21 d'Ochobre de 2023
Track: Ruil.lazo (Los Argüeyos) - Picu Correcillas
Dempués de los díes de patéu per Somiedu, descansábemos quince díes y volvíemos al monte, con una meteo dafechu distinta al calor que pasamos de daquella. Esta vegada, tenemos un día serondiegu, fresquín enforma y col golor esi de les primeres ñeves nel ambiente, tanto que según vamos conduciendo hacia Llión, acolumbramos esi mantu blancu na parte alta de los cumales del macizu de Penubina.
Atrás quedara l'almuerzu en Mieres del Camín, onde xuntamos coches, conduciendo pel Puertu Payares alantre, hasta Vil.lamanín, onde saldremos hacia Cármenes primeru y llueu hacia la fastera de Vegacervera, desviándonos hacia'l pequeñu pueblín de Ruil.lazo, onde tendremos el nuesu puntu de partida.
Tamos en mediu d'un mundiu de montes llioneses del Cordal Cantábricu y sincéramente, tovía perdémonos un pocu, ya que nestos años, patiamos Asturies con xeitu, pero darréu, vamos intentar conocer meyor esta Asturies Cismontana y nesta fastera, la cantidá de montes de gran valir son ablucantes: Bodón, Buicioso, Valdhorria...y el nuesu oxetivu el picu Correciellas o Polvoreo.
Pa ello, entamamos a caleyar peles cais de Rui.lazo saliendo per un preciosu camín empedráu, a la vera la riega Ruil.lazo y siempre a la solombra, gracies a la viesca que va protexéndonos del sol, cosa qu'esta vegada nun agradecemos del too, pudiendo calecer na parte alta del valle, cuando ya salimos a tarrén más abiertu, onde podemos acolombrar tolos montes que nos arrodien.
Pasaremos d'esti camín empredráu a la parte alta del valle, onde'l camín tresfórmase en pista que va ascendiendo cómodamente per monte baxo, hasta topanos con una "mítica" valla, ya que debemos travesar un tramu de "tarrén priváu", pero como ya sabéis, nun llevamos mui bien lo de les llendes nel monte, asina que siguimos l'antiguu camín pente Ruil.lazo y Correciellas, hasta'l colláu Santiagu, onde desviámonos hacia la mandrecha, algamando la primer vista del picu Correciellas.
Fadremos un par d'envueltes per pista, dando vista al valle'l Marqués, pero onde tornaremos y vamos siguir rodaes de vehículu, hasta ganar una vallina xustu a la manzorga de l'arista norte del Correciellas. L'ascensión ye cómoda, pudiendo tener munches opciones, pero intentamos siguir dientru la vallina, ya que tamos sintiendo y oyendo un vientín perfríu, que según vamos ascendiendo, nos va comiendo'l calor corporal, comprobando cómo nos caen dellos copos de ñeve, namái qu'entramos na ñube que tapez el cumal.
Con dos hores y cuartu d'ascensión, algamamos los 2007 m del picu Correciellas, quedándonos coles ganes de les vistes de tola redolada, pero tamos enmediu la ñube y malpenes, para'l vientu pa picar dalgo rápido y entamar el descensu pela arista oeste, ya que tenemos l'envís de descender per un valle continguu al del ascensu, como ye'l valle del Requexu.
Pente la ñube, somos a pescanciar la entrada a la vallina de descensu, la cuál sedrá muncho más guapa que la d'ascensu, pudiendo esfrutar cuando la ñube escampó del regalu de recuperar calor nel cuerpu y d'un caleyar relaxáu, demientres averámonos hacia'l valle'l Marqués, onde espéranos un agasayu como ye la cueva'l Moruquín.
Llueu de percorrer tol valle Requexu, atopámonos xustu al final col un espeutáculu en plenu valle'l Marqués, como ye ver como la riega'l valle súmese na cueva'l Moruquín, a la que fadremos una visitina, quedándonos coles ganes d'adentranos un pelín más, si llevásemos bota más fuerte de monte, por mor de la riega que sume y por mor de nun llevar frontales en condiciones pa esfrutala un pelín más.
Dende la cueva, namái que tendremos qu'esfrutar del ampliu valle'l Marqués, hasta topar la pista pela que xubiéramos va unes poques hores y ya baxar de nuevu al colláu Santiagu, onde sólo tendremos que dexanos cayera de nuevu hasta'l pueblu de Ruil.lazo, xustu enantes de que la meteo decidiera ponese a llover con cierta intensidá.
En resume, ruta clásica al Correciellas, conociendo un pelín más esta fastera Los Argüeyos, que déxanos la sensación de tener que volver pa conocer muncho más d'ella. Nesti casu, los 10,4 km y +/- 715 m de desnivel nes 4 hores y media de ruta, sirvieron pa tener más ganes de conocer otros montes llioneses.
No hay comentarios:
Publicar un comentario