jueves, 7 de julio de 2016

Peña'l Cadabal (Siero)

26, 28 d'Abril, 4 de Mayu y 27 de Xunu de 2016

Varios fueron los díes qu'anduve pel Cadabal entrenando un pocu col envís de recuperar nivel y ye qu'esta escuelina ye perfeuta por mor de les víes curties, pero dures de movimientos y téuniques, pa ponese en forma.

El primer día, los primeros díes alcuérdome de dir enseñásela a xente esguilador potente que nun la conocíen y colaron d'ellí encantaos anque de xuru que nun tornaron por milenta proyeutos nes sos escueles favorites.

Alberto probando'l 6a pa calecer

A mí, que préstame esguilar tranquilu ensin demasiaos xareos nin muncha xente nos pies de víes, ya que nun soi a tar concentráu y nun soi a sentime lo cómodu que debiera pa meteme nos mios proyeutos, siempre acabo tornando pel Cadabal pa dir finiquitando caxigalines por facer.

Esti añu, dióme más pola colchoneta y averéme pel Cadabal a la gueta de bloques duros pa garrar fuercia de deos, pero esa ye otra hestoria, que prestaríame cuntar aparte, axuntando dellos bloques d'esti llugarín pa los que tengan ganes de pasar un ratu apretón.

Llegando al top con esfuerzu

No qu'a da-y a la cuerda refierse, quedábame por encadenar Starway to Heaven, vía de la Trinchera'l Cadabal que taba a la manzorga del mió 7b (The Trooper). Camentaba qu'esta vía pudiera ser durina, casi más que The Troopper, pero a la fín alcontré un métodu con travesía a la manzorga ensin dirse de más de la vía.

Con esti pasu duru de travesía, alcánzase al traviés d'una ñapa ínfima la fisura que xurden pela manzorga les chapes y que da a algamar la vía, anque seya dalgo espuesta a vuelos llaterales... Nun me paeció tan dura magar del métodu nuevu... asína que dexela en 6b+/c como muncho.

A falta de más reequipamientos o nueves víes... la Peña'l Cadabal pasa a un segundu planu nes escueles completaes... al menos cola cuerda... col bloque siempre tendrá dalgo que facer.

Peña'l Cadabal
Croquis modificaos por mi de la escuela d'escalada de la Peña'l Cadabal, por mor de Pura Escalada Asturias. Gracies y col so permisu.


-------------------------------------------------------------------------



26 de Xunu, 2 de Xunetu y 25 d'Agostu de 2015

Otros tres díes más, tocó tornar pela escuela y en visites anteriores escapóseme comentar qu'Abel y Fredo, cola aportación de chapes mía, equiparon otres 4 víes que sumaríense a les que nome'l seutor Cueva.

Sí les vies d'esi seutor tan a la manzorga de la propia covacha estes 4 tan a la mandrecha y son toles víes del mesmu estilu, curties, poques chapes (3 máximu paezme) y con un toque bloqueru pa salir d'un techu saliendo la parte alta cenciella hasta la reunión.

Tan perfectamente protexíes y les cotaciones de mandrecha a manzorga van más menos de la siguiente mena: Selfi pola drecha (V) pol so sitiu, esquierda (6a+); Valor de Combate (6a); Vudú (6a) y la última que nun soi a alcordame del nome 6a/+.

A la próxima actualización espero facer semeyes cola cámara y facer unos croquis colos graos propuestos, anque como siempre pues ya sabéis... les cotaciones son como son, a caún-y paez una cosa, otru ta fuertísimu y too paez-y cenciello... en fin... qu'anden nesos graos diría yo.

Polo demás... na Trinchera'l Cadabal tuve un par de díes lluchando col 7a+/b (Starway to Heaven) pero seguí sin sacá-y métodu pel momentu, aparte d'entrenar nel seutor principal repitiendo 6b's pa garrar forma.

L'últimu día, ensín xente con quien esguilar... una constante esti branu, tuve entrenando faciendo traves y magar de dellos años intentándolo a la fín, fuí enllazar la trave entera de manzorga a mandrecha col pasu del monodeu que duru enforma.

El próximu día más....

-------------------------------------------------------------------------
21, 28 d'Abril , 8, 22, 24, 30 de Mayu, 17, 24 de Xunu de 2015

Como podéis ver... esta pequeña escuela y más aún, un pequeñu requexu dientru la Peña'l Cadabal, fué'l llugar escoyíu pa trabayar duro nos meses de primavera. La Trinchera'l Cadabal, va finando les sos posibilidaes y toi mui cerca de dexar unos croquis colos graos definitivos baxo'l mió puntu de vista.

Si ficiera grau máximu col 7b nomáu dende agora The Trooper, ya que voi poner nomes de clásicos del rock a toles víes d'esti seutorín, esti añu siguimos trabayando nes posibles variantes y vies que tovía nun fuera a encadenar.

Remembrar que ye una escalada bloquera, con víes curties y de pasos de fuercia, poro los graos que propongo puen paecer bien o mal, pero bono basándome en croquis vieyos qu'algamamos Vicen y yo, fuí probando y dexando la mió opinión nos croquis que teníes na entrada.

Encadene de la esplosiva T.N.T (6c)

La siguiente vía que cayó fué T.N.T a la que-y vien el nome que nin pintáu porque ye mui, mui esplosiva, compartiendo primeros metros col 6b+ (Mirror, Mirror) d'al llau, pero saliendo al agarre envede cola manzorga cola mandrecha teniendo llueu una salida durísima con crucies de manes per una fisura.
Nun ye mui natural, pero ye que les chapes na Trinchera paez que tan puestes un pelín a lo xole y hai que tirar de maxín, pa lleer les llinees de les víes. L'equipador nun sé bien, qu'idegues tendría pero bono... como poca xente trepamos per equí y fuí encadenando una a una y cotándoles... pues resérvome'l drechu de poner grau y nome, jeje.

Encadenando Run to the Hills (6c+)

Magar del duru encadene de T.N.T, pasámos a una guapa vía enfrente de l'anterior que llévanos, supuéstamente per una frecha que tuvimos que llimpiar de telarañes. Un par de díes de trabayu, llevó sacar los pasos (con un total de 5 pegues más menos) hasta que'l segundu día al segundu intentu salió alantre.

Dicir que ye una vía dura, na qu'hai que movese bien, pa garrar los bideos y les regletes esistentes, ya que nun son munches les posibilidaes de progresar pel paré. Si vos metéis nella, andái sollertes ya que les dos primeres chapes nun tienen mui bona pinta y hai dos bonos alloñes de la segunda a la tercera y sobretou d'esta a la cuarta.

Videu del 6c+ Run to the Hills

Asína que paga la pena, preparar la vía dende riba, a nun ser que vayáis mui sobraos o la tengáis ya bien entrenada. Dicir que nun m'atreví a volar de la segunda chapa en denguno de los pegues, poro nun sé la resistencia d'esta chapa. Lo dicho, curiar los posibles vuelos nesti seutor en xeneral, ya que l'equipamientu nun ye'l so puntu fuerte precísamente. 

Con esto, quédame namái una vía por encadenar que sedrá según los croquis vieyos un 7a+/b... ya tien les sos primeres prebes y llego hasta la cadena acerando, pero nun soi a enllazar los pasos entá... poro llevará trabayu la vía en cuestión.

-------------------------------------------------------------------------

27 de Xunu , 12 y 25 de Xunetu, 3 d'Ochobre y 2 de Payares


Esti branu, la Peña'l Cadabal fué quiciabes l'únicu llugar onde encadené dalgo curioso. Col entamar a trabayar, la perda de dos mesinos d'horariu de branu y nun tener collacios llibres colos que dir esguilar... el grau calteníu perdióse un pelín, con dalgún picu qu'otru de suerte y bona forma.

Nesti pequeñu requexu de la Xerra la Paranza tenemos unes 10 víes verticales o desplomaes, bastante bien equipaes sacante d'una que ta con spits y nun ye afayaizu metese n'ella. Nes demás, tenemos que poner los nuesos propios preseos pa descolganos pudiendo recuperales dende la sienda qu'arrodia la Trinchera. 


La Trinchera'l Cadabal dende riba

Metíos nel paré de la manzorga alcontrámonos con un 7b, según unos croquis vieyos, nos que tamién tan cotaes y al mió entender bien cotaes, les víes de la paré cimera, poro vamos da-y el visto bono a estos tamién, anque nunca tuviera per unos graos d'esti altor.

Como podéis ver nel vídiu d'abaxo, esti mesmu día (12 de Xunetu de 2014) tuve dándo-y unos bonos pegues hasta qu'a la fín, saqué'l mió primer 7b. La vía ye curtia y desplomada con movimientos perguapos toos obligaos ya que los agarres son escosos.

 
Vidiu del 7b de la Trinchera'l Cadabal

Xusto enfrente, tenemos el paré de la mandrecha onde la vía práuticable más a la manzorga, saldrá más menos de 7a ya que nun soi a pescanciar nos antiguos croquis cual ye cual, asína que dexela d'esti grau, magar de contar los pegues y díes d'entrenu.

Al 7b, tuviera dándo-y varios díes al final del branu anterior con Vicen, y a ésta, fueron un par de díes de pegues hasta que-y garré'l trucu a la travesía per planos y a los agarres planos llaterales. Un viote perguapu al igual que les semeyes que sacó Paulina al atapecer.

Encadenando'l 7a a la mandrecha la Trinchera

Nun queda más que dicir, que seguiré per equí probando les 3 víes que queden per encadenar. Son o les menos guapes, o les menos evidentes o nun sé mui bien por qué, fueron quedando pa prau porque picábenme más sacar estes otres.

Animaros a da-yos unos pegues... y contáime que grau vos paez que tienen.

Camudando'l Camín na Trinchera'l Cadabal

-------------------------------------------------------------------------

23 y 25 d'Ochobre de 2013

Acabáronse casi les oportunidaes d'esguilar pela tarde, y lo que tien tar en paru, ye tener más tiempu durante tol día, asína que les mañanes al sol, acabaron finando por ser al sol y la roca. Vicen y yo, somos dos paraos, pero nun vamos quedar ensin movenos anque seya verticalmente.

Pa ello, siguimos rematando y prebando víes na Trinchera'l Cadabal. Nun tenemos denguna referencia del equipador, así qu'al nuesu xeitu vamos agüeyando les víes y sacando los pasos poquín a pocu.

Si ya teníemos tres víes encadenaes, Vicen facíase nel calentamientu cola 3d (tercera de la drecha) un 6b llanzando, yo fuíme a pola cuarta a la cláramente veíase dos variantes, una saliendo de frente hacia la mesma reunión que'l 6b anterior y otra por chapes marielles hacia la reunión de la manzorga.

Trabayando na parte drecha de la Trinchera

La verdá ye que'l primer día nun salió, pero al siguiente, nel primer pegue coles coses clares y echándo-y un pelín de güevos, pol vuelu, salió perfeutamente, sacándola llueu tamién Vicen del mesmu mou que yo... dexándola los dos en 6b+.

Los nuesos primeros esfuerzos, foron hacia la versión de chapes marielles, pero nun fuimos nengún de los dos a sacar el pasu hacia esi llau, chapando la mariella. Al final, dempués de dos díes de pegues saquela vía númeru 4d, saltándome esa chapa mariella y chapando la siguiente ya penriba del desplome.

Tamién na mandrecha probáremos la vía númberu 6d, ya que la 5d sería la variante hacia marielles del 4d. Ésta, nos pegues ya intentones al 5d, tuviemos la oportunidá de probala en toprope, llegando hasta riba apretando munchísimu y por cantos romos, colo que nun sabemos de grau... pero tien pinta ser durina... de 6c duru.

Entamando'l trabayu na manzorga

Enantes de pasanos a la manzorga, miramos la séptima vía al fondu y desdexámosla por tar entera equipada (tamién la reunión) con spits y la roca paecer probe y suelta. Nel llau esquierdu, con un desplome sobre cuarzu y caliza brutal, intentamos entamar pol entamu, pero nun pudo ser la cosa.

Metíme con xeitu, a pola primer vía, nun pudiendo nin chapar el segundu seguru. Colgáu como un chorizu, decidí chapar la segunda chapa de la siguiente vía que va por tol desplome y ehí entamó una rellación amor-odiu con este viote.

Por turnos fuimos sacando pasu a pasu, chapando los tres seguros y aportando al ablucante llance dende un cantu perbonu. Ellí, garreme dempués d'un movimientu n'estáticu preciosu y nel cantu fíceme una caca tremenda pa llanzar en rebote hacia'l siguiente cazu.

Increyible vía, la segunda de la manzorga

Dióme tantu respetu, que preferí decí-y a Vicen que diba soltame a volar. D'esta miente lo fice, volando llateralmente, pero siendo tan desplomáu'l vuelu ye cómodu y non peligrosu, poro debería dar menos mieu de lo que tuve na realidá.

Entre rises y más rises, polos vuelos de caún, algamamos por turnos yo y Vicen hasta la cadena, escaeciendo el miu, y sacando dempués del llance, otra man penriba pa siguir saliendo hacia la cadena.

Hai que dicir, que dexamos un mosquetón vieyu pero en mui bon estáu, que taba pululando pela Trinchera, xusto nesta reunión. El motivu ye que nun hai posibilidá de recoyer el to propiu material dende la parte superior como nes otres reuniones.

Sinón tendríemos como nos pasó, que siguir trepando hacia la reunión de la primer vía, enriba la nuesa y hacia la manzorga. Ye cenciello, pero muncho meyor con ese mosquetón nesta reunión que nes otres.

Seya de quien seya... espero que nun-y paeciera mal... y si'l que fué per ellí, alcontró delles cintes nes reuniones dalgún día y les llevó, que sepa que yeren míes... despiste estúpidu.

 ------------------------------------------------------------------------------

9 d'Ochobre de 2013

Y siguimos trabayando duro, pa conocer y cotar les víes de la Trinchera'l Cadabal. La verdá ye que tamos enfotaos nesta pequeña ayalga de la Peña'l Cadabal y dempués d'encadenar toles víes de los otros seutores, alcuéntrome mui motiváu nesti llugar máxicu.

Aparte de Berto y yo, va xunísenos Vicen y Celso. Vienen del paré cimeru del Cadabal y col vientu que fai, dicen que nun se para de fríu, cosa que nesta trinchera tase estupéndamente. Celso esta vegada nun va poder esguilar per equí, por mor de ser toles víes desplomaes y dedícase a xugar con Kíla pela redolada.

Vicen encadenando la primer vía de la mandrecha... 6a

Entamamos, dexando que Vicen prebe la primer vía del paré de la mandrecha, sacandola a vista cenciello y sumando un sofitu más hacia'l 6a anque a Berto-y sigue paeciendo pelín más dura, nel intentu que ficiera enantes de la llegada de Vicen.

Berto encadenando la segunda vía de la mandrecha... V+

La siguiente vía a la preba, paecía tener más difícultá que la primera, pero magar de facela ún a ún, paeciónos más cenciella que'l 6a primeru, poro dexámosla nun bon V+, que caltien la parte más difícil na salida, pa siguir por una placa sofitada nuna fisurina que déxase facer hasta la cadena.

Encadenando la tercer vía... 6b

Dempués de tres bonos encadenes na segunda vía de la mandrecha, tocaba prebar la siguiente, la cual nun dexó posibilidá d'a vista ya que sin querer al compartir reunión, tanto Vicen como yo al baxar del V+, ensayamos el pasu clave, que ta nun llance a un cantu mui bono, dende dos ñapes.

Saliendo arriba magar del llance clave del 6b

El primeru en meté-y un pegue en condiciones fui yo, y nesti primer pegue a pesar de lo complicáu de colocar pies una vegada que tenemos bien afitaes les dos ñapes. Poro, sin pies bonos, toca llanzar al cantu y asína lo fice, saliendo ya del desplome y encadenando la vía ensín problemes.

Vicen nun bon intentu al 6b

Llueu tocó-y el turnu a Vicen, y tou bien hasta la colocación de pies y la gueta de les ñapes, onde equivocóse y nun tuvu la oportunidá de llanzar, teniendo que garralu Berto. Magar del reposu, ya sí colocóse bien y sacó la man al cantu pa siguir hasta la cadena cenciello.

Celso y Kíla xugando demientres esguilamos

Como pue vese nes semeyes, colamos de la Trinchera atapeciendo.... poro nun hubo tiempu pa más prebes, anque colamos d'equí permotivaos pa siguir apretando con xeitu vía tres vía.... el próximu día más.

 ------------------------------------------------------------------------------

3 d'Ochobre de 2013

Tan sólo quedábame por encadenar nos dos seutores conocíos del Cadabal una vía, Ébola. Así que, nun me quedaba otra que dir a por ella, teniendo na tiesta que diba costame muncho, ya que la referencia yera la so hermana de la mandrecha, que ya cotara de 6c.

Pero fuera de lo esperáu, entamé la vía hasta'l cordino onde agarréme pa chapar na so parte superior y probar los pasos. Lo raro, foi que ví la secuencia nesi mesmu momentu, un pelín más a la drecha de lo que probara otres vegaes.

Encadenando Ébola qu'al final quédase como 6b+

En realidá, encadené dos vegaes seguíes la vía, ya que primeru fícela col cordino chapáu na parte superior, y llueu fícela poniendo una cinta abaxo d'esti y otra enriba, teniendo que chapar dos vegaes y dexando claro, que nun yera tan difícil como paecía.

Así que viendo, la cantidá de pegues serios que-y dí a Ébola y a la so hermana, prefería dexar un pelín más baxo de cota Ébola quedando en 6b+ y 6c, siendo ambes de calter asemeyáu teniendo malos pies y ñapes cafiantes pa les yemes de los deos.

Sonia encadenando Afgánate (V+)

Con esto, dexo les dos víes más difíciles del Cadabal na so paré cimera, onde aparte de más llargues lleven más tiempu equipaes y muncha más xente les probó, poro supongo que'l grau tará más que revisáu. Namái pongo a estes dos lo que me paecen, ya que nun toi yo como pa cotar o descotar nenguna vía y siendo sinceros les del paré cimeru son más dures.

Mientres tanto, los collacios de vezu, Berto y Sonia, siguen machucándose nesta Peña y tamién tuvieron un bon día. Berto, sacó otru 6a del paré cimeru (la vía númberu 3) y Sonia sacó Afgánate nel seutor de la Cueva onde ta Ébola tamién.

Berto faciéndose cola tercer vía de la paré cimera, un guapu 6a

Pero bono, nun diba yo quedame tan ceo ensín víes que facer nel Cadabal y dempués de que Sonia lluchase duro col 6a de la esquierda del paré cimeru (vía 2), ensín algamar l'encadene, aunque ta a tiru, colamos pa esa ayalga na otra fastera del Cadabal.

Un día anterior, fuéramos a conocelo Berto y yo, quedando pelín ablucaos col llugar. Güei, como teníemos los deberes fechos, tiramos hasta ellí, aunque fuera a probar una vía tan sólo y de paso Sonia conocía esti pequeñu requexu del Cadabal.

Kíla camentando qu'habrá que camudar de seutor... equí acabose too

Aportamos hasta ellí y metíme de primeru a pola primera de la mandrecha. A simple vista paez tener bonos agarres y aunque un pocu sucia, tenía pensáu que rondaría'l V+. Pero cuando méteste nella, daste cuenta como desploma y llevar una especia de diagonal, fae qu'haya qu'aguantar dalguna puerte y too.

Salió a vista y dempués de probala, en toprope Berto y Sonia, paeciónos que rondaría'l 6a. Hai que dicir, que ye mantenida nel so desplome, y anque temos nel puntu de chapaxe de reunión, siguirá mandándonos apretar hasta'l final.

A vista la primer vía de la Trinchera... 6a paecióme

Pel momentu, esto foi tou na Trinchera'l Cadabal, nos próximos díes esperamos tar per ellí, pa dir conociendo dalguna vía qu'otra.... ta la próxima

 ------------------------------------------------------------------------------


17 de Setiembre de 2013
 
Pues llegó'l día. Si'l sábadu en condiciones de calor y humedá, na visita de Fernan, nun fui nin siquiera a tar cerquina del encadene. El martes, nun día fresquín, nel que tengo claru, que l'adherencia d'esta especial roca ye muncho meyor, encadené'l 7a dos vegaes.

Y digo dos vegaes, porque la primera, metíme un pelín a la mandrecha demientres ponía les cintes, pa asegurame nel pasu y volví a baxar pa facer la travesía colos pasos duros, nos que camudé la secuencia de pies y salió estupéndamente la vía.

Encadenando'l 7a del paré cimeru de la Peña'l Cadabal

Como nun me quedé agusto del too, ya que xubiendo más pela mandrecha pa meter la cinta llarga, llíbrase un pasín que quema fuercies, repetí la vía, cola cinta llarga puesta. Al segundu pegue, cola mesma secuencia de pies y tola vía pel sitiu como tien de ser, tamién algamela.

Así qu'otru 7a nel bolsiellu... el terceru no que llevo esguilando y el segundu esti branu tan provechosu.

Berto dando bona cuenta del 6a (vía 14)

Pa completar el bon día, tamién Berto y Sonia, sumáronse a la folixa. Poquín a pocu, los dos van completando encadenes nel Cadabal, y ficiéronse primeru Berto y llueu Sonia, cola vía 14... un 6a que como la vía 15 lo más difícil ta na salida a la cadena. 

Dempués d'ambos encadenes, fuimos hasta'l 6a de la vía 2, que fuera primer 6a de Paulina y tuvieron pegándose con él, hasta que-yos amosé como yera la secuencia. Paez ser qu'un pie que nun usaben, foi lo que resultó al final y Berto tamién la sacó y Sonia quedó a un tris dello.

Sonia faciendo más de lo mesmu cola vía 14 (6a)

Así que na... van quedándome mui poques víes por algamar nel Cadabal, tan sólo Ébola (6c+/7a???) del que nun tengo claro'l grau, ye la que tengo probada, ya que'l seutor d'onde'l vértice, nin siquiera fuimos coles cuerdes a miralu, si ta en condiciones de trabayar.

Más ceo que tarde, diremos a comprobar el trabayu que quédame nesta escuela tan apretona y prestosa a la mesma vegada....

 ------------------------------------------------------------------------------

14 de Setiembre de 2013

Dempués de los increyibles díes en Picos, ya inda cansáu física y mentalmente, tornamos la mañana'l sábadu a la Peña'l Cadabal pa esguilar un ratín. La tarde-nueche anterior, Fernan que ta de vacas, averóse hasta Xixón a facenos una visita.

Entamamos Fernan, Pau y yo, con unes cerveces, con Simón y Charly, pa llueu dir a cenar y cellebrar en condiciones les ascensiones de la Canal del Agua y el Picu Los Cabrones. Nun yera pa menos, foron grandes díes de montaña, que ya necesitaba pa escapar un pocu de tanto esguilar.

Gus y Pau apretando nun par de víes

Al día siguiente, magar del almuerzu, tiramos col mio hermanu, Sonia y Berto, hasta'l Cadabal pa trepar un ratín y pasar la mañana. Nunca vamos a esta escuela de mañana, y nótase'l calor y la menos adherencia na roca.
Asina queden les manes cola roca del Cadabal

Namái llegar, preparo'l 7a que tanto llevo trabayando y ya veo claramente que nun va ser d'esta. Na parte téunica ensín pies, el calor fae que nun haya manera d'aguantase, y a cada intentu patínenme los gatos y p'abaxo... nun va ser d'esta.

Fernan animóse tamién a da-y unos pegues al vertical paré

Menos mal, que tuve entreteníu viendo esguilar a tolos demás y a decir verdá, nun ye que tuviese les yemes de los deos, pa munches hestories dempués de catar la caliza más abrasiva de Picos, na parte baxa de Cabrones...

Sonia nel V+ de la fisura y yo a la preba'l 7a una vegada más

Tanto Pau como Fernan, animáronse tamién a apretar un ratín, pero aína colamos pa poder xintar con Fernan, na Pola (Siero), ya que Pau la nueche anterior nun pudiera quedáse, y quedáremos con ganes de tar más tiempu de charra los tres.

 ------------------------------------------------------------------------------

4 de Setiembre de 2013

Dempués d'encadenar mi segundu 7a na Manzanea, tocaba dir ver si sonaba la flauta otra vegada nel Cadabal. Pero nun fué así, y magar de 3 pegues más 1 de calentamientu, pa colocar les cintes, nun fui a algamar l'encadene.

A pesar de too, marché con clares sensaciones de que ta cerquísima, pero d'otra miente, lo que más me fastidia ye que durante los pegues fallaba na colocación y secuencia de pies, pero dempués de cayer, nel siguiente intentu siempre lo facía bien y aportaba a la cadena.

Alcontrámonos con esto....

En fin... quedóse ensín encadenar... pero a cada pegue préstame más, ya qu'estes víes técniques de pies, nos que tengo que memorizar la secuencia de pies y manes pa poder salir del pasu, ye lo que más ye a motivame.

Saldrá a non mui tardar, como a Berto, tamién-y ha de salir otru 6a qu'intentó (vía 14) nel paré cimeru. Tuvo a puntín de sacala, pero llegó tan petáu, que cuando quiso salir a cadena, nun fue siquiera a garrase de la cadena al vese mal, y baxó volando casi hasta'l pie de vía.... vuelaco fino.

Flipando en collores col allugamientu d'esti sector

Polo demás, llueu de perder tiempu nos nuesos intentos y dempués de falar con un rapaz, decidimos averanos hasta un sector que ta na cara contraria d'esta peña'l Cadabal, xustu embaxo del vértice xeodésicu. Ye una especie d'antigua cantera o dalgo asína, faciendo una especie de pozu, con una entrada enllena de peña sacao.

Parés de la manzorga y la mandrecha

El llugar ye espeutacular, casi paez máxicu. Metímonos ellí pa ver como yera l'asuntu y vimos que les víes tan bien equipaes con parabolts y que les reuniones tan con cadenes pero sin mosquetones. La verdá ye que tampoco-yos fae falta, ya qu'hai un camín qu'arrodia esti pozu y pué llegase de cadena en cadena pa recoyer lo que montemos dende riba ya ensín peligru.

Mandrecha (6 víes)

Así de primeres, nun me paeció ver nenguna vía "asequible" (pembaxo de 6a), paeciéndome toes durines, durines. Pero tengo claro, qu'en cuanto fine coles dos víes que quédenme nos otros seutores, tiraré hasta estos, pa llimpiar poquín a pocu esta pequeña ayalga y facer unos croquis.

Manzorga (3 víes)

Quiciás, fadría falta revisar bien tolos anclaxes y bono, como si too va bien, debería ventilar los dos proyeutos que quédenme nesta escuela ceo, que meyor que metéme a da-y aire a esti otru seutor de la Peña'l Cadabal.

Asína quédase Kíla dempués d'un día esguilando

 ------------------------------------------------------------------------------

24 d'Agostu de 2013

Siguimos semando... hasta que dalgún día toque recoyer. Esta vegada fuimos hasta'l Cadabal, pa que'l mio hermanu pudiera comprobar la dureza de les víes d'esta escuelina, ya qu'anque curties son verticales y con dalguna barriguina, lo cual fai petar enforma a los pocos pegues.

Y asína foi, ya que magar de metese unos bonos apretones nel V+ de la mandrecha, acabó bien petáu, como pa poder algamar la cadena nel 6a d'al llau. Ye lo guapu tamién, d'esta escuela, que nun permite munchos pegues a les víes ya qu'acabes reventáu al pocu tiempu, así qu'hai qu'andar fino y apretar nel pegue buenu, jeje.

Trabayando duro nel V+ y 6a de la mandrecha'l paré

Polo demás, tanto Berto como Sonia, siguieron apretando de lo lindo neses víes tamién, y tuvieron la oportunidá de prebar otru V+ que taba dalgo escaecíu y ye'l de la chimenea central del paré. Nesti casu, al poner una chapa más a la vía na so parte baxa, paez qu'anima a da-y con menos mieu.

Pau, tuvo a nada d'algamar el V+ de la vía 16, pero sigue quedándo-y mui llargos los movimientos pa la so estatura, lo cual ye un pilancu más pal encadene. Aún así, fizo lo más difícil y quedóse tan sólo a salir a la parte más tumbada de la vía.

Apretando nel 7a del paré cimeru del Cadabal

Pela mio parte, dediqué el pocu xeitu y fuercia que quedábame nesta selmana a da-y un pelín de color al 7a del paré cimeru. Nun soi a dar munchos pegues nesta escuela, pero nel intre, fici un primer pegue pa preparar la vía, ya que nel cuartu químicu necesito una cinta perllarga pa nun xugame un fostión épicu si fallo.

Asína que, a ese pegue hai qu'amestá-y otros tres más, dos enantes de xintar y otru dempués y más menos, los 3 foron mui asemeyaos. Ye perdifícil, acertar colos pies nel pasu clave, pa poder llanzar a una esquierda mala, pero los pasos peles pinces téngolos pillaos dafechu.

Vidiu d'un bon pegue... pero al final na

Pela cueta, la vía nun salió, pero ta mui al puntu ya, lo que sería mi segundu 7a algamáu, anque falta eso... algamalu. D'otra miente, esti día aparte, de marchar enfadáu con Kíla por entafarrase de cuchu, colé del Cadabal, cola sensación de tener el 7a a un tris del encadene.

A ver si pal próximu día... somos a ello....

Kíla esfrutando d'esta escuela y d'un güesu enorme

 ------------------------------------------------------------------------------

16 d'Agostu de 2013

Un día más, tornamos a la escuelina del Cadabal, col envís de siguir trabayando nes sos verticales parés. Nesti día averámonos hasta ellí, Berto, Natalia, Pau y yo, y como reciéntemente Abel equipó delles víes más cencielles nun pequeñu seutor a la manzorga'l cimeru, p'allá que fuimos.

Encadenando'l 6c ensín nome
Ya tengo fechu trabayu en toles víes esistentes na escuela, poro tenía que decidime por una de les 3 víes que réstenme por encadenar. La escoyida foi un posible 6c ensín nome, a la que tuve a puntu encadenar na última visita al Cadabal.

Kíla pasándoselo en grande demientres los demás esguilamos

Esta vegada sí qu'hubo suerte y aunque necesité de varios pegues p'algamala, pude poné-y la cruz a esta vía de pies inexistentes y movimientos sobre un invertíu y ñapes mui pegueñes. Munches vegaes acábes-y garrando zuna a delles víes hasta que l'encadene déxate con un tastu perbono y camientes lo guapo de dellos movimientos.


Berto trabayando nun V+ bien guapu... Afganate

Tanto Berto, como Pau y Natalia, tuvieron dándo-y al V ensín nome y a Afganate (V+), les cuales acabaron prestándo-yos un montón trabayar. Berto fue a encadenar les dos y Pau y Natalia, que veníen más relaxadas tuvieron apretando en toprope esfrutándoles enforma tamién.
 
Dempués d'una vía finiquitada llega'l trabayu n'otra... Ébola

Enantes de colar, tuve ganes de comparar la recién encadenada (6c) con Ébola, y quedóme bien claro, qu'ésta última va salir pelín más dura que la so compañera. Si amestámos-y el mesmu mal trabayu so los pies, tenemos que n'Ebola nun tendremos nengún invertíu curiosu como na vía de la mandrecha, lo que supón andar sin pies y con ñapes ínfimes p'apretar.... durina, durina va salir la vía.

Siguimos namoraos d'esta pequeña escuelina de la Peña'l Cadabal

Pero como tamos de vienres... decidimos colar ceo, alcontrándonos al baxar pol pueblu de Molleo, les fiestes parroquiales y como non, tomar unes botellines y finar xintando una costillada cola xente'l pueblu yera dalgo que taba perclaro, jeje.

 ------------------------------------------------------------------------------

1 de Agostu de 2013

Un día más de xornada braniega y como non, toca dir a trepar un ratín. Esta vegada, tornamos al Cadabal, ya que vien Pau, Berto y Jandro y siempre tienen coses bien interesantes a facer. Yo tengo menos proyeutos pero toos son difíciles así que con calma fui a ver si podía sacase daqué.

A Kíla como siempre-y encanta esti llugar y anque dempués tengo que quitá-y dalguna cabarra, la llibertá pa movese pelos praos al so antoxo ye tamién un motivu más pa venir. A nós, tamién préstanos a esgalla, porque ya pue facer el día de mayor calor n'Asturies que tase fresquín, fresquín nesi paré.

Así de relaxada va Kíla nel coche a esguilar

Ensín una motivación lloca, ponémonos a ello, y tanto Jandro, como Berto y Pau, van pasando pel V+ de la mandrecha'l paré, ensín qu'acabe de salir. Esta escuela, de víes cortes pero potentes, fai qu'anque paeza tener bonos agarres, hai qu'apretar con too pa salir de les barrigues y desplomes.

Pau, con tolo de trabayar durante'l branu, perdió esi puntu de dureza nes manes y pesie a tar fuerte, son les yemes les que sofren enforma, al garrar eses preses tan llacerioses pa la piel, poro sigue resistiéndo-y esti vía al igual qu'a Jandro y Berto qu'apreten pero nun son a da-y preste del tirón.

Preparámonos con calma pa trepar un ratín

Tócame'l turnu... y tiro pal 7a, ensín tener una gran motivación. L'últimu día, nun tuve bones sensaciones con esta vía, ya que paezme que ta mal equipada, con un químicu fuera de la llinea correuta pa facer la vía ensín trampiar pa les de los llaos.

Esto fai, que xuba les tres primeres chapes, y ensín pensalo, sálgame a la vía de la mandrecha, pa finar otra vegada na reunión del 7a. Equí, colgáu del descuelgue, póngome a trabayar na vía, con tranquilidá, poniendo una cinta llarguísima, pa ver si pueu quitame esi vuelu llateral tan malu en posteriores pegues y dir sacando los pasos.

Pau y yo, apretando nes muries del Cadabal

Aún cola cinta perllarga (empalme d'una llarga con otra cinta llarga), quédame lloñe'l seguru, pero metiendo bici y garrando una invertía camiento que voi ser a chapame y poder meté-y con ganes a tolo demás. Que ye tolo demás... pues una serie de movimientos a pinces mui anches, nos que los pies allumen pola so maldá.

Echando varios cagamentos, soi a dir descifrando tolos pasos, y anque véolo de lloñe a mui lloñe, esi color prietu de la vía, va camudando a gris escuru, asperando nos próximos díes de visita nel Cadabal, dir poníendolu hacia'l blancu pali pali.

Intentando alcontrar color al 7a... mui prietu nel intre

El restu del día, demientres Berto y Jandro, siguieron pegándose nel V+ y nel 6a de la mesma reunión, Pau acompañóme hasta'l seutor de la mandrecha, onde equipara Abel un par de víes curties pero apretones y d'equilibriu.

Metíme na que prebara, el caberu día y al segundu pegue, llegué hasta la reunión, poniendo una cinta y chapándome, pero queriendo siguir la travesía, pa poneme embaxo la reu, dando por finalizáu esti proyeutín, llancé a un furacu qu'albidraba meyor y cayí.

Asína, que vía nun encadenada, pero ta pa ello... asperando'l próximu día da-y al mesmu tiempu qu'Ébola pa poder consensuar graos pente elles y dexalos afayaizos pa cola dureza y llargura de les víes.

 ------------------------------------------------------------------------------

23 de Xunetu de 2013

Y dempués del finde en Cuevas de Mar, había que volver a l'actividá intentando xubir un pocu'l nivel amosáu en Cuevas. Pa ello, fuimos hasta la Peña'l Cadabal, a la cual tengo-y metíu tal repasu que namái quédenme por encadenar un 7a nel paré cimeru y dos posibles 6c's equipaos por Abel va pocu tiempu.

Berto nel V+ de la esquierda de la muria

Xuntámonos pa la ocasión Berto, Sonia y yo, y lo primeru yera meter a Berto n'acción nel V+ de la esquierda'l paré. Tanto él como Sonia tuvieron encadenando esi V+ y pegáronse con piores resultaos col 6a que comparte reunión.

Yo a la preba del 7a... pocu prestosu y feu de protexer
Con una motivación importante, metíme nel 7a que fáltame pa ver que tal yera. La metá de la vía ye mui factible, y les 3 primeres chapes faense bien hasta'l pasu clave pente la tercera y la cuarta, pero hai dos coses que faenla pocu agradable: un alexe perimportante pente chapes y que la cuarta ta fuera dafechu d'una llinea llóxica hacia la cadena, colo que'l vuelu llateral ye mui feu.

Falando con xente que conoz la escuela, dicen que llíbrase o pola esquierda, metíendose defechu na otra vía o pola drecha, metiéndose na otra vía tamién. Nun-y ví collor nesti día, así que tiré pela mandrecha chapando una de la otra vía y llegando a la reunión, con sensaciones males con esta vía.

Sonia ensayando un 6a pal futuru

Magar de mis apretones, colamos pa la mandrecha, pa da-y duru a les víes reequipaes va pocu. Sonia, ya tenía'l V+ de la vegada anterior y agora tocaba da-y al 6a, y fízolu perbien, ya qu'al segundu pegue facíase con ella.

Faciendo un V abiertu va pocu por Abel

Llueu d'apretar Berto tamién nella, tiramos hasta'l seutorín recién equipáu por Abel, al que paecía ser que-y metiera un par de víes más, pente Ébola y Afgánate. La primer delles ye un V, bien guapu, que sacante de la entrada a vía nun tien mayor problema.

Prebando un 6c? d'equilibriu con pies mui malos

 La otra vía, sal al llau d'Ébola y va de la man d'ella, ya que tien un tastu mui asemeyáu, con malos pies, ñapes ínfimes y munchísimu equilibriu. Casi sácola a vista, pero al final cayí enantes del pasu final a la cadena.

De grau, andará tamién nel 6c como Ébola, anque cuéstame abondo tener claro estos graos, pa víes tan curties como estes dos. Cuando les algame ambes, daré una cotación quiciás a la baxa, ya que nun se pue comparar cola importancia del 6c+ del paré cimeru.

Kíla a lo suyo... descansando

 ------------------------------------------------------------------------------

16 y 18 de Xunetu de 2013

Como camuden les coses nesto d'esguilar... nun m'alcuerdo bien, cuando prebé nun embarque  de los grandes el 6c+ de la paré cimera del Cadabal. Sólo sé, que metíme ensín querer, mirando unos croquis mui vieyos nos que nun sabía si ponía 6a+ o 6c+.

Esí día... salí xubiendo en artificial, pero unos spits vieyísimos. Pero nun m'imaxinaba de nenguna manera algamar esta vía en llibre. El tiempu dió pasu, a víes de 6a+, 6b y 6b+ d'esti paré, quedándome tan solo un 6c+ y un 7a.

Na parte inical del 6c+ del Cadabal

El 16 d'esti mes, dempués de recuperar los pies de la Travesera Picos 2012-2013, fuí con Sonia hasta'l Cadabal pa que probáse el V+ y 6a que reequiparen va pocu Jorge y el so collaciu, y que Pau y yo prebáremos va un tiempín.

Esi mesmu día, metíme nel 6c+ cola intención de ver si yera a nun tener que dexar nengún maillón pa baxame. Nun solo nun fizo falta, sinon que descansando una vegada de chapa a chapa, fuí sacando los pasos d'un intentu en otru hasta la cadena.

Resolviendo y encadenando pasín a pasu esta preciosa vía

Como yera normal, al día siguiente que decidimos esguilar, taba picáu y nun tuve que convencer nin a Pau nin a Sonia, pa tornar al Cadabal. La sorpresa fué, que nun primer intentu, poniendo les cintes, fui a algamar la vía, apretando y lluchando como en poques víes fice.

En resume... la motivación y l'entrenu lo ye absolutamente too. Esti iviernu, los incuntables entrenos de gym y bulder nel roco, ficieron garrar fuercia y dempués poquín a pocu, esti branu, fuimos ganando la confianza y motivación pa meteme a fueu nuna vía así, na que pude volar en varies ocasiones cola cuerda na man.


Sonia y Pau, dándo-y al V+ d'invertíos de la mandrecha'l paré

Valga esta actualización del blogue, como pequeña amuesa, de lo que podemos facer con motivación y entrenu. Paezme, que pa cualesquier cosina qu'intentemos facer nesta vida, si nun somos a caltenenos motivaos, centraos y continuos nel trabayu, nun van salir les coses así como así.

Na escalada, tamién hai que saber semar pa recoyer y esti añu, ta siendo una costante. Hai díes nos que nun s'algamen resultaos y colamos desfechos dempués d'apretar y otros díes, que podemos encadenar les víes al primer pegue, porque tenemos la fuercia, l'entrenu y la concentración pa facer les coses bien.

Ambientazu nesta pequeña escuela

Tan sólo, la paciencia y les ganes de volver al día siguiente a finar el trabayu entamáu, ye lo que va dános l'ésitu aseguráu. Desesperános y desmotivase, nunca nun dieron nengún bon resultáu, por embargu la continuidá y la confianza en nós mesmos son la meyor condición pa sacar cualesquier proyeutu.


 ------------------------------------------------------------------------------

4 de Xunu de 2013

Horariu de branu... casi sáltanseme les llárimes jeje. Así que, tiro hasta casa a xintar con Pau y Kíla, y garramos los trastos pa tornar a una escuelina, a la que siempre ye un placer dir a esguilar: la Peña'l Cadabal, pente los conceyos de Siero y Llangréu.

P'aportar a ella agora, magar de l'apertura d'un túnel de Riañu, cortándose l'antiguu acesu, tuvimos que dir hasta l'Hospital de Villa, onde gárrase la carretera que va parelela a la Minera y onde topámonos, cola carretera que va a L'Azorera, como antaño.

Anque, hai que dicir que viniendo dende Xixón, pola Minera, lo meyor va ser, salir en Bendición y tirar hasta Molleo, p'averanos a les parés, pela fastera contraria. Esta opción, tengo que prebala, pa ver que tal tan los aparcaderos ya que nunca la fice.

El casu ye qu'aportamos con Kíla, como lloca pelos praos d'embaxo'l paré cimeru, al pie de vía y alcuéntrome con que reequiparon dos de les tres víes que taben impráuticables. Vaya allegrón,... Pau ve en mi cara la felicidá de poder catar dos víes nueves, ensín pegame seriamente coles otres dos que tengo pendientes (un 6c+ y un 7a).

Kíla nel paré cimeru del Cadabal

Poro, preparámonos y métome a elles mirando los croquis y sabiendo qu'una ye V+ y la otra 6a. Entamo pol V+, teniendo unos romos de salida y llueu bonos furacos pa invertíos, que faen movimientos bien prestosos. D'ehí p'arriba, calma ya que la roca suel tar más rota y cadena.

Pau tamíen, prébala cola cuerda penriba y tamién-y presta pola vida. Ya tien equí un proyetu guapu p'apretar de primera. El 6a de la so esquierda, más de lo mesmu, salida perguapa, bonos cazos intermedios y cuesta un pelín más salir p'arriba d'una grieta, pero tamién a vista cenciello.

Otra vía pa entrenar Pau de primera, que tamién tira cola cuerda penriba con perbones sensaciones. Defechu, nun se dicir cual sería'l V+ y cual el 6a, ya que paécenme mui asemeyaes de dificultá, así que tampoco-y doi vueltes y déxoles como tan cotaes nos antiguos croquis.

Echando una güeyada a los V's del nuevu sectorín

Bien a gustu, animo un pocu a Pau, a dir hasta una paredina, na qu'Abel, equipó 3 víes curties pero que paga la pena prebar. La primera que faigo ye Afganate, que tien dos chapes y reunión, tando la primer chapa pelín alta, así que toque d'emoción y V+ al bolsu.

La segunda, A2ypico ta preparada pa facer con fisureros o n'artificial, pero viendo un cordinu, de la que baxo de la reunión, pongo una cinta llarga, na segunda chapa d'Afganate y otra nel cordinu y queda la vía pa facer tamién en llibre, resultando un V+ tamién.

Mui guapes les dos y agresives de roca, como toles preses d'esta escuela, jeje. Quedaba da-y unos pegues a una placa lisa ensín agarres decentes... Ébola, ye'l nome de la vía. Sal tumbada sobre una bona grieta d'esquierdes inclinada, pa xubir pies n'equilibriu, chapar a un cordinu y a partir d'equí, toca buscase la vida, con ñapes ínfimes y pies malos, pudiendo salise per dambos llaos, pero siendo una auténtica tortura pa les yemes de los deos.

Perguapa semeya d'una agarre

A la fín, nun salió pero saldrá, jeje y saldrá d'un grau curiosu... más menos 6c o 6c+, ya que nun tengo yo'l grau suficiente, nin víes feches de sétimu como pa ponela de 7a. Eso sí, siempre que vaya va tocá-y pegase conmigo a muerte.

En resume, primer día d'horariu de branu 2013 y prestosa tarde, la que pasamos los 3 nel Cadabal.... más ceo que tarde tornaremos per equí.

 ------------------------------------------------------------------------------

Hestoria na escuela de la Peña'l Cadabal

Otra pequeña escuela de calter llocal, qu'aparte de conocela pol nuesu collaciu Vicen, tuviemos la suerte de pasar penriba nuna rutina pela Xerra La Paranza: L'Azorera (Llangréu) - Xerra La Paranza. Y ye la Peña'l Cadabal tien un vértice na so cumera, pero na so faldera tien una muria vertical perllarga y delles pequeñes muries más calices onde facer búlder.

El búlder ye lo que más prodígase nesti perguapu llugar, onde les vistes a Peñamayor y dellos montes del parque de Redes (Reres) son bien guapes. Pero nun solo de búlder falamos, ya qu'esta llarga muria tien hasta 18 víes posibles y dalguna posibilidá d'equipar más al igual que n'otres llugares del Cadabal.

Travesía onde la paré


P'aportar a esta escuelina, hai que llegar hasta'l pueblu de l'Azorera en Llangréu y nel enllaz de la ruta desplico como facelo. Hemos de tar sollertes, a qu'esta escuelina de calter llocal, ye un tarrén priváu onde pastien les vaques y caballos na redolada.

Debemos ser conscientes de que podremos esguilar, demientres respetemos fondamente los pastores llétricos pasando con curiáu penriba o pembaxo y ya nun digo a los propios animales, nin al entornu, nin a los llugares onde dexar los coches ensín molestar los accesos.

Primer 6a de Paulina... pergayoleros la escaladora y l'asegurador

No deportivu, la roca tien un tautu raru y cuesta un pelín facese a ella. Ye una caliza agresiva, d'agarres romos y dalgo sobaos poles travesies, pero tamién de ñapes de munches formes, siendo difícil lleer a vista una vía, anque váyase sobrau de grau.

Si a esto, amestámos-y lo vertical y casi desplomáu a cachinos de les víes, fae que los petazos y esfuerzos pa sacar una vía seyan importantes. D'otra miente, les munches ganes de da-y pegues a les sos cortes víes, casi a mou de rocódromu, ficieron que tenga casi toes elles encadenaes, sacante d'un 6c+ y un 7a.


Tamién, hai que dicir, que tan en procesu de reequipamientu y les 3 víes de la mandrecha tan ensín reequipar inda, poro nun metese nelles, por mor de que los descuelgues y los spits tan desaniciaos. D'igual manera, güeyu na parte superior de les víes, ya que la roca ta más roto y podemos tener dalgún sustín, al finar la vía.

Aún así, lo más importante ye que nesta escuela fizo'l so primer 6a, Pau y fízolo teniendo qu'esforzase muncho más que cualquier otra persona, al nun llegar cenciello a les preses clave. Dempués de sacar los movimientos de manes y pies al detalle, en pegues d'entrenu, motivose pa meté-y un pegue brutal con llance incluyíu pa encadenala.

La verdá ye que nun se cual de los dos taba más contentu aquel día, si ello o el que la s'aguraba animando...

Ya tengo ganes de volver per ellí, jejeje, anque pa les tardes de branu o mañanes de fin de selmana ye la cuenta.

4 comentarios:

  1. Paezme que perdimos un montañeru, :-(
    Escapósenos pa lo de la cuerda.
    Ye broma Berto!
    A mi tamién me gustó mucho escalar haz años
    Un abrazu ;-)

    ResponderEliminar
    Respuestas
    1. Bah, nun t'esmolezas. Tan a la par les dos aficiones y amás llévense mui bien, jeje. Lo que pasa ye qu'estes entradines pequeñes de lo que facemos escalando tamién presten y casi son más davezu que les entraes montañeres.

      Un abrazu Monchu

      Eliminar
  2. Lo más prestoso ye la tranquilidá de Kila. Vese que ta avezada. Cualquier día vesla colgada y a tou meter.

    Saludos

    ResponderEliminar
    Respuestas
    1. jajaja yera lo que me faltaba... cuando monta nel coche ya sabe que ye pa tar suelta por ahí, así que va encantada.

      Y cuando cansa de correr, goler y demás... pues túmbase a la solombra y a durmir o descansar.

      Ye mui buena la perrina... vive meyor que nosotros, jeje

      Un saludu Nel

      Eliminar