jueves, 14 de abril de 2011

Fontaciera (Xixón) - Monte Los Llanos

3 d'Abril de 2011

Track: Fontaciera (Xixón) - Monte Los Llanos



Domingu pela tarde, ensín futbol bultable que ver, ya que l'Sporting diera ayeri bona cuenta del Real Mandril, y llueu'l Barça finiquitare la lliga práuticamente, poro, que meyor qu'aprovechar el bon tiempu pa dir a la gueta d'un nuevu vértice xeodésicu, esta vegada nel mio conceyu, Xixón.

Asína que, saldremos del centru Xixón, col envís de garrar la As-II, antigua As-18 que diría a Uviéu, pero xusto na retonda onde se toma, salímonos en direición Casares, pa en baxada averanos a Pinzales, onde nel primer crucie a la manzorga tomaremos otra carretera paralela al ríu Pinzales y a la vía del tren, hasta alcontrar pocu más alantre d'un llavaderu un sitín pa dexar el coche pegáu a la vía.


Saliendo de Fontaciera na parroquia de la Pedrera (47 ms)

Pocu enantes de les 5 de la tarde saldremos de la parroquia de la Pedrera, y más en concretu del pueblu de Fontaciera, y namái caleyar unos metros travesaremos nuna ponte'l ríu Pinzales, pa metenos na parroquia de L'Abadía Cenero.


Cruzando'l ríu Pinzales

Siguiremos pela carretera, pa n'ascensu facer delles envueltes hasta garrar una pista al llau d'una casa y esfrutar un bon ratu d'un caminar pela solombra y con tarrén blandu baxo los nuesos pies.
Esta pista, nos dexará práuticamente, no alto del monte la Picona (193 ms), onde tendremos ya vistes pente los árboles de la fastera urbana de Xixón.


Xubiendo y baxando de la Picona

D'equí baxaremos dellos metros tamién por pista, hasta volver a garrar asfaltu y nun crucie hacia la manzorga, aniciaremos una xubida, con bones vistes de la costa xixonesa, que nos llevará per tol pueblu de Piñera, ente cases bien guapes, hasta la bas del monte Los Llanos, xusto a la entrada del pueblu d'Aguda.


Xubiendo por Piñera hacia'l monte Los Llanos

Namái pasar una viesca y enantes d'un depósitu d'augua, tomaremos un camín que nos dexará nuna cruz de caleyes, teniendo que garrar la d'enfrente, menos marcada que les otres, y siguila hasta una portiella a la esquierda, onde pasaremos pembaxo d'una allambrada p'atopanos enriba d'un prau col vértice xeodésicu del monte Los Llanos (284 ms).


Xixón dende'l vértice del monte Los Llanos (284 ms)

El día sigui soleyeru, pero paez qu'una brisuca ta poníendose dalgo repunante y sumáu a la hora que ye, les 6 y 25 min, lo meyor va ser tirar camín alantre y non parar muncho, porque la manga corta, pue pasanos factura.

Pa ello, vamos dar la vuelta pel mesmu camín hasta'l crucie, y esta vegada garramos el de la mandrecha pa baxar hasta la carretera y d'ella pola esquierda, alcontrarémonos de nuevu col entamu del pueblu d'Aguda, onde tomaremos otra carretera en baxada, pasando pol Pilanqueru hasta que nuna curva abandonaremos l'asfaltu pa en xubida metenos nuna guapa pista, hasta un altu que nos dexa ver les antenes del Picu Samartín.


El Picu Samartín y aportando a Fontaciera de nueu

D'equí baxaremos selemente, en delles amplies vueltes, hasta qu'aportamos a una curva hacia la mandrecha, onde nos "atacarán" una xauría perros que baxaron d'un prau d'enriba la casa. Pasamos un ratín chungu, pensando que yeren mastines, pero a la fín alcontrámonos con unos llabradores y perrucos pequeños, que dempués de golenos un pelín dexáronmos pasar.

Dempués del sustu, aumentaremos el pasu, nun vaya ser que... y magar d'enfilar la carretera de nuevu, pasaremos primeru pela ponte del Pinzales y dempués per un túnel que traviesa la vía'l tren, y con ello, algamaremos la recta en Fontaciera que nos devolverá al coche.

En resumen, pasamos un bon ratu caleyando peles parroquies xixoneses nun día preciosu, y dempués de 2 hores y 45 minutinos, ficimos 10 kms y superamos casi 475 ms d'ascensión acumulada, que nos ficieron merecer una botellina sidre nel barriu del Llano.


Camudando'l Camín na parroquia de L'Abadía Cenero

Otra ruta na que dimos preste a un vértice xeodésicu de Xixón: Monte Los Llanos (284 ms)

Ver progresos en: Retos montañeros

2 comentarios:

  1. un paseu muy guapu pa aprovechar la tarde de domingo.
    ¿el vertice que estaba cerrau en una finca? nun se ubicar el monte esi.
    Y lleva siempre palu, nunca se sabe pa q pues necesitalu.

    ResponderEliminar
  2. Sí, el vértice taba zarráu, como munchísimos dentro d'un prau, y lo del palu, ya nun se nos escaez, jeje

    ResponderEliminar