miércoles, 20 de mayo de 2015

Busecu (Valdés) - Capiel.la Martín

14 de Febreru de 2014

Track: Busecu (Valdés) - Capiel.la Martín


Siguimos con munchísima ñeve nos montes astures, poro decidimos facer una ruta pel occidente, onde camentamos que los montes de fasteres noroccidentales pueden tar ermos del mantu blancu, al raspiar los mil metros.

Decidimos dir conocer el Capiel.la Martín, ún de los montes más importantes del occidente astur y sobretou del conceyu de Valdés. Pa ello, saldremos de Xixón pela autovía'l Cantábricu hacia L.luarca, parando un pelín enantes a almorzar en Cadavéu.

Partimos de Busecu (460 m)

Siguimos autovía alantre hasta pasáu L.luarca, saliéndonos na retonda de dempués de los viaductos de San Timotéu y el Zurracu. Ellí, garraremos una carreterina que tien de llevanos hasta Setienes onde garramos la As-36, siguiendo carretera alantre pasando per Menudeiru, La Carboniel.la, Los Conqueiros y Belén onde paramos un segundín a falar.

Nel intre, ta lloviendo enforma pero les previsiones nun yeren ta males como tamos teniendo'l día, así que-y echamos un plizca de valor y ya que tamos en Belén, decidimos siguir un pocu más hasta'l nuesu puntu d'aniciu na braña de Busecu.

Xubimos de Busecu hacia las Penas de la L.lagúa

Tenemos suerte y nun llueve mientres preparámonos, asína que saldremos de los 460 m de Busecu, caleyando nunca meyor dicho, pente los caleyos d'esta braña... y manda coyones que somos a mediu perdenos teniendo que salir a altu'l pueblu pa garrar el camín bono.

Una vegada que vamos empobinaos, diremos xubiendo altor hacia las Penas de la L.lagúa hasta dar coles vistes a ún de les cotes que tenía na tiesta nesti dia: el Picu Concernosu. Tamién damos de focicu a la escontra d'un airón molestu tirando a insorpotable dacuando.

Sofrimos abondo por mor d'un vendaval descomanáu

El día va a pior según xubimos desnivel y aportamos a un puntu, onde deberíemos pasanos a la otra fastera'l valle, onde baxa'l regueiru la Gallega que baxa hacia'l pueblu de Siñeiriz. Nel intre, tenemos el primer erru del día, al nun pasar al valle y parte del grupu abandona por mor del vendabal qu'alcontramos.

Los que quedamos siguimos lluchando hasta l'arista, xubiendo pente toxos y delles fasteres arbustives más, amestáu a dalgún tramu de pizarra resbariosa. Esto fai, que cueste munchu superar l'entepechu hasta l'arista y una vegada qu'aportamos a ella... el vientu torna más fuerte si cabe, tirando p'atrás a otru grupín que deciden baxar.

Faldiamos hacia'l sur onde l'airón pega menos con vistes al Concernosu

A los 5 minutos de siguir los demás, dámonos cuenta del erru de dexar baxar a los demás, ya que los nuesos pasos casi ensin querer lleváronmos hacia esi valle nel que nun pescanciamos que'l picu Concernosu, bon cumal de la xerra Busecu diba aportanos esi abellugu del vientu tan necesariu.

Si amestamos a tar protexíos, el cambeu de direición al bordiar el cumal, tendremos un ascensu más sele al dir emburriaos pela espalda hacia'l cumal poles raches de vientu. Poro, aportaremos a los casi mil metros de monte, sacando les semeyes lo más aina posible pa colar pa embaxo.

 Cumal del Capiel.la Martín (983 m) casi esnalando

Casi tamos el xustu tiempu pa semeyes de cume y tiramos pal valle esnalando ya que nun hai quien pare, quitándoseme de la tiesta tamién facer tola xerra Busecu, viendo qu'entá tien dalgo más de ñeve y ya nun tendré la proteición del mesmu cordal.

Asína que too tiesu p'abaxo hacia un bon camín, el cual nas Penas de L.lagúa tendríemos de garrar y nun lo ficimos. Ésti diba llevanos a xubir hacia'l colláu de Bobia y d'ellí al cumal del Capiel.la Martín ensin esfuerzu col vientu de culu, pero fizómoslo dafechu del revés.

Baxaremos protexíos pel valle del regueiru la Gallega hasta Busecu

Ensin más y con cierta pena, por nun andar sollerte a los convites del monte a facelo meyor, descendemos al alcuentru del últimu grupu n'abandonar col que baxaremos hasta Busecu pa dir camudanos de ropa en Belén y tomar un vermú col restu que cuantayá abandonara tando más a gustu tomando un cafetín nel chigre de Belén que los demás pel monte.

En resume, ruta curtia, non completada nos mios planes, poro tendré que tornar a facer dalgo más curiosu per esta xerra Busecu con un día guapu a poder ser. Nel día de güei, ficimos 5,5 km durante 3 hores y superamos un desnivel positivu de 540 m.

Camudando'l Camín nes brañes de Valdés

2 comentarios:

  1. Iñaki "Txinaski"24 de mayo de 2015, 15:07

    Guapa salida para hacerla con un tiempo tan rarete .
    Recorrido explicado perfectamente claro y conciso.
    Saludos para ti y para todo el grupete

    ResponderEliminar
  2. Que tal Iñaki, gracies pol comentariu. El tiempu nun daba pa más. Un abrazu

    ResponderEliminar