martes, 11 de noviembre de 2014

El Puertu (Somiedu) - La Penouta

18 de Mayu de 2014

Track: El Puertu (Somiedu) - La Penouta


Tamos na Xuntanza Asturvasca 2013-2014 nel pueblu somedanu del Val.le. Llevantarémonos con calma y magar del almuerzu nel Hotel Rural Somiedu, col bon facer de Naciu, dexaremos esti pueblu pa empobinanos hasta'l Puertu Somiedu, onde alcontrarémonos con Pangua.

Si viniéremos de Xixón tendríemos de garrar l'autovía "Y" en direición Uviéu pa siguir dempués en direición Grau pola As-63, hasta la salida de Cangas del Narcea. Equí tomaremos la As-15, travesando parte del conceyu de Salas y entraremos nel conceyu de Miranda, siguiendo pola As-227 hasta l'entamu del conceyu de Somiedu, Aguamestas.

Entamamos n'El Puertu a 1481 m

Dende Auguasmestas pasaremos pelos pueblos de Xadriz, La Riera, Recueva, Castru y La Pola Somiedu, onde entama l'ascensu hacia'l Puertu, pasando pelos pueblos de Gúa, Caunéu y cerquina'l propiu puertu la braña La Peral.

Tenemos otru día d'espatarrar, asína que vamos esfrutalo con calma pero sin pauses, que tenemos la xinta fin de xuntanza al términu d'esta ruta. Ésta, nun va ser otra que l'ascensu a la Penouta, perguapu monte que bien merez tar ente los más prestosos d'Asturies.

Avanzamos al llau de los Praos cola Penouta siempre nel puntu mira

El camín ye cenciello, caleyando per una pista amplia siempre cola vista de la Penouta al frente. Hai que dicir que comparte un tramu col de la ruta normal al Cornón, el cual vemos con ñeve abondo a lo lloñe.

Asína que, caleyaremos penriba los Praos (Vieyos y Nuevos) que tan bien caltenios tan, pasando pel Foxacu y las Erías enantes d'aportar a un posible crucie hacia la fastera norte de la Penouta pol camín de la Paradina.

Perpasaes las Veigas de Penouta encomencipia l'ascensu

Nun ye'l casu, anque teníemoslu na tiesta pa una posible vuelta y baxaremos un pelín a las Veigas de Penouta, onde hai una reciella caballos de bon porte. Nesti puntu, travesamos las Veigas y decicimos averanos a la faldera de la Penouta col envís d'aportar al colláu occidental.

La fastera occidental de la Penouta ye una pindia panda, qu'amestada de caliza y vexetación fadrános tirar de paciencia, restolando cual ye'l meyor camín pal so ascensu. Nesti casu, Pau y yo, escoyimos l'atayu y ficimos dalgo más d'esfuerzu que los demás, qu'arrodiaron a la gueta d'un bon senderu.

Facemos l'últimu tramu crestiando hasta'l cumal de 1976 m

Les vistes, de la que vamos xubiendo altor van abriéndose hacia'l macizu de Penubina al oriente y a cotes cercanes de Somiedu, dende'l Cornón, hasta'l Cogol.lu Cebol.léu, anque l'amplitú de panorámica casi fai imposible saber hasta onde somos acolumbrar montes.

A la fín, caún al so ritmu y siempre cola compaña de Kíla y dos collacios que s'echó nel pueblu (un mastín enorme y una perrina perguapa) facemos cume nos 1976 ms de la Penouta, viendo'l guapu crestéu qu'al traviés de las Camposas vien dende'l oriente.

Semeya de grupu na Penouta

Nun vamos mal de tiempu, pero ya tengo decidíu tornar pel mesmu camín, ya que'l calor fizo un pelín dura l'ascensión más de lo que camentáu al entamu. Ensín más baxaremos esta vegada pel camín más marcáu (azul) desdexando'l de xubida (colloráu) qu'anque más emocionante fízo qu'agora nun tengamos ganes de munches más variantes pal descensu.

Baxamos hacia la riega'l Puertu

Una vegada que tamos nel col.láu col picu Portiel.lu, vamos descender un pelín más hacia la fonte La Penouta, onde ñaz la riega'l Puertu y con ello empobinarémonos tol camín, per senderu claru, anque les árgomes van facer a dellos tramos una llucha avanzar hasta las Veigas de Penouta.

Nas Veigas, magar de l'amuesa de fuercia del mastín pa escorrer a tolos caballos por mor d'un ataque a Kíla d'un d'ellos, siguimos per pista charrando hasta dar vista de nuevu al pueblu d'El Puertu, onde mudarémonos de ropa pa facer la xinta final de la Xuntanza.

Siguimos pel mesmu camín hacia'l Puertu Somiedu

En resume, tenemos antes nós una prestosa ruta mañanera na que tan sólo vamos superar un desnivel acumuláu de 568 ms, nos 12 kms de percorríu con una duración de 4 hores y media que bien púedese rebaxar incluso.

Eso sí, que seya una ruta curtia nun quier dicir que'l monte nun seya más qu'encomendable, ya que morfolóxicamente ye bien atrautivu con una cayida na fastera norte ablucante, anque'l so ascensu seya más menos relaxáu pela panda suroccidental.

Que vos preste!!

Camudando'l Camín nuna ruta perruna total

Nesta ruta ficimos la Penouta (1976 m): Monte prestosu astur

Ver progresos en: Retos montañeros 

6 comentarios:

  1. A la Penouta va munchos años que nun arrimo. Guapa pena. Esti branu pedí permisu al parque pa facer una ruta que pasaba po la cara norte d´ella, zona restrinxida. Tovía toy esperando la respuesta. Toy fartu del restrinxido y eso que Somiedu nun ye lo peor.
    Un saludu

    ResponderEliminar
    Respuestas
    1. Tenía pensáu baxar hacia esa fastera pero nun mos dió tiempu... diba pasame la restricción un pelín pol... jejeje. La verdá que'l tema de les fasteres protexíes nos parques ta pasándose de la raya sobretou cuando pa otres coses nun-yos importa una mierda travesar parques con llinees llétriques y demás.

      Un saludu

      Eliminar
    2. Curiao con metese na fastra norte de la Penouta. Ehí pillaron a dos collacios los del Seprona. Llamáronlos hasta´l movil que pa se baxaran. Taben güeyándolos con prismáticos desde la carretera y non yos metieron una multa por un pelu. Ese cachín ye muy oseru y debe haber guardas día si y otru tamién.
      Un saludu

      Eliminar
    3. Hosties... tomaré nota... nun sabía que taba tan controláu. Gracies pol avisu

      Eliminar
  2. Guapa cumbre Berto, unas cuantas veces la tengo ascendido y no me cansa nunca. Si vuelves te recomiendo que hagas la crestería que va en dirección al pueblu, no es muy complicada y si espectacular.
    Aunque me parez que la que más disfrutó devió ser Kila, jejejeee
    Un saludu

    ResponderEliminar
    Respuestas
    1. Pues si que tenía mui bona pinta esa crestería de las Camposas. Habrá que tenelu en cuenta pa otra vegada.

      Un saludu

      Eliminar