lunes, 30 de abril de 2018

Berodia (Cabrales)

1 de Payares de 2017

Siempre préstanos tornar per esta escuelina cabraliega a los collacios y a mí, la razón ye bien simple, más menos hai víes de tolos graos pa entretenenos y en díes d'iviernu ye soleyera enforma. Poro, plantámonos ellí, nun día nubláu pero con perbona temperatura pa trepar.


El pueblín de Berodia cola fastera de la Peñe'l H.ascal detrás

Como ya dixe, nesta escuela tenemos graos abondos d'iniciación, asína que la fartura víes que te pues meter si tas entamando nesto o simplemente si ties ganes d'escalada relaxada ensin grandes apretaes, ye perfeuta pa pasar el día.

Jose, Jeni y Pepa trepando nos parés del Serrón

Aparte, como les víes son curties, al menos na parte superior de la escuela, les víes un pelín más dures, sextos altos, suelen ser dalgo bloqueres, lo que si nun ties munches ganes de tar colos gatos puestos, pero apetezte meter dalgún apretón curiosu son mui prestoses.

Montando les víes como tien de ser

Si nun recuerdo mal, nesti día, ventilé toles víes del seutor A (quedábame un 6b+ y un 6c que salieron a vista) y el B que tamién lo tenía ya fechu y de tarde decidimos baxar un ratín hasta'l seutor más cercano a la carretera, el G, onde tuve trepando nunos V mui chulos, que teníen agora segundu llargu que rondaría'l 6a+ o así.


Un vistazu hacia Portudera

La verdá ye que siempre tamos a gustu, nesta escuela, ya que cada día que pasa soi más repunante colo de tar n'escueles masificaes y préstame pasar el día con tranquilidá cola mió xente, lloñe ya d'apretar en graos más o menos duros.

Al final... trátase d'eso... de pasar el día al aire llibre y colos collacios.

Berodia (Seutores visitaos)

Croquis modificaos por mi de la escuela d'escalada de Cuevas de Mar, por mor del blogue  Entretenimiento Vertical. Gracies y col so permisu.


 -------------------------------------------------------------------------

26 d'Avientu de 2016

Finales d'añu... media raspia de bon tiempu y saliemos corriendo pa onde se pueda... y esta vegada podíase en Cabrales... y más en concretu... prestábanos tornar per Berodia. Namái que tuviera nesta escuela un día y cayéranos un tormentón pa colar pal coche y aún así prestar un montón.

Zori nel so primer quintu y un alemán esguilando cual Hobbit

Esta segunda vegada, apaecimos coles mesmes intenciones de siempre, siguir trabayando la escuela poquín a pocu de víes más cencielles a más complexes pero siempre cola tranquilidá de que munches visites tienen que venir nun futuru.

Orlando trepando col grupín del Xuan de la Borrina

A la fín, cayeron dalgunos quintos, dalgun sestu baxu y anduvimos apretando hasta'l 6b+ nos que siempre con una entrada durina, llueu había de navegase peles plaques y lluchales hasta'l final, quedando con un tastu a grandes víes en cotes un pelín más altes y con munches ganes de probar tolo que nos dea'l nuesu nivel.

 -------------------------------------------------------------------------
 
29 de Mayu de 2016

Cuantayá que taba con ganes de dir a Berodia en Cabrales pa conocer la escuela d'El Serrón. Dende que viera les equipaciones, croquis ya hestoria que diba contando'l compañeru Victor, nel so blogue Entretenimiento Vertical taba naguando por conocela.

Noe y Zori entamando nesta xera d'esguilar

Así qu'un día, así a lo xole, con amenaza de tormenta, tiramos hasta Cabrales a conocer esta escuelina, metíendonos senderu arriba hasta los seutores más altos d'El Serrón. Ellí, andaremos faciendo un pocu d'iniciación a la escalada pa Noe y Zori, demientres Richar, Haritz y yo vamos saltando de vía en vía tamién.

Les nueses cordaes acaparando too

Al final, quedósenos un pelín curtiu'l día, pero diónos pa facer 4 cuartinos bien guapos, un V+ y un 6a+ (Asomadoriu). Dalgún de nós, como Richar tuvo tamién tiempu a metese n'otru 6a+ bien chulo como yera Postureo sin canteo.



Cuando quisímonos dar cuenta, les ñubes metiéronse enriba de nós y entamó a esbastiar, que llegamos cola pingadura del fin del mundiu al coche, eso sí, muertos de risa, porque mira que lo llevábemos viendo... y col bah, llibramos, bah llibramos... zasca.

Xornaes ensin gluten en casa Niembro

D'esti xeitu, mudaos de ropa dalgunos y otros secándonos como pudimos, tiramos hasta Casa Niembro n'Asiegu, onde aparte de tratanos de luxo, fartámonos cola so bona comida y cola sidra Pamirandi que ta de restallu.

Berodia (Seutores visitaos)

Croquis modificaos por mi de la escuela d'escalada de Cuevas de Mar, por mor del blogue  Entretenimiento Vertical. Gracies y col so permisu.



 -------------------------------------------------------------------------

2 comentarios:

  1. Esti día pa guardar bien adientro... preciosu.
    Gracies por ello amigu!
    Noe

    ResponderEliminar
    Respuestas
    1. Hai que tornar per Berodia... muncho queda por trepar

      Eliminar