martes, 14 de noviembre de 2023

Figares (Morcín)

5 de Payares de 2023

Vuelve la temporada de Figares, escasa temporada d'esguilada en Figares, que fai enllenase esti maraviyosu seutor demientres los 3 meses y mediu nel que por mor de regulaciones dafechu inxustes y desmedíes, queda zarráu esti seutor por utre y digo por utre, ya que la zapiquera, tien una regulación menor y ye munchu más controlable.

A la escontra, tamos antes una creciente comuna utrera en Figares y en xeneral en Morcín, lo que ye evidente a cualesquier llugar que vayamos a esguilar, pasiar o visitar del conceyu, por estes regulaciones nun tienen xacíu dengún, ante l'aumentu y el total pasotismu d'estos increyibles animales ante la presencia humana.

 
Baxando al muru Este del picu Figares

El casu ye qu'esti añu, sí que diónos un pocu más por volver hasta Figares, ya que nel añu 2022 diónos tanta pereza que malpenes dimos unos peguinos a dalgún posible proyeutu pero vímosla lloñe y nun fui a motivame lo suficiente pa enfrentame al Promontorio, coles ganes necesaries, asina que llimpiela una vegada más, pero nun-y dí siquiera unos pegues decentes y con motivación.

Dando unos peguinos pal encadene de Paseo Vertical con Suco y Rubén

Esti añu, teníemos dos grandes motivaos del seutor, como yera Anna que dexara Masterchimi l'añu pasáu vista pa sentencia dempués de facer Oficial del Metal y Dani, que probó Kiluxa y namoróse, dexando pa prau Paseo Vertical, na que la rotonda brutal qu'hai que facer pa facer los pasos, nun-y motivó lo suficente pa continuar proyeutándola.

Personalmente, nun sé mui bien por qué, vila factible y púnxeme más en serio con ella, tanto pa controlar bien los pasos duros, como pa controlar meyor si cabe los pasos sicolóxicos ya que'l vuelu llateral ye pocu apetecible y cuando entamé a dar pegues d'encadene na parte más lloñe de la llínea de chapes había que dir por railes cláramente.

Anna en Masterchimi y Santos en Oficial del Metal
 
Al final, tanto Dani como yo, fuimos a encadenar dambos proyeutos (Kiluxa paecióme mui dura pa esti añu (7c+)), quedando nel mió casu, Paseo Vertical de 7b+, ya que nun me paez que llegue al 7c, a non ser que fuerces los pasos per unes regletes rascaes, cuando ties a mediu metru a la drecha cantos más agradables. 

Pa estes coses, suelo siempre apuntame les víes de lo que me paecen y nesti casu, faciéndola pero onde yo la fice, nun pueu apuntala de 7c, porque nun llega. Sicasí, la vía ye guapa, anque pa mi idega nun ta equipada per onde la llinea ye más evidente, pero bono, una menos, que dedicámonos a esguilar linees y non graos.
 
Apuraremos lo que queda de temporada pa tener más tocada dalgún otru proyeutu y si esti añu faise una regulación menos salvaxe estiraremos la temporada hasta onde se pueda, sobretou esperando qu'Anna pueda encadenar Masterchimi cola que lleva una llucha contra la vía y coles condiciones de moyaura de les sos chorreres.

Figares
 
Croquis de la escuela d'escalada de Figares, por mor de la Asociación de Escaladores Astur Vertical. Gracies y col so permisu.  

-----------------------------------------------------------------------------

19, 31 d'Agostu de 2021

Tornamos a Figares con tola motivación, al empar, que terminaba la regulación paxarera nesta guapa escuela morciniega. Esperemos que la regulación dinámica prometida nes reuniones, lleven a nun tener tanto tiempu zarrada esta escuela, cuando ye un sin xacíu por mor de les utres, que pocu-yos importa que temos esguilando, cuando lo que de verdá molestaba yera l'actividá de la cantera de Peñamiel.

Anna nel primer día de prebes con Masterchimi
 
Dicho esto, nel mes d'Agostu, munchos fueron los díes qu'averámonos hasta Figares, sobretou na segunda quincena, teniendo como oxetivu claru, l'ablucante ruta de Masterchimi, un 7b que primeru Xavi y Rubén y llueu Iso, que garró'l testigu, caltuvieron la motivación peralta pa llevásela y pa que los demás fuéramos probándola y quitándo-y el respetu.

Iso motiváu a tope con Masterchimi

La verdá, que pa min, ye la llínea de Figares xunto a Mimos y Roca y Acuario Tropical, terminando por motivame pegue a pegue, esfrutándola munchísimu y metiéndo tamién nel procesu a otros collacios como Orlando, Iván y finalmente Anna, que tamién la probó l'últimu día que tuviéramos per ellí.

Entrando a la secuencia dura de Masterchimi... brutal ruta de Figares

Mientres tanto, en díes fanáticos acompañando a Xavi, a la gueta de su primer 8a con Invernalia, tuviera probando Paseo Vertical, un 7c mui duro a bloque, nel que pudimos compartir pegues con dos nuevos collacios de Cuenca, Eli y Rober, qu'aparte de perbonos escaladores, yeren xente de diez.

Xavi proyeutando nel so primer 8a (Invernalia)

Desencantáu con Paseo Vertical, decidí meterme a llimpiar Oficial del Metal, un 7b a la mandrecha de Masterchimi, demientres los collacios, seguíen evolucionando per ella, teniendo la suerte de que dalguien más, metióse a probarla y pudo quedar llimpina pa que la esfrutásemos y encadenásemos tanto Rubén como yo.

Kíla esfrutando de les tardes per Figares
 
La vía, más a bloque que Masterchimi, ye otru rutón, con una pasu finu de placa a mitá de vía y un bloque físicu nel desplome nel qu'hai que sacar métodu propiu, pero ye otra ruta brutal que salió en 4 pegues adaptándose perbien al mió estilu d'escalada.
 
Agora, ya sí que toca ponese seriu nesta escuela... el 7c tendrá que llegar más bien ceo 

----------------------------------------------------------------------------- 

7 d'Ochobre y 6 de Payares de 2020

Mes d'Ochobre apurando al másimu les tardes per Figares de vienres, ya que la pérdida de lluz diba faciéndonos perder oportunidaes d'esguilar nesti seutor, a nun ser que fuéramos de día completu. Poro, caún tiraba a los sos proyeutos y los pegues teníen de ser serios y mui comprimíos nel tiempu.

Vane y Lolo de nuevu pelos pies de vía de Figares

Nesos díes, llevaba persiguiendo facer Piedramuelle, un 7a+ de dalgo más de 35 metros, que comparte'l bloque plaqueru finu del primer llargu de Mimos y Roca, poro tocaba comese un 7a finu y llueu media vía más de continuidá p'algamar esta increyible vía.

Nati enchufando el Diedro de Jose

Calculo que llevaríamos 3 o 4 díes algamala y de regalu nestos díes tamién tuviera probando'l segundu llargu de Mimos y Roca (7b+) pero nun me ví con fuercies pa motivame a tope y la llargura de la vía, penriba de los 45 m fai que seya pocu amigable pa un asediu jeje.

Faciéndome cola llarguísima Piedramuelle (7a+)

El restu'l grupu anduvu a los sos proyeutos, encadenando Anna dalguna vía pendiente como Fuego en las Entrañas y Medalles, vía que ta siendo un bon proyeutu mental, más mental que físicu pa Andrea, pero que de xuru ye algamala un día d'esguilada relax.

Andrea apretando fuerte na esixente Medalles

D'otra miente, un par de díes baxamos hasta l'últimu seutor de Figares, abaxo del too a la mandrecha, onde tenemos dalguan referencia, anque nun esistan croquis y ficimos nesos díes, les víes de más a la mandrecha, paeciéndonos un 6c/+, Ganga Parbat y la siguiente a la so manzorga, La Agarrancha, con un grau más, rondando'l 7a suave, al nuesu entender, el d'Anna y míu, que la ficimos el mesmu día. 
 
P.D: Semeyes d'Anna na so mayoría... qu'ente encadene y encadene tamién-y dá por ello
------------------------------------------------------------------------
4 d'Agostu de 2020

A primeros d'Agostu, tirábemos otra visita más a casi mi escuela preferida como ye Figares, yendo con intenciones bien distintes a lo que finalmente ficimos. La idega yera dir probar un 7a+ llarguísimu a la manzorga'l seutor, pero como tovía pegaba la solana, me fui a dar un par de pegues a un antiguu collaciu que diónos pa munches rises dellos meses atrás.

 

Ehí tenéis, l'amuesa de como 3 chancletes pegábense con un 7a (Rock Trip) de 7 chapes y 4 movimientos duros. Nun hai que dicir, les rises qu'echámonos esi día, viendo pringar ún tres d'otru nel mesmu pasu. Como ya dixi, diba a otra cosa, pero al final eché tola tarde (4 pegues) pa llevarme este auténticu vater de vía, quedándome ensin yemes pa probar el proyectín jaja... coses que pasen.

------------------------------------------------------------------------

13 Xunu, 3 de Xunetu de 2020

Cualesquier persona que me conoza, sabe que Figares ye ún de los llugares onde más me presta esguilar y ye qu'a lo llargo los años, fuí ganándo-y puxu, anque tengo que reconocer que de primeres, les víes tan llargues y con esi ambiente facíame esguilar con ciertos nervios.

Pali, pali, fui completando tolos sestos posibles dalguno costando abondo como Fuego en las entrañas, un viote de 6c+ con segundu llargu de 7c+ que me paez nel intre pallabres mayores. Nes visites de los últimos meses, centréme sobretou en Acuario Tropical y na variante del diedro de Jose de 7a+.

Primer parte d'Acuario Tropical con vistes hacia Peñamiel

Dalgún día, nun fui a centrame nuna de les dos y metí-y dos pegues a cauna, por supuestu ensin enchufar denguna jaja. Llueu, tocó tirar d'acosu y derribu a Acuario Tropical, quizá la llínea más bonita de Figares, percorriendo tola proa de la peña, siendo mui, mui estética, saliendo dempués de varies pifies con Suco d'asegurador y baxo l'atenta mirada de Mon y Villa que teníen tiempu d'echar unos ánimos ente pegue y pegue.

Con Acuario Tropical nel bolsiellu, ya me fuí a fueu a pola increyible vía que sal a la mandrecha del Diedro de Jose. Una pena que nun tenga un nome guapu, ya qu'esa V2 nos croquis déxala un pelín triste pa tan bona vía como ye. Al final, tamién con un númeru de pegues asemeyaos a Acuario Tropical, salió nun día d'escalada con Andrea.
 
Conviviendo coles utres qu'abellúguense pela fastera de Peñamiel y peña Figares

Manda güevos que la persona que más tuvo qu'asegurame nestes víes, como fue Anna, nun tuviera presente en dengún de los encadenes. Eso sí, les semeyes d'un día probando la vía son d'ella, asína que tamién llévase la so parte d'ésitu, jaja.

Agora tocará, metese en fregaos más duros, anque ya va quedando menos pel seutor principal. Habrá que metese en segundos llargos duros, anque trabayalos va dar muncha pereza. Menos mal, que tamién tenemos un segundu seutor pembaxo'l colláu, del que ya probamos un 7b duro enforma qu'habrá que trabayar tamién cola calma.

Nel pasu duru de la vía... preciosa Acuario Tropical

Dende equí, como siempre, facer un llamáu a la responsabilidá de tol mundu escalador, faciendo sostenible esti deporte que tien de convivir coles aves qu'añeren nes peñes qu'usamos pa trepar. De la responsabilidá de la conseyería, de los clubes d'escalada y del colectivu escalador depende que'l nuesu deporte tenga una regulación más restrictiva o más dinámica cola participación de los propios escaladores, qu'asina debería ser.

De la Fempa ya si eso, como defensor del nuesu deporte, falamos otru día, porque paezme que con dir de fartures y xubir trastos en forma de buzón a los cumales ya tienen abondo.

--------------------------------------------------------------------------------

8, 15 Febreru de 2020

Continuamos coles esguilaes nel entamu l'añu pela fastera central d'Asturies y como non, faltaben un par de díes bien guapos trepando na escuela morciniega de Figares. Facía unos mesinos que nun pasaba per ellí y tampoco tenía mui claro que probar, asína que metíme a calecer nun 6b+ con entrada bloquera per una cueva que dábame pereza facer.

Al segundu pegue, salí del bloque y ya pude esfrutar de la típica plaquina de Figares. Mientres, el restu del equipu calecía deos nes víes llargues, llevándose al primer pegue Andrea, una de les sos víes oxetivu como yera Reencuetros nel Tercer Desfase.

Un placer la escalada na escuela morciniega de Figares

Darréu, pocu convencíu, ya que nun me gustara muncho la primer vegada, metíme al segundu llargu del Diedro de Jose, faciendo esti guapu 7a poniendo cintes y esfrutando un pelín más el 6b del diedro. D'esta miente, Anna, metíase detrás, dándo-y un pegue increyible trabayando na parte endiadrada del 7a, faciéndola dafechu a vista, ya que yo preferí salir pela placa que se me da meyor.

Esi mesmu día, completábemos el tríu ganador con otru encadene d'Andrea, coles últimes lluces a Ojo con el Huevo, otra de les víes que tenía recomendaes a tachar na so llibretina. Con esti ésitu total, colábemos del seutor hasta'l próximu día, nel que volvimos Anna y yo, con ganes de probar dalgún 7a llargu d'esti seutorazo.

Kíla perentrenía coles utres nel pié de vía de Figares

Entramos con tou, ensin calecer a por Mimos y Roca que fízome trabayar enforma p'algamar el pasu clave de la vía. A la fín, saqué los pasos y aporté a cadena, quedando pendiente pa un segundu pegue na que la pude encadenar non sin bramar nel pasu de ñapéu finu.

Anna, metío-y dos pegues perbonos, quedándo-y pendiente d'encadenar pal próximu día, onde cayerá de xuru. Nesto, aportaba pel seutor Vane, que viniera con ganes de facer unos metrinos repitiendo como si nun costase Mimos y Roca, demientres probaba yo la variante de 7a+ del Diedro de Jose, con unos pasos brutales a bloque nuna placa dalgo desplomadina, colo que personalmente paecióme brutal y dexóme con unes ganes tremendes de volver a probar.

------------------------------------------------------------------------
 
30 Marzu, 12 Abril, 17 Mayu de 2019

Como siempre, munchos son los díes na dómina primavera-branu, qu'avérome pela escuela de Figares a trepar y sobretou a pasar un ratu agradable con collacios. Cuando ya-y ficisti varies visites a un llugar y fuisti fulminando los graos más cenciellos toca metése no que más menos, va quedando pel camín o en proyeutos.

Esti añu, pocu más y quedamos ensin poder tastiar la caliza maraviyosa d'esta escuela, poles menacies d'un ecoloxista de salón, paezme a mín, que dicía que molestábemos a les utres nel so añeramientu, cuando tienen los ñeros mui penriba de cualesquier reunión final d'una vía.

 El collaciu Suco flotando peles plaques

Personalmente, paezme que tenemos qu'adelantanos el coleutivu d'escaladores a ciertes denuncies que dan vida a los periodicuchos d'esti país, onde paez que busquen criminalizar cualesquier intentu de facer deporte nel mediu natural, ya sea corriendo, faciendo barranquismu, esguilando o yendo simplemente de monte, ya que paez que salise de la "urbe central" onde quieren metenos ye ser antisistema.


Plaquando un pelín faciendo delles víes que quedaben nel tinteru
 
Poro, hai que activase, protexer el mediu ambiente cerrando víes onde veamos ñeros, pidir revisiones anuales de los sectores y sus ñeros y especies, non cierres o prohibiciones sistemátiques. Hai que dir pasu per delantre y facer por avisar a los compañeros esguiladores onde se puede y non se puede trepar, sinon, toparémenos con xente aburrío y cola alministración que por nun trabayar va facer lo más cenciello, prohibir y piesllar seutores.
Figares un llugar agradable onde escalar y esfrutar de la fauna esnalando

Sacante d'esto, deportívamente, aparte de tener nuevos collacios de pareya de cordada colos que fue un placer compartir pegues, llevámonos unes cuantes víes nueves nos díes que fuí por allí: Nunca están cuando se les necesita (7a), el 6b sin nome de la so manzorga, Medalles (6c+), el 7a de la zorga de los Nichos y la Exvias (6c+/7a).

Tamién quedónos un par de víes con varios pegues que nun salieron y qu'espero próximamente encadenar... hasta la próxima.

------------------------------------------------------------------------

16 de Mayu de 2018

Les coses nunca son como ún les albidra y yo que camentaba pasar munchos díes nel branu pela escuela morciniega de Figares, tán solo pasé per ellí ún día, a la carrera, namái salir del trabayu y casi con ganes de ver más a la xente que d'esguilar.

El casu ye, qu'una vegada que sentéme cola calma a ver a la xente trepar, diéronme ganes de facer dalgo y puse l'arnés. Agora mesmu, nun tengo claro si tan siquiera dióme por intentar calecer deos en dalguna otra vía, anque paezme que tiré de primeres a dar un peguín a el Figurante (7a+).

Alcuérdome que nesti pegue pifiera na primer parte, onde nun solía pringar y siguiera hasta reunión ensin mayores problemes. Magar de descansar un ratín y col envís de desmontar les cintes, tocó da-y un pegue pa ver que pasaba y salimos del primer pasu, apretando de más, pero salimos hasta'l primer reposu.

Ellí, centramos la pelota y demientres veía a otru collaciu sufrir na vía paralela de la manzorga, un 6c+ mui perru, al que-y tengo ganes, seguí escalando más centradín pa nun pringar la vía y llevámonos l'encadene ensin mayores problemes.

Sería ún de los pocos sétimos no que va de branu, nel que teníemos grandes esperances pero los díes fueron pasando y les ganes d'apretar fueron a menos envede a más y el tiempu que nos tocó padecer esti branu fue pésimu pa poder apretar con ciertu enfotu.
------------------------------------------------------------------------

Branu 2017

Pocu tengo que cuntar d'una escuela qu'en mui pocu tiempu dende que se reequipara, convirtióse nun de les escueles más visitaes n'Asturies. La llargura de les sos víes y la calidá d'éstes xunto con un averamientu más menos curtiu, fai qu'en díes de branu tuviésemos los pies de vía con xente abondo.

Pero, non sólo falamos de xente, tamién hai que falar de coches y esto puede que vaya costanos más d'un problema colos vecinos, d'otra miente, encantaos de ver xente per ellí, siempre y cuando, seyamos respetuosos a la hora d'aparcar.

Ye dalgo que me güelo nos dos branos que llevo más menos esguilando en Figares, ya que lleguen los coches a la carretera de la Collá y dalgún día pasarán los de verde y nos van poner a vivir. Ye más, dalgún día cuando llegué taba la carretera estrada de coches y colé d'ellí a buscar otru sitín onde trepar con más tranquilidá.

Seutor soleyeru pero siempre con dalgo de brisina

No qu'a lo deportivo se refier, tengo un pelín d'amor-odiu nesta escuela, ya que nun m'acabo d'alcontrar nella y muncho d'ello ye por mor de la cantidá de xente nel pié de vía, lo que me suel condicionar a la hora d'apretar de verdá.

Aún así, pali pali, fuimos llimpiando delles víes dende los 6bs a casi tolos 6cs del seutor cimeru, quitando Medalles, na que nun tuve la oportunidá de meteme nella. Probé dalgún sétimu más, pero con poca motivación, sacando tolos pasos, pero nesta dómina nun tenía la fame d'encadene como pa repetir víes tan llargues.

Onde sí qu'esfruté de les sos víes más desplomaes y curties fue nel seutor superior, nel que solemos tener más tranquilidá que nel del colláu. Eso sí, el sol caliente y peles tardes de branu ye imposible esguilar nes sos chorreres y cantos enormes.

En plenu colláu nel seutor principal


Nesti pequeñu seutor, fice l'únicu séptimu que tengo en too Figares, aparte d'enchufar tamién los demás 6c que son mui del mesmu estilu físicu y de cantu grande. El 7a (Asturvertical) tien una seición de chorrera mui prestosa, saliendo a un pasu de placa onde toca apretar y aguantar hasta cadena... un vía mui, mui guapa.

Supongo qu'esta primavera tornaremos a les parés de Figares, onde espero alcontrar la motivación suficiente pa siguir llimpiando los pocos sestos que me falten y entamar a sumar sétimos, pero sobretou ganar continuidá y motivación en vía llarga.
------------------------------------------------------------------------

19 de Xunetu y 30 d'Ochobre de 2016

Otru par de visitines más a la recién remocicada escuela de Figares, anque nel intre taben por finar los trabayos de reequimamientu, anguaño esiten dellos croquis bien actualizaos, qu'amuesen la calidá de la escuela de la que tamos falando.

Víes a tope de cuerda de 70 m ya incluso dalgunes más que nin con cuerda de 80, asína que munchu güeyu col llargor de la cuerda y pensar bien, como facer el descuelgue si vos metéis en víes de 45 m como hai dalguna.

Haritz pegándose cola ablucante caliza de Figares

No personal, ambos díes tuviemos descubriendo la tremenda calidá de les víes de la derecha l'abrigu cabres, onde salen dende 6a+ a 6b+ nes primeres de la mandrecha y siempre toes raspiando los 35 m y con una calidá insuperable.

Esta escuela tien tola pinta de convertise nun clásicu y de pasu valdrá pa relaxar un pocu'l xentíu que móntase nes paredes d'Otura. Entre otres cuantes, fíceme con Iban pal Monsacru y terminaron en Figares (6b+), La Perreta (6b+) o la Guapa (6b) y dellos 6a+ mui asemeyaes a les anteriores ya que con tantos metros cuesta dixebrar los graos.

Marie perdida nun mar de caliza y Kíla a la solombra que facía calor

Puntu aparte, tien l'actuación de Marie nuna mañana d'Ochobre, cuando amosóme como se tien el grau ganáu y escálase metros, metros con total confianza, algamando Nunca están cuando se les necesita (7a) a vista o Lluvia Tranquila (6b+) de 45 m tamién a vista.

Ablucante lo d'esta rapaza...


------------------------------------------------------------------------------ 

29 d'Abril y 13 de Mayu de 2016

Mes y mediu dempués de la última visita a Figares, esta vegada si que vamos tener la suerte de poder trepar nesti ablucante paré. Si dalguien nun sabe onde ta, tan sólo tien de mirar de la que va en coche pa Otura por exemplu, enfrente de la cantera.

El problema ye que pa llegar hai que dar más vueltes hasta'l pueblu de Figares, pero polo demás, nun ye un accesu mui llargo nin muncho menos y paga muncho la pena esguilar equí, poro esta vegada sí que dibemos probar les víes recién equipaes.

Conociendo pali pali esta preciosa parede morciniega
Como ya dixe, casi toles víes tan reequipaes y dalguna nueva que nun sal nos croquis de la guía d'Escalada en Asturias, que ye la única en la que tenemos croquis d'esta escuela, anque hai que dicir que mui allá nun anda, en cuanto a les víes pintaes nel croquis.

El primer día, apaecimos per ellí los dos Bertos y Richar y nun entamé con bon pie que se diga nesta escuela comiendome con patatines un supuestu 6a, Fuego en las entrañas, que bien me paeció más de 6a, pero bono, tendré que volver probala, porque nun se si llargura de la vía o que pasóme factura y nin siquiera anduve cerca d'enchufala.

Nun quise volver a probala y llueu esguilamos n'otres 4 víes más curties que tan sólo vienen dos nos croquis y que rondarán toes el 6a, mediu grau arriba o abaxo. La roca ye superior y manca de pocu sobada que ta... poro güeyu al volar si nun queremos encender como una cerilla jeje.


Enchufando un de los 6b+ xemelos que salen de la cueva

Al día siguiente, diba con ganes de quitar el mal tastu del llarguísimu 6a que quedara nel tinteru, pero cuando llegamos Richar y yo, vimos una chorrera d'agua nos pasos claves, asína que tuve que quedar pa prau.

Dicir, que nel croquis pon como qu'hai 3 llargos, pero nun lo tengo mui claru, pudieren ser dos, xubiendo un pelín el grau de la vía hasta'l 6b. Al non poder facela, fuimos al primer 6a que probara va un par d'años con spits ferruñosos y esta vegada si que fué un placer trepar pelos 32 m de vía aproximadamente... una pasada.

Richar apretando fino en Figares

Llueu, siguimos coles víes que tienen salida na cueva, apretando de coyones pa enchufar dos guapísimos 6b+, anque al ser un pocu espuesta la entrada de la manzorga ficimos una variante dende la vía de la mandrecha (hai chapa pa ello), dexando la entrada bloquera pa otru día.

Agora nun me doi cuenta, pero a la manzorga de la cueva, puede qu'haya una vía más que nun reseñé nos croquis... la verdá ye que tengo que facer más visites y dir poniendo los graos que me van paeciendo ya que ta pelín precariu'l croquis.

Lo dicho... imprescindible esta escuela... va dar muncho xuego.

------------------------------------------------------------------------------ 

11 de Marzu de 2016

Averámonos a la primavera y les tardes medren día a día y les ganes d'esguilar medren al empar. Nun mos aguantamos y anque lleva lloviendo dende cuantayá n'Asturies garramos los trastos Alberto y yo, anque seya pa dar un paséu.

Comentando que l'iviernu nun quier colar con estos collacios

Dellos meses atrás entérome que taben reequipando Figares, asína que decidimos facé-y una visita y da-y otra oportunidá a esta escuela. Aportamos al pueblu y les ñubes qu'amenacen, quítanos les ganes de llevar siquiera la mochila por si tuviéremos dalguna vía seca.

Paré de Figares y al frente Cueva Cabrera

Facemos el camín hasta'l seutor, alcontrándolo con barru enforma y dedicámonos una media horina a inspeccionar vía tres vía con la guía, pudiendo comprobar a pié de vía, qu'al menos toles víes pembaxo del 7a tan ya reequipaes.

Kíla a puntu de ser devoráu pel mostruu la cueva

Con una sorrisa na boca y un paséin más, colamos d'ellí, esperando que'l tiempu ameyore pa tornar colos trastos y dir tastiando vía tres vía, ya que los graos y el tipu d'escalada nesta escuela son bien afayaizos.

Como siempre dar mil gracies a los equipadores... tornamos con munches ganes.

------------------------------------------------------------------------------ 

21 d'Agostu de 2014

Segunda entrega d'a la gueta de les escueles escaecíes entamada cuantayá col paséu nes cueves d'El Portalgo. D'aquella, simplemente fuéramos dar un paseín y vimos que'l tema taba complicáu pa esguilar daqué y tampoco teníemos nin siquiera croquis.

Esta vegada, siguiendo una guía d'escalada espublizada va menos de 2 años, fuimos a conocer de tarde la escuela nomada como Figares, baxo'l Picu Figares y col mesmu nome que'l pueblu morciniegu.

P'aportar hasta la escuela, tenemos que dir hasta Santolaya Morcín, onde podemos xubir a la Collá pel propiu pueblu o yendo hasta'l desvíu enantes de la Ponte, casi na foz de Morcín. Una vegada qu'aportemos a la Collá, tenemos un tercer desvíu hacia'l pueblu de Figares hasta'l cual averámonos p'aparcar.

Na base del monte Frechura vemos la Cueva Cabrera penriba la foz de Morcín

Con tolos trastos, saldremos penriba'l pueblu per una pista que lleva hacia unes antenes nel picu Figares y onde unos praos, entamaremos a baxar al llau d'unes muries hasta una especie de canal que nos corta'l pasu. 

Baxaremos hasta la parte baxa de la canal onde la travesamos y ellí, tendremos el paré que cae dende'l Picu Figares, el cual namái velu namora pola bona pinta que tien la caliza y les guapes víes que paez tener.

Digo paez tener, porque tar equipaes tan, pero l'estáu de conservación d'estes dexa muncho que desear y muncho más si tamos anunciándola nuna guía, lo cual ye un error dafechu, ya qu'una cosa ye que tenga unes mínimes víes en mal estáu y otra ye que la escuela tea defechu en mal estáu.

Paré ablucante nel picu Figares... pero l'equipamientu ta en mui mal estáu

Revisamos más menos una a una y metíme nun 6a+ nel que fui alcontrándome dende dos parabolts en bon estáu con chapa en bon estáu, a paraboltos ferruñosos, dos spits siguíos ferruñosos y con mui mala pinta... hasta facer 30 ms de vía y ver que siguía a un segundu llargu.

A mi drecha, tenía una vía recién equipada de la que nun ví reunión intermedia nin agüeyaba'l descuelgue final y delantre mía, tenía una reunión que metía mieu enforma. Dos parabolts en bon estáu, con chapes ferruñoses de les que colgaba una argoya con tres mosquetones a cual más podre... horror.

Demientres pienso que facer, llega un collaciu d'Alberto, Chus que venía esguilar con nós un ratín. Asina qu'écho-y valor, pongo un cabu d'anclaxe a la reunión y paso la cuerda pelos tres mosquetones podres (malo será que fallen los tres) y descuélgome p'abaxo lo más aina posible mientres recueyo toles cintes.

Colamos d'equí a escape jeje... ensín un ta llueu mui claro

Una vegada que toi embaxo, presentámonos Chus y yo que nun mos conocíemos, echamos unes rises y los tres xuntos revisamos la escuela de primer a última vía, decidiendo que nun paga la pena xugásela en denguna otra vía... meyor tomar una cerveza en Santolaya.

Hai que dicir que sí tuviese en condiciones, la escuela sería increyible. Sacante la cantera d'enfrente, les vistes hacia la Foz de Morcín son guapes y la caliza tien un tastu perbono, siendo víes llargues y tumbaes en munchos casos.

Esperemos, que nun quede nel escaezu más de lo que ta y que dalguien anímese a reequipala, porque diría encantáu a probar toles víes posibles y como siempre, si entérome qu'hai bote común pa un reequipamientu... aportaríemos ensin duldalo. 

7 comentarios:

  1. Gracias por la info. Me gustaría saber cual es la guía donde sale esta escuela o, si fuera posible, saber al menos la graduación de las vías reequipadas. Si quieres por privado.

    ResponderEliminar
    Respuestas
    1. La guía ye Escalada en Asturias de Esáu Puente y por lo que pude mirar, toles víes pembaxo del 7a o que nun fuesen un tercer llargu o así, tan reequipaes.

      Por casualidá, mañana de tarde diré per ellí a trepar... y nun ratín mándote per priváu un pocu d'info

      Eliminar
  2. Hola Berto,

    Creo que coincidimos estas navidades por Villanueva del rosario. Voy subir a Asturias en unas semanas y me recomendaron figares. Es buen sector para hacer sextos? Un saludo

    ResponderEliminar
  3. Pues sí, ye un sectorazo pa sextos y séptimos bajos muy, muy buenos

    ResponderEliminar
    Respuestas
    1. Genial. Allí iremos algún día estas vacaciones. Gracias y un saludo

      Eliminar
  4. Un lugar prestosu para los que nos presta la clásica de varios largos

    ResponderEliminar