Collá Arniciu (Casu) - Picu Facéu

2 d'Abril de 2011

Track: Collá Arniciu (Casu) - Picu Facéu

Finde d'Abril, en que tocábanos dir pa Somiedu a facer montaña, pero'l tiempu nun mos daba aliendu dalgunu, poro tuvimos que sacar del sacu de les rutes del añu, una visita más al parque de Redes y más en concretu a la xerra'l Frieru onde s'alcuentra'l Picu Facéu.

Pa ello, saldremos de Xixón como siempre y garraremos la autovía minera, pa tomar en Llangréu, el corredor del Nalón, travesando los conceyos de Llangréu, Samartín del Rei Aurelio y Llaviana, metíendonos nel Parque de Redes a traviés del conceyu de Sobrescobiu.

Nel pueblu de Rusecu, desayunaremos y siguiremos camín hacia'l Campu en Casu, onde tomamos la As-254 que nos fae pasar polos pueblos de Nozaleda, Orllé y Bueres, enantes d'aportar al nuesu puntu d'aniciu, la Collá Arniciu (923 ms).

Primeros pasos dende la Collá Arniciu (923 ms)

Según les distintes páxines meteorolóxiques que consultamos, nun teníemos lluvia hasta'l mediudía o pelín más, pero na collá Arniciu, ya taba metía la ñebla dende'l primer pasu, asína que díbemos tener un ruta dafechu tapecía de cualesquier paisaxe o vista de los conceyos de Piloña y Casu, y les ablucantes foces d'esta fastera asturiana.

Bono, que se-y va facer..., nun se pue tener too nesta vida, asína que nun quedaba otra que facer una rutina en moyáu, pa da-y un pocu a les pates, poco a los güeyos y muncho a la llingua, jeje.

Caleyando pela Campera

Magar de preparanos, entamamos a caleyar per una pista al llau drechu de la carretera, que nos llevará nun par d'envueltes hasta les cabañes de la Campera. D'equí caleyaremos per praos, hasta'l Picu Cabezu (1083 ms), del cual baxaremos hasta un colláu y xubiremos a degüeyu unos 200 ms d'altor, polo que paez un monte más calizu, hasta topános colos 1282 ms d'ésti, nomáu Picu'l Campellín.

Xubiendo al Campellín

Nun vemos res, pero al menos tamos echando unes rises y estirando un pocu les pates. Aparte, como tamos na cota más alta de lo que va ser la nuesa ruta, dános igual moyános un pocu más o menos, ya que simplemente vamos crestiar tolo que nos queda hasta'l final de la xerra, nel picu Facéu.

Llevamos una hora caleyando, cuando ponémonos a pasar pela Viesca d'Arriba a la gueta d'un colláu na Viesca d'Abaxu que nos faiga aportar dempués al cumal de la Peña la Llomba'l Covayón de 1240 ms, de la cual baxaremos hacia'l Covayón (1110 ms), onde pasaremos a da-y preste a la parte más complexa de la ruta, l'ascensu al Xierru les Campes.

Tampoco ye que sea nada del otru mundiu, pero entre la humedá qu'hai nes peñes y que ye lo más escarpáu de tola xerra, hai qu'andase con curiáu. Como siguimos sin ver nada, tiramos p'alantre dempués de poner cota a la mayor peñona del Xierru les Campes (1153 ms).

Simón, baxando de la Colladiella

Del xierru, baxaremos otros 50 ms d'altor, y tendremos que forzar la máquina, pa xubir a otra llomba que fai llende entre los conceyos de Casu y Piloña, la Colladiella de 1223 ms. Darréu, ya nun abandonaremos práuticamente la llende d'estos conceyos, y baxaremos unos metros hacia'l Picu Fontón de 1884 ms, enantes d'entamar l'ascensión final al Picu Facéu.

Ascensión al Picu Facéu (1233 ms)

Nel intre, tendremos casi la parte más divertía de la ruta, al tener que facer tola ascensión al Facéu pela so cresta, teniendo dalgún pasín qu'otru, hasta a aportar a los 1233 ms d'esti picu piloñés-casín.

Paez mentira, pero ente'l xube-baxa de tola xerra y l'estáu d'humedá nel que nos tuviemos moviendo tardamos 3 hores en facer cume, poro, xintamos un pocu chocolate, sacamos una semeya pa l'alcordanza y ponémonos a baxar cola intención de facer la ruta circular, baxando hacia les brañes de la falda la xerra'l Frieru.

Caleyando poles pistes hacia la collá Arniciu

La primer parte de la baxada será lo más abegosu, ya que baxaremos ente cotolles, poníendonos d'augua finos, hasta aportar a la vallina la Figuera, onde ya alcontraremos camín que nos fadrá travesar campes y brañes como la Llinar, Pandicuerries, Gamonéu, La Venta'l Frieru,...

Hai que dicir, que tuviemos una de les baxaes menos cargantes pa les pates y más prestoses, ya qu'abriónos dalgo'l día, y pudimos esfrutar d'una xinta ensín orpín nes Campes del Frieru, y d'un caleyar per pistes de tierra bien allegre y casi llanu, hasta tomar un ratín de carretera en xubida a la collá Arniciu onde dexáramos el coche, 5 hores y cuartu atrás.

A la fin, tuviemos un día de monte pasáu por augua, pero nel que pudimos entrenar un pocu de cara a la dómina más dura del añu, nel que fadremos rutes d'alta duración. Nesti "paséu", caleyamos unos 12 kms y superamos casi 900 ms desnivel acumuláu, así que tocaba echáse unes cañes na capital de Piloña, L'Infiestu, y asperar meyores díes pa siguir trabayando nel monte.

Camudando'l Camín na ruta del picu Facéu