Valbona (Siero) - La Grandota - Xerra La Paranza - Bendición - El Sol (Noreña) - Cotorbán

7 de Xineru de 2024

Track: Valbona (Siero) - La Grandota - Xerra La Paranza - Bendición - El Sol (Noreña) - Cotorbán

Dempués del 2023 llegaron cambios físicos, ceru positivos y pel momentu, ensin tener posibilidá de facer monte curiosu y ensin dolores, namái que me quedaba la escalada como forma de tar pel monte, pero la sensación yera incompleta ya que les ganes de grandes actividaes y conocer más llugares yera más potente que la escalada deportiva, que sincéramente, acaba siendo dalgo obsesivu y casi repetitivu y los montañeros necesitamos algo más.

Asina que llueu de faceme con una bici estática y una elíptica pa poder entrenar tren inferior y ver si meyoramos dalgo los problemes de cadera, pude comprobar que la bici yera dafechu indolora, poro, llueu de munchos años ensin salir a facer monte en bici, tirámonos a la piscina, mercamos bici y estrenámosla con una salida pela contorna del conceyu de Siero.

Partimos del pueblu de Valbona (215 m)

Nun hai que dicir que pa los montañeros xabaces, hai dellos conceyos que quédense un pelín curtios a la hora de los pateos, tanto por desnivel como pola altitú o belleza de los montes o simplemente polos caminos asfaltaos o formigonaos, poro, la bici de monte fai perfeutes toes estes condiciones pa preparar rutes, conocer nueves fasteres ya incluso, tachar dellos montes pocu afayaizos pa grandes rutes a pie.

Asina que, nesti nuevu mundiu qu'ábrese cola bici de monte, vamos facer la nuesa primer ruta saliendo de Valbona en Siero, averándonos hasta Bobes, onde vamos travesar tol parque industrial pa salir hacia la parroquia de Llimanes, saliéndonos ya pelos pueblos carbayones de Caravia y Faro, nel nuesu envís cola nuesa primera ascensión del día al picu La Grandota de 505 m.

Partimos dende Siero empobinándonos hacia'l picu La Grandota

Con esta primer cota del día, poníemos les pates a preba, bordiando'l picu pela manzorga, per un camín mui pindio y dalgo téunico que fizó qu'echásemos pie a tierra en dalgún momentu. A partir de la collada Este, dexaríemos les bicicletes al pie d'un cierre de camín y averámonos caleyando hasta'l vértice aportando a estos 505 m d'altor y ganando guapes vistes del cordal de L'Aramo baxo la última ñevada.

Vértice del picu La Grandota (505 m) perteneciente al conceyu d'Uviéu

Tornamos a les bicicletes y darréu vamos tomar lo que nómase como'l camín de los Peregrinos, un GR que va dende Uviéu a Cuadonga, garrando nel nuesu casu tola travesía que fae pela Xerra La Paranza, que ya ficiera en parte caleyando va munchos años y que pesie a les pallabres positives de Suco, ye casi llano, siendo en bicicleta una realidá bien distinta, paeciéndonos un prestosu quebrapates, con tramos de pista en descensu hasta la Paranza y una xubida per asfaltu en primer momentu y camín téunicu hasta'l picu Santu Mederu, nuna fastera perteneciente al conceyu de Noreña.

Travesamos tola xerra la Paranza travesando les llendes de los conceyos d'Uviéu, Siero, Llangréu y Noreña

Una vegada qu'aportamos al area recreativa de la Paranza, tendremos una baxada hacia la Pasera y continuaremos per pista hacia los barrios de Bovia y L'Azorera baxo la Peña'l Cadabal, llugar onde tantísimes tardes d'escalada tuve na mió vida y que nun pueu otra cosa que facer, que parar a enseñásela a Suco, ya que tien una escuelina llocal al llau de casa que nun conocía entá.

Coles mesmes, baxamos de los parés a la pista pa reencontranos coles nueses bicicletes y tirámonos pista abaxo hasta Molleo, de vuelta nel conceyu de Siero y tendremos per delantre la baxada más téunica del día, por mor del barru pero tamién divertida hasta la vega'l rigu Los Vayos, onde paramos a pensar que facer, ya que la ruta taba yéndose d'hores pa dir a xintar a casa.

Facemos camín apriesa dende Bendición hasta Noreña onde xubimos a la parte alta n'El Sol

Coles coses más clares, decidimos acortar un pelín la ruta y vamos salir per una guapa pista paralela a la As-246 hasta'l pueblu de Bendición, onde travesaremos la vía'l tren y siguiremos un tramu pela senda a Valdesoto, saliéndonos na Venta Soto hacia Xixún, con un repechu que casi pétanos les pates enantes de garrar finalmente la As-246.

Per carretera tocarános ya rodar travesando primero'l Berrón siguiendo hacia Noreña, dándo-y la vuelta a la capital pegándonos un pindiu ascensu per camín hacia'l barriu d'El Sol, col envís de dar preste a otru vértice asitiáu nel depósitu d'agua de Noreña a 230 m.

Terminamos el nuesu viaxe de vértices col monte Cotorbán bien cerquino ya de Valbona

Na parte alta de Noreña, nel barriu'l Sol (nun me presta muncho'l nome esi de Base Sur) vamos descender per caleyes hacia La Reguera pa siguir pela Belga hacia la parroquia d'Argüelles, esfrutando de la visión del so palaciu y pegándonos la cabera ascensión del día hacia'l monte Cotorbán, onde tamién nel depósitu d'agua, alcontraremos l'últimu vértice del día con 229 m d'altor sol nivel de la mar.

Con tol trabayu fechu y les pates pelín cansaes, baxamos felizmente col solín del mediudía, que ya pasáremos fríu abondu nes primeres hores, hasta Llugar de Riba, rodando los últimos metros per Llugar de Baxo y entrando a Valbona pel Castañéu, mudándonos de ropa apriesa pa dir tomar el vermú y pedir unes costielles na parrilla de Valbona.

En resume, primer ruta bttera dempués de nin se sabe cuantos años, na que completamos una circular pelos conceyos de Siero, Uviéu, Llangréu y Noreña de 37 kilómetros con un desnivel acumuláu de +/-760 m en pelín menos de 4 hores ciclismu montunu.

Camudando'l Camín pasando fríu en bici pel centru d'Asturies