miércoles, 18 de julio de 2012

Posada (Valdión - Llión) - Chavida - Frieru - Padiorna - San Luis - Áliva (Lliébana - Cantabria)

9 de Xunetu de 2012

Track: Posada Valdión (Valdión) - Áliva (Camaleñu - Cantabria)



Ayeri aportáramos a Posada en compaña de los cántabros (Juan, Tino y Jóse) y de César, pero dempués de despedinos, quedamos Fernan y yo tola tarde pasiando pel guapu pueblu. Ye impresionante ver onde t'allugáu pente los macizos occidental y central, pero tamién ye esmolecedor comprobar como un domingu de Xunetu taba más bien ermu d'ambiente a pesiar de los munchos establecimientos qu'intentan vivir del turismu.

Sacante d'esto, la posada El Asturianu, foi un bon llugar pa cenar y descansar, pal día siguiente almorzar nun chigre d'al llau onde yeren más afayaizos col nuesu interés, que nun yera otru que salir a les 8 de la mañana.


Partimos de Posada (940 ms)

Asína que, los de Tudela (Fernan y yo, "que nos han dejao solos") salimos caleyando de cualquier manera tamién peles cais de Posada y de Prada de Valdión pa dempués de travesar la carretera al puertu de Pandetrabe xubir per delles pistes bordiando la Mata Prada pola manzorga.


Xubimos pela Mata Prada per pista y senderos

Pasaremos per delles cabañes nel nuesu ascensu... el cual faíse pesadísimu por mor del orbayu cayíu na nueche, que fai caleyar nun ambiente de fondera humedá faciéndonos sudar casi de forma sobrehumano.

Tampoco aída demasiáu'l tarrén, ya que tamos siguiendo senderos pente la yerba y estos van de continuu superando pequeñes llombes de prau, sucediéndose un colláu tres otru, un altu tres otru y así hasta que dámonos de frente cola ñebla pela qu'avanzamos hasta topanos con un bebederu de frente so los 1400 ms d'altor.


Entramos na fastera de ñebla hasta un bebederu

Pocu dempués d'esti bebederu, despistámonos un pocu coles marques blancomarielles del Pr-pnpe-15, averándonos de más hacia'l colláu Peranieva, cosa que remediamos faldiando en direición contraria hasta empobinanos correutamente hacia la canal de Chavida so los 1520 ms d'altor.

A lo postreru, dicir que nun pasaba nada si siguiésemos hasta'l colláu Peranieva, ya que pudiéremos empatar igualmente cola canal penriba d'un peñón de 1839 ms, ximielgu del Peñón Chicu formando los dos una puerta a la canal de Chavida.


Metémonos dafechu na canal de Chavida

Pa cuando tamos en plena Chavida, llevamos casi 3 hores de camín abondo cansaes, poro, ver penriba la ñebla tola canal que tenemos per superar ye dalgo duru d'asumir. Como siempre, Fernan y yo, intentamos sacar dellos temes de que falar y poquín a pocu, vamos travesando enormes pedreros a la gueta del meyor senderu a siguir.


Les vistes hacia'l Frieru y Torres de Liordes y Hoyu Chicu son ablucantes

Hai que dicir, que la canal ye tan amplia, que fai posible siguir milenta senderos distintos y eso faíla abondo más pesada si cabe. Menos mal, que les vistes a la punta SE del Frieru y al marabayu de peñes y aguh.es que formen les parés de la Torre de Liordes y del Hoyu Chicu va faciendo'l camín más entreteníu.


Nel nuesu avance dexamos la ñebla bien abaxo

Nesos camientos tamos y dacuando echamos un vistazu pa la ñebla que ya quedó mui pembaxo nuesa., lo cual anima y muncho. Les primeres hores de moyadura de pies pelos praos, fízonos nun tar tolo animaos que debiéramos, pero nel intre'l sol ya'l cielu azul ye de lo más positivu.

Y pasu tres pasu, pedreru tres pedreru... dos pasos p'alantre y unu p'atrás, la canal de Chavida va quedando abaxo y el colláu de Chavida cada vegada más cerca, hasta qu'a la fín, 4 hores dempués de que saliéramos de Posada, arribamos a los 2200 ms que da pasu a unes vistes del macizu de los Urrieles ablucantes... ensín pallabres.


Perguapu llugar el colláu de Chavida... Llambrión... presente

Tamos cansaos pero contentos... y agora tou camuda de sen. Camudamos lo malo de la canal polo bono del colláu. Camudamos la mirada a la piedra que pisamos pol güeyu qu'esnala llibre hacia les precioses vistes del seutor del Llambrión... la montaña ye así... xubimos y baxamos moralmente como xubimos y baxamos pel terrenu que pisamos.

Y si de xubir tenemos que falar... tenemos ante nós l'ascensión más guapa de la Travesera 2011-2012, que nun ye otra que la Torre'l Frieru. Pa ello, lo primeru vamos dexar les mochiles a bon recaudu y arrodiando la paré oriental, vamos averános sele hacia l'hombru NE.


Averámonos al hombru del Frieru cola Torre de Liordes a la espalda

Les vistes siguen siendo increyibles... tornamos la mirada hacia les torres del Hoyu Chicu y Liordes, sabiendo que detrás ta la de Salinas, pero sobretou parámonos a mirar al norte col Llambrión con tolo que l'arrodia y que conocimos na travesera anterior.



Guapu tramu d'hombros con precioses vistes

Quiciás, echamos de menos a tola xente que fuímos a xuntanos l'añu pasáu en colláu H.ermosu.... pero bien ceo, ponémonos otra vegada a la xera y avanzamos rápidamente pelos distintos hombros, que sin nenguna dificultá, paez que son perfeutos pal posáu col Cornión o colos Urrieles de fondu.


Fernan cola Bermeh.a al fondu nel arrodiu del Frieru

Malpenes un cuartu d'hora dempués, tamos nel pasu más míticu del Frieru, que nun ye otru, que la barriga que cae sol corredor norte del Frieru. Cuando digo míticu, quiero dicir que ye eso, míticu ya que pa na ye difícil, anque siempre hai que tar sollerte y nun facer el fatu pasando con confianza.


Míticu pasu del corredor norte y aguh.a Maria Luisa

Como agasayu pa esti pasu vamos tener la impresionante aguh.a María Luisa con su doble cumal, que col seutor de la Bermeh.a al fondu, dános una guapa semeya de mar de ñubes y tamién el pasín del corredor norte dános vista al canalizu cimeru de l'ascensión.


Garramos el canalizu p'arriba con trepes disfrutones

Esti llargu canalizu, va tenenos entreteníos durante un ratín, con dellos trepes protexíos no aéreu, que daránmos mayor confianza p'apretar hasta la parte más alta d'este, la cual amosarános la verticalidá sobre la canal d'Asotín.


Parte final de piedra más roto hacia'l cumal

D'equí n'adelantre, siguiremos dellos h.itos, que per un tarrén de piedra roto anque cenciello, dexarános nuna primer antecima, pa dempués poder esfrutar como dos rapacinos de la cume de la Torre'l Frieru de 2445 ms.


Cumal del Frieru (2445 ms)

Pocu más de 5 hores y tamos nuno de los cumales más guapos d'ascender que fice nunca. Nun tien una dificultá grande, pero'l pasín del corredor norte y tol canalizu de trepada-y dan un puntu d'atención en tou momentu, que presta enforma tener.


Vistes pa los Urrieles y mar de ñubes al Cornión... ensín pallabres

Ye estos montes que te van diciendo que ties que llevar tolos sentíos espabilaos porque lo esixe, anque bonamente va dexándose facer y lo meyor el so allugamientu, con unes vistes espeutaculares hacia'l Cornión, hacia los Urrieles, hacia'l cordal Cantábricu... una pasada.

Si tuviéramos que retirarnos de la travesera nel intre... camiento que fadríamoslo felices, ya que los díes anteriores foron mui bonos y esti con un día soleyeru nes altes cotes y col algame d'esti cumal, nun se pue meyorar.



Mismu canalizu y mismos pasos na baxada... sollertes siempre

Ye la una la tarde y col descensu vamos aportar a les mochiles a la hora perfeuta pa xintar, asína que ponemos el "mou sollerte" a ON y encomencipiamos a baxar pela mesma vía, pasando'l tarrén de piedra suelto con curiáu, destrepando sele y sacando les semeyes contraries na barriga del corredor.


Parte final del descensu pa les mochiles y la xinta

Cuando queremos danos cuenta, tamos baxando del hombru hacia les mochiles, faciendo'l Frieru nuna hora y media, lo qu'amuésanos lo esixente d'esta torre, dexándome un tastu perbono y un probatible futuru colos demás collacios de Xuan de la Borrina pa otra vegada.

Magar de la media hora pernecesaria de descansu y xinta, tenemos per delantre una auténtica paliza hasta'l hotel d'Áliva. Sabemos qu'esti yera'l día más llargu y duru de la travesera y agora lo importante ye caltener la motivación, ya que sinon, pue facese pesadísimu tol camín qu'inda resta.



Toca bordiar la Torre del Hoyu Chicu pela manzorga

Ponémonos a ello, empobinándonos al travíes de la canal que xube d'Asotín hacia los pedreros que cayen de los cumales de la Torre del Hoyu Chicu, bordiando'l caberu d'ellos pol norte y metíendonos dafechu H.ou de los Llagos.

Equí, equivocámonos, ya que perdimos un pelín el rastru del senderu que tenía que baxanos al Llagu Bah.eru y travesamos durante un bon trechu (una hora aprox) esti estensu h.ou. Como nota positivu, pude trepar un ratu hasta'l Altu del H.ou de los Llagos (2109 ms), pero como nota mui negativa, la navegación nesti tarrén fízose abegosa y los xube-baxa de continuu, xunto col calor foron amagostándonos les fuercies.


Tramu complexu nos altos del H.ou de los Llagos cola Padiorna al fondu

A la fín, fuimos a salir d'esti marabayu h.oos pente'l h.orcáu de dos cotes de dosmil metros que nómanse altos del H.ou Bah.eru, pero que nun tuve ganes nin d'ascender y con ello topámonos a la fín col senderu que xube de la canal d'Asotín hacia'l nuesu destín... el sedu la Padiorna.


Cansaos hacia'l colláu la Padiorna

Pero enantes, ficimos un descansín nes cercaníes del colláu la Padiorna, ya que tábemos pelín desinflaos, pa siguir camín al pocu pel sedu, demientres echábemos un vistazu a la vega de Lliordes y les sos torres, cuando la ñebla esnalaba de xemes en cuando.


Xubiendo'l sedu de la Padiorna

Una vegada más, paez que yera'l día, volvimos a despistanos, al camudar el sen nel sedu la Padioarna xustu nel puntu nel que tiraría hacia H.ermosu y xubimos de más, trepando y teniendo que destrepar dempués hasta'l camín correutu, col desgaste mental y físicu que conlleva.


Otra interminable xubida a la colladina Las Nieves y d'ehí al Picu La Padiorna

Con esto... l'ascensión hacia la Colladina de las Nieves fízose eterna non... lo siguiente. Aún así, nun se nin con qu'ánimos, dexamos les mochiles nella y caleyamos, como si fueramos la güestia, poles envueltes hasta'l Picu La Padiorna (2319 ms)


Na Padiorna (2319 ms) desfechos

Como se pue ver nes semeyes, les cares entamen a ser d'un cansanciu total y ye que l'esfrute y el sufrimientu na montaña van siempre de la man. Defechu, los 5 minutinos que tuvimos nel cumal, camiento qu'utilizámoslos, más que pa descansar, pa entretenenos nomando cumales y garrando un pocu d'ilusión col paisaxe llunar de los Urrieles pal restu de la ruta.

Tol seutor del Llambrión baxando a la colladina de nuevu

Recoyimos les mochiles, con casi 9 hores y media de ruta y sin cruciar nin una sola pallabra con nengún montañeru más. Esto foi así, una total soledá, sacante de la nuesa compañía mutua que realmente... nun se pue pedir más y ya son munches hores de monte xuntos.


Despedímonos del Llambrión baxando al Hoyu Oscuru

Coles fuercies mui xustes, empobinámonos al tramu final del día y pa ello tenemos qu'averanos hacia'l Hoyu Oscuru, pasando cerquino de les últimes peñes de la torre sur del Hoyu Oscuru y descubriendo esti guapu h.ou, que ciérrase cola Torre norte del Hoyu Oscuru y coles torres de San Carlos y Altaiz.

Xustu nel cierre del h.ou Oscuru, vamos garrar el senderu d'entamu a la canal de San Luis y tamién vamos tener la suerte d'alcontrar al primer montañeru del día, qu'endirixíase hacia H.ermosu y avisónos de lo que nos asperaba... otra vegada ñebla y orpín como facía casi diez hores enantes.


Llarguísima canal de San Luis que métenos na ñebla otra vegada

Tengo que dicir qu'esta canal pente la ñebla, fízose llarguísima, casi infinita... y namái que pudimos dir caleyando al nuesu ritmu caún, ensín falar... solo col envís d'aportar d'una vegada a Áliva... pero inda quedaba canal y senderu pelos hoyos de Lloroza y un últimu ascensu a la h.orcadina Covarrobres y eso paecía nunca llegar.


Coles últimes fuercies aportamos a Áliva dende la h.orcadina Covarrobres

Mui pero que mui cansaos, empatamos finalmente cola pista que vien del cable y xubimos a la h.orcadina pa baxar pela pista ensín poder siquiera esfrutar de la visión de la Peña Vieh.a nin de nenguna cota de l'arrodiada.

Poro, acortamos camín pel senderu que va baxo'l Cuetu de Juan Toribio, evitando un paséu más llargu pel chalé rial y col últimu aliendu y colos músculos doloridos de les pates, aportamos al refuxu-hotel d'Áliva a les 7 de la tarde.

Finamos la estaya nel hotel d'Áliva (1653 ms)

Estaya perdura que llevónos dende tierres llioneses a cántabres, nun total de 11 hores y 5 minutos, percorriendo 20,25 kms y superando 2250 ms de desnivel acumuláu que dízse pronto y 1530 ms de descensu. Una auténtica soba, cola recompensa de facer el Frieru, eso sí.

Con esto y unes cerveces fríes, fuímonos a reservar habitación, porque nin siquiera ficiéramoslo y pocu más y la cagamos porque taba l'exércitu de Jaca per ellí, copándolo too. En fin, yera lo que nos faltaba, quedar durmiendo na cai, jeje.

Nun hai que dicir que, duchámonos, cenamos y más bien ceo, fuímonos a sobar a la habitación ya qu'al día siguiente quedaba la última estaya que dependía y muncho de les previsiones del tiempu, que yeren males defechu.


Camudando'l Camín y Ortzamendiren Sua na Torre'l Frieru

Nesta tercer estaya de la Travesera 2011-2012 ficimos la Torre'l Frieru (2445 ms) perteneciente al club 111 de PicosVer progresos en: Retos montañeros

8 comentarios:

  1. Impresionante, no se me pasa otra palabra por la cabeza. Bueno sí, envidia. Por coses como estes hacéis que me sienta orgullosa de compartir con vosotros la montaña. Sois grandes!

    ResponderEliminar
    Respuestas
    1. Sí, grande animales tamos fechos... menuda soba... de díes como ese, tengo inda les plantes de los pies tocaes, jaja

      Un besín chu

      Eliminar
  2. Precisamente dentro de 2 semanas espero estaren la cumbre del Friero, preciosa cima viendo las fotos. Luego la Padiorna quedará para otra ocasión. Un saludo.

    ResponderEliminar
    Respuestas
    1. Disfrutala a tope Jonatan, porque ye una d'eses ascensiones que dexen mui, pero que mui bon sabor de boca.

      Un abrazu

      Eliminar
  3. No se si voy a poder dormir hoy, vengo con las patas cansadas de Pirineos y recordando esta pateada lo voy a tener difícil.
    Pero preparado para la siguiente y con ganas.

    Un abrazu.

    ResponderEliminar
    Respuestas
    1. Ya me paecía a mi, que taríes por ahí perdíu, pa nun contestar a los mails, jeje

      Pues na, prepárate pa la siguiente, que va ser fina, fina espero, jeje.

      Tenemos que dir falándolo

      Un abrazu

      Eliminar
  4. Preciosas cumbres las que en esta ocasión habéis conquistado y gran relato de una jornada tan solo apta para unos pocos.Me quedo sin palabras. Tan solo mi mas sincera: Enhorabuena !!!. Un saludo

    ResponderEliminar
    Respuestas
    1. Mil gracies Jose pol comentariu. La verdá que foi una estaya dura, dura de la Travesera, pero con ánimu y eses vistes había que completala jeje.

      Un abrazu

      Eliminar