Muriel de la Fuente (Pinares) - La Fuentona - La Peñota - Umbriazo

 29 de Marzu de 2025

Track: Muriel de la Fuente (Pinares) - La Fuentona - La Peñota - Umbriazo

Dempués de la selmana santa per Olba, escalando y saliendo cola bici, apetecía tamién, andar un pocu pel monte, asina que dempués del miércoles de viaxe hasta Soria, preparamos pa dar una vueltina colos collacios, yéndonos hasta Muriel de la Fuente, na contorna natural de la Fuentona. onde alcontraremos dellos senderos bien balizaos pa pequeños pateos, col envís de conocer la cascada d'Espeñalayegua y la propia Fuentona.

Partimos de Muriel de la Fuente (1010 m)

Aportamos a Muriel alcontrándonos l'aparcaderu casi enllenu y ye que la selmana santa, ye un pocu infiernu pa visitar cualesquier cosa, ya que tolos rebaños de xente salen a lo llocu. Pagamos l'aportación pal caltenimientu del monumentu natural y salimos pente la xente a bon ritmu, esfrutando del paseín a la vera del rigu Abión, hasta'l desvíu hacia'l Chorro d'Espeñalayegua, al qu'aportamos pente les cares de frustración de los visitantes, qu'alcuéntrelu dafechu seco.

 

Facemos paseín con tola dominguerada hasta la cascada y Fuentona de Muriel

Coses que pasen, anque paeciónos raro, ya que les lluvies esti iviernu fueren abondes, pero'l rigu Cabrejas nun lo tuvo mui en cuenta paez ser. Damos la vuelta hasta la mecedura col Abión, pa siguir camín hasta la Fuentona, onde la xente da vueltes, ensin saber mui bien el mundiu interior, qu'oculten les tranquiles agües del ñacimientu del rigu Abión: llugar de grandes espeleoaventures y dalgunes traxedies.

 

Ascendemos hacia la sierra del Umbriazo per cómodes pistes pa dempués travesar un sabinar

Abandonamos la Fuentona, escaeciendo tol marabayu xente y vamos salir hacia la parte alta de la sierra Umbriazo, ya por un camín ensin xente, cruciándonos namás que con dellos ciclistes en descensu, que dánmos delles idegues pa facer en BTT xuntos y entraremos na parte alta, nun llargu paseín pente sabines y enebros, hasta averános finalmente, hasta La Peñota (1243 m), ún de los cumales más importantes d'esta sierra.

Encumamos los 1243 m de la Peñota con amplies vistes

El día sigue frescu y tira un airín repunante, asina qu'esfrutamos un pocu de les vistes (Sistema Central, cañón del Río Lobos...) y decidimos abelluganos del vientu, al interior de la viesca, pa picar dalgo, enantes de continuar pel senderu, pegaos a la fastera oriental de la sierra, pa caltener les vistes, hasta aportar a los restos d'una atalaya onde alcuéntrase'l vértice xeodésicu del Umbriazo, segundu del día cola Peñota.

Descendemos pocu a pocu pasando pela peña del Umbriazo hasta baxar al riu Abión de nuevu

Fadremos semeya de rigo y echámonos abaxo de nuevu hacia'l rigu Abión, pa tornar al camín principal pel que tornaremos hasta'l coche, pa cambianos y dir a tomar un llargu vermú, primeru per Muriel y más tarde pel Burgo d'Osma, onde paez nun tener fin los vermús y tardeos, dándonos de picar dalgo bien pasaes les 4 y media de la tarde.

En resume, pateín agradable de 3 hores y media, pa facer los 15 km de percorríu con +/-265 m de desnivel positivu acumuláu, eso sí a bon ritmu que fuimos, anque podemos ampliar el patéu tolo que queramos ya qu'esta xerra llarga y plana, daría pa siguir hasta'l so puntu más alto en La Lastra (1345 m).

Cascada d'Espeñalayegua (Semeya e info en Excursiones y rutas por CyL)