Soto (Sobrescobiu) - Pandanes - Retriñón - Moroma - Pandefresnu

23 de Xunu de 2024

Track: Soto (Sobrescobiu) - Pandanes - Retriñón - Moroma - Pandefresnu

Ruta programada nel calendariu del GM Xuan de la Borrina, pol compañeru Carlos, a la qu'animámonos como siempre los más interesaos, ye dicir, los más interesaos en bregar pel monte y descubrir dalgún senderu mediu perdíu y de pasu que Carlos ficiera per primer vegada, el Retriñón, que por temes de trabayu nos últimos años, nun pudiera ascendelu.

Pero como nun mos presta repetir rutes, na ruta mítica, pola bregada, al picu Les Aberrugues peles foces de Llaímu, acolumbráremos la posible ascensión al cercanu Retriñón peles mines de Pandales, quedándonos cola ruta guardada na tiesta, por muncho que nos diese pereza percorrer una vegada más, el camín d'Agüeria o senda L'Alba.

Partimos del guapu pueblu coyanu de Soto (432 m)

Llueu d'un intentu d'almuerzu en Sobrescobiu, pasando pela Pola Llaviana, a pinchar unos pinchos a la xente, ya que llegaba pelín tarde, preparámonos nel aparcaderu y entamamos a calecer patuques pel clásicu camín pegáu al rigu Alba, esfrutando de la nuesa soledá madrugadora y como siempre, de dellos puntos de gran interés paisaxísticu, hasta aportar a la Vega, onde asítiase una pequeña área recreativa.

 

Facemos tol camín d'Agüeria hasta la Vega pa calecer pates

Nesti puntu, envede siguir camín alantre adentrándonos na foz de Llaímu, vamos salir a la manzorga per una pista y al pocu de cruciar el rigu Alba, vamos tomar un senderín a la mandrecha, que bien ceo, tresformarase en camín con bona caxa, pel que diremos avanzando nun par d'envueltes, pa garrar un tramu llargu de traviesa perguapa pela viesca hasta dar a un collaín onde tenemos vistes increyibles de la foz.

 

Entramos al monte per guapu camín a la gueta de les mines

Los nuesos pasos dirán llevándonos per un increyible senderu, que pesie a la primavera que tuvimos, síguese bien, pasando al llau d'una pequeña aguya, onde algamamos vistes más clares, hacia una caseta que diznos que vamos bien hacia les mines. Como digo, el senderu ye colgáu sol rigu Alba y paez imposible que percorriese tola parte alta de la foz, pente los desventíos y canales perpindies, hasta dar cola Casa Los Obreros.

 

Pesie a tar pelín tomáu, seguimos l'increyible senderu hacia les mines de Pandanes

Llueu d'echar una miradina a la casa, viendo que mete mieu onde ta colgada y onde facíen vida o trabayaben, siguimos senderu penriba d'ella pa entrar nel ámbitu de la riega la Escombrera, onde atopamos caminos armaos brutales y restos de cables, per onde baxaben el material. Vamos dafechu entreteníos, mirando onde teníen que trabayar los paisanos d'antañu y atopámonos cola ayalga del guapu tabayón de la riega la Escombrera.

 

Vamos descubriendo pasín a pasu les antigües estructures y bocamines

Nesti ambiente xabaz, averámonos a la cabecera del tabayón, viendo que gran parte de l'agua sal d'una bocamina anegada, onde nótase un fríu brutal y saldremos a la esquierda de la bocamina, nel tramu más pindiu y de senderu menos evidente, de tol percorríu per estes mines. Poro, hai que poner procuru nesti tramu pindiu sobretou si facémoslo en descensu, anque rápidamente atoparemos delles construcciones más, como la chabola del Vigilante y la torre del Transformador, asina como alcontraremos dalguna fría bocamina más.

 

Tenemos l'agasayu en forma de tabayón na canal de la Escombrera

Tamos alloriando con tol percorríu, entrando na parte final, onde ya salimos de los crestones y canales cuarcítiques pa salir al monte L'Arru, onde tendremos un llimpiu fayéu, pel que'l senderu dirá faciendo envueltes, con restos de cueves y aviros ñaturales que fueron escavaes, pa entrar en camín más ampliu hasta aportar a la collada onde alcuéntrase la Casa la Mina.

Salimos per guapísimos collaos pente una viesca de gran calidá hasta la Casa la Mina

Esta construcción que pali pali, va desmoronándose, escaeciéndose este increyible paisaxe industrial, pudiera ser un puntu final de ruta bien válido, ya que podríemos descender pero bona pista hasta la Vega de nuevu, pasando peles Argamosielles, onde axúntense la riego los Negros y la d'Agues qu'acompañaríanos tol camín.

 

Siguimos camín alantre hacia la mayada de Pandanes

Dexando esta opción, como ruta mañanera bien guapa que nun m'importaría repetir, saldremos pel monte'l Furáu alantre, qu'amuésanos una belleza primaveral sobresaliente, hasta atopar camín marcáu, que vendría dende la pista hacia la casa la Mina y que va sacanos ya pela canal de los Pandanes, primeru y pela Güeya les Llastres onde atopamos dellos corripios al mayáu de Pandanes, onde atopamos un guapu pero desaniciáu mayáu, dándonos bastante pena l'estáu de toles cabañes.

 

Descansamos un ratín en Pandanes y siguimos camín hacia'l Retriñón pasando per Fiuyu

Equí despedirémonos de Benjamín, que quiso siguir hasta'l mayáu pa descender hacia Les Felgueres y Cruz de los Ríos pola so cuenta. Nós, llueu d'un descansu y picar daqué, aprovechando pa esfrutar de les vistes hacia les foces de Llaímu, alcordándonos de la riega'l Cabritu. Magar del reposu, vamos salir pela Carba los Pandanes alantre, hacia Campurralláu onde atopamos fonte, pa siguir per una vallina que métenos dafechu pente'l borrín, dándonos bastante que facer p'alcontrar la mayada Fiuyu.  

Col senderu bien claro dende Fiuyu, onde casi nun vemos nin les cabañes, vamos garrar otru senderu marcáu per una vallina amiestu de yerba y caliza, hasta una colladina onde ya sí, toca tirar de marcha baxa y garrar la panda final hacia'l cumal del Retriñón, faciéndose un pocu bola pa los xemelos, aportar hasta los 1862 m del techu de Sobrescobiu.

 

Facemos cumal nel Retriñón (1862m) pente una borrina fonda

Con un resol bastante cabrón, xintaremos nel cumal del Retriñón, charrando un ratín coles compañeres montañeres d'Encumbradas, que tuvimos qu'orientar un pelín pa que pudieran siguir la so circular que teníen en monte y nós, tirarémonos pela cuerda'l Retriñón hacia'l norte, col envís de facer de camín el picu Moroma.

Tengo que dicir, que tampoco ye que fuese una maraviya de crestería, teniendo munchu matu de cotoya y brezu baxu y dalgún destrepe con un toque dalgo aéreo, anque puédese evitar yendo más pela fastera coyana. Pente que díbemos sin vistes y que tampoco yera de fácil avance los senderos, aportamos al Moroma de 1653 m, faciendo semeya y aína punxímonos a buscar una baxada factible.

Crestiamos con calma hacia'l picu Moroma (1653 m) con dalgún pasín entreteníu

Alcontrarémosla dende la collada siguiente al cumal, baxando como meyor podemos siguiendo dalgún rastru de senderu, hasta garrar l'arista Este, ya que dende'l cumal nun lo veímos mui claro. Llueu d'esta pequeña bregada, debemos intentar alcontrar el meyor rastru posible de senderu, pero insisto en non abandona l'arista ya que va danos posible baxada en tou momentu. IMPORTANTE: nun metese hacia la vallina drecha, que baxaría hacia la mayada Xulió, ya qu'alcontrámosla tomadísima por un mar de felechos, cotoyes y urcies quemaes, que fizo un infiernu la baxada.

Imaxinamos una baxada meyor hacia Pandefresnu de la que sofrimos por metenos pela vallina

Asina que vamos obviar la nuesa baxada y encomendavos a descender pela arista Este del Moroma, hasta'l colláu L'Home Muertu, onde diremos de llomba en llomba al colláu mediu y finalmente a colláu de Pandefresnu, onde enllazaríemos el camín que vien dende'l valle Xulió, poro si queremos facer una bona circular desdexando'l picu Moroma, baxar dende'l propiu Retriñón al colláu de la Muezca, pa siguir hacia'l valle Xulió dende la col.lada L'Arcu ye otra perbona opción.

 

Descensu más tranquilu pasando pela Bauga hasta la Vega onde garramos la senda L'Alba

Una vegada que tamos en Pandefresnu, les aventures termínense y diremos per senderu claru, faldiando la fastera SO del picu la Frayada hasta'l Pandu Troncos, onde ya garramos pista hacia la Baúga, onde empatamos col PR que llevaríanos en direición contraria a la collada Isorno pa baxar hacia Caliao. Nel nuesu casi siguiremos descensu per Mudriellos primeru pa siguir nun par d'envueltes llarguísimes hasta Lixariegu, onde ya diremos a la mandrecha'l rigu Alba hasta empatar col camín d'Agüeria al altor del Retorturiu.

Dende equí, quedaríanos unos 4,5 km de camín hasta Soto de nuevu, onde zarramos esta guapa y llarga circular al Retriñón, que sacante'l fallu na baxada, pa la que vos propongo cambios, ye dafechu imprescindible anque seya por conocer tol camín de les mines de Pandanes. Sicasí, quedámonos igualmente colos 23,4 km de percorríu, con +/-1555 m de desnivel acumuláu nun total de casi 12 hores de camín, meyorables nel track que vos indico, siendo 5 estrelles dafechu.

 

Camudando'l Camín nos mundos de Llaímu