jueves, 11 de octubre de 2012

A Sarra (Uesca) - Refuxu de Respomuso

8 de Setiembre de 2011

Track: A Sarra (Uesca) - Refuxu de Respomuso


Como dixe na entrada resumen, tamos a sábadu 8 de Setiembre, día de la Nación Asturiana y pa un nacionaliegu, ye hasta raru vese tan lloñe, pero que queréis que vos diga, toi tan cansáu de la política n'Asturies y de la sociedá aborregada que tamos careciendo, que la meyor forma de sentise asturianu, ye tar fuera de les nueses llendes pa echala de menos, jeje.

Poro, magar del menú bien curiosu nel hostal El Sarao d'Escarriella, xubimos hacia'l banzáu de la Sarra, pasando por Sallent de Galligo pa garrar la carretera d'O Fornigal, desviándonos dempués hasta bordiar el banzáu pola mandrecha, dexando'l coche nun aparcaderu al llau d'un chigre bien prestosu.

Semeya d'entamu n'A Sarra (1443 ms)

El llugar ye una maraviya y siendo sábadu ta estráu de coches, aún así, somos a dexalos nun bon sitiu, ya que nun tornaremos hasta ellí, pasáu 4 díes. Al llau del ríu, Aguas Limpias, vamos mudanos de ropa casi camentando la posibilidá d'un bañu na última estaya pirenaica cuando temos bien reventaos.

Pel momentu, cargar con una mochila de 60 ls enllena, déxame a les clares, lo cansáu que de xuru, taré'l martes cuando baxemos hasta esti puntu. Sacante d'esto, hai ganes, asína que salimos alantre pela carretera hasta cruciar el Aguas Limpias nuna ponte, onde paramos a mirar los cartelos d'info del val de Tena.

Sele camín a la vera'l ríu Aguas Limpias con barrancos a los llaos
 
Nesti puntu, conocemos a Carlos y Miguel, pa y fiu, que van ser una costante d'alcuentru, nos primeros díes pasando bon ratu con ellos nel refuxu y na ruta del día siguiente al Pico Os Moros o Balaitus. Yo como siempre ando a lo míu, mirando pa les parés d'enfrente a la ponte, nes qu'agüeyo'l rellume de les chapes de deportiva... picor en mou ON.

Dexaremos los picores, que tamos en mou montañeru y non esguilador, poro ponemos el OFF y entamamos a caleyar pela vega esquierda del ríu y bien aína, diremos topándonos con dellos barrancos que baxen a ún llau y al otru, como'l de las Feixas y Musales a la mandrecha y Ministiriu a la manzorga.

Con pocu esfuerzu, aportaremos a los Llanos de Tomadizas, onde va pocu que pusieron un area recreativa, con pocu gustu la verdá. D'esti llanu, travesaremos otra riega, la de Balsaroleta, que tien enriba nuesa un tabayón, anque la seca qu'hai fai que seya menos vistosu de lo que suel ser.


Caleyamos per viesques y per beyos bien guapos

Siguimos a bon ritmu, xubiendo un tramín, que fadrános dexar el ríu abaxo, pa dempués caleyar nesti casu pente una viesca de fayes, que caltien una especie de silenciu tensu, ya que de les últimes fayes d'abaxo sabemos d'una cayía al vaciu mortal dafechu.

Namái salir de la viesca, podremos ver el barrancu del Aguas Limpias en direutu, detrás d'unes valles perpeligroses. Se supón, que tan pa evitar accidentes, pero tan ensín suxección nenguna nin fondura nos postes, aumentando la peligrosidá si dalguien apóyase confiáu nelles.

Siempre digo, que l'home ye faltosu por ñacencia, si pa enriba somos a da-ylo too mazcáu, afaltosámoslu de más y pasen ca vegada más y más accidentes. La prevención en montaña, tien que venir pola educación y la preparación pa dir a la montaña y non, por poner cadenes, escaleres y fierros que faciliten l'accesu a tol mundiu.

Esto paezme un arma de doble filu... la esperiencia y l'entrenu ye lo únicu que nos fai medrar na montaña y así tien de ser.

Dexamos atrás estos "pasos peligrosos", que con nun arimase tan solucionaos y aportamos al crucie col camín que xube al picu Arriel, que vimos a la entrada nel valle, que xube pegáu al barrancu del Garmo Negro.

Avanzamos pol barrancu d'Aguas Limpias hacia'l banzáu de Respomuso


Nun ye'l nuesu camín, asína que siguimos a la mandrecha, hasta topanos col senderu y tabayón que baxa de los ibones d'Arriel, que nun podré esfrutar hasta'l día siguiente, poro tampoco garramos esi camín, metíendonos na parte más dura de la ruta.

A partir d'equí, el senderu ponse pindiu y encaxónase pente les falderes que baxen de los Picos de Fondellas a la nuesa esquierda y de los picos de Musales (Garmo Carnicero, Garmo Pipós y pico Musales) a la drecha.

A pesar del desnivel, nel intre, va ser cuando más apretemos, ya que ta formándose la tormenta pelos altos y oyemos a lo lloñe'l turenos y vemos dalgún rellámpagu. Esto, fainos entainar y pronto, vemos de frente la muria que forma'l banzáu de Respomuso en plenu circu de Piedrafita.

L'Exiptu pirenáicu de Piedrafita

Y al fin, al altor de la muria, podremos acolumbrar un de les vistes más guapes de Pireneus que vi nestos tres años de viaxes. Tamos ante, una especie de valle de les pirámides, como si tuviéramos ante les d'Exiptu, con delles tan guapes d'esquierda a drecha como los picos Bachimanya, Pico de Campo Plano, Llena Cantal, Piedrafita y Tebarray... ablucante.

Con dos visiones... una con cumales increyibles y otra con ñubes amenazantes... vamos dexar l'esfrute pa los güeyos pal día siguiente, ya que nun queremos moyar la ropa de tolos díes, nel casu de que cayera una xarazada gorda.


Refuxu de Respomuso (2135 ms)

Ensín más, ficimos el tramu hasta'l refuxu, cola amenaza enriba nuesa y col guapu banzáu de Respomuso embaxo, hasta qu'aportamos a esti, ensín que cayésenmos más que cuatru gotes gordes de tormenta. Asína que, como tolos años, tocónos facer la miniruta hasta l'entamu, pa rutes más curioses y esti añu amás, esti puntu diba ser el nuesu campu base pa toes elles.

En resumen, ruta mui masificada a tramos, poles visites a los ibones d'Arriel o a esti refuxu nel circu de Piedrafita, que llevónos en total 2 hores y 25 minutos, superando un desnivel acumuláu de 915 ms, nos 7,9 kms de percorríu.

Llueu de dexar les mochiles na entrada, como siempre, tocó rexistrase, ponése cómodu, tomar unes cerveces de caña (primer refu que veo con barril, presta), conocer la nuesa habitación, que por suerte, a pesar del petazu del refuxu foi un llugar cómodu pa descansar y durmir, anque fuera la pior de toes.

De la cena.... meyor nun falar.... como en tolos refuxos de Pireneus... y del almuerzu... na siguiente entrada.


Camudando'l Camín nel banzáu de Respomuso

5 comentarios:

  1. Otras fuentes escriben también el nombre de la presa como Respomusa, aunque yo siempre lo haya oído Respumoso.
    Pero ya sabemos como es todo esto.

    Un abrazu.

    ResponderEliminar
  2. Na, Fernan, ta confirmáu toponímicamente como Respomuso, pasa que paez más fácil decir Respumoso, jeje. Sinon, siempre podrás dicir que ye Piedrafita que dalgo de drechu tendrás o que? jeje

    ResponderEliminar
  3. Hola Berto, esperamos ver alguna ascensión por esa zona, a ver si el próximo año nosotros nos podemos perder por ahí. Esa zona es desconocida para mi.
    Un abrazu

    ResponderEliminar
  4. La primera ta nel fornu, Monchu jeje

    Toi mui retrasáu nes entraes del blog...

    Lo cual desespérame un pocu

    Un abrazu

    ResponderEliminar
  5. Yo también estoy hasta los cojones de la política y los políticos del País Valencià y tampoco soy capaz de cambiar del modo escalador a el modo montañero jejeje.

    Buena pinta tiene ese refugio, aunque la cena...algo leí en el blog de Fernan...

    Un abrazo.

    ResponderEliminar