miércoles, 17 de abril de 2013

La Espasa (Caravia) - Costa de Caravia

7 d'Abril de 2013

Track: La Espasa (Caravia) - Costa de Caravia


Dempués de perder un sábadu nel qu'a final nun fizo mal día, decidimos dir a pasiar un pelín per dalguna costera y equí ye onde xuntáronse varies cosines: la primera, que nun teníemos ganes de caleyar muncho, la segunda tampoco queríemos conducir muncho y per última, a Kíla-y quedaba ya bien pocu pa esfrutar de la mar y les sableres... Caravia yera'l conceyu perfeutu.

Kíla na playa La Espasa en Caravia

Poro, salimos pela autovía'l Cantábricu hasta'l desvíu de Colunga, saliendo hacia la sablera de la Espasa, onde xústamente a la mandrecha'l ríu Espasa, entama'l propiu conceyu y la nuesa ruta. Que maraviya, dir con una mochila por llevar dalgo y lo demás, playeros de trekking, dalgo de ropa y xugar con Kíla tol camín.

Caleyamos seliquino hacia'l final de la sablera

Travesaremos, tola Espasa, tirando-y la pelota a Kíla y pel momentu nun ta mui pol llabor de moyase, asina que dexámosla tranquila y siguimos caleyando hacia la punta Melín, onde tendremos guapes vistes de la Isla y más al fondu del perguapu pueblu de Llastres.

Xubimos hacia la Punta Melín con vistes hacia Llastres

El nuesu caleyar pela Punta Melín, podemos facelo más pegaos a los cantiles o pol camín de Santiagu, que ye tamién ciclable, cruciándonos con un par de ciclistes, a los que por suerte, Kíla nun tien ganes de lladrá-yos.

Baxamos hacia la playa la Beciella onde Kíla báñase un puquiñín

La primer sorpresa guapa de la ruta, aparte de les continues vistes hacia'l Sueve, ye la playina de la Beciella, onde Kíla gueta una baxada alternativa tirándose p'abaxo per un terraplén. Ante tal encamientu de la perra, decidimos baxar tamién nós a conocela y tuvimos un ratín xugando con ella, mientres dase'l primer bañín.

Siguimos camín pelos Romedos con vistes a la Xerra'l Fitu

Magar de salir de la Beciella, cruciamos el regueru Los Romedos, pa meternos hacia n'ascensu hacia la fastera de los Maderos. Nesti puntu, al igual que na punta Melín, podemos tirar pegaínos a la costa, averándonos hasta la Punta L'Atalaya, pero esta vegada cruciamos los praos pel Camín, cola vista puesta nel Xerru'l Fitu, como cordal de compaña al sur. 

Baxamos pela fastera la Tuerba hacia'l sablón de Moris

Con pocu más, qu'esfrutar de ver a Kíla corriendo pelos praos, entamamos na Tuerba, la nuesa baxada final, hacia'l nuesu destín, L'Arenal de Morís. Esta parte, faciendo bon casu al nome, taba pelín embarráu, hasta qu'aportamos a la carretera que baxa al Arenal, onde caltenemos a raya Kíla pa que nun se desmadre por mor de los coches.

El guapu Arenal de Moris ye final de la ruta

El final de ruta, dempués de pocu más d'una hora de camín relaxáu, será dir d'una punta a otra de la sablera de Morís. Nesti tramín pisando'l sable, de ver a Kíla saltar pente les foles, casi danos ganes de metese a la mar, pero menos mal que pensámoslo meyor, y decidimos tomar unes cerveces, porque tien que tar frío, frío, l'augua.

Kíla pierde'l mieu definitivu a la mar y les sos foles

Ensín más, llueu d'aportar al pedreru les Teyes, final del conceyu de Caravia, tornamos so los nuesos pasos, pa xubir hasta'l chigre, onde tirámonos un bon ratín tomando'l vermú. Nun ye que tuviésemos mui cansaos pero bono, nun tolos díes va ser metese palices montañeres.

Col Sueve siempre presente tornamos hacia La Espasa

La vuelta fadrémosla pol mesmu camín, teniendo como constante al Picu Pienzu ñeváu, y como cares contraries de la mesma moneda la vida y la muerte nel mundiu animal. La vida, tenémosla a güeyu en tolos xatinos mamando'l tetu la so ma y la muerte... foi amosada pol istintu más xabaz de los animales, la caza, a cargu de Kíla, cola víctima d'un paxarín, que nun andaba mui allá y nun foi a escapar volando.


En resume, paseín costeru, qu'en branu sedría la cuenta pa bañase en cauna les sableres del conceyu. En total 8,4 kms de percorríu, con un ascensu acumuláu de 180 ms y una duración de 3 hores y 50 minutos, a lo que-yos hai que restar esos 50 minutos de vermutéu en dambes playes, ya qu'a la vuelta paramos na Espasa a tomar otra, jeje.

Camudando'l Camín pola llibertá de les mascotes nes playes

3 comentarios:

  1. De vez en cuando esta bien dejar un poco de lado el terreno difícil de las montañas y dar paseitos relajados como este.

    Pero no hay que acostumbrarse jajaja.

    Yo en breve publicaré algo parecido a esto.

    Un abrazu.

    ResponderEliminar
    Respuestas
    1. Si ho, amás que meyor que dar un paséu pa estirar les pates cola perrina.

      Na, les costeres tamién dan muncho xuegu por Asturies.

      Un abrazu

      Eliminar
    2. Así no preparamos la Travesera, que no habrá vermú en las canales ni desniveles de 3 cifras.
      Suerte el domingo en el Sr. Bárcenas (Tesoreru).

      Un abrazu

      Eliminar