Poncebos (Cabrales) - Bulnes - Cuetos d'Albu - Llagu Rasu - Valcosín

23 de Payares de 2020

Track: Poncebos (Cabrales) - Bulnes - Cuetos d'Albu - Llagu Rasu - Valcosín

Lo de siempre, llamada d'Ana con picor de monte xabaz y Berto qu'acude a la llamada. Conocémonos demasiáu bien, como pa saber que ye lo que-y presta a la compañera de grandes batalles, asina que preparo una circular cañera pero con toque teúnicu na parte alta.

Problemes? Tolos que quieras, tamos casi n'Avientu con mui poques hores de lluz y ocúrreseme la xabazada d'ascender a los Cuetos d'Albu dende Poncebos. Camiento que somos a ello, pero tamién tengo claro que nun tamos na forma d'otros años y ye que'l 2020 pasó factura en tolos sentíos.

Partimos de Poncebos (260 m) de nueche aportando a Bulnes (715 m) pela canal del Texu

Inguanzu (Cabrales) - Seu L'Home Muertu - La Canal - El Cuetón - Ostandi - Busnuevu

31 d'Ochobre de 2020

Track: Inguanzu (Cabrales) - Seu L'Home Muertu - La Canal - El Cuetón - Ostandi - Busnuevu

Segunda fola de la pandemia del horrendu 2020, no sanitariu y no económicu a estes altures pa muncha xente, quedándonos colo únicu positivu, que ye la posibilidá de salir al monte siendo federáu ya que tamos confinaos perimetrálmente nes grandes ciudaes.

Sicasí, somos conscientes de la gravedá del asuntu, poro xuntámonos namái que seis del grupu monte y vamos en coches separaos. Nel ambiente, toos tenemos un ruxerux de que quiciás ye la última ruta que vamos poder facer nesti añu, ya seya por cierre gubernamental o por pura responsabilidá de grupu.

Partimos del guapu pueblu d'Inguanzo (315 m)

Tarna (Casu) - Tabayón del Mongallu - Cuetu Negru - Vega Pociellu

 27 de Setiembre de 2020

Track: Tarna (Casu) - Tabayón del Mongallu - Cuetu Negru - Vega Pociellu

Día serondiegu enforma, con frescu mañaneru pero con unes previsiones perbones de sol tol día, poro espérase un "llenu" nel monte astur, ante la nueva moda que tamos sofriendo. Ye lo que traen les pandemies, camudos de vezos na xente y al non poder salir d'Asturies dalgunos meses, la xente descubrió lo que tenía en casa.

 

Nun tengo mui claro entá, si esto ye positivu o non, por un llau que la xente avérese al monte, pue dar de sí un mayor interés nos conceyos y nel país por caltener les siendes llimpies, al menos los PR y GR, pero paezme que sedrán la sociedá la que dicte sentencia y la masificación acabará por crear problemes mediuambientales y pente la xente llocal y los foriatos.

Partimos del pueblu casín de Tarna (985 m)

Sobrevil.la (Teberga)

10 d'Ochobre de 2020

Entamaba un puente d'Ochobre con una meteo pelín gafa, con fríu y dalgo de lluvia a tramos del día, poro díbemos pa Teberga a facer lo que buénamente se pudiera. El primer día, magar d'alborecer relaxádamente, terminamos por dir hasta Murotecho.

Esguilando un pocu per Murotecho

Sedría la mió tercer visita y nun acabo de pillá-y el puntu, quiciás porque siempre vamos con condiciones fríes y pocu agradables. Esta vegada, al menos llevaba los deberes apuntaos y nun yera otra que facer Juventud Creadora, una 7a finu de regletéu y ñapines que según la xente diba prestame.

Juventud Creadora.... una vía fina, téunica y mui, mui guapa

Y teníen razón, prestóme, una vía mui guapa, fina de ñapes nel pasu y llueu un tramu más físicu arriba, siendo mui completa en términos xenerales. El pegue poniendo cintes ya fué perbono, pringando al dir más dinámicu de lo que diba prestame a una regle ínfima pero al segundu pegue ya la enchufamos y nun dió tiempu a metese en namái.

 

Habrá que tornar per ellí...

Sobrevil.la (Seutores visitaos)
 
Croquis modificaos por mi de la escuela d'escalada de Sobrevil.la, por mor de La noche del Lloro. Gracies y col so permisu.

 

Millaró (Los Argüeyos) - Cuetu Millaró

27 de Setiembre de 2020

Track: Millaró (Los Argüeyos) - Cuetu Millaró

2020, añu pandémicu. Branu enllenu de salides al monte, col grupu, sin grupu, xataes, ascensiones clásiques. Qu'esperar a partir d'agora? Entamamos temporada como si nun pasara na? Munches incóunites teníemos y aún así, decidimos entamar la temporada del GM Xuan de la Borrina con una salidina curtia pa intentar calecer pates y que la xente vaya animándose.

 

Partimos de Millaró (1380 m)

Val.le (Somiedu) - Pena L.lana - Picos Blancos - Picos de la Mortera

24 de Setiembre de 2020

Track: Val.le (Somiedu) - Pena L.lana - Picos Blancos - Picos de la Mortera

Un día cualesquiera, como siempre, Ana dame un toque picando pa ver si pueu garrar un día pa salir al monte. Esti añu, pente la pandemia y demás, tengo díes sueltos a esgaya, asina que póngome a preparar dalgo pa pegar un patéu guapu, pero ensin xatada infame, ya que tenemos previsión de lluvia pa la tarde.

Va tiempu, que sé que los últimos dosmiles de Somiedu que me queden por facer, son les peñes de la Mortera, poro preparo una circular guapa y p'allá que vamos. Cuantayá que nun tuviera per Somiedu y más entá pel Val.le, asína que paezme una idega de lo más afayaiza.

Partimos del Val.le (1258 m) en Somiedu

Rodellar (Semontano de Balbastro) - Cañon del Mascún - Otín

13 de Setiembre de 2020

Track: Rodellar (Semontano de Balbastro) - Cañon del Mascún - Otín

Despedímonos de les vacaciones per Rodellar con pocos encadenes, pero a gustu col mundiu de posibilidaes correnderes y montañeres qu'abrimos durante estos díes. Como non, pa terminar bien l'últimu día, que meyor que conocer tol barrancu del Mascún nun agradable patéu.

Poro, recoyeremos y pagaremos la nuesa estancia nel camping, del que nun falé muncho, pero a dicir verdá gastar perres pa tar a gustu como nesti camping paga la pena. Dicir, que ye nel primeru nel que toi, que veo bolses pa recoyer la mierda perru a cada pasu, lo cual ye d'agradecer el detalle, porque nun sabes cuando-y va dar al animalín por soltar lo suyo jeje.

Partimos de Rodellar con bona info del nuesu percorríu

Rodellar (Semontano de Balbastro)

Del 4 al 14 de Setiembre 2020

Una vuelta más, tornamos per Rodellar y ya va siendo, casi una necesidá, un viaxe al añu per esta escuela oscense pernomada mundialmente. Lo bono d'esti añu, ye que tuve descubriendo un pelín tamién otres actividaes a facer y ya namoróme del tou, pudiendo esguilar, correr pel monte, bañame o dir dar un pateín, poro paezme'l sitiu perfeutu.

Yo, Suco y Orlando apretando nel Bulder del John

No que na escalada podemos falar, tornamos de nuevu a vieyos proyeutinos que dexáramos d'otros años atrás, viendo que pa dir a Rodellar con ciertes garantíes, hai que tar d'escalar duro o nel roco o en desplome, poro vimos que nun mos movíemos quedando pa prau, una vegada más.

Na roca o nel roco siempre esfrutando de la escalada

Sicasí, esti añu, nun mos centramos tanto en dellos seutores y fuimos conociendo otros tantos de grau cenciellu como de grau duro. Poro, envede marchar con menos deberes, cayeron dellos pegues a víes que nun encadené y que quedarán como non, pa otra vegada que temos más fuertes y motivaos.

 

Volviendo a antiguos y eternos proyeutos

Na realidá, daste cuenta onde te mueves bien y lo que lleves faciendo nos últimos tiempos, acaba por amosar cual ye'l to estilu d'escalada. Esto quier dicir, que nun yes a movete en grandes desplomes de cazos pero sí que cuando toca menos desplome y dalgo de regleta con pasos menos físicos pues sal fácil.

Tolo y Orlando apretando nel Meandro

Exemplu, pues los pocos encadenes que fice, fueron nel Camino, un 7a y un 7a+ pegaos que lleváronme lo mesmu defechu. A la escontra, víes como Juan y Fran en Ventanas, quedóme claro, que lo mesmu necesitaba otros 2 o 3 pegues en díes distintos y descansáu pa poder faceles, ya que nun son difíciles pero sí mui desplomaes y ehí hai qu'andar con resistencia y fuercia.

Viendo trepar a Nico y Rober nel Delfín... brutales les semeyes

 

Como siempre, xuntámonos un montón d'asturianos pela escuela y pel camping, ya que nesti añu de pandemia, l'aparcaderu de Rodellar taba dafechu prohibíu estacionar de nueche, así que tocó gastar perres nel camping, pero dexáronse bien a gustu.

Kíla esfrutando de los paisaxes o non... depende del momentu

En resume, bones vacaciones, corretiando, conociendo un pelín meyor tola redolada y esguilando lo que nos dexó'l cuerpu y el non entrenu que llevábemos pa esti tipu d'escalada. D'esta mena, nun queda otra que tornar más fuerte o intentar buscar les víes que meyor se te puedan dar pa non marchar desmotiváu, anque en Rodellar ya se sabe, desplome y garrote.

 Rodellar (Seutores visitaos)
 
Croquis modificaos por mi de la escuela d'escalada de Rodellar, por mor de En La Vertical. Gracies y col so permisu.

--------------------------------------------------------------------------------------------- 

Rodellar (Semontano de Balbastro) - Cresta Balcez - Cheto

6 de Setiembre de 2020

Track: Rodellar (Uesca) - Cresta Balcez - Cheto

Tornábemos a Rodellar por tercer vegada nun viaxe d'escalada, pero quiciás esti añu, fué nel que descubrí un mundiu más allá, alloñándose del fanatismu escalador que me suel atufar a los pocos díes. Poro, llevé ropa y zapas pa conocer un pocu más esi mundiu de senderos del Guara, senderos qu'hai que dicir alto y claro, tan perbien calteníos y señalizaos ufreciendo un sinfín d'oportunidaes pa salir a patiar o entrenar un pocu corretiando per ellos.

Conociendo una migayina los senderos de Guara

Isoba (Porma) - Peñón San Justo - Valle Pinzón

30 d'Agostu de 2020

Track: Isoba (Porma) - Peñón San Justo - Valle Pinzón

Siguimos intentando compensar los meses perdíos pola pandemia, saliendo al monte en dómines nes que davezu, caún ta más bien a les sos hestories, ya seya peles sableres o faciendo proyeutos personales nos Picos.

Poro, finales d'Agostu y con un día pelín frescu pa esta dómina, vamos facer una salidina pa la comarca del Porma, más en concretu hasta Isoba, onde son munches les opciones que tenemos pa facer monte. Una d'elles y que siempre tuve na tiesta yera l'ascensión al Peñón San Justo, una mole de casi dosmil metros dafechu asitiáu en fastera llionesa.

Partimos a la vera'l llagu Isoba (1410 m)

Vega Urriellu (Cabrales) - Picos d'Arenizas

11 d'Agostu de 2020

Track: Vega Urriellu (Cabrales) - Picos d'Arenizas

Un martes cualquiera d'Agostu, llama a files Ana, llibra de curro y que si pueu pillar un día. Col cuentu de la pandemia, tengo díes ensin gastar abondo, asína que sobre la marcha pidimos el día, preparamos una mochilina y restolo na carpeta de pendientes que tenemos de menú del día.

Coménto-y la xugada y nun perdemos tiempu, vamos intentar el crestéu de los picos d'Arenizas, que llevo ensin pisalos dende la nuesa primer Travesera. Daquella, ficiéramos un hombrín y aportáramos a la primer Areniza si contamos dende la h.orcada d'Arenizas Baxas o de Caín.

Partimos de Pandébano (1080 m)

Cubiel.las d'Arbas (Los Argüeyos) - Peña La Barragana

 9 d'Agostu de 2020

Track: Cubiel.las d'Arbas (Los Argüeyos) - Peña La Barragana

Aprovechando que'l Baskonia Mendi Taldea, collacios de Basauri, llevaben de travesíes per Llión dellos díes, arrimámonos parte del GM Xuan de la Borrina al so alcuentru. Otra cosa ye que somos pelín desastres y Montse, Nus y yo llegamos tarde coles perrones.

Menos mal que Benjamín, punxo la nota seria nesti desastre de grupu monte que somos. Plantarémonos en Cubiel.las d'Arbas, na comarca los Argüeyos, casi una hora más tarde de la hora de quedada, asina que garraremos agua na fonte, ya que fae un calor brutal y tiramos p'arriba.

Salimos dende Cubiel.las (1315 m)

H.itu d'Escarandi (Cabrales) - Morra Llechugales - Pica'l H.ierru - Pozu Andara

 19 de Xunetu de 2020

Track: H.itu d'Escarandi (Cabrales) - Morra Llechugales - Pica'l H.ierru - Pozu Andara

Continuamos col finde de clásicos de los nuesos Picos, averándonos esta vegada hasta'l macizu Oriental, onde tenemos la idega d'ascender a la Morra Lechugales. Si'l día anterior, ya pasáremos calor na Peñesanta asturiana, güei alborecemos con una sensación chornu brutal.

Nun lo pensamos muncho, que sinon tiramos pa una sablera y salimos dende Arenas hacia Sotres, pa siguir hasta'l H.itu d'Escarandi, onde alcontrámonos col aparcaderu hasta la bandera. Toca dexar la furgo un pelín más baxa, anque sin problema, ya que sal un camín qu'empata cola pista del H.itu.

Partimos del H.itu Escarandi (1300 m)