Seaza (Grau) - Picu'l Víu - Picu Pedroriu - Moutas - La Fuexa

 22 Setiembre de 2024

Track: Seaza (Grau) - Picu'l Víu - Picu Pedroriu - Moutas - La Fuexa

Entamábemos temporada 2024 - 2025 dempués d'un final bastante apoteósicu de l'anterior, con una Travesera per Picos bien potente y un par de rutes de muncha calidá per tierres llioneses al Cuetu Ancino y a la Peña Forqueta. completando un branu montañeru escelente.

Pero como non, la meteo pal entamu de temporada, nun yera afayaiza y tuviemos que buscar una rutina curtia nuna ventanina de bon tiempu, que dexáranos tiempu pa poder picar dalgo dempués. Pa ello, preparamos una circular al traviés del cordal del Pedroriu, llende pente'l conceyu de Miranda y Grau.

 

Partimos del pueblu de Seaza (485 m) nel conceyu de Grau

Quedaremos a una hora prudente p'almorzar en Grau capital y saldremos hacia la GR-4 que percorre'l valle del rigu Vega, conduciendo per llugares realmente guapos hasta'l Puente Seaza, onde tomamos una pista asfaltada, per pindia hasta'l pueblín de Seaza, onde aparcamos a la entrada'l pueblu y preparámonos pa caleyar.

 

Cruciamos el pueblu n'ascensu hacia'l camín real pa siguir hacia'l Capítulu

Travesaremos tol pueblu, esfrutando de dalguna guapa construcción en Seaza y salimos al llau de la ermita'l pueblu, p'ascender per cómoda pista hasta'l camín rial de la Mesa, que nesti puntu, ye una auténtica carretera que percuerre tola faldera del cordal de Pedroriu y que tien de llevanos, pesie al asfaltu per guapu camín hasta'l barriu del Capítulu.

 

Siguimos per caminos y siendes hacia'l cordal de Pedroriu

Nel Capítulu, saldremos per camín, primeru travesando una viesca y llueu ya siguiremos per monte baxo, pa dir upándonos hacia lo cimeru del cordal, siempre alcontrando senderu hasta la collada Cuémanes, onde ya ascenderemos el tramu final hasta los 821 m del Picu'l Víu, dando vista a casi toa Asturies tapecida per una ñube que paez eterna.

 

Ascendemos al Picu'l Víu (821 m) cola vista puesta nel llonxanu Pedroriu

Ensin más, facemos semeya de cumal nel puntu más altu del cordal del Pedroriu y descendemos con vistes al picu Pedroriu, hacia'l Llanu'l Lliguillín, primer collaín, de los munchos que vamos dir conociendo nel nuesu transitar pel cordal, siempre con vistes al rigu Narcea a la nuesa manzorga. Pasaremos entós, pel Llanu la Plana, La Sierra y faldiando'l picu Cutarieyu, aportaremos al colláu Xuncéu, onde entraremos nun tramu final hacia'l picu Pedroriu, alcontrando toles dificultaes de la ruta.

 

Facemos camín alcontrando siendes hasta'l tramu final onde ponse pelín más abegosu

Cuando digo dificultaes, ye dende'l colláu Xuncéu baxa un camín hacia'l camín rial, pero nun atopamos un senderu claru hacia'l Pedroriu, asina que tendremos que pasar una valla ganadera, güeyu col pastor que sacude y siempre pela arista, diremos travesando cotoya baxa, con tramos de peña onde superamos les más altes y dalgo de felechu secu, pa continuar, con ciertu picor pinchudu nes pates, hasta los 798 m del Picu Pedroriu.

Cumal del picu Pedroriu (798 m) n'arba pente Miranda y Grau

Con dalgo d'orpín, a la fín, facemos cumal nel Pedroriu, onde cuéstanos alcontrar el vértice xeodésicu, entre tanta lápida, buzón de cumes y trastos varios nel monte. Sicasí, namás que vemos tanta ferralla, dámonos cuenta, que'l monte suel ascendese bastante pero cláramente dende la fastera norte, pela que viendo les ñubes que tenemos enriba, decidimos tomar pa baxar cuanto antes.

 

Descendemos de nuevu hacia'l camín de la Mesa entrando per Moutas siguiendo hacia La Fuexa

Con baxada bastante más cómoda que l'ascensu, vamos averanos hasta'l llanu Llindelapeña, onde tenemos descensu cenciellu hasta l'asfaltu del camín rial de la Mesa, aportando a la parte alta del pueblu de Moutas, onde charramos un ratín con un paisanu y siguimos caleyando con calma y baxo'l solín hasta'l desvíu del pueblu de la Fuexa, al que vamos descender, pillándonos la ñube lloviéndonos un ratín demientres travesamos les sos cais.

 

Travesamos el pueblu La Fuexa pa siguir sollertes p'alcontrar los caminos hacia Seaza

Siguiremos per bona pista en descensu dende la Fuexa, ya col envís d'empobinanos hacia Seaza, teniendo camín claru hasta una cabaña con un prau enorme, que travesaremos, tando bien atentos al senderu, pa salir del prau a camín típicu entre muries, que siguiremos hasta topar la riega'l Pasadín, onde debemos xubir unos pocos metros a la mandrecha la riega pa continuar per camín hasta les cais de Seaza, ya que si siguimos de frente, toparemos otru camín dafecha zarrada.

En resume, ruta a priori cenciella pa conocer esti cordal n'arba pente los conceyos de Grau y Miranda, que túvonos entreteníos durante casi 14 km con un desnivel acumuláu de +/- 590 m nun total de 5 hores y 35 min, anque camiento que ye reducible, sicasí, travesar tol cordal del Pedroriu ye bastante llargu, poro les hores nun tan lloñe de la realidá.

Camudando'l Camín na llende de Grau con Miranda