3 d'Agostu de 2024
Track: El Caserío (Los Argüeyos) - Cuetu Ancino - Valdenuciello - Prau Llano - Montuertu (Curueñu)
Magar de quince díes de descansu dende la Travesera Picos, toca escapar de la mala meteo que tamos sofriendo per Asturies esti branu, apeteciéndonos dir hasta'l valle'l rigu Curueñu, onde podemos atopar tanto escueles d'escalada como montes calizos de gran calidá, como'l Cuetu Ancino, monte que punxera Pepa pa esta temporada.
Durante la selmana, tuviemos varios intentos de xente del grupu por venir, pero a la fín, quedámonos sólos Pepa y yo, que xunto a Jose, ya fuéramos a sobar cola calma de vienres a les cercaníes de Cármenes. Poro, al día siguiente, llueu de les birres y cena na furgo del día anterior, alborecemos cola calma, pegándonos un almuerzu demasiáu tranquilu, viendo que nun tábemos pendientes de naide más del grupu.
Poro, viendo que daben másimes de 24 graos, terminamos por aportar al antiguu camping del Caserío na foz de Valdeteya a les 11, entamando a caleyar tardísimo, puntu qu'a posteriori diba facenos pasalo mal, anque nel intre siempre teníemos la opción d'abandonar en cualesquier momentu.
Sicasí, nesi momentu, salimos felices col cuetu Ancino enriba nuesa, cruciando la riega'l Fito, p'ascender per pista valle alantre, hasta alcontrar a la nuesa mandrecha'l senderu que va facenos ascender per un perguapu fayéu adornáu con munchos texos, a lo llargo del pindiu senderu.
Y cuando falo de pindiu senderu, ye porque poques vegaes metímonos nuna viesca con senderu evidente y con bon trazáu, pero tan pindiu, asína que toca poner les pates a trabayar y non sin esfuerzu, travesaremos tol fayéu, esfrutándo munchísimu de los exemplares tanto de faya como de texu, saliendo a la parte alta de la viesca, atopando ya una canal de monte baxo y llera.
Dende equí, diremos ganando altor, xubiendo un tramu penriba la llera hasta salir a una vallina herbosa, alcontrando a lo postreru, un senderu que vien un pelín dende la izquierda, poro decidimos empatar con él, pa facilitar l'ascensión hacia una evidente chimenea, a la qu'aportamos llueu d'echar una güeyada a tolos montes que nos arrodien.
Fadremos gayoléramente la poca trepada del canalizu y con pocu más de poner les manes en dalgún qu'otra peña, tendremos a tiru ya, el cumal del Cuetu Ancino, dende'l que garramos una amplia vista de tolos montes de la redolada al otru llau del Curueñu, col Bodón hacia'l noroeste, la Peña La Verde enfrente nuesa y la Peña Galicia con su doble cumal más al sur.
Miramos el tiempu fechu y nuna hora y cuartu, tamos nel cumal llueu d'ascender 620 m de desnivel en malpenes dos kilómetros, asina que nun tamos mal de forma camentamos. Sentámonos un ratín, miramos pal banzáu del Porma, la crestería de Peña Forqueta que tenemos pendiente y miramos al sur pal siguiente oxetivu del día: la crestería del Prau Llano, anque nun mos cuadra muncho la temperatura que tenemos a les doce la mañana, colo que daben les previsiones.
Sin más, picamos dalgo y desfacemos un pelín de camín destrepando'l canalizu y garraremos sienda que va dir llevándonos pela fastera norte del cresteríu, con dellos pasinos bien guapos per dalguna forcadina, hacia'l cumal de Campayagua (1650 m), onde ya entamaremos un descensu per praos en primer llugar y tarrén más calizu hacia la collada de Valdenuciello.
Travesaremos tola collada, pegaínos a la sebe d'un prau pela manzorga hasta aportar a la llínea de solombra de pinos, onde decidimos descansar un pelín pa quitar tola cantidá semilles que metiéronse nos playeros pelos praos que baxamos. Llueu del descansu, vamos tener el pior momentu de la ruta, xubiendo per un cortafueos pel monte de pinos, onde lo pindio del tarrén y el calor afoguinante, llévanos a pensar si la retirada en Valdenuciello hacia'l Curueñu sedría lo meyor.
Pero equí tábemos, con una solana tarrecible, aportaremos al colláu pente los altos de Las Espicales y la Colina, onde aparte de tener guapes vistes a la crestería recién fecha del Cuetu Ancino, va danos una llixera brisa qu'aumenta los nuesos ánimos, llueu del infame cortafueos pel pinar, pa tomar impulsu y ascender hacia'l primer cumal de la crestería que ye la Peña'l Texo.
Dende los 1685 m del Texo, vamos empobinanos per una crestería cómoda y guapa hacia'l Prau Llano, soplando una brisina calufera que nos caltién vivos, pero nin con eses vamos a gustu. Pa cuando quédanos unos pocos metros pal cumal, atopamos a unos montañeros veteranos que ya entamen la retirada y abluquen un pocu cola ruta que tamos faciendo, derrumbándonos a la poca solombra del vértice xeodésicu de 1727 m llueu de despedinos d'ellos.
Tocó parar casi quince minutinos, descansar, tomar l'aire, beber agua a saco y picar dalgo y como nun había quien parase, decidimos continuar crestería alantre, una crestería que ye bien prestosa, pero que nun vamos esfrutando, pol calor que tamos pasando y que fainos dir sollerte nos pasos más espuestos, por si tenemos dalgún mareu.
Pasaremos pela Peña Corvero, puntu nel qu'avisamos a Jose por walkie, que tamos entamando a pasalo mal y que venga a buscanos a Montueru, ya que pensamos en dexar la ruta nuna travesía. Coles idegues bien clares ya, continuaremos la crestería hacia l'últimu puntu del cordal como ye la Lica'l Cielo de 1671 m, onde alcontramos dalgún pasín pente la roca curiosu.
Pesie a lo guapu de la crestería, de les vistes y de les ganes que teníemos, nun podemos más, asína que tirámonos pela arista occidental d'esta ferradura que ye'l Prau Llano y namái qu'alcontramos una vallina de monte baxo, descendible, echámonos abaxo apriesa hacia la pista pegada a la riega Requexo, onde ya relaxámonos y caleyamos ensin más, hacia les primeres cases de Montuertu.
Pa cuando aportamos a la carretera pegada al ríu Curueñu, onde nos esperaba Jose, la furgoneta a la solombra marcaba 34 graos, poro no alto del monte, teníemos que tar raspiando los 40 graos, mui lloñe de la máxima de 24 graos qu'albidraba la meteo, poro l'abandonu de la circular pel camín al llau del riu Curueñu hasta'l Caserío, ye más que xostificáu, anque viendo'l camín dende la carretera, quedamos con munches ganes de percorrelu.
En resume, travesía, con posible anque llarga circular n'otres circunstancies más favoratibles de temperatura, que fízonos conocer dos montes bien guapos del Curueñu, como son el Cuetu Ancino y el Prau Llano, nuna ruta de 11 km con 1090 m positivos acumulaos y 1140 negativos, nun total de 6 hores de ruta que súponos al doble por mor del calorazu que nos comimos. Les milenta birres de chigre en chigre del Curueñu, yeren más que xostificaes nesti día y dicir que bien a gustu tuviemos nel chigre de la playa fluvial de Valdepiélagu y nel de Tolibia d'Abaxo onde cenamos estupéndamente y dormimos nel so aparcaderu.
No hay comentarios:
Publicar un comentario