lunes, 28 de diciembre de 2015

Puertu Tarna (Casu) - Picu Celispardi - Vega Baxu - Pendones (Casu)

12 d'Avientu de 2015

Track: Puertu Tarna (Casu) - Picu Celispardi - Vega Baxu - Pendones (Casu)



Tornamos al monte, magar d'unes minivacaciones de puente en Soria, onde aparte de fartucame merienda tres merienda y parrillada tres parrillada, tuve'l bon facer de salir a correr tolos díes un ratín colos perros y trepar otru en Valdenebro. Asina que con dellos torreznos más nel cuerpu, preparamos ruta pal parque de Reres, col envís d'andar n'arba pente los conceyos de Casu y Ponga.

La ruta, propuesta por César que vuelve a patiar per Asturies dempués d'un par de meses per Sudamérica, sedrá salir del Puertu Tarna y facer una guapísima travesía hasta'l pueblu casín de Pendones, como non, xubiendo dalgún qu'otru monte pel camín.

Como ye vezu vamos salir de Xixón pela minera hasta'l desvíu al corredor del Nalón onde travesaremos los conceyos de Llangréu, Samartín del Rei Aurelio y Llaviana, entando en Sobrescobiu p'almorzar en Rusecu, onde aparte del cafetín llevéme pal bolsiellu un llibru de cumales de Casu, el escrito va pocu pol blogueru MonteJuan.

N'El Puertu Tarna (1493 m)

Siguiremos en coche hacia'l Puertu Tarna, pasando nel nuesu camín pelos pueblos de Tañes, El Campu, Sotu, La Foz, Bezanes pente otros, desviándonos con dos coches a Pendones pa dexar ún d'ellos y siguir camín pela esbarrumbada carretera que colos argayos y colo xeláo na parte alta hai qu'andar con güeyu.

Aportaremos al Puertu con temperatures perbaxes, teniendo que poner toles capes posibles y echaremos a andar con un solín prestosu pero tímidu nel so calecer. Güei ye una ruta estraña ya que'l gran oxetivu del día, falando de cotes, sedrá lo primeru que vamos a atacar y a ello vamos cruciando la carretera y garrando un senderu paralelu a esta pela mandrecha de la primer cota de la Xerra Celispardi.

Ascendemos pela Xerra Celispardi hacia'l so puntu más altu

Esti senderu tien de llevanos a dos opciones, siendo la primera ganar l'arista nun collaín y siguir per claros senderos hasta'l colláu Cotalbo pente'l picu Celispardi o L'Abedular y la llomba del picu Cotalbo.

La segunda sedría faldiar pel senderu hasta ganar una pista que vien más baxo hasta'l mayáu d'El Forco onde podemos ascender per una vallina hasta'l senderu que transita pela arista qu'igualmente tien de llevanos hasta'l colláu Cotalbo.

Les vistes ábrense en toles direiciones nos caberos metros al cumal

Como non, nós, nin lo unu nin l'otru, asina que tuviemos un tramín de faldéu intermediu per un senderu tapecíu pela broza hasta dar a la vallina a mediu altor aproximádamente. Aportaremos de cualesquier manera al colláu Cotalbo y d'ellí, al cumal del picu Celispardi o L'Abedular siendo diez minutinos de pindiu pero cómodu tarrén.

Les vistes dende'l colláu a los 1814 m del Celispardi, son una maraviya, teniendo enfrente Ten y Pileñes y baxando per elles pasaremos hasta'l Picu Zorru y Recuengu. Detrás, el Cornión apaez en tola so plenitú y si xiramos la vista hacia'l norte alcontrámonos con tol parque de Reres... destacando'l Maciédome y a la so manzorga la fastera del picu La Becerrera.

Cume del Picu Celispardi o L'Abedular (1814 m)

Al otru llau del valle'l Nalón, salta a la vista'l Cantu L'Osu y tolos cumales de la cordelera dende'l Remelendi, Xerra Mongallu, Rapaínes hasta la Peña'l Vientu. Increyibles vistes miremos pa onde miremos, ya qu'al sur tenemos tol macizu del Mampodre anque'l feble sol iverniegu nun mos dexa velo como debiera.

Nun hai quien pare de fríu y la borrina xuega con nós esnalando pente'l cumal, asína que tirámonos abaxo col envís de pasar de la xerra de Celispardi a la de Montobiu. Fadrémoslu con curiáu ya qu'esta fastera'l picu ta xelada y aportaremos al colláu Llagu (1664 m) demientres vemos unos corcios correr per Montobiu alantre.

Percorreremos sele la Xerra Montobiu (2004 m)

Del colláu, podemos llibrar la xerra, per una sienda a media faldera'l monte, pero ye munchu más guapu ganar la cumera, esfrutando d'un paséu con grandes vistes hacia'l Cornión y asina lo fadremos toos, menos Kíla, que decidió escorrer un ratín a los corcios que viéramos dellos minutos enantes.

Finaremos el paséu per Montobiu, baxando a un colláin penriba la Peña Montobiu onde entamamos una traviesa hasta un pequeñu mayáu, onde damos vista al siguiente tramu de ruta que nos llevará pente los maraviyosos fayeos del monte la Salguerosa.

Descendiendo al tramu de fayeos de la Salguerosa y la Xerra la Bolera

El monte La Salguerosa estiéndese dende la mayada la Salguerosa hasta la cumera de la xerra la Bolera, que ye xustamente per onde va dir el nuesu camín y p'aportar a elli, baxaremos d'esti preciosu mayáu, llibrando'l cantu que baxa de Montobiu pela mandrecha, hasta dar con un máxicu pasu pente unes peñes que baxa nuna xelada escalera al fayéu.

Travesar el fayéu de la Bolera, ye quiciás el puntu más hermosu de tola ruta, ya que diremos caleyando per un senderín pente les fayes qu'a cada pasu tórnase más guapu. Los nuesos pasos tienen de llevanos hasta'l colláu Texediellu que da pasu a la mayada casi perdida de la Bolera, onde'l tiempu paez parase quedando tan sólo la tranquilidá y la sele calma d'un llugar máxicu ensin dubia.

Travesar los fayeos de la Bolera ye de lo meyor de la ruta

Pueu dicir mui en seriu, qu'esti tramu del fayéu de La Bolera ye de lo más guapu que fice cuantayá, asina que siguiremos esfrutando hasta'l collada Gambiteros al llau del picu L'Altu Pasu, onde sal un senderu qu'empobínase pela Xerra de Valloseru, entrando nel parque ñatural de Ponga.

Tendremos de dexar pa otra vegada, el conocer estes fasteres ponguetes ya qu'esi nun ye'l nuesu destín, asina que garramos la direición contraria descendiendo hacia'l collá del Paréu, anque la fame puédenos y nun claru enmediu la viesca pararemos a xintar enantes de que la temperatura baxe de más col atapecer.

Empobinámonos al travíes del colláu Paréu hacia la viesca de Castrillón

Pa cuando tamos finando los bocatas, el sol ya quier desapaecer tres de los fayeos del xerru La Bolera, convidándonos a colar del nuesu allugamientu. Siguiremos camín hacia'l crucie con una riega, la cual debemos siguir hasta desvianos a la manzorga hacia'l ampliu colláu Paréu pel que caleyaremos pente'l picu'l Paréu y la Peña la Parada.

Fadremos casu al topónimu y pararemos, col envís d'enfocar bien el senderu pa baxar hacia la Vega Baxu, el cual percorrerá l'enorme fayéu de Castrillón, al mió entender menos impresionante que'l de la Bolera pero bien prestosu, faciéndose mui entreteníu'l pindiu descensu siempre a la mandrecha de la riega, que baxará paralela a nós.

Descendemos el monte Castrillón hasta la Vegarriba

Sacante d'andar sollerte coles marques marielles nos árboles y de nun resbariar cola fueya cayío, descenderemos sin problemes hasta facer una pequeña envuelta a la mandrecha, empobinándonos el senderu hacia'l valle de la Vega Baxu, topándonos en primer términu coles cabañes de la Vegarriba.

Guapu llugar esti y coles cabañes bien calteníes, anque llugar perfríu nesta dómina del añu, viéndose'l mayáu xeláu dafechu aún siendo les 3 de la tarde. Darréu, quédanos esfrutar d'un llargu anque relaxáu descensu pel valle de la vega Baxu hasta Pendones.

Descendemos tola vega Baxu esfrutando de los últimos collores serondiegos

La pista ye cómoda enforma y percorrerá tol valle, baxo les muries que cayen dende la Peñe Maciédome, tamién nomáu como la Pandona u Altu de Ponga y pasando perriba de los mayaos de la Vega Baxu y La Texera hasta aportar a les cercaníes del pueblu de Pendones pasando peles cabañes de la Calameriza y la Gargasa.

En resume, ruta pa total esfrute ensin ser esixente físicamente, ya que tan sólo xubiremos un desnivel de 750 m, nos 14,2 km de percorríu faciendo un total de duración de 6 h y 35 min, que como ya dixe ye pal total esfrute de los sentíos.

Camudando'l Camín... per tierres casines

4 comentarios:

  1. Estupenda travesia, recorriendo paisajes y bonitas majadas. La de la Vega D´Abaxu, de ensueño. Un saludo y feliz 2016

    ResponderEliminar
    Respuestas
    1. Feliz añu Sebas... y sin nun conoces el fayéu de la Bolera... nun pierdas la oportunidá.

      Un abrazu

      Eliminar
  2. Guapa travesía Berto, conozco les cumbres Abedular y Montoviu, pero nunca hice la travesía. Me gusta la zona para hacer en otra época esos fayeos -primavera/otoño-
    Un abrazu y feliz añu 2016

    ResponderEliminar
    Respuestas
    1. Pues nun ye muncho trasiegu de coches así que paga la pena.

      Un abrazu y feliz añu

      Eliminar