Frechura (Mieres)

3, 5 y 11 d'Abril de 2024

Un añu más, entra'l calor enantes n'Asturies y la vida llévanos hasta Frechura, onde los perretes vieyos tienen un patéu más amable y munchu prau pa tar tumbaos, asina que decidimos qu'al menos un día a la selmana, vamos averanos a dir llimpiando hasta onde puédase esta téunicu, dura y guapa escuela, onde nun regalen nenguna vía dafechu.

El primer día de visita, tuve la suerte de prebar Tayuc (6c+), pringando nun pasín mui arriba, por nun ver una regleta y al segundu ya salió ensin problemes, quedándome claro, que ye la vía más agradecida que probara, sobretou viendo a Andrea bregando con Desarrollo Sostenible hasta que la pudo facer, ya que'l bloque resultába-y mui incómodu pal so esguile más estáticu y téunicu.

Al día siguiente, ya compartimos vía, metíendonos a facer metros na variante del Reencuentro y Tírate a la Cabra qu'amesta dos llargos de 6c y 6b+ de casi 50 metros, que vien-y dan el 6c+, tocándome facer un testeu mental nel segundu llargu a vista con unos pires d'alloriar qu'acabaron por tumbame, faciéndola tamién al segundu del tirón, pudiendo esfrutala muncho más, pero non tanto como Andrea que la enchufó al primer pegue, quedándose mui a gustu.

 

Plaquines de pies infames de Frechura

El tercer día, tocó metese en Atácala que ya cae (6c+) que fué la que menos prestóme del seutor, pel momentu, teniendo que facela de nuevu al segundu pegue, llueu d'un primer pegue atroz de calor y esnidiaes de pies y manos, con pasos llaterales que nun me dieron más.

Andre a lo suyo, faciéndola a vista y rematando cola Vagoneta (7a) tamién a vista, que ya la tenía yo y recomendésela, algamando un día perfeutu, hasta qu'avísenme otros escaladores que reventárenme la ventaniella la furgo, robándome la cartera y liándome tola selmana pasada y ésta, dalgún cabronazo que tien pilláu'l puntu del aparcaderu de Frechura, más averáu a la carretera.

D'esti xeitu, avisái, de que'l tipu en cuestión ya lleva tres robos nesi aparcaderu y anque ta denunciáu y deberíen pillalo, porque ta grabáu nun gasolinera porque mui llistu nun yera, pues que lo mesmu, tovía tien güevos a siguir faciendo'l rata colos vehículos de los escaladores, así qu'andái con güeyu que dalgún personaxe llocal ta fadiándonos les nueses tardes de tranquilidá per Frechura.

--------------------------------------------------------------------------------------

Olba (Teruel)

Del 25 al 30 de Marzu de 2024

Continúabemos de vacaciones teniendo qu'escapar de Cuenca pola mala meteo que nos venía y averámonos nun viaxe lluviosu, de pocu más de dos hores, hasta la llende pente Teruel y Castelló, siendo más concretos, yéndonos hasta'l pueblu turolense d'Olba, onde alcontramos un abellugu maraviyosu pa pasar dellos díes d'escalada, bicicleta y hasta un pelín de comedia.

La idega yera dividir un pelín los díes d'escalada pente Olba y la cercana Montanejos, pero viendo'l nivel de xente qu'había per Montanejos, al final, paeciónos lo meyor esfrutar d'Olba, el másimu de díes posible, quedándonos namoraos tanto de la escuela, ensin conocer tolos seutores, como del pueblu, pasando mui bonos ratos nos distintos chigres del pueblu y charrando animósamente colos vecinos, que nun terminaben de creyer que viniésemos dende Asturies a escalar. 

Becky esfrutando de la roca d'Olba

 En cuanto a la escalada, nun pueu más que destacar lo guapo del llugar, siempre con un pateín per percorríos balizaos que llévanos hasta los seutores, col rigu con poces pa poder refrescanos y con ambiente nos seutores, con muncha xente conocío: asturiana y llionesa y xente que conocimos: vascos, catalanes... munchos neños, perros y xente, pero nun ambiente familar, ensin voces, nin bichos, nin titanes, sólo xente escalando, families y neños xugando y perros nel so sitiu ensin molestar.

Los paseos a la vera'l rigu Mijares son una gociada

La mayoría de los díes tuviemos nel seutor Sol de Invierno, onde tengo que dicir que movime más o menos pente'l 6c y 7a, paeciéndome toles víes mui buenes, con bona roca de plaques grises y desplomes colloraos, con tou tipu d'agarres y munchísima calidá nes víes, nun grau moderáu, tirando a durete quiciás, pero mui disfrutona d'escalar, quedándome con milenta víes a probar pa prósimos viaxes.

Pegues y más pegues a una rocona increyible en Sol de Invierno

L'últimu día, averámonos hasta la muria d'enfrente de Sol de Invierno, entrando per otru percorríu balizáu dende'l Casucho, onde asítiense otros seutores como Meteoblue o Don Quijote, nel que finálmente quedámonos por mor de la cantidá de xente qu'había nel primeru, prestándonos un pelín menos que Sol de Invierno, pero ensin dubia, pagaba la pena la visita tamién pa despedir el viaxe, llevándonos al segundu pegue otru 7a más desplomáu, pero mui guapu tamién.

Maia tastiando un pelín la roca turolense

Con munchos metros escalaos, anque ensin apretar al másimu nivel, dalgo que suelo facer en tolos viaxes, colábemos de vuelta p'Asturies, cola sensación d'alcontrar otru requexu nel que tornar una vegada tres d'otra, sobretou porque entá quedábenmos munchos seutores per conocer y munches víes per prebar.

Poro, Olba, hasta la prósima, que nun sedrá a muncho tardar...

Cuenca (Cuenca)

23 y 24 de Marzu de 2024

Vacaciones de Selmana Santa, con munchos planes na tiesta, de primeres con idega d'escalar per Cuenca dellos díes y colar pa Soria a andar en bici, pero siempre pendiente de la meteo, ya que nun lo daben bono precísamente, poro tamién, teníemos la opción de continuar viaxe esguilador hacia'l Levante.

Al final, namái que pudimos esguilar un par de díes per Cuenca, nós que pela mañana salí a dar una vueltina en bici, viendo muches posibilidaes pa la bici monte, asina que nun sedrá la última vegada que meta la bici na furgo, nin munchos menos, ya que fai l'amestaura perfeuta salir pela mañana en bici y esguilar tola tarde.

Conociendo'l seutor del Merendero na Hoz del Huecar

 

El primer día, averámonos hasta la Foz del Huecar, onde nunca esguilar nos distintos viaxes y ficiéramoslo nel Merendero, ya que les mañanes d'almuezu estirábense y nun mos dió tiempu a conocer la cueva la Zarza, onde ya entraba'l sol pa la hora a la que llegábemos, poro echamos pie a tierra nel merenderu y centramos la vista nun par de 6c+, col envís de calecer deos nellos, pero como siempre, la vía Libertad (6c+) púsonos nel nuesu sitiu y ya vimos los graos nos que tocaba movese tol viaxe, teniendo qu'encadenala al segundu pegue.

 

Colos díes llarguinos ya, tuve tiempu a dar un pegue fuerte a vista a Imaginación, un 7a, que pa mi ronda'l 7a+, pifiando nun pasín non mui duro na metá de la vía, pero sicolóxico pegando un volátil de los guapos, pero viendo que na parte alta, tenía toles papeletes de pringar tamién, ya que tien un pasu regleteru que toca tener bien controláu. En resume, rutón que quedóme apuntáu na tiesta pal prósimu viaxe, al que-y dí un segundu pegue cayéndome na parte alta, que como dixe, hai que llevar bien controlada ya que ye fina, fina.

Probando un 7a increyible... que llamábase Imaginación

Al día siguiente, volvimos al Júcar, cola calmísima, ya que salí en bici una tiradina llarga y teníemos qu'esperar a la entrada de solombra en Juego de Bolos, el primer seutor del Júcar a la manzorga la carretera, si miramos dende Cuenca. La última vez que fuéramos, pasamos echando un vistazu a les víes, pero'l murín nel que pudimos paranos siempre taba estráu de xente.

Esta vegada, malpenes había 5 o 6 cordaes asina que pudimos escoyer vía, caleciendo en Alpi un 6c+ con un tramu de fisura bien guapu, pelín suave comparáu col seutor del día anterior y terminamos con un encadene al flash de Mirando pa Cuenca, un 7a míticu, mui guapu y tamién un pocu sele ya innecesariamente manufacturáu na parte alta, pa que llueu digan d'otros sitios, grandes adalides de la escalada llimpia.

---------------------------------------------------

Cuaya (Grau) - Rañeces - Xerra Los Arellanes - Las Murias - Llauréu

9 de Marzu de 2024

Track: Cuaya (Grau) - Rañeces - Xerra Los Arellanes - Las Murias  - Llauréu

Continuamos investigando fasteres menos conocíes pa facer monte, siguiendo l'envís de dir tachando tolos vértices xeodésicos d'Asturies, averándonos nesti casu hasta Grau y más en concretu, hasta la parroquia de Cuaya, onde nel pueblín de Cuainxú, tenemos una escuelina mítica d'escalada onde munchísimes tardes de branu tuviemos apretando enforma.

Poro, nun yera una fastera desconocía pa min, pero sí que nunca tuviera na tiesta preparar una ruta de monte per estos llugares, asina que tocó tirar de mapa, restolar dalgo que poder tachar ya intentar que'l patéu fuera lo más atrautivu posible, llamándome l'atención poderósamente los rigos Las Varas o Menende y Busllán, por mor de lo xabaz de les sos foces.

Entamamos en Cuaya (150) caleyando un kilómetru hacia Cuainxú

Asina que, dempués del almuerzu en Trubia, tiramos hacia Cuaya per Sama de Gráu, que pa los que non conozan esta carretera, podrán conocer dellos pueblos bien guapos. En Reconcu, desviámonos hacia Cuaya, teniendo un maraviyosu aparcaderu xunto a la ilesia del pueblu, onde preparámonos pa la ruta, con un día muncho meyor de lo que la meteo quería albidrar.

Molleda (Corvera) - L'Escañoriu - El Castiellu - La Cabaña - Picu Prietu - Bango - El Pino

11 de Febreru de 2024

Track: Molleda (Corvera) - L'Escañoriu - Castiellu - La Cabaña - Picu Prietu - Bango - El Pino

Día perruno no meteorolóxico, pero menos de lo que teníemos na tiesta cuando quedamos a les 9 y media p'almorzar nes Vegues en Corvera. Sorprendéntemente, tenemos un día ventosu pero con vientu ábrigu y pel momentu teníemos una ventana decente pa salir a patiar, col envís de facer el techu del conceyu corveranu. Aparte, dende les miós primeres andances pel monte, nun llibru que mercara, nomábase L'Escañoriu como un llugar a conocer, asina que preparamos esta ruta, col envís de matar dos páxaros d'un tiru.

 

Partimos del barriu'l Molín en Molleda (45 m)

Magar del cafetín, saldremos hasta la parroquia de Molleda, per onde percuerre la Sienda l'Agua, aparcando al llau del rigu nel barriu'l Molín. Ellí, preparámonos, saliendo con más capes de ropa de les debíes y entamamos a caleyar pela sienda l'agua, pasando per dalguna ponte curiosa y esfrutando d'una cantidá d'agua xabaz del desxelu, pero na rialidá, ye qu'atopamos muncha basoria a cada pasu que vamos dando ya seya nel propiu rigu o perende, ya seya nos praos, en cases abandonaes, etc...

Covarriella (Morcín)

21 de Febreru de 2024

Con esti iviernu de mentira que tamos teniendo, la oportunidá d'escalar al solete n'altura, ta siendo una de les meyores opciones, asina que la Covarriella ta dándonos munchísimu xuegu, tanto pa les tardes de vienres, viendo el nulu accesu al seutor dende l'aparcaderu como pa dir a pasar el día enteru nel fin de selmana.

Un par de findes tuviemos esguilando pela Covarriella con díes bien soleyeros, asina que fuimos hasta un seutorín pembaxo la peña La Covarriella, baxo la Sienda Cimera, del que tengo que buscar el nome, falando colos ganaderos de la zona, pero que llámolu la Visera de momentu y en dalguna páxina de facebook llegó a nomase como Marco Polo.

 

Vistes a la Mostayal dende'l seutorín de la Visera (Marco Polo)

Ye un seutorín equipáu per Berni, va dellos años ya y nun llegó a espublizase na, comentándome'l mesmu que yera ideáu pa iniciación y pa trepar los guah.es, coles chapes mui cerquines. Nel mió puntu de vista, les víes son buenísimes y pa que nun se pierdan, espublizo esta pequeña reseña, colos graos que nos paecieron más menos, ente los que les probamos.

 

Suco trepando y croquis de les cuatru víes esistentes na Visera

La idega ye llimpiar un pocu más y podríen entrar unes cuantes víes más y andái sollerte que les reuniones tienen los gatillos de los mosquetones tocaos y meyor facer reunión de l'argoya. Avisar tamién, que ye un seutorín, onde tenemos que tener cuidáu de nun tener cabres o caballos penriba ya que la sienda pasa penriba pudiendo tirar piedres y que de dalguna manera abellúgase del aire que suel correr pela Covarriella y si pega'l sol la palmada ye clara, asina que madrugar pa calecer deos nes sos víes y llueu ya podemos movemos a la Covarriella o Entrepicos.

 

Ambiente per Entrepicos nun día de rises y munchos pegues relaxaos

Aparte de dar a conocer esti minseutor dafechu recomendable, esta última temporada andamos llimpiando'l seutor d'Entrepicos y dempués de los encadenes de Sálvame del Crux (6c+/7a), Jinete Pálido (7a) y el Saltachapas (7a+) , quedábame l'ayalga de la cuevina, como ye'l Trono de Hierro, que ya probara va dellos años, casi recién reequipada.

 

Becky probando'l Trono de Hierro y yo dando pegues d'encadene

Col Saltachapas encadenáu en tres pegues, que pudo salir al segundu, tenía munches duldes so'l grau y con tan sólo, tocar les preses del Trono de Hierro, sacar los movimientos y ver lo físico del bloque, tenía claro que nun podien tar nel mesmu grau, asina que pa mi idega, el Saltachapas taría bien de 7a+, cincu estrelles dafechu y el Trono de Hierro, que tuvimos proyeutando Suco y yo, dellos díes y tamién dempués Dani, paezme que queda de 7b sólido y mui fisico.

Secuencia del bloque de Trono de Hierro (7b) durete mui bloqueru

Tuvi la suerte de tener a Andrea colgada nel quintín de la so manzorga y sacar tola secuencia del bloque nuno de los pegues d'encadene, que por gañán nun fice esi mesmu día y tuve que dir corriendo una tarde con Suco, antes de la llegada del temporal pa encadenala quedándome muncho más tranquilu pa la llegada del tardíu iviernu.

Finalmente, sacamos esti viote equipáu per Rubén, con movimientos mui na llende morfolóxica pa min, que dempués de los pegues dexábenme la espalda a la moda y tan sólo, quédame por encadenar d'esti seutor Gallumaster, que supongo que rondará también el 7b... pero esa ya será otra hestoria espero, primaveral.

Covarriella (Seutores visitaos)

Croquis modificaos por mi de la escuela d'escalada de Covarriella, por mor del grupu del facebook d'Escuela d'Escalada del Monsacru. Gracies y col so permisu.

------------------------------------------------------------------

Manzanea (Uviéu)

20 de Marzu de 2024 

Esti últimu mes, siguimos con varies visites a la Aguya'l Moru, yendo'l primer día con Pepa, a facer unos guapos metrinos, faciendo la variante d'Amagüestu (6a) que saldría V+, quiciás un pelin más cenciella que la llínea cimera y ya pasámonos a les nueves víes abiertes por Javo, que fizo una llimpieza de bardial en paré increyible y sacó 4 llínees bien guapes con metrinos.

Esta vegada, andaba un pocu alloriáu l'abeyeru d'enriba la cueva, asina que tirámonos a les primeres víes nueves de la manzorga, pudiendo facer dos más bloqueres, que saldrán sobre'l 6a+ y la siguiente facilina pero mui guapa que sedrá V, pelín más cenciella que la so compañera de la mandrecha que sedría como V+.

Llueu d'un día infame que pillónos la lluvia con malpenes un pegue nel que ficiera la salida pela mandrecha la cueva hasta riba, baxo una lluvia intensa, pude volver al día siguiente y calecer de nuevu na variante Amagüestu y ya, Anna y yo punximonos manos a la obra a prebar les víes más dures a priori del seutor.

 

Resume de víes de l'Aguya'l Moru a mi entender

Entamamos con Yoyin, encadenándola los dos al primer pegue, pero teniendo qu'apretar bien, con una llarga secuencia intensa sobre presa pequeña y pies un pelín malos, que paeciónos un 6c nel sitiu. Llueu, siguimos ya cola Curva del Moro, vía ya más curtia que tien quiciás el bloque, como movimientu particular, más duro que Yoyin, pero menos intensa, paeciéndonos tamién 6c como la so compañera.

Pa terminar, metímonos col únicu sétimu del seutor, Venus de Milo, que tien un bloque mui marcáu con un pasu bastante raro, que costó-y a Anna descifrar nel primer pegue. Tocóme'l turnu a min y pudo salime bastante natural el bloque, continuando con unos pasinos guapos hacia cadena, teniendo llueu Anna tiempu a dar un segundu pegue pa llevásela tamién.

Con esto, finalizamos la nuesa andanza cola Aguya'l Moru, encadenando toles víes a vista, asína que vos dexo la mió opinión solos graos y vuelvo a dar les gracies a Javo pola reequipación y ampliación d'esti seutor, pudiendo dicir como crítica positiva, que quiciábes meter una primer chapa más en varies víes, sedría dalgo a tener en cuenta por seguridá, ya que veo que tan mui altes en munchos casos.

Manzanea (Seutores visitaos)
 
Croquis modificaos por mi de la escuela d'escalada de La Manzanea, por mor de Piratas Free y El Maquis. Gracies y col so permisu.

----------------------------------------------------------------

Buyera (Santu Adrianu) - Picarós - Serandi (Proaza) - Airúas - Cutiái - Tartuchas - Samartín (Proaza)

11 de Febreru de 2024

Track: Buyera (Santu Adrianu) - Picarós - Serandi - Airúas - Cutiái - Tartuchas - Samartín

Otra xornada de monte nel GM Xuan de la Borrina, como siempre, restolando llugares o fasteres que nun conocemos entá y poro, preparamos una ruta que válganos pa tener una visión más completa d'Asturies y nesti casu, del conceyu de Santu Adrianu y Proaza, ya que vamos averanos hasta los valles del Osu.

Pa ello, quedaremos un bon garrapiellu de xente, nel área recreativa de Buyera, onde llueu de presentar a los nuevos collacios del grupu y vieyos que facía que nun veníen, preparamos les mochiles y bastones y entamamos a caleyar sele pela sienda L'Osu en direición Proaza.

Partimos del área recreativa de Buyera (200 m) en Santu Adrianu

Pasaremos al llau del cercáu oseru, casi ensin mirar pa la prubina la osa Molina, enzarrada de por vida, pal caltenimientu d'un cuentu turísticu nesta fastera y desviámonos hacia la foz de Picarós, la que nun conocía entá y a la qu'entramos per una pindia pista formigonada, pa llueu metenos al pocu, nun guapu camín pente les peñes de Tresbuyera.

Otura (Morcín)

3 Febreru de 2024

Como tolos iviernos, la Canal ye un llugar clásicu pa escalar al solín nos díes fríos, pero esti añu, tamos teniendo que medir muncho, cuando xubir sinon queremos cocer, ya que les temperatures esti iviernu tan siendo anormalmente cálides, asína que xubir, xubimos unes cuantes vegaes, pero non tanto como otros años, nes que veíemos L'Aramo ñeváu demientres dábemos pegues.

 

Anna plaqueando fino nel Esturbín de cara a proyeutos mayores

Pel momentu, centréme en facer el segundu llargu de Barriscal (7b+) que ya probara la temporada anterior, pero como suele pasar con una vía tan a bloque, a los piquiñinos cuéstanos más y tuve que buscar milenta formes de facer el bloque, ya que'l pasu quedábame llargu perdiendo pie drechu, teniendo qu'aguantar una puerta enorme.

Engoriláu col segundu llargu de Barriscal (7b+)

Asina que llueu d'alcontrar un feble pie que permitíame meter una rodiella nel techu pa frename y que nel pegue del posible d'encadene rompiérame'l pie, teniendo qu'aguantar la puerta a pelo y fundiéndome pa les siguientes secuencies, tuve que volver a restolar métodu pal pasu y tocó xubir un pie más entá, con una retrobici, pudiendo finalmente, encandenar la vía llueu d'unos pocos pegues más.

Sandra dando unos peguinos de placa relaxada

Al final, ruta fanática, que llevóme demasiaos pegues y darréu fuimos direutos a prebar Laguna Mental, demientres que Dani y Becky fulminen vía tres vía y Anna, fízose al fin con Promiscuidad Vertical (7b) dando muestres del so estáu de forma y cabeza y ya tien nel puntu de mira El Implacable L1 (7c), que de xuru, va poder no que queda de temporada dir a por ella con toles ganes.

-----------------------------------------------------------------------

L.levinco (Ayer) - Xerra de Pel.luno

28 de Xineru de 2024

Track: L.levinco (Ayer) - Xerra de Pel.luno

Otru día d'esti iviernu atípicu ensin ñeve, anque albidro que va ser la tónica nos años que queden per delantre. Asina que decidimos dir a cotes baxes, porque pa pisar la tristura nos altos, preferimos tocar caliza y trepar un pocu, asina que viniéronseme a la tiesta, esos guapos cumales penriba de la escuela d'escalada de Pel.luno.

Vamos xuntanos un bon garrapiellu xente, con primer ruta col grupu de Carlos, que vien col so perrín Nico y tamién de Maite, qu'acompaña a Carla, que facía munchu tiempu que nun venía col grupu. D'esti xeitu, vamos facer la decena de persones col restu xente más avezada a venir con nós de monte.

Partimos dende'l pueblu de L.levinco (450 m)

Quedaremos toos nel pueblu ayerán de L.levinco, onde almorzaremos nel chigre y dexaremos los coches, pa preparanos y entamar a caleyar peles cais del pueblín hacia la parte alta, pudiendo travesar peles cais o xubir un pelín pela carretera en direición a la cantera y ya garrar una pista a la manzorga que déxenos nos praos de la Pandiel.la.