jueves, 30 de mayo de 2013

Puertu Cienfuegos (Ibias) - Picu Miravalles

26 de Mayu de 2013

Track: Puertu Cienfuegos (Ibias) - Picu Miravalles


Tamos nel fín del mundiu.... astur... entiéndase, jeje. Venimos de monte hasta Ibias, a conocer un pelín meyor tola xeografía asturiana. Pa ello, tenemos intención de xubir ún de los cumales más míticos del cordal cantábricu y nesti casu de la fastera d'Os Ancares... el Miravalles.

P'aportar equí, tócanos facer una tirada en coche llarga, llarga, saliendo de Xixón a les 6 y media la mañana, pa garrar l'autovía de Grau, dempués de bordiar Uviéu, hasta'l so final. Ellí, como siempre, garramos la As-15 hasta Cangas del Narcea, pa pocu dempués parar en Pinl.lés a almorzar como lo ficiéramos na ruta na que visitamos Seroiro.

Siguiremos camín pela As-15, siguiendo'l ríu Narcea, pol conceyu de Cangas, hasta topanos col túnel d'El Rañadoiru, pa salir por L.larón y baxar al conceyu de Degaña, conociendo'l guapu pueblu de Fonduveigas al llau del ríu Ibias agora.

Dende'l Puertu Cienfuegos (1677 ms) vemos el nuesu oxetivu


Magar d'esi valle, toparémonos col desvíu hacia'l conceyu d'Ibias, pasando pelos pueblos del Rebol.lal y Trabáu de Degaña y pelos d'Ibias: A Estierna y Llanelo enantes d'arribar a la Campa Tormaleo, onde alcontramos la pista, que tien de xubinos pente una borrina fonda al puertu Cienfuegos.

La mio primer idega, yera xubir dende Luiña, faciendo una ruta potente, pero... pa comenos más de 800 ms pente la ñebla, nun paga la pena l'esfuerzu, poro decidimos xubir, colos coches hasta'l puertu. Tamién aidó a tomar esta decisión, les previsiones del tiempu, que daben tormentes dende les 12 n'adelantre.

Atrás dexamos el puertu cola Rogueira y alantre'l camín al Miravalles

Entre pitos y flautes, somos a ponenos a caleyar a les 10 y media de la mañana (sí, 3 hores dempués de salir de Xixón, jeje) y fadrémoslo, col cielu azul, solín y un increyible mar de ñubes p'Asturies. Namás entamar, apaez un paisanu llionés col so perru y ya perdimos a Kíla durante gran parte la ruta, ya que marchó de comedia col perru y col paisanu que siguió la mesma ruta que nós.

Guapes viste hacia Os Ancares y alto d'Ibias y Degaña

Ésta nun yera otra, que siguir tola cuerda'l cordal de Cienfuegos, siguiendo dellos senderinos pente'l berezu, que faínse difíciles de nun perder a cada calvina de prau, qu'alcontramos. Aún así, la única dificultá ye alcontralu de nuevu, magar de travesar tola vexetación a lo xole, jeje.

Mar de ñubes p'Asturies y el Miravalles al frente

Polo demás, anque paeza qu'al salir de tan alto (1677 ms) nun tendremos desnivel a superar, tamos equivocaos, ya que nel nuesu camín, tendremos que superar munchos altos, demientres acolumbramos con ciertes ganes al picu La Candanosa, en plenu parque de Muniel.los.

Unes vegaes pela ñeve y otres pel brezu vamos avanzando

El primeru d'ellos sera l'Alto'l Cuadro (1755 ms), del que llueu baxaremos al colláu del Boquín, pa tornar a xubir hasta l'Alto la Estaca, onde tendremos una nueva vista, Los L.lagozos, los cuales tan perguapos, baxando un pequeñu tabayón hacia'l zarráu valle del Luiña.

Acolumbramos el valle del Luiña y la cubeta de los L.lagozos

Dalgunos de los tramos, decidimos facelos pela ñieve, ensín seguir el crestéu, ya que tárdase menos, hasta aportar a la xuntanza de xerres, xustu enfrente'l valle del Luiña. Ellí, pasaremos de la de Cienfuegos a la de la Corredoira, per una crestina bien guapa de caleyar, pola que Kíla de vuelta al grupu muévese como si nada.

Averámonos a l'antecume del Miravalles na parte más guapa de la ruta

En realidá, agora ye onde entama lo más prestosu de la ruta, al tar ya bien cerquina de la base del Miravalles. Dende ella, diremos avanzando per una palina de ñeve, con vistes a la l.laguna de L.lagozos, hacia l'arista que va dexanos na antecume del Miravalles.



Bordiamos la primer cumera cola vista puesta na más alta

Na xubida, decidimos viendo un senderín, bordiar esa propia antecume, hasta que tenemos que xubir a una forcadina, a partir de la cual crestearemos hasta'l mayor puntu de dificultá de la ruta, el destrepe hasta'l forcáu de pasu al cumal cimeru del Miravalles.

Destrepe con curiáu y panda de yerba hasta'l picu

El destrepe sedrá escalonáu, pa llueu averase hacia la manzorga, onde garraremos una llambria que báxase cenciello. El problema tuvelo con Kíla, nun de los escalones, ya que nun s'atravía a baxar (yera dalgo aéreu) y tuve que garrala en brazos y azotala pa la llambria de baxada.

Magar del pasu, tendremos que faldear a mediu altor un pocu y llueu xubimos per unos pindios praos, hasta topanos col vértice xeodésicu llantáu a los 1969 ms d'altor, del Picu Miravalles. Por suerte, les ñubes amenazantes dende va un tiempín, dexáronmos tar tranquilos nel cumal a nós, y lo menos a una treintena más de gallegos qu'accedieron a él, dende la parte llionesa.

Cumal del picu Miravalles (1969 ms)

Entre xintar dalgo, sacar semeyes al enorme grupu montaña gallegu y falar con unos y con otros, tuviemos nel cumal dalgo más de media horina y eso fizo que, la presión camudase de nivel, xubiendo la ñebla que calteníase nos valles hasta'l nuesu altor, poniéndose de lo más fríu.

Poro, decidimos nun esperimentar de más y tornamos los pasos pel mesmu camín, faciendo la baxada al forcáu, pa llueu garrar a Kíla nos escalones y volviéndola a xubir a pulsu, pente Haritz y yo. D'ehí p'alantre, preferimos esta vegada siguir penriba l'antecume y baxar tola arista abaxo, faciendo Pangua y Simón un guapu culuesquí.

La vuelta sedrá pel mesmu camín col divertimentu d'un bon culuesquí y muncha ñebla

El restu'l camín, sedrá intentando abelluganos del xelidu vientu, pela fastera sur, lo cual llevónos gracies a la borrina a desvianos de más del nuesu camín, teniendo que volver a xubir altor hacia'l crestéu pente la Corredoira y la xerra Cienfuegos.

Sacante d'esta pequeña perda, llueu siguimos les siendes lo meyor que pudimos, echando-y una güeyada al gps dacuando. Asína fuimos a aportar al puertu, pa mudanos la ropa moyada pola ñeve, nos coches a mou de parapetu pa protexenos d'una sensación térmica que rondaría los 4 graos.

En resume, guapa ruta, sobretou la parte averada al Miravalles, qu'anque diba prestanos facela conociendo'l valle del Luiña, esta vegada saliónos dende'l puertu Cienfuegos col percorríu de 10.6 kms, una duración de 4 hores y 45 min, faciéndonos superar un desnivel de 650 ms acumulaos.

Camudando'l Camín n'arba pente Asturies y Llión

8 comentarios:

  1. Berto, dasme envidia con caún de los tos caminares pela nuesa tierra, sicasí, les seis y media son les seis y media. Vaya fuerza voluntá.

    ResponderEliminar
    Respuestas
    1. Dempués de tola selmana madrugando, tener ganes de llevantase un domingu a estes hores, ye d'alloriaos.

      Pero bono, ye lo qu'hai cuando toca madrugar pues madrúgase, pa llegar a conceyos más lloñes de Xixón.

      Un abrazu

      Eliminar
  2. Buenos recuerdos me trae lazona Berto. La primera vez que hice esa cumbre, fue desde el pueto Tormaleo y con El Botete también a la vuelta. Salimos del monte completamente de noche!!!
    Buenas fotos y bien descrita, con el sufrimientu de Kila incluido.
    Un saludo amigo
    PD Enhorabuena por el resultao del concurso

    ResponderEliminar
    Respuestas
    1. Hai que conocelo too, yo sinon, nun quedo a gustu, jeje. Tuvo bien... tocará siguir conociendo la Rogueira y demás pa otra vegada.

      La verdá que la perrina muévese mui bien, pero esti pasu, quédaba-y pelín llargu.

      Gracies polo del concursu... prestó presentase

      Un abrazu

      Eliminar
  3. ¡Coime!, el mio puertu, ja , ja. Manda coyones que nun lu conzoco y llévolu nel nome. De esa fastera quédame por conocelo too. El Miravalles ye un desos cumales que ta siempre ehí, pa cualquier díi, pero nun acabo de dir.
    Un saludu

    ResponderEliminar
  4. Pues viendo'l día que tuvimos, pa un día de bon tiempu pa Castiella y ñube baxa p'Asturies ye la cuenta, asína llibres de ver les mines a cielu abiertu, como nós, jeje.

    Polo demás quedé con ganes de xubir dende Luiña, pel valle'l ríu Luiña... pa otra será.

    Un saludu

    ResponderEliminar
  5. Mira que está lejos eso, solo con acercarse ya se funde la mitad del día, pero ahí están los montes y no hay más.
    Y los que quedan todavía.

    Un abrazu

    ResponderEliminar
    Respuestas
    1. Efectivamente... anda que nun queda por andar, jeje

      Un abrazu Fernan

      Eliminar