La Molina (Cabrales) - Casañu - Cantón del Texéu - Vega d'Ariu (Onís)

6 de Xunetu de 2013

Track: La Molina (Cabrales) - Vega d'Ariu (Onís)

Madrugón de los que faen hestoria, pa entamar la Travesera Picos 2012-2013, ya que quedamos bien ceo n'Arenas p'almorzar toos xuntos. Dende Xixón, saldremos Simón, Haritz y yo y dende Euzkadi vienen, Fernan, Bittor, Tito, Carlos y Ainara.

Como siempre, aportamos a Arenas garrando l'autovía del Cantábricu hasta Posada de Llanes, onde tomamos direición a Cabrales al traviés del Altu d'Ortigueru, y ya baxamos a los pueblos de Canales, Carreña, Poo y a la fin Arenas.

Entamamos la Travesera en La Molina (356 ms)

Magar del almuerzu, los abrazos y los comentarios so les posibilidaes de la Travesera y tamién sol percorríu de los otros miembros de la Travesera (Pau, Rebe y Pangua) que vienen del llagu La Ercina hasta Ariu, vamos plantanos nel pueblu cabraliegu de La Molina (356 ms).

Ellí, vamos preparanos pa lo que nos vien enriba: 4 díes per Picos d'Europa, col iviernu más nivosu de los últimos años y con una fola de calor pal total de los díes de percorríu. Con ello, los preparativos, son cuanto menos caóticos y la mochila y ferramientes a llevar una tortura en pesu pa la nuesa espalda.

Caleyamos baxando hacia'l cursu del ríu Casañu

Dicir, qu'en La Molina, nun hai sitiu pa dexar los coches tantos díes ellí, poro dexámoslos a mediu camín pente'l pueblu de Canales y La Molina, comiéndonos dalgún kilometrín estra. Magar del asfaltu, travesamos el pueblu, sacando la semeya d'aniciu y baxamos con allegría hacia'l guapu puente Pompedru, siguiendo esta vegada'l cursu del ríu Casañu, a la escontra que'l día de la ruta a la Cabeza Llerosos.

El primer tramu del Casañu, será'l más tranquilu, y darános pie a caleyar sele, esfrutando de les poces del ríu, de los enormes y vieyos castaños del camín y de les pontes que lu crucien el de L'Escobín y unu más improvisáu, pero más emocionante, dempués de la braña L'Escobiu, el de los Mineros.

 

Perguapu avance pel valle'l Casañu travesando dalgunes pontes

 

Magar del pasu de nuevu a la marxe esquierda del ríu, tendremos otru guapu tramu, nel que la vexetación paez querer ganar tarrén sol senderu. Ésto, fadráse muncho más evidente na Vega la Batuda, onde'l tamañu de los felechos algamen dimensiones tremendes.

Al pocu de pasar la Batuda, tenemos qu'escoyer dos caminos pa siguir alantre hasta la ponte Llameru. El que garramos va pela parte baxa'l valle y tien dellos xube-baxas sol ríu, pero ye una sienda clara y mui prestosa de caleyar.

El segundu y que coméntase en dellos blogues, como'l de Las Claras, percorre la canal de Llucia, d'orixe inxenieru hidrolóxicu, teniendo dellos pasos aéreos y dalgo molestos pa los mochilones colos que cargamos nesta travesera, poro desdexámoslo pa otra ocasión.

Siguimos caleyando pel camín baxo hacia la ponte Llameru

Na ponte Llameru, con una 1 hora y 40 minutinos de ruta, fadremos una parada obligada ya que tenemos delles coses que decidir. Equí, podríemos cruciar el Casañu y xubir el Valle Llameru pa conocer dempués L'Oyu la Madre dende la base del Cantón del Texéu.

Sicasi, somos a decidir, que paeznos viable siguir el calce del ríu ya intentar alcontrar esa surxencia que da vida al Casañu. Asína lo fadremos y siguiendo una marques roxes nes peñes y dellos h.itos, con cierta dificultá, vamos avanzando y conociendo poquín a pocu, los increyibles requexos, pelos que muévese y ñaz el Casañu.

Tramu d'investigación hacia L'Oyu la Madre

El casu ye, que somos a albidrar un senderu bien marcáu y vemos una bona intención de que puea llegase bien empobináu hasta L'Oyu la Madre, pero nós, dempués de lluchar cola vexetación, llimpiando na mayor manera posible tamién el camín, alcontrámonos col pasu (con marca roxa nuna peña) nel que tenemos que cruciar el ríu a la mandrecha d'esti.

Hasta equí, sacante de querer siguir penriba y nun baxar hasta más tarde hasta esti pasu, nun tuviéremos problemes importantes, pero alcontrámonos nel puntu, nel que faísenos imposible albidrar per onde tenemos que siguir hacia L'Oyu la Madre.

Hasta equí llegamos... crucie del Casañu a la vera la mandrecha

Nun paga la pena dicir, los esfuerzos que delles persones del grupu, ficimos pa intentar alcontrar un mínimu rastru que siguir, sólo se qu'a lo postreru pagámoslo. Si tengo qu'albidrar daqué solución a la entruga que presentósenos... diría que ye pol mediu'l calce, cuando nun hai tanta augua como la qu'alcontramos nesti día nós.

Dos hores y media perdíes... pónenmos de nuevu na ruta dende la ponte Llameru. Hai qu'aclarar qu'en realidá hasta´l puntu en que llegamos, dir y tornar sería un hora, poro´l restu del tiempu foi de restolar, perder y alcontrar el camín...

Perpindia xubida pol valle Llameru

Tornando al bon camín, entamamos la xubida pel Valle Llameru, el cual tien de llevanos per un senderu, que pente un ampliu felechal, ha de pasar a una viesca carbayos. A la escontra d´otres viesques, los felechos paecen tener bona fuercia ya que asítiense pente los árboles hasta bien arriba'l valle.

Si amestámos-y a la vexetación, el calor, lo dificil de siguir el senderu y lo pindiu que ye´l tarrén, tenemos un amiestu perfectu, p'aportar a los 902 ms del colláu L'Incós, con una bona sudada y munches duldes sol estáu de forma nel que preséntome a esta travesera.

Nel colláu L'Incós (902 ms) cola Peña Ruana detrás

Na realidá, nun tengo mui claru inda, por qué a metá del valle, entamé a tener calambres nos rectos anteriores. Camiento, que la xuntanza de fozar per llugares complexos a la gueta'l camín a L'Oyu la Madre, más una posible deshidratación fonda, fízome quiciás pasar el pior día na montaña no que físicamente refierse.

Nel colláu, inda nun tenía les sensaciones de pasalu mal, poro descansé echando una güeyada a les canales que trian la Peña Ruana y col envís de que fora dalgo pasaxero, siguimos camín pela pista que vien del pueblu de Demués, empobinándonos hacia'l colláu Camba y al siguiente oxetivu, el Cantón del Texéu o de Soñín. 

Xubimos per pista al colláu Camba, cola vista del Cantón y la vega Comeya presentes

Esta parte de la ruta, fadrémosla entainando, a sabiendes de la perda tan grande de tiempu que sofrimos na baxera'l Cornión. Aún así, diónos bien de tiempu, a esfrutar de les primeres vistes a la Peñasanta asturiana, la cual allumaba tol Cornión, con tala cantidá de ñeve na redolada.

Personalmente, esti tramín prestome enforma, ya que dióme p'alcordame d'una visita rápida a la fastera de los Llagos, na qu'intentamos siguir les indicaciones d'un llibru pa facer una ruta peles brañes d'esta fastera y acabamos magar de pasar por Belbín, nel mirador de Camba, ensín tener mui claro pa onde queríemos dir, nin per onde tábemos moviéndonos, yendo dafechu al sen contrariu de marcha... coses de la mocedá.

Perguapa ascensión al Cantón del Texéu... con trepadina prestosa

Ensín más, pasaremos por Soñín de Riba y cruciarémonos pocu dempués del H.orcaín del Cantón, con una reciella guah.es que formaben parte d'un campamentu o dalgo asina. Al aportar a la base, de la cara sur del Cantón, dexamos a Haritz, mancáu d'un todiellu, na h.aima que fízose cola sábana pa durmir y entamamos l'ascensión.

Ésta será bien prestosa, ya que xubirános nuna llarga envuelta hasta la base d'una muria a metá de la paré del Cantón, ellí camudaremos el sen, y pasaremos pembaxo la muria, hasta topános con una pequeña chimenea, que tendremos que superar con entretenida trepada.

Haritz descansando y los demás na cumera'l Cantón (1165 ms)

En 6 hores y media de tiempu dende que saliéramos de la saliéramos de la Molina, tamos nel llugar non más altu de la ruta, pero si nel más montañeru del dia, el Cantón del Texéu de 1165 ms d'altor, que nun bon día sorprenderá non solo polo guapu del ascensu, sinon poles vistes tan ablucantes que tien sol Cornión astur y tamién sol macizu central, col Torre Cerredu perposando les miraes.

Nun tamos pa tar muncho tiempu nel cumal, asína qu'entainamos la baxada, teniendo curiáu nel destrepe'l canalizu, el cual faise tan entreteníu como na xubida, y bien ceo tamos de nuevu con Haritz, el cual na espera, decidió xintar cosa qu'inda tenemos que facer los demás.

Vamos dexando atrás el Cantón, pasando por Belbín

Fadrémoslo pocu más alantre na nuesa ruta, que tien de llevanos en baxada hacia la Vega las Mantegas y cerca'l colláu de las Mantegas, atoparemos dos peñonas, que dan la solombra xusta pa protexenos del sol y xintar daqué unos minutinos.

Magar del merecíu descansu, va llegar un tramu de la ruta, que tien de llevanos hasta'l puntu más altu del día, el colláu del H.itu (1646 ms). Tenemos unos 500 ms de desnivel per delantre, que van facésenos mui duros a toos, pero personalmente, nunca tan mal lu pasé na montaña. 

Llargu camín dende la Rondiella polas Reblagas hacia'l H.itu

Partimos de las Mantegas, pa xubir pol colláu'l Padre hacia la Llomba Belbín, onde tenemos guapes vistes del mayáu Belbín. Ellí, pillamos a Haritz, que siguió camín sele pa gananos tarrén y al travíes de la braña Sotres y el Llanu L'Espinu, empobinarémonos hacia'l mayáu de la Rondiella.

Hasta equí, nun voi mal... nun pueu apretar el ritmu, pero nun voi mal. Pero cuando entamen las Reblagas, las d'Abaxu primeru y llueu les d'Arriba les pates dicen que nun van y a cada pasu, contráenseme los cuadriceps y nun pueu caleyar.

Ye la sensación más mala que tuve nunca. Tanto, que si al día siguiente, alborezo en tales condiciones, abandono la travesera como ta mandáu. Nun se pue dir pola montaña, con estes sensaciones, nun se disfruta, ya que vas pendiente de siguir alantre y acabar y non d'acolumbrar les milenta cimes que había ne redolada.

Ablucantes les vistes dende'l H.itu hasta la Vega d'Ariu

Y nun yeren poques... ya qu'ante nós diben abriéndose toles que faen la fastera d'Ariu. Dende la Peña'l H.ultayu, Cuvicente y Verdilluenga, pasando por Peña Blanca y Robriza, les Torres de los Cabrones cola Punta Gregoriana, Traviesos....

Menos mal, que los kms foron pasando y que paramos un pelín al alcontrános con Sito y Carlos (del antiguu blog de Sito) que comentónos que taba tamién Monchu (Monchu x Montaña) en Ariu. Entre'l ratín falando con ellos y garrar augua nel valle las Campizas, paez que recuperé un pocu y xubimos con ciertu aliendu al H.itu, onde una vegada más, namoreme de les vistes sol macizu central.

Esfrutando d'una guapa puesta de sol na Vega d'Ariu

Ya taba tol pescáu vendíu, agora sí, tan solu restaba baxar unos poco metros hasta'l refuxu de Vega d'Ariu y descansar rehidratándose con unes cerveces. El día, personalmente, nun foi nada bonu, nin táuticamente, nin físicamente, nin mentalmente.

Per un llau conocí'l valle'l Casañu, pero quedámonos ensín l'ayalga de L'Oyu la Madre, na que perdimos escesivu tiempu, como pa conocer tamién otra ruta más de Travesera, yendo por Vega Maor a Ariu. Son coses que nun se controlen y que faen destrozar dafechu tol plan que llevaba dende meses.

Sacante d'esto... tar per primer vegada pernoctando n'Ariu, onde taben esperándonos la otra parte del grupu: Pau, Rebe y Pangua, foi una pasada. Tirase nos praos, falando de too, conocer a Monchu, tomar unes cerveces, cenar y ver un guapu atapecer... son cosines que queden na memoria y lo otru escaecese aína.

En resume... ruta dalgo confusa pa colos tiempos, ya que faise en muncho menos, saliéndonos al final 10 hores y 20 minutos, pa percorrer los 15 kms (ensín contar la gueta pol Casañu) y superar un desnivel positivu acumuláu de 1710 ms. 

Dir a la segunda estaya....

Camudando'l Camín na Vega d'Ariu