viernes, 20 de septiembre de 2013

Poncebos (Cabrales) - Canal del Agua - H.ou los Cabrones (Cabrales)

10 de Setiembre de 2013

Track: Poncebos (Cabrales) - Canal del Agua - H.ou los Cabrones (Cabrales)


Esti añu, les condiciones económiques pa un viaxe hasta Pirineus, nun yera la meyor opción pa unos díes de montaña fuerte, y que coño, teniendo Picos n'Asturies, quien necesita dir hasta los Pirineus. Así que Fernan y yo, embarcámonos nunos díes por Picos, col refuxu del H.ou de los Cabrones, como campu base.

Y que meyor, y más direutu que xubir al refuxu de Cabrones, pola Canal del Agua, jeje. Fernan ya la conoce de va unos años, cuando nin siquiera conocíamonos, anque ya tábemos en contactu, tanto que-y pasé una semeya que tenía de la canal completa dende la Peña'l H.ultayu.

Salimos enantes de les 6 y media dende Poncebos

Que tiempos aquellos, nos qu'intentábemos entamar a ser un pelín meyor montañeros, y díbemos conociendo Picos, mui pero que mui pocu a pocu. Alcuérdome, que la pallabra Picos, dábame casi mieu y nin siquiera conociémos los caminos más trillaos d'esti hermosu macizu.

D'otra miente, camiento qu'a la montaña hai qu'entamar pali pali, viendo les posibilidaes de caún y conociendo pasín a pasu, meyor los llugares onde vas a movete y pa ello, facer munchos cumales y munches rutes, enantes de metése en Picos... foi la meyor escoyeta que pudimos facer dende'l GM Xuan de la Borrina.

Tiramos na nueche pela Senda'l Cares hacia los Collaos

A lo que vamos, llevántome a les 4 la mañana pa dame una duchina, ya que taré 3 díes ensín duchame, gochez, jeje. Pocu dempués de les 4 y media toi garrando'l coche y tiro nuna nueche cerradísima hacia Poncebos, pol camín clásicu de Autovia'l Cantábricu, Posada, Ortigueru y Arenas nel conceyu Cabrales.

Esta vegada nun hai almuerzos ya qu'a les 6 de la mañana, nun hai abiertu nothing for the relaxing cafe con llechi (Ana Botella dixit). Así que preparamos Fernan y yo, mil trastos nel aparcaderu de Poncebos y salimos cola lluz de los frontales pela senda'l Cares alantre, tando en tres cuartinos d'hora nel so puntu más altu, Los Collaos (565 ms).

Echando una güeyada a les canales de Estorez y Sabugu

Baxando de los Collaos, paez qu'alborez y dexamos los frontales pola lluz natural, anque nun ye mui potente, por mor del día murniu que tocónos pa xubir la canal. Nel intre, vamos entreteniéndonos Fernan y yo, falando de mil coses y viendo delles canales como la d'Estorez y Sabugu, les cuales nun conozo inda.

A la fín, dempués de dos hores de Cares, aportamos a Culiembru, onde no más baxo podemos agüeyar la puente Vieya, a la que baxamos per un guapu senderu n'envueltes y aportamos a ún de los llugares más guapos del Cares, cola agua azul verdoso tan davezu d'esti ríu.

Cruzamos la puente Vieya dexando atrás la Canal de Culiembru

Bebemos un pelín d'agua del mesmu ríu, y cruciamos la puente, pa xubir con curiáu per un escaleru, hacia'l Pandu, onde tendremos ún de los tramos más abegosos por mor de la broza que crece tapeciendo'l senderu.

Los nuesos pasos tienen de llevanos siempre en xubida hacia les desaniciaes cabañes de la Quintana y con bon sudor somos a llegar a elles, pa llueu pente la yerba llargo, llegar al colláu d'Impividre (655 ms¨), onde tenemos unes estupendes vistes de la canal de Piedra Bellida.

Xubimos el Pandu hacia'l colláu d'Impividre (655 ms)

Dende equí, muncho de lo xubíu tendremos que baxalo de nuevu y pa ello, vamos conocer el Sedu Inabio, el cúal percorre un contrafuerte de la Canal de Raíz, con ablucantes vistes sola senda'l Cares munchos metros más abaxo.

Ensín tener nengún pasu complicáu, lo que realmente impresiona una vegada qu'aportes a la canal de Raíz, ye alcontrar esti pasu pa xubir hacia Impividre y non pa baxalo, que ye munchísimu más evidente.

Baxando pol Sedu Inabio... pasu pelín escondíu

Tamos na canal de Raíz y equí Fernan avísame, que ye la pior parte del día y ye que ver esti pindiu pedreru pon la piel de pita. La meyor forma de llibralu y nun andar un pasu p'alantre y dos p'atrás na pedrera, ye metese pelos costaos de la canal.

Fernan fízolo pela mandrecha, muncho más herbosa y yo fícelu pela manzorga, na que fui alcontrar un senderu cláramente más utilizáu de baxada, na qu'algamé un ritmín de xubida curiosu, cosa que Fernan perdió teniendo que xubir garrándose a les yerbes y llegando pelín fundíu a la collada Ventaniella (754 ms).

Facemos el pindiu tramu de Canal de Raíz hasta la collada Ventaniella

Un descansu necesariu, dexó pasu a meténos en plena canal de Ría. D'ellá namái que conocía, la so traviesa viniendo de la h.orcadina'l Cuebre a la del Turoneru, pero ya fuera capaz d'achisbar tola so grandura a lo anchu y a lo llargu.

Nesta canal, nun se caleya, navégase. Ye tremendu como nun ambiente tan pindiu, somos capaces d'alcontranos con viesques, pedreros, praos ya inclusu los meyores peñones pal esguile de bloque que se puea imaxinar... la pena 5 hores d'accesu, jeje.

Navegando pela enorme Canal de Ría

Los minutos nesta canal, puen convertise n'hores, y nós, pasamos de la collada Ventaniella pel senderu qu'avérase al camín que vien del Cuebre y dexaremos esa guapa ascensión al Turoneru, pa siguir sele, siguiendo de h.itu a h.itu, hasta la entrada a la canal del Agua.

Como sabréis, la canal de Ría, dixébrase en dos canales. La de la mandrecha sigue siendo Ría y ye transitable o con material d'escalada o con munchísima ñeve que fáiganos llibrar los difíciles resaltes que presenta y la canal del Agua, salse a la manzorga dándonos la posibilidá d'aportar a la collada l'Agua.

Entrando tímidamente na Canal del Agua

Esta posibilidá ye cierta y factible, pero pa entamar, cuando a la fín metámonos na nomada canal del Agua, llevaremos 6 hores de patéu continuu y de xubida casi ensin descansu. Esto ye así, y hai qu'asumilo y tener mui en cuenta durante tola ruta, que nun hai cumal al que xubir y llueu baxar, simplemente xubimos y nun baxamos nesti día.

Y asína vamos yendo pola canal del Agua, superando pasu a pasu y problema a problema, teniendo como mayores torgues tres pasos según fuí a pescanciar. El primeru d'ellos, tará casi al entamu de la canal, y sedrá un pasu llateral penriba d'un pequeñu tabayón nel qu'usaremos con curiau pies y manos, al tar la peña pelín rota.

Trabayando na parte más estrecha de la Canal del Agua

El segundu problema, tendrémoslo cuando la canal empózase y pa superar munchos saltos de la riega, tendremos que xubir pela mandrecha, perpasando nun tarrén amestáu de yerba húmedo y llambria. Pa mio idega, ye'l pasu onde mentalmente pior lo pases, ya qu'afitase pel pindiu paré del canal viendo la cayía hacia ella, nun presta res y los agarres son malos, teniendo que movese sollertes al peligru.

Poro, cuando a la fín, tornes al cursu la riega, el cuerpu reláxase y el restu de la canal, sedrá un puru disfrute, nel que treparemos resaltes con della facilidá, hasta alcontranos el últimu y mui prestosu pasín. Un canalizu llaváu de color marronín, que superaremos n'oposición, anque si nun fuésemos a ello, podríemos llibralu pela mandrecha per mistu de yerba y peña.

Últimos problemes de la canal del Agua

Superáu esto, siguiremos pela canal trepando cenciello, hasta meténos nuna parte más amplia, na qu'al travíes de pedreros, veremos canalizos hacia les muries de los Cuetos del Trabe, asína como alcontraremos l'escape del agua de la canal hacia la de Ría.

Perdiendo'l sentíu de les hores caminaes, vamos mirando'l gps pente´l ñublu y l'orpín y sabemos que tamos cerca del final, ya que la peña suelto va dando pasu a tramos de yerba, asína qu'al saber de la cercanía'l final y aprovechando un ratín de sol pente les ñubes, paramos a picar daqué.

La canal ensánchase apaeciendo accesos hacia los Cuetos del Trabe

Cinco minutinos bastaron, pa quedános fríos, así que decidimos siguir hasta'l nuesu puntu más altu del día de güei: la collada l'Agua a 2148 ms. Esti foi'l nuesu puntu final, nel qu'abellugámonos nel vivac, ya que'l vientu fríu, l'humedá y orpín que muéyanos déxanos xelaos dafechu.

En meyores condiciones, a pesar del cansanciu, Fernan tien claro, que yo diba xubir a perconocer los Dobresengros, pero por suerte, el tiempu paez aliase con él, dexándolos pa otra vegada y dedicándonos a contautar cola xente'l grupu pa que supiesen que tou fuera bien.

Na collada l'Agua... bien satisfechos....

En resume... equí tamos na collada l'Agua, en menos de 10 hores dende que saliésemos de Poncebos... más venti minutinos de descansu na collada y de baxada al refuxu faen, 10 hs y 20 minutinos de percorríu durante 13.2 kms.

Pero lo más importante, aparte de tar no más xabaz de Picos, foi'l desnivel direutu y acumuláu, de 1950 ms y cercanu a los 2300 aprosimáu, respeutivamente, ya que los gps colaron de paséu na parte más fonda de la canal.

Ensín más, quedándome coles ganes de da-y preste a ún de los Dobresengros una vegada más, baxamos al refuxu, onde tuviemos la mala suerte de tar metíos durante munches hores, por mor del mal tiempu... un pelín pesáu, pero tiempu descansando si que tuvimos... pa los díes siguientes.

Camudando'l Camín nel H.ou de Cabrones

2 comentarios:

  1. Arratsalde on:

    Buena recorrido que nos metimos al cuerpo. Aunque hizo fresco, la visibilidad tan buena y la tranquilidad de ascenderlos desde el refugio fueron importantes para disfrutar de esa vuelta al H.ou de Cerredo. No cayó Labrouche pero no importa ahí está esperando.

    Un abrazu.

    ResponderEliminar
    Respuestas
    1. Al menos, sacíemos les ganes de monte.... o d'alta montaña, más bien dicho.

      Un abrazu Fernan

      Eliminar