viernes, 20 de febrero de 2015

Rocódromu de Mataxove (Xixón)

17 de Setiembre, 1 d'Ochobre, 26 de Payares de 2014 y 17 de Xineru de 2015

Llega l'iviernu y toca entrenar atecháu y como non... dellos díes pasamos pel roco de Mataxove, onde alcuéntrase a diariu gran parte de la comunidá escaladora de Xixón y casi d'Asturies. Esto ye así y si vas un día per selmana y a una hora punta pues quedar ensín entrar como nos pasó dalgún día.

Estes coses y poder llevar al sobrín hasta'l roco, fae que fuéramos munches más vegaes hasta'l roco de Llugones, ya que pue tar el carru tranquilamente, con menos xaréu qu'en Mataxove. De toes formes, dellos díes sí que fuimos y anduvimos entrenando un ratín ensín matase, tornando a facer víes que ya tenía nel bolsiellu.

Póngovos los croquis actualizaos, ya que moviéronse preses y modificáronse los graos de munches d'elles. A ver si pocu a pocu, voi garrando nivel y tachando de la mió particular llibreta d'entrenos.

 
Croquis modificaos por mí del tablón del roco de la Calzada. Gracies y col so permisu.

 
--------------------------------------------------------------------------
23 de Marzu de 2014 

Durante estos últimos cuatru años, nun se nin la cantidá de vegaes que fui hasta'l roco de la Calzada o Mataxove que ye onde na realidá asítiase. Ellí entrenen práuticamente a diariu, munchísimos de los esguiladores de Xixón y d'Asturies, ya que les sos altes muries y víes de resistencia son la cuenta pa ello.

Taba yo encantáu de mis entrenos nel roco de Llugones, hasta qu'acabóse la hestoria nel trabayu y pasé a dexar d'entrenar bloque. Les mios visites dacuando a la Calzada, pa entrenar resistencia deberíen convertise nun vezu, pero a la fín, nun soi capaz d'algamar nin siquiera una visitina a la selmana.

Esto ye así, ye un fechu que sé que ta restándome posibilidaes nes víes desplomaes na roca. Cuando'l tema ponse tiesu, los brazos pétense y nun soi a dar lo meyor de mi mesmu. Poro, dánseme bien les víes de placa n'adherencia con pasinos duros sueltos y descansos magar d'una barriga o un techín.

Nesta vida, hai qu'entrenalo too y necesito entrenar munchísimu les víes llargues desplomaes si quiero siguir xubiendo'l nivel. Así que, como soi de tachar retos, vamos poner los croquis del roco de la Calzada, que va pocu punxeron actualizaos nel tablón de la entrada.

Tengo munches víes más que les marcaes, pero apetezme entamar de cero y dir pocu a pocu, sacándoles de nuevu hasta xubir grau... a ver si voi siendo a ello col tiempu.

--------------------------------------------------------------------------
Un pasu más nel tema d'esguilar peles parés, agora que tengo dalgo de nivelín nel búlder, ye da-y al tema del esguile en altor. Pa ello, así un pocu de casualidá, entereme d'un cursu de la casa conceyu de Xixón, nel nomáu Rocódromu de La Calzada.

Asína qu'apuntéme y tuvi un mes y algo deprendiendo tres díes en selmana durante hora y media, poro paecióme más que suficiente pa que dalguien que tien interés, acabe con más ganes inda de metése nello. Si tengo que recomendar dalgo, ye esti cursu. Pol preciu que tien, menos de 60 euros, pues prauticar muncho y bien, garrando al menos tolo necesariu pa poder dir pola to cuenta.


Un par de semeyes del roco n'altor

Y esto que digo ye perimportante, porque ta claru, que pa siguir avanzando y si te presta esti deporte, vas tener qu'acabar mercando material. Poro, un cursu d'estos, dizte a les clares si ties aptitues, si sufres col altor,... en definitiva si te presta poner el cuerpu na llende. Y por qué digo esto?? Pues porque equí, dante tolo necesario, materialmente falando, pa comprobalo. Si nun quedes convencíu de que quies siguir, nun lo faigas, porque'l desembolsu de perres en material ye caro, y tien que gustate pa facelo.


Zona de búlder


Magar d'estos apuntes, pasamos al tema personal del cursu. Pa min, foi positivu en parte, pol tema de deprender materiales, y tolo que necesito pa poneme con esta modalidá, anque sigo namoráu del búlder, ya que teúnicamente, tien esi puntu tan guapu, que l'altor de momentu, nun me dexa acolumbrar, ya que con completar les víes tengo abondo, jeje.

La parte negativa, ye'l baxón físicu que toi sofriendo, pola lesión na pata, la que nun me ta dexando entrenar nada, tando tol mes yendo namás al cursu a ver que se podía facer, ensín disfrutar rialmente de tolo que llevaba hasta agora entrenando.

Como puntu final, dicir que pude completar toles víes más fáciles del rocódromu, faciendo un 6a+, nel mio mayor ésitu. Camiento qu'esto solo foi l'entamu porque esti rocódromu de 17 ms d'altor y 35 víes posibles, tien muncho más qu'ofrecerme nun futuru mui, mui prósimu.

2 comentarios:

  1. 6a+?? Un poco más y das tu el curso, jajaja.

    Estoy curioseando por aquí, vaya blog más completo que tienes.

    Saludos.

    ResponderEliminar
  2. Gracies Jose Luis, como ves soi más montañeru qu'escalador, pero pocu a pocu vamos avanzando

    Saludos

    ResponderEliminar