miércoles, 26 de julio de 2017

Tuíza Riba (L.lena) - Práu L'Albu

4 de Xunu de 2017

Track: Tuíza Riba (L.lena) - Práu L'Albu


Hai díes, nos que paga la pena quedase en casa o camudar los planes que ties d'entamu. Pero a los que nos presta dir de monte, nun sabemos de malos díes, nun sabemos de negatividá y siempre tenemos na tiesta la idega de xubir y a ver que pasa.

Que pasó esta vegada? Pues que ficimos tola ruta penmediu d'una borrina fonda y anque fizo dellos amagos de querer abrir pelos altos, nun fuimos a ver el sol en tol día y namái que lu sentimos calecer el pelleyu en contaes ocasiones.



Partimos dende'l refuxu del Meicín (1210 m)

El plan yera facer la senda Les Merines conociendo la nomada pasada'l Siete, pero d'esti xeitu como que non. Asína que plantámonos nel refuxu del Meicín dempués de l'averamientu davezu dende'l pueblín de Tuíza Riba.

Tamién como siempre, p'aportar a Tuíza Riba, llegamos pela As-66 hasta Campumanes pa siguir pasando pelos pueblos de Sotiel.lo, Espineo, Los Pontones, Teyeo, Rospaso y Tuíza Baxo. Esta vegada nun madrugué, ya que durmí nel propiu aparcamientu y escucho un ruxerux de xente aparcando hasta qu'asomamos el focicu Kíla y yo, viendo qu'hai quedada de corredores de monte.

Ascendemos pente'l borrín a la Forqueta'l Portil.lín

Almorzaremos na furgo y lo dicho, camín arriba ensin sacar nin siquiera la cámara de fotos. Total, nun vemos res. Arribamos al refuxu y dexo a Kilina fuera con dellos collacios perrunos, pa pasar a tomar un café y aldericar un ratín so les opciones que gastamos pa esti día de monte.

Personalmente, digo que ya que toi equí voi dar una vueltina con Kíla, así que voi probar a xubir a la Forqueta'l Portil.lín y ver si podemos ascender dalgún cumal cenciellu d'esa fastera. A la fin, apúntase tol mundiu a esa opción y salimos del refuxu pente un borrín cansino empobinándonos hacia'l canalón Oscuru.

Navegamos pelos fuechos de Cuapalacios

Durante l'ascensión nun hai muncho que mirar asina, qu'al empar que vamos pingando la baxera los pantalones nel nuesu caleyar, voi alcordándome de la primer vegada que pasé per ellí, nuna ascensión a los Picos del Fontán con Fernan, na que mui pocu sabíemos d'esto del montañismu.

Aportaremos a la Forqueta'l Portil.lín (X m) onde'l día quier mediu amagar con dexanos ver dalgo, pero dempués de tar un ratiquín sentaos picando dalgo. Decidimos siguir hacia los fuechos de Cuapalacios bordiando'l Picu'l Canalón Oscuru pela manzorga.

Ascendemos hacia l'Altu los Comisos (2068 m)

La idega yera nun baxar muncho y facer una travesía baxo estos cumales más agrestes (Canalón Oscuru y Palazana) pero como nun veíemos res, poro tiramos polo conocíu y siguiendo marques marielles baxando abondo hacia los fuechos pa más tarde, dempués de crucianos con tolos corredores, xubir hacia l'Altu La L.lera (2047 m).

Seguimos pente la borrina, poro paso olímpicamente d'intentar alcontrar cual ye'l puntu más altu d'esa cota nomada como Altu La L.lera y siguimos ascendiendo al primer puntu del día, el Altu Los Comisos. Esti altu, caltien na so cumera un parapetu de la guerra civil perbien conserváu que valnos pa refuxanos d'un vientín y un orpín, que nel intre, entama a ser molestu enforma.

Facemos tola travesía hacia'l Práu L'Albu

Dende l'altu los Comisos, quédanos facer l'ascensión hacia'l puntu más alto de la nuesa ruta: El Prau L'Albu. Dende la nuesa posición, vemos un cresteríu pelín gafu como pa metese con esti día, asina que fadremos una traviesa con cayíes hacia los canalones de los Comisos.

Damos preste al Práu L'Albu (2132 m)

Nun tien denguna dificultá, pero quiciás el tarrén moyao y ver el borrín col vacíu embaxo faenos tar sollertes con caún de los nuesos pasos. Una vegada que plantámonos nel hombru de la arista SE, tan sólo tendremos que remontar con calma hasta'l cumal de 2132 m.

Baxamos a pinchu hacia'l Val.le Corrales

Taremos malpenes lo xusto pa facer la semeya y salimos per pates del Prau L'Albu col envís de baxar hacia'l Pozu Corrales y a posteriori pel val.le Corrales, per onde xubiéramos hacia'l Pié Ferriru y al Fariñientu la temporada pasada.

El descensu faise penosu y enllenu de patinaes pel barru, asina que vamos xugándonos a ver quien nun cae pa pagar unes cerveces en Tuíza. Ente rises, vamos dando preste al tola baxada del val.le Corrales hasta aportar a la Plana.

Descensu peles vallines de Corisco hacia Tuíza Riba

Siempre con un güeyu alantre pa nun perder el camín y otru atrás pa nun perder a naide, vamos reuniéndonos ca pocu, pa siguir xuntos nel caberu tramu del camín peles vallines de Corisco, hasta aportar al camín que vien del Meicín al altor del depósitu d'agua de Tuíza Riba.

Con 7 hores moyándonos y ensin vistes, ponemos pié nel aparcaderu del pueblu, onde de bona gana mudámonos de ropa y tiramos a tomar una cervecina al chigre. Al final, el paséu quedó en casi 10 km de percorríu y 1050 m de desnivel acumuláu, eso sí con mui mal tiempu.

La próxima más... y meyor... esperemos.

Camudando'l Camín pente la borrina

2 comentarios:

  1. Esta vez no abrió, pero hay que estar ahi para intentarlo.. un día aprovechado y haciendo lo que gusta, seguro que a Kila lo pasó estupendamente! Abrazos!

    ResponderEliminar