al llau de cases y cases, vacíes, coles persianes baxaes, pesllaes en definitiva y munches d'elles en venta. Nunca entendí, esi afán especulador de los políticos asturianos... lo qu'algamaron son urbanizaciones pantasmes y estrozar la costa asturiana.

La mar y la montaña... inmeyorable ascensión al Picu Pienzu

De toes maneres, nós tábemos felices, con una ruta nel cuerpu que fue defechu un ésitu: por tol percorríu, poles vistes, por xubir pela Texera y baxar pela Viescona, porque nin siquiera llegó a ser escesívamente dura y quedóse nunes 7 hores y media bien correutes.

Un percorríu de 18,5 kms y un ascensu acumuláu de 1385 m, ye un preciu pequeñu pa una ruta tan bona. Eso sí, a nun ser que queráis facer el datu de salir de la sablera al cumal, encomiéndovos a dexar los coches nel aparcaderu de la Llosa Quichi y facer una circular xuniéndola del Beyu al coche, con ello, quitáis lo más feu y menos interesante de la ruta.

Kíla... Camudando'l Camín na fastera norte del Sueve

4 comentarios:

  1. Coime, Berto, pisámonos les rutes, ja, ja. Pues la alternativa vuestra nun ye pa escaecer. Muy bona idega lo de salir desde el sable. Y lo de les pistes po los ocalitales, que te voy contar. Nos armámosla al baxar que nun fuimos quien a dar con la meyor delles, más bien con la peor. El texedal ye ablucante, ¿que non?. Menuda maravieya. Tengo que tornar pa dir sele y esfrutalu abondu.
    Un saludu

    ResponderEliminar
    Respuestas
    1. Ya te digo Javi, voi mui retrasáu nes entraes y poro, acabáronse pisando jaja. Lo del Texedal tien que ser increyible percorrelu enteru faldeando... con calma.

      Nun me fales d'ocalitales, que tengo pendientes entraes, nes que tuve currando varios díes per ellos inclusu, jaja

      Un abrazu

      Eliminar
  2. ¡Cómo me prestó'l percorríu de vueso y sobre too la descripción que faes! Les semeyes tamién perguapes. ¡Norabona!
    El Sueve da munchu xuegu.
    Un saludu.

    ResponderEliminar
    Respuestas
    1. Gracies Arturo, son estes coses que te plantees y salen p'alantre estupendamente.

      Un abrazu

      Eliminar