martes, 14 de julio de 2015

Azarrulla (La Rioxa - La Rioja) - Cuculla (San Lorenzo) - Valdezkarai (La Rioxa)

25 d'Abril de 2015

Track: Azarrulla (La Rioxa - La Rioja) - Cuculla (San Lorenzo) - Valdezkarai (La Rioxa)


Llevantámonos ceo nel pueblu rioxanu d'Ezkarai, onde aportáremos ayeri de nueche. Tamos nun pisu del padre d'Haritz, Dani, Zori, Richar, Pau y yo y dimponémonos a almorzar mil hestories bien riques que traxo Zori.

Cuando tamos bien fartucos de palmera xigante d'Unquera, salimos como tiros hacia l'antigua estación d'Ezkarai, onde xuntámonos tolos miembros del Baskonia y del GM Xuan de la Borrina, repartiéndonos en rutes más o menos complexes.

Preparándonos n'Azarrulla (950 m)

D'aniciu, vamos xubir tol GM Xuan de la Borrina y Baskonia al monte San Lorenzo, nome cristianizáu del Cuculla, que significa capucha. Esti cumal, ye'l puntu de más altor de la Rioxa y de tola xerra la Demanda o montes Idubedas que nomábense cuantayá, hasta que magar de delles "demandes" polos pastos pente los pueblos de la redolada acabó por da-y tal nome.

Tamos nuna fastera de clara toponimia euskaldun y presta asgaya intentar echar una güeyadina sobre antigües formes toponímiques y los cambeos que fueron sufriendo hacia'l castellán, anque como siempre lo primeru ye'l monte y la ruta que vamos llevar alantre.

Xubiremos pegaos a la riega Usaya per una sienda bien prestosa

El día ta bien murniu y nun tenemos ni idega de si seremos a ascender siquiera. Con too, los grupos vamos separtanos en dos rutes de más y menos dificultá, saliendo tol Xuan de la Borrina dende Azarrulla, acompañaos por Kike, Bittor y Amaia y el Baskonia capitaneáu por Fernan, qu'anda tocáu xubirá con calma dende Valdezkarai.

Al pocu d'entamar l'ascensu pegaínos a la riega Usaya, tendremos delles llamaes al móvil comentándonos el mal tiempu qu'hai pa la parte alta de la xerra la Demanda. Nun llevamos nin media hora caleyando y les noticies son permales.

Entama a orbayar pero decidimos siguir alantre hacia'l colláu de Zalguria

Aún así, el camín ye bien guapu ya que tamos faciendo la ruta de los "7 puentes" nel barrancu del Usaya, que perpasa penmediu d'una viesca preciosa, dándonos cierta alcordanza a les viesques asturianes de faya.

Col pasu del tiempu y cruciando ponte tres ponte, aportamos a un crucie onde con bon orbayu cayendo sobre nós, tendremos si decidir si seguimos o non. Nel intre, ye Bittor quien pon más ánimu al asuntu y gracies a él siguimos alantre hacia'l colláu de Zalguria, xubiendo n'envuelta pela Umbria d'Usaya.

Siguiremos agora per pista maderera hacia Orquicia

Dende Zalguria, camudamos el sen del camín, empobinándonos ya per pista maderera, nel que dexamos atrás les guapes siendes pente les fayes, pa metenos en pistes madereres de pinares qu'afeen enforma'l nuesu andar.

De toes formes, avanzamos apriesa peles pistes ascendiendo per una llomba hasta'l llugar d'Orquicia, onde topámonos cola pista forestal que vien dende la estación d'esquí de Valdezkarai finando nel colláu de les Tres Cruces.

Fríu pero cómodu ascensu hacia'l cumal del monte San Lorenzo


Nós, nun llegamos hasta esi colláu y siguimos ascensu dexando a la nuesa mandrecha, l'Altu de Bogolrrucia garrando l'amplia arista sur del picu Cuculla, la cual xubiremos tapecíos per una densa borrina qu'escupe un finu orpín.

Ensin mayores problemes fadremos cumal nos 2271 m del San Lorenzo (Cuculla), que ta enllenu de santos, estatues, cruces y la de dios, lo cual nun me presta res. Poro, sacamos les semeyes de rigor, con cara de felicidá y bon esfuerzu ya que'l desnivel aportó hasta los 1300 m aproximáu y tirámonos abaxo ya que'l vientu y el fríu son fonderos.

Semeya esitosa del grupu nel San Lorenzo (2271 m)

Xustamente, namás camudar de fastera na baxada, el vientu queda atrás y la sensación térmica asciendo faciéndonos quitar dalgo de ropa y too. La baxada sedrá cenciella per un cómodu senderu de primeres que llueu fadrános al altor del primer remonte baxar corriendo per un ñeveru hasta'l Portillo de Nestaza.

Baxaremos aina hacia'l Portillo de Nestaza pa encarar la Cabeza Parda

Nos 2033 m del Portillo, charraremos un ratín y dalgunos de nós decidimos siguir esfrutando de los siguientes dos miles del cordal. El primeru d'ellos ye la Cabeza Parada y práuticamente somos a encumalo con tan sólo l'emburrie que trayíemos de la baxada del Cuculla.

Ascendemos a los 2119 m de la Cabeza Parda siguiendo hacia la Cuña

Escaecemos la Cabeza Parda y baxamos hacia otru colláu, muncho más fondu que l'anterior, el cual dexa pa prau l'ascensión al siguiente cumal, La Cuña, pa munchos del grupu. Haritz, Amaia, Pau y yo, decidimos continuar con fuercies renovaes por nun dexar un dosmil güerfanu tando tan cerquina.

Toca sufrir n'ascensión a la Cuña (2014 m) por mor del vientu

Dalgo más complicada sedrá l'ascensión de la Cuña, alcontrándonos otra vuelta col vientu y dellos trabes que tendremos que llibrar como meyor podemos. Les ñubes prietes, amuesen que vamos finar la ruta moyándonos, cosa que dende los 2014 m de la Cuña hasta la estación nun vamos poder llibrar.

Menos mal que'l descensu ye curtiu y la lluvia nun fué tan gafa como pintaba, poro alcontrámonos baxo los edificios de la estación con Fernan, Juanan y demás conductores que veníen buscanos a los últimos miembros de la ruta.

Descensu hacia Valdezkarai onde finaremos la nuesa travesía

Llueu falaríemos con calma, contándonos qu'ante'l mal tiempu que teníen na estación, prefierieron conocer dalgún monte más baxo al norte d'Ezkarai, onde siempre tuviemos viendo unos cielos más azulinos llibres de la ñubosidá escura y del borrín.

En resume, ruta mui guapa na parte baxa al traviés del barrancu del Usaya, pa pasar a la típica xerra  castellana, dándome sensación d'asemeyase al Moncayo tanto na so morfoloxía como na so mala meteoroloxía.

Magar de baxar hasta Ezkarai, esta vegada dexamos la cervecina del final de ruta pa un pelín más tarde, ya que la ducha yera más que necesaria pa relaxase de les 6 h 50 min, 24.5 km y 1630 m de desnivel acumuláu que nun ficieron otra cosa qu'abrinos la fame pa una cena que quedaría n'alcordanza de toos nosotros pa siempre.

No hay comentarios:

Publicar un comentario