22 de Xineru de 2023
Track: Trail Afuega'l Pitu (Morcín)
Web del Trail: Trail Afuega'l Pitu
Clasificaciones: Clasificaciones 2023
Tres años pasaron dende la mió última participación na carrera más guapa d'Asturies nesta distancia y ye que nun la hai más montañera, téunica y pindia, que la xubida al Cuitu Rumiru dende la Foz en Morcín. Aparte, ye tarrén d'entrenos pela tarde, na que voi siempre camudando'l percorríu, según tenga de tiempu o ganes p'allargar un pelín más o menos, anque a dicir verdá, la mayor de les vegaes salgo dende la Collá.
Con un día perfríu como suel dase nesta dómina l'añu, aporto a la Foz, resacosu por xuntame con collacios que facía tiempu que nun veía, na tarde-nueche del sábadu y d'esti xeitu, prepárome con mal cuerpu, demientres el restu los corredores caltienen una alta motivación, caleciendo músculos p'alantre y p'atrás de les cais de la capital morciniega.
Intento desperezame, corriendo un pelín hasta la salida, la cúal como siempre sal a fueu, dando una vueltina pel camín fluvial y entama la xubida hacia'l Picoretu, pasando dalguna posición ya intentando garrar ritmu, anque'l cuerpu nun va y l'estómagu menos, asina qu'aporto a la Canal d'Otura col envís de caltener posiciones, xubiendo mui pero que mui atrancáu, ensin poder dar más, poro quédome a rebufu del d'alantre hasta'l Cantu d'Entrepuertes, onde al fin pueu soltar pates na pequeña baxada hasta la collada.
Dende la collada de salida de la pista de los Yanos, tendremos una pequeña subidina pa garrar baxada per pista hacia'l picu La Granda, onde fadremos un bordéu perguapu pela cara norte del Monsacru, hasta dar cola boquera de la xubida dende la Collá.
A estos altores, el cuerpu diba recuperando y garro un ritmín mui prestosu, ganando posiciones por tarrén téunicu, parando a garrar un pocu d'agua pa siguir xubida hacia'l Cuitu Rumiru, cola típica prebaxada quebrapates pela Fayona.
Voi esfrutando a tope, aportando al cumal y entamando'l llargu descensu, per fastera Noroeste, lo que fai que'l tarrén tea bien xeláu, lo que nun ye problema col estrenu de zapas, pudiendo ganar varies posiciones en tol bordéu en descensu hacia la Covarriella. Como siempre, nesta collada entama'l xuegu del barru, qu'al tar xeláu nun tuviéramos entá, atrancándome un pocu nel llanéu picante hacia la Forcá, onde ya entamaría la baxada final hacia la Foz.
Son unes cuantes vegaes, les que baxé de nuevu per equí nos entrenos, alcontrándome'l pior día de barru de los últimos tiempos, sicasí, ye más bien los altos ritmos los que faen que revuélvaseme l'estómagu, baxando un pocu ritmu, perdiendo ciertes posiciones, aportando a la meta nuna hora 1h 38 minutos y puestu 100, siendo esto bastante meyorable, pero les coses hai que tomales como son, ya que finalmente pude esfrutar muncho de la carrera a tramos y eso ya paezme abondo, pa como me sentía al llevantame pela mañana.
19 de Xineru de 2020
Track: Trail Afuega'l Pitu (Morcín)
Web del Trail: corriendoxmorcin.com
Clasificaciones: Clasificaciones 2020
Una vegada más tornamos a correr en Morcín na clásica xubida al Monsacru. Tol mundiu que-y gusta esto del trail, tien claro qu'antes o dempués pases pela mítica canal d'Otura, que tanto nos sirve pa entrenar, yendo casi siempre más rápido nos propios entrenos que na carrera.
Cosa que ye bien normal, ya que la gran afluencia de participantes fae que se faigan coles y seya imposible casi, perpasar a naide en tola ascensión pela canal y los caleyos anteriores. Aún así, si lo tomes con un pelín de calma, disfrutarás d'un ambiente de corredores montunos y d'una xubida con rises y bon rollu.
Llueu cuando'l tema afloxa ya toca caún garrar so ritmu y tirar fuerte na parte cimera del Monsacru onde senderos bien guapos y dellos xube-baxa en tarrén de monte preciosu, fai que la carrera garre un puxu más competitivu.
Como siempre, dempués de facer una xubida cómoda, apreté na parte intermedia hasta qu'entamó la baxada onde ví que nun podía dalo too colos playeros casi nidios que gasto y tocó baxar ritmu pa intentar nun zampar un fogón como nel Villacabra Trail.
, Al final, carrera na que pintaba fatal la meteo, pero tuviemos suerte y sin demasiáu fríu pudimos esfrutar del monte y si nun m'equivoco de la mio meyor participación nesta carrera en cuanto a posición y tiempos... y como dixe me lo tomé pelín tranquilu, poro habrá que dir a fueu un añu d'estos.
Mil gracies a los fotógrafos, a los voluntarios y a los organizadores por esta carrerina tan prestosa.
Track: Trail Afuega'l Pitu (Morcín)
Web del Trail: corriendoxmorcin.com
Clasificaciones: Clasificaciones 2018
Desmpués d'un añín de baxa por diversión, tornamos a la carrera por excelencia nesti intervalu de kilómetros y ye que nun pueu dicir na malu d'esta carrera... en 10 km ye imposible xuntar un percorríu tan montañeru, guapu y duru.
Tengo un especial apreciu al Monsacru, nes sos falderes, canales, senderos y cumales, tengo fecho monte, esguiláu en deportiva, esguiláu n'alpina y agora correr pel monte, asína qu'hai ciñu pa con esti monte sagráu, anque pa facer delles actividaes seya pelín gafu con nós y la so dureza nes ramples pónganos a vivir.
Dicir que nun fué ún d'esos grandes díes de carrera, nun me sentí bien en dengún momentu y tocó sufrir y sufrir munchísimu, sin ritmu ascendiendo la canal y ya dende antes d'aportar al entamu d'esta y ye que tuviera'l día d'antes esguilando na canal y les pates nun queríen furrular.
El restu la carrera, ensin dir gayoleru precisamente, mantuve'l tipu nel preciosu crestéu, esfrutando un pelín más col nuevu trazáu con ascensión al picu Monsacru. A partir d'ehí, víneme arriba, les pates entamaron a dar sensaciones y baxamos esnalando pel tarrén más teúnicu.
Al menos nun colé con males sensaciones y ye que nun voi, como diba p'arriba pero en tarrén téunicu de quebrapates y baxaes téuniques seguimos faciendo les coses bien... habrá que tornar más de monte y correr menos pa tirar p'arriba en condiciones.
En resume, un carrerón que como diz el mió compaeru Alberto, si tuviera qu'escoyer una carrera pa facer al añu, siempre apostaría pol Afuega'l Pitu, por ambiente nel pueblu, percorríu montuno al máximu y porque ye una preciosidá de carrera... y esti añu colos cambeos munchísimu más.
Mil gracies a los fotógrafos (Mariaw, Chechu Xosenel...), a los voluntarios y a los organizadores por esta carrerina tan prestosa.
24 de Xineru de 2016
Track: Trail Afuega'l Pitu (Morcín)
Web del Trail: corriendoxmorcin.com
Clasificaciones: Clasificaciones 2016
Tercer carrera de la temporada y siguimos con puxu, anque personalmente nun m'alcontraba nes meyores condiciones pa ella. Por dalgún motivu, estes carreres curties nun se me dan y nun acabo de sentime a gustu.
Eso sí, guapa como denguna. Tamos falando de salir dende la Foz hacia la canal d'Otura, onde delles vegaes esguilé, xubiéndola dafechu hasta les capiyes del Monsacru. Abluca con vela dende la Foz y pindia y dura ye abondo, agradeciéndose nel intre nun dir cola mochila d'escalada a la espalda.
El casu ye que xubí cómodu, demasiáu cómodu ya que dexaba atrás a los collacios y tuvi qu'esperar pa xubir toos xuntos. Llueu por dalgún motivu, na parte llana nel bordéu de los cumales del Monsacru nun garré un ritmu amañosu, anque hai que dicir que la sienda norte del Monsacru hasta Covarriella fue de lo más guapu que fice un munchu tiempu.
Magar del bordéu entamóse una rápida baxada na que xente diba como lloca, baxando patinando nun par de llábanes y pasé olímpicamente de forzar, quedando Gus y yo per detrás d'Alberto que baxó como un tiru, mientres nós aportamos a meta dellos minutinos más tarde.
Lo dicho... carrera curtia (10 km) pero dura, dura polo pindio de la xubida y polo rápida qu'andase a posteriori... la próxima más y meyor esperemos y como siempre con fartura qu'esta vegada diba llevanos hasta la fastera de Santolaya.
No hay comentarios:
Publicar un comentario