Covarriella (Morcín)

25 de Mayu de 2024

Continuamos trabayando pela Covarriella, faciendo delles visites p'adecuar un pocu'l pie de vía de L'Aviru'l Campón, asina como visitando l'Aguya Madalena, repitiendo dalguna vía col envís, de da-y una nueva vida a estos dos seutorinos, metiéndonos a trabayar nel evidente bombu que sal a la mandrecha de la clásica Roberto Madalena de tres llargos.

Dellos collacios, centráronse más en trabayar na aguya mientres que personalmente, prestóme muncho'l seutorín anterior, nomáu L'Aviru'l Campón, como confirmóme dalgún ganaderu de la zona. Ellí, llueu de facer el 7a de la manzorga que comentáremos nel anovamientu anterior, pasámonos a la siguiente vía, que salió a vista, paeciéndonos a los collacios que tuviéramos esi día dándo-y un pegue, que rondaría'l 6c+.

 

Ana encadenando'l 6c+ de L'Aviru Campón... cincu estrelles de vía

Brutal la vía, cincu estrelles totalmente d'escalar en tou momentu, al igual que la so collacia de la esquierda y bien ceo, metíme al día siguiente a la de la mandrecha, tando pelín moyáu un xarru al final d'una chorrerina, pero pudiéndose probar, paeciéndome aquel día, incluso más dura que'l 7a de la esquierda, pero llueu de sacar los pasos y da-y pegues colos compañeros, tamién paeciónos 7a, más cenciellu que l'otru, pero pa min, muncho más guapa y continua d'esguilar, siendo tamién un rutón.

 

Prau perfeutu pa echar la siesta baxo'l paré

Quedándome namái que les víes de dambos llaos y sabiendo que la de la esquierda pudiera rondar el 6c, pero necesitando una bona maceada, por mor, d'una parte baxa pelín rota o más bien hueca, tireme a la de la mandrecha, siendo la más dura de momentu, ensin dubia, paeciéndome más o menos 7b, super plaqueru y ñaperu concentráu nes tres primeres chapes.

 

Rubén y dellos escaladores más probando les víes del seutorín

Llueu de sacar pasos y mirar los chapaxes que tan un pelín estremos, con mal vuelu cerca'l suelu, pude encadenar les tres primeres chapes, pringando en dos ocasiones nel caberu movimientu duru, pero ye que tien tal intesidá que nin garrar magnesiu dexa jeje. Asina que cuando quise volver al día siguiente a dar un pegues d'encadene, alcontrámonos cola visita del guarda de mediuambiente, que traía de noticia, el cierre de los seutores sur del Monsacru.

Croquis de L'Aviru Campón hasta'l momentu

Viéramos a la zapiquera volando pela zona, pero nun sabíemos per onde añeraba, asina que paeznos lóxica la regulación, viendo que tienlo mui cerquina d'ambos seutores, asina que'l cierre hasta Setiembre ye una consecuencia normal, teniendo qu'esperar unos mesinos hasta poder trabayar tanto nes víes esistentes como nes nueves que dambos seutores pudieren ufrecernos a los escaladores.

Asina que ya sabéis, Aguya Madalena y L'Aviru Campón, queden cerraos hasta'l 31 d'Agostu, quedando'l restu seutores abiertos ensin regulación. Ya sabéis, respetái les regulaciones y volveremos a trepar per esti llugar al final del branu, ensin problemes.

------------------------------------------------------------------------------

Po (Cabrales)

10 de Mayu de 2024

Finde cabraliegu de conciertos col Válgame Fest, nel qu'averámonos el vienres tarde hasta Po y pese a lo que camentábemos en cuanto a moyaura de la escuela, alcontrámonos con tolo contrariu, con tolos parés secos, poro decidimos per primer vegada na mió vida, quedame na parta baxa de Po, cola idega d'esfrutar de les chorreres.

 

Vistes mítiques dende la escuela de Po en Cabrales

Ellí, tuviemos qu'esperar un ratín a que baxara'l sol y entamamos probando les dos primeres víes del seutor, como non, dando un peguín a Mociviellos (6b+), vía increyible buena, nun grau nel que nun ye normal poder esfrutar de garrar chorreres, empotrase y endiedrar pa salir a una placa cenciella brutal, con preses en forma de xarros nos que fluir con tola calma hasta la cadena.

 

Esfrutando de la parte baxa de Po con víes de chorrera

Aprovechando que teníemos la parte d'arriba montada, montamos la Carola Caracola (7a), que probó primero Ana, tirando d'empotres rodilleros y más tarde yo, viendo lo terriblemente malo que soi pa estes xeres. Nel segundu pegue, malpenes apoyé un segundu'l muslu na chorrera y tiré de garrotismu illústráu pa salir lo más apriesa posible de tola parte desplomada y encadenar la vía, qu'a dicir verdá, al final gustóme bastante.

----------------------------------------------------

Riumiera (Cantabria)

Del 28 d'Abril al 5 de Mayu de 2024

Semanina de vacas pol valle del Miera, onde ya contáremos un par de rutes de monte per Santoña, escapando d'un día atroz de meteo y una mañanera pel valle, como fuera conocer el fayéu de Zamina bien cerquina de Sanroque Riumiera y del nuesu campu base como ye'l camping de Lunada, onde volvimos a tar encantaos, tanto colos dueños, como nel chigre y nel bungalow de relax.

 

Apalanque perfeutu nel camping Lunada con tolos necesariu pa esfrutar del paisaxe

Entamáremos col viaxe de domingu, aportando a la cabecera del valle cola calma, parando a dar unos peguinos en Solares, nuna escuela que nun conocíemos y que prestónos bastante, con víes curties y pelín bloqueres pero con bona roca, paeciéndonos mui divertíes nel so conxuntu, asemeyándonos un pocu a las Cabadas en Cabrales, siendo una perfeuta opción pa una tarde, enantes d'averase finalmente al valle del Miera.

 

Paradina enantes d'entrar al valle en Solares

Esi día, aportamos al camping, organizamos les millones de tonelaes de comida como pudimos nel bungalow y dedicámonos a esparcer tomando birres y cenando xenial nel chigre del camping, col envís de llevantanos cola calma al día siguiente y ver pa onde podíemos tirar. Llueu, d'una mañana que dió tiempu pa too, saliendo en bici pela redolada y almorzando ensin priesa, fuimos hasta Ajanedo que nun concocíemos, alloriando col murazu qu'estiéndese durante cientos de metros, anque na realidá una pequeña parte ta equipada al entamu del farayón de roca.

 

Segundu día trepando per Ajanedo... muria llarguísima con milenta posibilidaes

Nesti día fadríemos un par de sestos, con ciertu toque alpín, siempre esguilando per diedru na parte baxera y terminando en plaques bien guapes na parte alta, que llevónos dempués a intentar facer un 7a, al que malpenes pude da-y un intentu fuerte a vista, nun saliéndome, hasta que les yemes dixeron basta, magar de 4 díes siguíos trepando, ya que'l finde per Asturies tamién tocara trepar de vienres y sábadu.

Visitina a Calseca llueu d'un día de lluvies que pudimos llibrar plaqueando

Al día siguiente, ficiéramos una visitina hasta las Placas de Sanroque, onde malpenes pudimos probar un 6b+ mui buenu, llargu y de cantu que prestóme bastante y ya vino l'orbayu que dexónos ensin esguilar hasta'l día dempués de la ruta pel monte Bucieru. Llueu d'esi día dafechu ivernal pel valle, fuímonos al siguiente, a conocer Calseca, lo que ya ye una aventura de por sí, echando unes rises pela mediu ferrata colgada hasta dar cola paré sur, onde teníemos plaques grises onde tuviemos probando un par de sextos guapísimos hasta que de nuevu les ñubes tormentoses echáronmos pal camping.

 

Víes atómiques nun día pelín murniu nel plaques de Sanroque

Al día siguiente, de vienres, llueu del patéu per Zamina, xuntáronse más collacios fuxendo del mal tiempu n'Asturies y tiramos hasta las placas de Sanroque, onde tuvimos la suerte de topanos con dellos equipadores, que recomendaronmos víes, tanto pa Sandra y Silvia, como pa Dani y pa min, que llueu de calecer nel 6b+ que ya conocíemos, métimonos a probar el Sacacorchos, un pepinazu de vía que tengo munches ganes de volver a probar.

 

Conocimos los seutores del Molino con víes mui divertíes y mal pié de vía

Con tol sábadu per delantre, al día siguiente decidimos conocer dalgo más nuevu y fuimos hasta'l Molino, valle abaxu, onde esisten dos seutores, norte y sur, yendo a conocer el norte, pudiendo probar víes mui buenes, pero con un pie de vía, espuestu y mui incómodu. Esi día, tuvimos la fortuna de metenos a probar un 7a de desplome de lo meyor que probé nesti estilu, simplemente pura resistencia y diversión total, qu'esfrutámosla toos, pudiendo Dani, que venía fanáticu, facer otru 7a tamién atómicu.

Despedímonos del valle nel Desplome del Camping

Esi día, ficimos de tarde una visita esprés pa que Dani conociese Merilla y col domingu amenazando agua ensin xacíu y la vuelta final de vacas, tocó cena relaxada nel bungalow y espabilar un pocu la mañana siguiente, pa dir hasta'l Desplome del Camping, muria allargada y curtia mui desplomada, que sorprendiónos pa bien, por ser una escalada divertida pa combinar una mañana y quiciás plaquear de tarde.

En resume, selmana de vacas mui completa, con bici, monte y esguilada, repitiendo dalgunos seutores, pero conociendo otros que prestáronmos muncho, poro como non, tenemos claro qu'esti valle, volvió a dexanos un tastu bien dulce y que tengo claro que volveré siempre que pueda ya que ye un sitiu onde tamos bien a gustu.

La Concha (Valles Pasiegos) - Fayéu de Zamina - El Toral

3 de Mayu de 2024

Track: La Concha (Valles Pasiegos) - Zamina - El Toral

Continúabemos de vacas pel Miera y a la espera que llegasen dalgunos collacios más pa esguilar el restu la selmana, decidimos de mañana salir a dar un patéu y conocer el recomendáu fayéu de Zamina, poro averámonos hasta'l barriu La Concha, pelín más arriba de Sanroque Riumiera, en direición al puertu Lunada.

Entamamos la ruta a la Zamina dende la Concha (575 m)

Ellí, aparcaremos la furgo y echamos un vistazu al cartelu indicativu, viendo que vamos tener que facer la circular completa, ya que dir ver el fayéu y volver diba ser igual de llargu, asina que baxamos dellos metros pela carretera y salimos pela manzorga nun camín n'ascensu, llueu de visitar un pequeñu y guapu tabayón na riega Los Pontones.