27 de Mayu de 2024
Track: Ruil.láu (Babia) - L.láu - La Ferrera - Altu La Cañada - Rabinalto - Peña L'Arena - Las Veigas
Dempués d'unes vacaciones cántabres y muncha escalada deportiva, per Asturies, yeramos a algamar un grupete curiosu nel GM Xuan de la Borrina pa salir de monte una vegada más. Llevaba tiempu, con ganes de conocer l'otra fastera de Babia al sur de la carretera, ya teníemos bones rutes feches hacia'l norte, como nel Montigüeiru o al Morrunegru más reciéntemente, pero teníemos munchu monte por conocer al sur, y l'Altu La Cañada, yera un oxetivu míu pa esti añu.
D'esti xeitu, vamos averanos hasta Güergas de Babia, onde almorzamos nel Moriscal, como siempre y siguimos hasta'l cercanu pueblu de Ruil.láu, onde travesaremos les sos cais, hasta atopar un bon sitiu onde aparcar los coches, al pie del camín de partida y d'una bona fonte onde garrar agua. Dicir, qu'a la entrada del pueblu, tenemos un amplia area d'autocaravanes y furgonetes onde pasar la nueche y esfrutar d'esti guapu llugar.
Comentando lo muncho que trabayen en Llión pa caltener un turismu de monte estable y sostenible, con rutes señalizaes, aparcaderos de furgos y autocaravanes en munchos pueblos y munchu qu'ufrecer y por embargu, n'Asturies colo poco que se cuida'l turismu sostenible de monte, en toles fasteres asturianes, lo únicu que somos a algamar ye masificación en delles fasteres, llevando mil molesties a los paisanos de los pueblos.
Saldremos camín de la Braña alantre, siempre nun ascensu sele, como non, con un verdor preciosu y dellos tramos nos que somos a ver los altos de la xerra de Villabandín. Dempués de dalgo más de 3 km de calecer músculos, siguimos los cartelos del L.lau, averándonos hasta la Braña, onde podemos esfrutar de las ol.leras (olles onde enfriábase la lleche recién ordeñao).
La verdá ye que vamos esfrutando del camín munchísimu, teniendo tolos praos verdes y hasta les cotoyes en flor, anque por suerte nun tenemos nin qu'acercanos a elles, ya que les siendes tan bien abiertes, averándonos hasta'l tabayón de San Bartolo, na peña'l Cuérrabo, puntu bien guapu d'esti percorríu que tien como oxetivu llevanos hasta'l L.láu (non lago del l.láu que ye una redundancia).
El camín va faciéndose hasta llargu de camín al L.lau, entrando nun tarrén onde vemos el llabor de desmonte del agua, siguiendo'l camín pente los terraplenes formaos pola cuenca'l rigu la Señal que ñaz nel pocu impresionante L.lau. Digo pocu, porque la escavación del rigu daba entender lo grandiosu de la l.laguna, pero quedámonos un pocu deceicionaos, anque hai que dicir que'l llugar ye guapu, sicasí tando en plena primavera d'agua enforma, sorprendiónos lo probe de la llaguna.
Saldremos del L.lau pela amplia cubeta glacial, pasando pela inesistente l.laguna siempre ya cola vista puesta nos altos de la xerra de Villabandín, pudiendo entrar al crestéu per varies vallines, decidiéndonos pola arista norte del Picu La Ferrera, cola idega, de mirar si Benjamín tenía baxada hacia'l valle siguiente, desdexando esta opción, aportando a los 2125 m del Picu La Ferrera, demientres Benjamín, bordea más baxo hacia La Cañada.
Col primer cumal de 2125 m fechu, vamos dir crestiando tranquilamente hacia'l siguiente y cimeru oxetivu del día, que nun ye l'otru que'l Altu la Cañada, puntu más altu de la xerra colos sos 2161 m y Dosmil Cimeru del Cordal Cantábricu, dominando tantísima fastera asturllionesa, que volvémonos llocos intentando saber tolo que nos arrodia.
Con casi 4 hores de patéu, tocaba descansar con tola calma, esfrutando d'un día preciosu de monte, pela nuesa querida Babia, anque pal norte, veíemos tola nubosidá norteña que tapecía Asturies. Sicasí, xintamos el bocata con calma, pero taben tornándose un pocu más prietes les ñubes, asina que nun quisimos estirar de más el descansu y col banduyu enllenu, entamamos el descensu dende la Cañada hacia'l picu Rabinalto.
Pa ello, descenderemos cómdamente dellos metros, comentando la xugada d'un posible descensu, que nun acabamos d'atalantar, asi que convidamos a Benjamín, que pasáralo pelín mal xubiendo, a que pocu a pocu fuera de colláu en colláu, evitando les ascensiones y baxar finalmente toos xuntos, asina que mientres faldiaba, nosotros ascendimos hasta'l Rabinalto (2115 m), un monte tipu llomba pel sur, pero que tien una faza norte, increyíblemente guapa y xabaz con una cayida perimportante.
Continuaremos esfrutando del patéu pel cordal, descendiendo del Rabinalto, hasta' colláu l'Arena, onde atopamos claramente la razón del nome y ya toos xuntos ascenderemos al caberu cumal del día como ye'l cumal norte de la Peña L'Arena (2106 m), teniendo'l so puntu más altu más al Sur, pero vásenos un pelín del circuitu asina que siguimos descensu hacia la collada los Machadones, onde ya sí, alcontramos un claru descensu, al llau de la riega homónima hacia'l valle fonderu de Veigas.
Restolando pente'l valle, siempre a la mandrecha de la riega los Machadones, diremos alcontrando senderos curiosinos hasta aportar a la mecedura de la riega los Machadones cola de San Bartolo, amestándose pa formar la riega Las Veigas, pasándonos nel intre a la manzorga les riegues, pa entrar nun tarrén más amable na enorme mayada de la Braña Veigas, onde tendremos la semeya paisaxística más guapa del día, como ye tol circu de dos miles que pudimos percorrer nesta ruta.
Con esti puntu final del día, echando un vistazu a tol percorríu que ficimos, dende los cumales de la Ferrera a la L'Arena, cola Cañada y el imponente Rabinalto, nel centru, vamos facer una visita al refuxu de Veigas y nel intre alcontrarémonos cola pista que va llevanos al llau de la riega de Veigas primeru y más tarde, empataremos col Ruil.láu, onde ya baxaremos pela mesma pista hasta'l pueblu de Ruil.láu, onde esperábenos unes birres na terraza del Moriscal.
En resume, ruta perfeuta pa conocer esta fastera babiana, menos conocida qu'otres y que personalmente encantónos y diónos munches vistes a montes llioneses que tenemos la necesidá darréu de conocer. Los 18,75 km de percorríu y los 1010 m de desnivel positivu, fueron un pagu prestosu pa les 7 hores y 40 min de monte del buenu.
No hay comentarios:
Publicar un comentario