jueves, 8 de enero de 2015

Vegarrionda (Cangues d'Onís) - Vega Enol - Fana - Les Travieses - Mestes - Xenra - Orandi - Cuadonga (Cangues d'Onís)

8 de Xunetu de 2014

Track: Vegarrionda (Cangues d'Onís) - Cuadonga (Cangues d'Onís)


Cuartu día de Travesera 2013-2014 y magar d'una nueche estupenda nun refuxu vacíu, durmiendo caún a pierna suelta nuna esquina de l'habitación... espertamos con otru día borrinosu, fríu y orpinando pa completar ya dafechu, la pior Travesera na nuesa pequeña hestoria.

Entamamos pente la borrina en Vegarrionda (1454 m)

El día de güei tien de llevanos hasta Cuadonga nun llargu descensu, queriendo conocer nesti primer tramu la canal de la Mostaya per onde baxa la riega Ridimuña que llueu conviértese nel ríu Pomperi, pocu más alantre del míticu Pozu L'Alemán... pero col día que mercamos probamos un pelín de suerte y aína decidimos garrar camín conocíu pa baxar a Pandecarme.

Restolamos caleyos pero acabamos pela normal hacia Pandecarme

Poro, garraremos camín perconocíu pela Rondiella y canal de Canrasu hasta la Vega la Piedra, onde pocu más alantre topámonos col Ridimuña, pa siguir pela Vega'l Güertu metíendonos nel ampliu camín hacia Pandecarme.

Acompañados por Fernan caleyamos per pista hacia la Vega Enol

Dende Pandecarme, ya sí que siguiremos per pista caleyando sele hacia la Vega Enol cosa que nunca nun ficiera tovía. Los nuesos pasos, fuera del orpín y col sol queriendo asomase, llévenmos al llau de la Vega la Cueva y pocu enantes de la d'Enol, dexaremos a Fernan al llau de la furgo, col envís de venos unes hores dempués en Cuadonga pa la xinta final de Travesera.

Aportaremos al siempre guapu llagu Enol y xubiremos hacia'l colláu les Valeres, anque a posteriori arrepentime de nun xubir a la Porra Enol, ún d'esos montes con hestoria deportiva anque pocu altor, al que nunca dióme por xubir y ya diba siendo hora.

Siguimos camín hacia la braña de Fana pasando peles Valeres

Caleyaremos al llau de la carretera que baxa de los llagos, saludando al pocu a Fernan y empobináremonos hacia la guapa braña de Fana, que caltien cabañes bien curioses con dalgún mastín más lladrador qu'otra cosa.

Dende Fana, siguiremos per bon camín, marcáu como GR-202 (camín de la Reconquista o dalguna tontería pol estilu). Ésti, tien de llevanos nun continuu xube-baxa de colláu a vega y de vega a colláu, pasando pola vega Les Travieses, siempre a la vera del cordalín del Porciles.

Garramos bon camín que coincide col GR-202 pasando poles Travieses

Aportaremos a un puntu nel que tendremos a vista, l'únicu oxetivu a ascender del día... la Peñe Xenra, cumal penriba del monte Auseva y de la Cuadonga, onde ta la imaxe mariana tan venerada por muncha xente asturiano y foriato.

Baxaremos con xeitu pol Pandal hacia Les Mestes, onde aparte de dalguna cabaña topámonos col ríu del mesmu nome, el cual siguiremos quiciás nel tramu más guapu de tol día, ya que caleyaremos averaos a delles poces d'agua cristalino.

Baxamos hacia'l valle Les Mestes siguiendo la riega hacia Orandi

El nuesu caleyar hacia Orandi, pesie a que'l solín acompaña a la fín con ciertu toque gayoleru quiciás, tien d'interrumpise pola ascensión a la Peñe Xenra. Namái, vadiar el ríu nel Campu L'Escobiu tocarános tornar a la manzorga pa xubir pela vallina la Ilesia hacia'l nuesu oxetivu.

Desviámonos faciendo l'ascensu a la Peñe Xenra

Tol senderu será bono, sacante la parte final, na que faese nel cumal una mestura de peña calizo afilao y broza, costando más de lo naguao, aportar a los 751 m de la Peñe Xenra. Nun ye nin guapu, nin la cume más alto de la xerra Raíz... pero como ta enriba la cuevona, pues paez ser que garró dalgún tipu d'importancia estúpida a mi mou de ver.

Cumal de la Peñe Xenra (751 m)

De toles maneres, tampoco paramos muncho a saber si tenía importancia o non esti cumal y tirámonos pel mesmu camín abaxo lo más apriesa posible hasta'l Campu L'Escobiu, onde con pocu más camín aportamos a la parte superior de la Cuadonga... Orandi.

Descendemos hacia la cueva d'Orandi pero onde desapaez la riega hasta Cuadonga

Equí, sí que paramos un ratín a facer semeyes y asomar el focicu, viendo un sistema de cuerdes que supongo será usao por espeleos, ya que nun ye nin tan siquiera mediu seguru averase dientro la cueva, siendo cada pasu un peligru de resbariar importante.

Con un tastu muncho meyor, tiramos al caberu tramu de ruta del día y de tola travesera, xuntándose dende Les Mestes hasta'l collaín d'Orandi y pela Matona a Cuadonga lo meyor y más curioso de tol día. 

Finamos la travesera en Cuadonga col guapu camín de la Matona que baxa dende Orandi


Anque hai que dicir, qu'esta baxada pela Matona hasta Cuadonga ye un camín mui, mui encomendable a la xente con ganes de caleyar un pelisquín, pero cuando vas cansáu de varies hores como tou camín empedráu faise pesao.

En resume, ruta mui meyorable, pudiendo amestar dellos tramos más atrautivos y dalguna ascensión más, pero pa nós col entamu borrinosu del día y cola xinta final de Travesera valiónos enforma. Aún así, completamos un percorríu de casi 21 km en casi 6 hores de bon pasu, ascendiendo unos 500 ms de desnivel acumulao siendo la baxada lo más duro: 1745 m.


Camudando'l Camín n'Orandi

Nesta ruta ficimos un monte prestosu astur: Peñe Xenra (751 m)
Ver progresos en: Retos montañeros

2 comentarios:

  1. Buena travesía Berto, me trae grandes recuerdos esa vega de Orandi y la cueva, también el río con sus meandros....
    Hice una travesía distinta también haz unos años con el grupo de montaña pasando por esa cumbre y bajando a Caño.
    Lo dicho, me haces recordar tiempos pasados y buenos momentos. Un saludo y feliz año!

    ResponderEliminar
    Respuestas
    1. Feliz añu Monchu... ya ves, nun tuvimos bon tiempu nin un día... pero aprovechámoslo lo meyor posible.

      Un saludu

      Eliminar