7, 8 y 9 de Setiembre de 2023
El Cuetu La Corona, que non "cerro", ye aparte d'un monte bien guapu cabraliegu, una potente escuela d'escalada que si tuviera nel centru d'Asturies sería de les más visitaes, pero como siempre digo, nel Oriente d'Asturies, hai más roca qu'escaladores deportivos, poro la realidá, ye qu'anque vayas un finde o un puente, siempre vas tener el seutor práuticamente sólu pa ti y los tos collacios.
Nos últimos años, gracies al trabayu de Lito, Miguel Menchaca y Rafa
Escandón, la escuela fue creciendo en forma, amosándose nel espoxigue de
víes dende los croquis d'antaño, a los que tenéis baxo los primeros
pasos de Fistro de Diedro (6b), algamando la escuela les 60 víes
aprosimádamente.
El xefe siempre presenta na escalada cabraliega
Mi primer visita, perdiéndonos nel paséu hasta'l seutor fuera pel 2016 y
la siguiente vegada, fuera con Andrea y Anna, en 2021, nun finde nel
que ficimos delles visites a escueles cabraliegues. N'aquellos años,
ficiéramos el duro 6b, más bien 6b+ de Fistro de Diedros, una vía
imprescindible, acompañada nesti pañu de roca, por otres víes con
perbona pinta (Tu seré (7a+) y Requiem (6c+)).
Aparte de la vía de "calentar", pudimos probar Réquiem, un duru y físicu
6c+, que nun fuimos a encadenar daquella nin Anna nin yo, que la
probamos gracies a que la tenía montada Alvarín. La verdá ye que tábemos
nun estáu de forma pelín floxu nesi tiempu, sumáu a que siempre
cuéstame muncho garrar puxu en seutores que nun tengo pilláu'l puntu,
asína que dimos un pegue namás y cola llegada del sol, decidimos colar
del seutor a pasar la tarde polas Cábadas.
Esfrutando de Fistro de Diedro, rutón increyible de 6b
La siguiente visita, ya fuera en Xunetu d'esti añu, averándome hasta'l
seutor con Alvarín, pa conocer dos nuevos seutores en cara norte,
equipaos reciéntemente, lo que da a esta escuela munches más
posibilidaes pa esguilar en branu y pasar el día ensin esmolecese por
cocer al sol. Esi día, entramos a los nuevos seutores pel seutor Romano y
perdimos bastante tiempu hasta alcontralos tanto la Cueva como la Canal
del Castro.
Andrea y Anna probando delles víes nel paré cimeru de la Corona
Pa cuando llegamos, echamos un vistazu a la vía que más llamónos
l'atención: Las Témporas, un supuestu 7a, que lleva siendo la comedia
ente tolos collacios. Aquel día, Alvarín nun fue a sacar los pasos nel
primer pegue, probándola yo y dándo-y el métodu pa que llueu la pudiese
encadenar, metíéndo-y otru pegue yo tamién, pero pringando nel pasu en
cuestión.
Alvarín dando dellos pegues a víes nos nuevos seutores cara norte
Les rises ya entamaron na nuesa última visita nel puente del día
d'Asturies, con Dani, Becky y Anna, que la volvimos a probar nes tardes
cuando entraba'l sol al principal. El primer día, fuimos Dani, Becky y
yo, nun pudiendo encadenala nengún de nosotros, pero disfrutándola con
muncha risa, pa sacar los pasos.
Al día siguiente, volvimos con les tres con Anna, dando un peguín caún,
pudiendo llevásela Becky al primer pegue del día, terceru en total ente
los dos díes, diciendo que-y paecía 7b, cosa que tenemos toos más menos
claro, tamién Anna dempués de probala y sacar los pasos con munchu
esfuerzu tamién.
Becky y Dani apretando duro en Halftree
Dani ya desesperado, dempués de montala l'últimu día decidió nun dar más pegues quedando pa otra visita y yo volví a cayer nun dinámicu d'esquierdes dexándola con una cayida. Esi día, desmontárala Anna y decidimos que ya tuviera bien, baxando a peganos un bañu al Cares, por mor de los más de 30 graos que tábemos teniendo estos díes.
Fon y Becky dando pegazos nel Cuetu La Corona
Al marxe d'esta vía, tol equipu completáu por Nati y Fon y Ani y Rubén, fuimos xubiendo de mañana, aprovechando les hores de solombra, pa poder probar pela mió parte la Manivela (7a) que llevábase Anna a vista, faciéndola yo al segundu pegue, por pifiar el bloque, teniendo que dar ese segundu, que mermóme un pelín de cara a los pegues de tarde en Las Témporas, aún así, ta claro qu'hai un grau de diferencia ente ambes víes.
La compañera siempre atenta pa dar mimos
El sábadu, fuera l'últimu día que xubiéramos a trepar pela mió parte, pudiendo probar Tu Seré (7a+) perguapa vía de regletéu y resis, que montara Rubén nun pegue fanáticu al corte. Demientres, Anna daba un pegue increyible a otra vía nueva, La Santina (7a+) que pringara nel últimu pasu a reunión, nun pudiendo encadenala hasta'l día siguiente, al metese a probar tamién Tu Seré y entrar el sol nesa parte del paré.
Finde perfeutu per Cabrales cola comodidá del aparcaderu n'Asiegu
Coles yemes al corte y ciertu cansanciu, dempués d'escalar dende'l martes al sábadu de siguíu, pude terminar el día, encadenando sufrídamente Tu Seré al tercer pegue, lloñe de lo que debería ser, nel puntu de forma nel que debería tar, pero al menos si que tuve la fuerza mental, de meter un tercer pegue polo muncho que me prestaba la vía.
La baxada del Cuetu La Corona siempre con grandes vistes
Como siempre, el puentu fue un placer xuntándonos munchos collacios pel Oriente, trepando entre rises, los almuerzos mañaneros furgoneteros, les cenes nel aparcaderu del mirador d'Asiegu y los munchos y bonos pegues intensos de la xente, nes víes comentaes u otres que nun probé y que se llevaron Dani, Becky y Fon (Halftree (7b+)) y Oro Olímpico (7b), que ficiera Dani nun pegue soleyeru y desmontara con encadene Fon, pa finar el día del sábadu.
La verdá ye qu'esti finde, valíome pa garra-y gustu a esta escuela, quedándome la espinina de nun tar más descansáu pa prebar más víes, pero ye que venía d'apretar fuerte per Morcín y diba un pocu a pasar el puente tranquilu más qu'a meteme en grandes xardinos a los qu'esperemos entrar en prósimes visites.
-----------------------------------------------------------------------------------
