Tuiza Riba (L.lena) - Covarrubia - Cuetu Les Cabres - Merines - Penubina Arista Este - Terreros - Meicín

15 de Mayu de 2025

Track: Tuiza Riba (L.lena) - Covarrubia - Cuetu Les Cabres - Merines - Penubina AE - Terreros - Meicín

Tornamos al monte col GM Xuan de la Borrina y vamos facelo, con una ruta divertida y mui entretenida, pela contorna del macizu de Penubina, al que nun visitábemos dende'l rutón a la Tesa pel monte Tixirúa, faciendo esta vegada una ascensión más clásica que nos pidiera'l compañeru Rubén y que nun conocía como ye la arista Este de Penubina.

Axuntámonos un bon garrapiellu pa lo que solemos tener por vezu nel grupu, averándose tres compañeros esternos, teniendo namás llegar al aparcaderu un percance col coche, rompiéndo-y l'embrague, teniendo que dexalu averáu a la carretera a la espera que dempués de la ruta viniese la ruta a recoyelo. 

Semeya de partida en Tuíza Riba (1204 m) onde dexamos un coche KO

Entamando bien el día, preparámonos y salimos pasaes les diez de la mañana, pente'l borrín, en direición al Meicín, xubiendo nun alderique continuu, ensin mayores prieses, que calecer un pocu músculos y garrar un ritmín curiosu, dexando abaxo'l refuxu y saliéndonos hacia'l valle de Covarrubia metíos dafechu nel borrín.

Por suerte, al altor de la bas del Portil.lín Cimeru, la borrina entama a escamplar, regalándonos perguapes vistes tanto hacia la cara nortiega de la Penubina, como al valle del rigu Güerna tapecíu dafechu pel mantu ñubosu.  

Covarriella (Morcín)

23 de Mayu de 2025

La Covariella sigue siendo el nuesu llugar d'escape, de trabayu y d'esguilada tranquila, saliéndonos de los circuitos morciniegos más nomaos, como la Peña Manteca, con tolos sos seutores u Otura, la escuela más nomada de Morcín. Nós, llevamos un par d'añinos trabayando nesti requexu tan increyíblemente guapu del Monsacru.

 

Orlando, Dani y Andrea dando peguinos nes víes de la Madalena

Mientres yo centrárame más en recuperar y equipar nueves víes nel Aviru Campón, Dani, metióse a trabayar dafechu na Aguya Madalena, onde ya esistíen delles víes antigües, qu'aprovechamos tamién pa revisar y reequipar el Guía del Meicín, que-y faltaba una reunión curiosa y añadimos una chapina na parte alta, ya que nun tenía dengún xacíu el alloñe a reunión esistente.

 

Dando pegues d'encadene a la Patatina Turner (7b+)

Demientres Dani diba enchufando tolo qu'equipaba, yo namás di pegues sueltos a la Patatina Turner (7b+), hasta que más o menos, terminé nel Aviru Campón, a falta de Camudando'l Cadril (7c/+?) y centréme un pelín en ganar la resis a la vía, ya que los pasos dende'l primer día fícelos ensin problemes, asína que pegue tres pegue, fuimos sintiéndonos cómodos hasta poder encadenala nel segundu pegue d'un vienres de finales de mayu.

 

Croquis de la Aguya Madalena na Covarriella (tenéislos nel MoNa en papel)

Dempués d'esti rutón de 35 metros aprósimáu, tamos probando Inversión Térmica (7b), una ruta más a bloque, qu'esperemos encadenar enantes del posible pieslle del seutor por añeramientu de zapiquera, anque pel momentu, dende la guardería nun tenemos noticies nengunes pa esti añu 2025, asina que llegalmente nun esiste dengún seutor reguláu nel intre.

----------------------------------------------------------------------------------

Carbes (Amieva)

24, 25 de Mayu de 2025

Finde d'escapada escaladora col envís de facer retomar un pocu a la compañera nesto de la escalada y como Shei, tenía munchu apreciu a Carbes, p'allá que tirámonos a ver que podíemos facer xugando col sol, asína que la idega siempre fue madrugar dientro de les posibilidaes y trepar hasta que nun s'aguantase, pero la verdá ye qu'entra la solana antes de lo camentáu y los pegues tienen que ser esprés.

 

Alboreciendo na Collada d'Amieva

Sicasí, el sábadu tiramos hasta'l seutor Principal, onde tuviemos solos tola mañana, al igual que durmiendo na Collada d'Amieva, asína que perfeutu, pudiendo repetir Misógeno (V+) pa calecer, Diente de Tiburón (6b+) que ye buenísima, Abrocanomacho (6c), brutal tamién y faciendo a vista un 6c+ nuevo (Gracias Pingüi) qu'entra a mi entender por Abrocanomacho y que ye buenísima y durina pal grau, vamos, qu'apreté como un cabrón pa facela.

 

Sector Principal y Gardaleyu

Al día siguiente, llueu de pasar una tarde estupenda de merenderos y ríos y de parar en San Román, que taben de fiestes, a la xubida a la Collada pa dormir, averámonos de nuevu hasta'l Principal pero había muncha xente y más perros, asina que tiramos hasta'l Gardaleyu a ver que podíemos facer per ellí.

 

Atapeciendo na collada d'Amieva

Entrámos-y a el Rey Gardaleyu (6a+) flipando cola llínea, lo completa que ye con un diedru preciosu con tramu finu y tramu físicu na parte alta, una pasada de ruta que Shei lluchó pa encadenala quedando ya satisfecha pa tol día. Al baxar púnxome les cintes a un 7a (Deslizdelet) del que nin había referencies en denguna páxina, asina que metime a vista total, porque nun había res de magnesiu per dengún llau, pegándome una de les mayores lluchaes nos últimos tiempos pa poder facela, paeciéndome totalmente brutal la vía y superfina d'escalar.

---------------------------------------------------------------------------------------