Orllé (Casu) - La Becerrera

8 de Payares de 2015

Track: Orllé (Casu) - La Becerrera

Güei vamos facer una ruta que debería tar en cualesquier axenda d'un bon montañeru asturianu. El so percorríu, los llugares a conocer, el cumal qu'ascenderemos, les increyibles vistes... tou ye merecíu de conocer y caltener na memoria durante munchos años.

Nel nuesu casu, esta ruta fue propuesta por mí l'añu pasáu y hasta esta seronda, quiciás demasiáu entrada ya poles poques hores de lluz, nun tuviemos la oportunidá de facela. Pa ello, aportaremos al conceyu de Casu y más en concretu, al pueblu d'Orllé, anque na realidá dexemos el coche nel barriu de Nozaleda.

Como siempre, el nuesu camín dira dende Xixón garrando la autovía minera, pa tomar en Llangréu, el corredor del Nalón travesando los conceyos de Llangréu, Samartín del Rei Aurelio, Llaviana y  Sobrescobiu, pasando'l banzáu de Rusecu y el de Tañes hasta llegar al fin a El Campu, onde siguimos pela carretera hacia L'Infiestu hasta Orllé.

Partimos del barriu de Nozaleda n'Orllé (645 m)

Son les 9 de la mañana y tamos preparaos pa una ruta llarga pero enllena d'emociones y llugares nuevos pelos qu'entá nun tuve la oportunidá de pasar. Saldremos pela manzorga'l ríu Orllé, pente les cais de Nozaleda, siguiendo les marques del PR que tienen de llevanos a cruciar el ríu d'Enmediu na ponte la Pomarada hasta Viamín onde alcontrámonos con uno de los munchos cartelos informativos d'esti pequeñu percorríu.

La verdá ye que durante tol camín del valle del Orllé, sorprende polo guapo, amestándose fondes poces del ríu con pequeños tabayones, nun sinfín de guapos toboganes estraos de mofu. Pero nesti percorríu, nun sólo tendremos llugares guapos, sinon que tamién esisten dellos cartelos informativos con posibilidá d'audio con desplicaciones, cosa qu'en pocos llugares d'Asturies podemos alcontralo.

Caleyamos impresionaos pel valle del ríu Orllé

Siguiremos camín alantre, siempre en xubida, pasando d'un llau al otru del ríu peles pontes del bayu Los Turoneros y del Bayumásaltu, pa siguir dafechu pela mandrecha'l ríu tol tiempu hasta'l crucie de caminos, nel bayu Fresnedal, onde equivocámonos y cruciamos la ponte hacia'l valle de Fresnedal,  teniendo que dar la vuelta a los pocos metros, al danos cuenta del erru.

Asina que vamos tirar de frente y siempre con un desnivel mui asemeyáu y diremos ganando metros d'altor y de percorríu a esti valle del ríu Orllé. Fadrémoslu durante 45 min, algamando vistes más abiertes nel Llanu L'Acebal, cola presencia a la nuesa mandrecha de la muria norte del Requexón de Valdunes, el cual traeme bones alcordances, hasta aportar a un llugar qu'ensin dubia namoróme: la braña Conforcos.

Ablucaos quedamos cola braña de Conforcos

Nesti llugar máxicu, paez que ponemos puntu y final a l'ayalga que ye'l valle d'Orllé, pero namás que sedrá un puntu y siguíu, poro descansaremos unos minutos suañando con poseer una cabaña como'l refuxu de cazadores... pena que nun seya de montañeros, porque de xuru que yera un llugar increyible nel que pasar la nueche.

Magar d'un traguín d'agua, pasamos a ún de los llugares más ablucantes del día, la Foz de Melordaña. Pa ello, travesaremos Conforcos y siempre cola vista puesta nes muries que la zarren, salímonos per un senderín a la manzorga dexando'l más marcáu que tiende a descender hacia'l Valle Capiella. Nesti puntu, si Conforcos yera increyible pol so allugamientu, la escapada ñatural hacia los altos per esta foz tresfórmase en daqué máxicu.

Foz de Melordaña... de lo más guapu de Casu y Asturies

Caleyamos en silenciu, moviéndonos despaciu ya que nun somos a parar d'acolumbrar cada pasu que damos, cada requexu de paré nel que ñacen texos ensin saber onde pueden enraigañar siquiera. La Foz de Melordaña, ta siendo tan guapa o más como yeramos a imaxinala, paez mentira que tardara tanto en venir perequí y ta pagando la pena, ya que son unes cuantes foces les percorries nos años, pero esta ye prestosa enforma y caleyase cola mesma facilidá cola que sonrreimos demientres travesamos cada peldañu qu'asciende per ella.

Pero como suel pasar, tolo bono dura poco y bien ceo, tamos mirándola dende l'otru llau, casi con ganes de tornar so los nuesos pasos y poder esfrutar esti pasu tan curiosu una vegada más. D'otra miente, nun tamos pa perder tiempu, asína que siguimos alantre, comentando la xugada y superando'l desnivel necesariu pente guapos praos hasta pegar de frente con un de los mayaos más guapos d'Asturies: la mayá de Melordaña.

Nun queda otra que parase un ratín a contemplar la Mayá de Melordaña

Ellí, tamos unos minutos, demientres intento orientame, ya que nel día de güei venimos un pelín incompletos... anque nunca nun fuimos mui completos jeje. Llevamos GPS pero namás el track y sin la referencia del mapa cuesta escoyer cuala ye la direición correuta.

Poro, céntrome y entamo de manzorga a mandrecha nomando los llugares que creo son... Colláu Melordaña, Picu Pelacera, Foz de Filispando, Picu Campigüeños, Foz de Valloseru, Picos de la Magrera, Colláu Campigüeños y Picu Cornielles... y la ganadora ye la Foz de Valloseru.

Empobinámonos hacia ella, viendo qu'esiste un camín empedráu, tapecíu pel mantu de fueya nel que Kíla nun pierde la ocasión de revolcase. A la entrada'l senderu topámonos con una faya que nun tuvo otru sitiu onde espoxigar más que nuna peña y siguimos alantre pel cómodu senderu hasta topanos enmediu d'un mayaín arrodiaos d'un felechal infumable, dándonos como única salida, a la nuesa mandrecha, la mayada de Valloseru.

Xubimos per Valloseru hacia La Magrera

Aportamos a la mayada, menos caltenía que Melordaña, pero guapa enforma tamién y topámonos con un par d'opciones: averanos hasta'l colláu Campigüeños na base del Picu Cornielles, faciendo una envuelta enorme baxo los picos de la Magrera y demás collacios del nuesu oxetivu, La Becerrera o aportar hasta'l final de Valloseru pegándose a una muria pa garrar un senderín siempre a la mandrecha de la riega.

Quiciás nun seya tan clásicu y cómodu como la envuelta, pero esta tirada más direuta y pindia, too seya dicho, va facenos aportar con esfuerzu pero más ceo, a la base de los picos de La Magrera, onde sentámonos más bien por inercia que por necesidá a descansar unos minutinos. Anque tamos a finales d'añu, fai calor y nótase la deshidratación por mor del sudu que llevamos enriba, asína qu'antes d'entainar hacia'l picu La Becerrera echamos un tragu d'agua.

Empobinámonos hacia l'arista de la Becerrera

Con dalgo más de fuercies tornamos a ascender bordiando la Magrera pela manzorga siempre con tendencia a ganar el colláu La Mostayera, onde quedamos plasmaos poles vistes hacia Picos que tenemos dende equí... un puntu más pa la ruta de los milenta que lleva.

Dende antes del colláu, vamos viendo como la cresta de la Becerrera va afilándose según xubimos desnivel y la cayida hacia les terraces de Los Foyos peles qu'anduviéramos na nuesa aventura nel Tiatordos ye acoyonante.

Hai xente que prefier xubir dende la otra fastera del crestéu, pero vamos ver que tal se da, asina qu'averámonos a ella y métemonos con calma con dalgún trepe ya inclusu destrepe en travesía, siempre mui pendiente de siguir dellos h.itos y dalguna traza pisada nos pasos. Aparte, ando sollerte con Kíla, que tien una manía d'echar vistacinos nos aéreos que me pon la piel de pita.

Prestosu crestéu de la Becerrera con bones cayíes y grandes vistes

Ensin más, adelántome con Kíla dexando un pelín atrás al restu del grupu que va negociando los pasos como meyor puede, demientres indíco-yos onde ye meyor que nun s'asomen de más y aportamos a los 1837 m del Picu La Becerrera a la 1 de la tarde. La satisfacción ye plena, nun se puede facer una ruta tan completa, al menos na so primer parte, con un valle preciosu como'l d'Orllé, una foz y una mayada brutal como les de Melordaña y darréu un cumal coles meyores vistes de Reres y Picos... ascensión de díez.

Pudiera entreneme desplicando les vistes qu'hai dende equí... pero nesti día, tan sólo pensé no difícil que fué caleyar pente la borrina baxo la fastera oriental d'esti cumal el día que ficiéramos la vuelta al Tiatordos dende Taranes. Dende equí, vense milenta siendes toes paraleles hacia la mayada Daón y facer una escoyeta d'una canalina que nos llevase demasiáu a pinchu hacia la Foz de la Escalada pudiera ser la perdición... nel monte hai que tener suerte y paciencia pa non embarcase.

Cumal del Picu La Becerrera (1837 m)

Facemos les semeyes de rigor, aprovechando la llegada d'otros montañeros y tiramos p'abaxo a la gueta d'un abellugu onde xintar , ensin que'l vientu qu'azota nel cumal seya tan molestu. Alcontrarémoslo magar de descender hacia'l final del crestéu, quedándonos nun mayaín en mediu de l'amplia terraza que fai esti monte pa la so cara norte. Llueu de reponer fuercies tan sólo tenemos que descender pegaos a un contrafuerte pa tar na baxera del monte.

Dende equí, la nuesa intención ye dar un paseín pel fayéu de Purupintu, poro tendremos que descender hacia esta viesca, pasando pegaínos a un imponente xerru, el de Piedrafita, que tien una covacha enmediu. La cantidá de posibilidaes qu'ufrez Reres ye interminable, ya qu'otres opciones diríen por intentar travesar la Peña La Estrecha pol sur, baxando pel colláu Buceñáu al de Melordaña pa siguir hacia Conforcos... pero quedará pa otra vegada.

Baxamos hacia los Xerros de Piedrafita

Nesta ocasión garramos esi pindiu senderu pegáu al xerru, viendo de la que vamos descendiendo el guapu mayáu del Covayón a la nuesa mandrecha y más allá vemos como cae Purupintu so la preciosa Foz de Saolla que conocimos na nuesa ruta a la Llambria. D'aquella tocáremos Purupintu pela baxera y esta vegada vamos dir lo más arriba posible per clares siendes, empedraes incluso, baxo les muries que caen dende la Peña La Estrecha.

El nuesu puntu de crucie ye'l colláu los Duernos, na xerra del mesmu nome que vien dende la Estrecha, anque si queremos podríemos siguir camín alantre hasta la pasada'l Mozquitón, que tamién conociéramos va tiempu al dir a Peñe Crespa.

Nos Duernos (1413 m), paramos un momentu, acolumbrando cumales que ficiéramos l'añu pasáu, como la Ordaliega o la Frayada y siguimos descendiendo per un pequeñu seu, hasta la cumera d'otra prestosa viesca, la de la Infiesta.

Travesamos per Purupintu hacia la Xerra los Duernos

Nun sé si l'estáu serondiegu de la viesca o qu'internamente andábemos con más ganes d'aventura, decidimos conocer esta viesca envede bordiala penriba hasta'l colláu Friera que mos daba pasu al valle d'Enmediu. Personalmente, como ya lu conocía del ascensu a Peñe Crespa, tirábame muncho la opción d'intentar descender per esta viesca hacia lo qu'albidrábemos sedría una salida pel valle Fresnedal, qu'unes hores antes tomáremos como camín erróneu.

Paez increyible les ganes d'enmarronanos tóntamente que nos dió esti día, sobretou xugando cola poca lluz qu'hai nestes feches del añu y ensin llevar mapes de papel nin nel gps. Aún así, supongo que tirando d'intuición aldovinaba que teníemos d'acabar xustamente ehí, nel Valle Fresnedal. D'esti xeitu entamamos a descender pela viesca, que tenía tantísima fueya que nun yeremos capaz de ver onde pisábemos.

Pasiamos pel monte la Infiesta... embobaos col espeutáculu serondiegu

A cada pasu que dábemos la Infiesta tornábase más guapa, amestándose los collores pardos de la fueya de faya colos verdes del mofu y los felechos según díbemos baxando cota y averándonos a la riega Fresnedal. Nel intre, nin sabíemos los nomes de les riegues nin como diba tresformase esti ampliu valle, pero siguimos descendiendo hasta que la riega entamaba a empozase con pequeños tabayones y munches posibilidaes d'embarrancar.

Nós, siempre pela fastera esquierda de la riega, fuimos llibrando les vallines que cayíen hacia la riega y siempre la sensación yera de dir per un senderu, pero na rialidá nun veíemos res, asemeyándose la situación a cuando vamos penriba la ñeve. El casu ye que mediánamente bien, fuimos avanzando valle abaxo, siempre pela faldera'l monte, quedando mui abaxo'l calce del ríu.

Facemos el tramu final de la viesca hasta la mecedura de riegues

Llegaos a un puntu de faldéu, baxo'l colláu Antosu, acabamos por xubir a un espolón que paez cayer a pinchu hacia la foz del ríu y al otru llau del espolón, topámonos con una vallina que desciende dafechu hacia'l ríu Fresnedal.

Como la paré contraria de la vallina paeznos mui pindia,pa una posible travesía y faldéu posterior, decidimos baxar pela vallina hacia'l ríu esperando nun alcontrar cortes o una foz profunda na parte baxa.

Por suerte, aparte d'un descensu, pente mediu metru de fueya, prestosísimu alcontrámonos col calce del ríu xustamente onde paez acabar la parte más zarrada y onde tenemos un claru vau hacia la otra fastera'l valle, onde tan les cabañes de Cañandi.

Baxamos calmao pel valle Fresnedal

 D'esta miente, viendo qu'agora si que ñaz un camín bien marcáu y qu'amás el track nuesu d'ascensu ta más cerca, relaxámonos y sentámonos un ratín nes peñes al llau del ríu a esperar. Esperar que? Pues, esperar por Benjamín qu'enantes d'entamar el descensu de la vallina, tuvo un golpe de deshidratación y diónos un bon sustu.

Ya sabéis, nel monte hai qu'hidratase y tamién si ties calor nun ta de más quitar el forru polar jeje, que llueu pasa lo que pasa. Magar de los 15 minutinos d'espera y dempués de que se recuperase, siguimos ya per un cómodu descensu, alcontrándonos con sebes de praos y delles cabañes como les de la braña Fresnedal.

Descendemos hasta Orllé pelos bayos y poces del ríu homónimu

Dende equí, ya con calma, percorreremos la parte baxa del rebautizáu Valle Fresnedal, hasta pocu enantes nun sabíemos si andábemos per él siquiera y con una charra animada averámonos, pali pali, hacia nuestru track de xubida y a la ponte onde cruzábense los caminos nel bayu Fresnedal.

Una vegada que tornamos al PR, tan sólo toca facer tol restu del valle d'Orllé, col atapecer sol Piqueru, hasta'l barriu de Nozaleda al qu'aportamos con casi 9 hores de ruta, 17,3 km de camín y un desnivel acumuláu de 1685 m, anque como siempre quedámonos con tolo positivu del día, un amiestu de foces, mayaos y cumales perguapos del parque de Reres.

Que vos preste!!

Camudando'l Camín na seronda tardía