Viḷḷare (Somiedu) - Cornón

9 d'Abril de 2011

Track: Vil.lare (Somiedu) - Cornón

Primer día d'un impresionante finde en Somiedu, nel que dibemos facer intentu a dos cumales clásicos, el Cornón y el Cogol.lu Cebol.léu, col compangu de dalguna sorpresa más en forma de cota superior a dos mil metros. Pa ello, tendríemos de campamentu base, el pueblu de Vil.lare, nel perguapu val.le del Pigüeña, onde garraríemos una habitación na casa rural de La Corte.

Los implicaos nel finde, fuímos finalmente, Canta, Pangua y yo, que taríemos lluchando los dos díes, y Simón, que facía la so despidida del monte, a la espera del ñacimientu de la so fía, Olaya, pa finales del mes d'Abril, poro, esta ruta tenía que ser potente y dexálu con bon tastu.

Partimos de Vil.lare de Vildas (858 ms)

Como tenemos un viaxe y ruta posterior llargos, partimos de Xixón sobre les 7 la mañana, y garramos autovía "Y" en direición Uviéu y pa siguir dempués en direición Grau pola As-63, hasta la salida de Cangas del Narcea. Equí tomaremos la As-15, travesando parte del conceyu de Salas y entraremos nel conceyu de Miranda, onde empobinarémonos pola As-227 hasta la so capital Balmonte, desayunando nel mesmu hotel, de la ruta a la Manteiga.

Magar del cafetín, siguimos pola As-227, hasta'l pueblu d'Auguasmestas, onde améstense les augües del Pigüeña coles del Somiedu, y onde dexaremos l'anterior carretera pa tomar otra, que nos llevará val.le Pigüeña alantre, pasando polos pueblos de Santul.lanu, Pigüeña, Corés y Vil.lare.

Primeres rampes pegaes a un Pigüeña con muncha augua

Dempués de dexar dalguna mochila na casa rural, preparámonos nel parking del pueblu y entamamos a caleyar con mui bona temperatura sobre les 10 menos cuartu de la mañana. Pocu a pocu diremos avanzando pola pista, que paralela al Pigüeña, y siempre n'ascensu, fuerte en dalgún tramu, empobinarános hasta ún de los llugares, cuanto menos, más especiales d'Asturies, la braña La Pornacal (1196 ms)

Canta na braña La Pornacal con una cabana típica

Anque costónos llegar una horina, al menos un ratín paga la pena tar pasiando ente les cabanes de teitu d'escoba, enantes de siguir caleyando pel ablucante val.le'l Pigüeña. Y ye que si la Pornacal ye preciosa, los siguientes pasos hacia lo que sería'l final d'una ruta clásica de Somiedu, la Braña Viecha, nun se queden atrás de xuru.

Ablucante'l vaḷḷe'l Pigüeña

La semeya d'enriba, dexa a les clares de lo que toi falando, el verdor yera increyible y la cantidá d'augua del desxelu, facía un contraste perguapu de collores. D'esta miente, cuando quisimos danos cuenta, ya pasáramos per delantre del tabayón del Corralón.... y tábemos dando la curva que nos amosaría'l final de vaḷḷe'l Pigüeña.

Picu L.lausecu y Pena Bermecha y la Braña Viecha

Tamos na Braña Viecha dempués de casi dos hores caleyando, y a la fín, acolumbramos lo que sería l'entamu de l'ascensión al Cornón, el col.lau de Zreizales. Con esto, toi queriendo amosar la llonxitú d'esti valle que fainos caleyar per pista n'ascensu un bon trechu y darréu quédanos un averamientu per praos anagaos de les riegues que dan ñacencia al ríu Pigüeña.

Empobinándonos al col.láu Zreizales

Asína que, unos minutinos de descansu agüeyando les cabanes y corros de la braña y escaecéremonos por unes cuantes hores del formigón de la pista, p'adentranos per esti val.le Zreizales. Nel nuesu caleyar, travesaremos delles vegaes la riega los Cuartos, y pasaremos al llau de los corros del Pioyu, enantes de conocer la fonte de la Paredona, qu'antañu formaría l.laguna de xuru y que ye d'au l'augua'l Pigüeña ñaz.

Antigua l.laguna de la Paredona y el Moscosu dende'l Col.lau Zreizales

Paez mentira, pero tendría que restolar pente los datos de toles rutes, a la gueta d'un acesu tan llargu dende l'aniciu la ruta hasta un colláu pa entamar una ascensión, ya qu'hasta esti puntu, llevamos 3 hores de camín y más de 9 kms superando 900 ms de desnivel . Nun yera d'estrañar que tuviéramos dalgo cansaínos, poro'l descansu foi más que xustificáu.

Canta y Simón colas Camposas y Raxos detrás

D'esti colláu, que dixebra les rutes pa esti finde en dos, al oriente'l Cornón y al ocidente'l Cogol.lu Cebol.léu, vamos facer pata, munchísima pata, nel ascensu al nuesu primer dosmil del día, el picu de Xerra Pelada de 2043 ms d'altor.

Cuetu d'Arbás y les cotes de mañana

Sinceramente, nun m'asperaba que se nos ficiese tan duro, ya que paecía una llomba ensín dificultá, pero tien un grau d'inclinación continuu, que fai llevate cola llingua fuera durante los 40 minutos y 300 ms d'altor que separen el colláu del cumal d'esti monte.

Ruta a siguir dende'l Xerra Pelada

Dende equí, les vistes hacia les cotes del día siguiente (Cogol.lu Cebol.léu, Camposas, Raxos) y sobretou, les de les aristes hacia les cotes de güei, diéronmos aliendu y brenga, pa siguir alantre con xeitu, ya que dalgunos de nós, ya tenía na tiesta, l'ascensu al Cornón saltándose dalgún picu más.

Faciendo camín ente'l Xerra Pelada y Cornín

Nun foi así, y dempués de danos un abrazu pola soba que llevábemos y la que nos quedaba, siguimos pasu hacia l'hermanu pequeñu del Cornón, el Cornín, el cual a pesar de su desafiante cara norte, va dános un ascensu cenciellu, anque tamién cansáu hasta los 2062 ms de la so cume.

Canta a puntu d'aportar al Cornín y val.le de Sosas

Son estes caxigalines les que más me presten del monte.... Aportamos al cumal los primeros Pangua y yo, y sentámonos frayaos, nel primer sitiu qu'atopamos cómodu,... ya inda detrás lleguen Simón con una sorrisa y Canta, más cansáu si cabe, pero con bon humor tamién pa dexase fotografiar sufriendo.

Con ciertu cansanciu nel cumal del Cornín (2062 ms) agüeyando'l Cornón

Llevamos más de 4 hores ensín parar más de 10 minutos, y tenemos el nuesu oxetivu cimeru cerca, pero tan lloñe a la mesma vegada que, namái... sentámonos en silenciu, compartimos chocolate, frutos secos, un tragu d'augua, ... y quedámonos un ratín imposible de contar en tiempu, acolumbrando la belleza del parque de Somiedu, ensín entrugase caún si mañana tendrá fuercies pa otra ruta.

En plenu ascensu al Cornón

Casi son les dos de la tarde, y llevantámonos casi sin decir nada, y entamamos la baxada del Cornín, hacia una especie de segunda cume de 2049 ms (nomada Gornín en dalgunos mapes), qu'aparte d'ufrecer una caída perguapa hacia'l vaḷḷe de la riega'l Pioyu, supónenos el nuesu tercer dosmil del día.

Macizu d'Ubina dende Somiedu

D'esti modestu cumal, dende la nuesa posición, non tanto dende'l vaḷḷe, vamos descender unos metros pa de secute, salvar mui poquín a pocu, los más de 170 ms d'altor qu'inda nos separten del ablucante Cornón.

Más cumales somedanos a facer...

Agora sí, 5 hores dempués de salir de Viḷḷare, tamos nel Cornón de 2191 ms d'altor, y anque costónos lo suyo, tamos faciendo la ruta que camentábemos posible (nun hai munches referencies dende Viḷḷare de xubir al Cornón), y amás, paez ser que'l bon tiempu, el bocata que nos vamos xintar y les rises qu'inda podemos echar, va facenos siguir alantre con una baxada alternativa.

Nel vértice del Cornón (2191 ms)

Dempués de media horina descansando y esfrutando de toles vistes, ponémonos en marcha y por primer vegada vamos separtanos na baxada hacia'l contrafuerte que fai la Pena Bermecha col Cornón, ya qu'enantes de dir a por ella, Pangua y yo vamos averános al Picu Asta, demientres Simón y Canta, van dando-y preste selemente a la Bermecha.

Baxando del Cornón pela ñeve hacia las vegas del Cornón

La baxada del Cornón tornóse bien gayolera, pudiendo esquiar un pocu hasta las vegas del Cornón, onde descansaremos viendo como baxen Simón y Canta, y una vegada que vemos qu'entamen a dirixise a la cresta de la Pena Bermecha, dexamos les mochiles nuna roca, ya que'l Picu Asta diba tenenos preparada una sorpresa... trepada al cantu.

Taba siendo una ruta percompleta, pero siempre dalgún picu de los que tengo que tachar y nun ye protagonista cimeru de la función apaez pa poner la guinda al pastel, y esta vegada foi l'Asta. Ya de primeres, ye un picu raru, con tres cumes rocoses dixebraes por cortes, y nel nuesu casu, fuimos a pola más alta y por suerte más averada a nós.

Con curiáu nel trepe y destrepe del picu Asta (2079 ms)

Pa ello, pasamos d'atacala pol oeste a tiranos en baxada pola sur hasta ver una trepada asequible, pola que métome ensín problemes, pero con dalgún pasín qu'otru d'echá-y güevos, y tamién con muncho curiáu na parte superior del trepe, pola roca suelto pal collaciu Pangua, que diba pembaxo mía.

La baxada d'esti cumal de 2079 ms, vamos facela per una llábana en pegue pero mui disfrutona que nos dexará ente la primer y segunda cume del Asta, y qu'abriendo buelga pela ñeve y con munchu esfuerzu, aportaremos de nueu a les mochiles media horina dempués de dexales.

Vamos dexando'l Picu Asta atrás nel averamientu a la Pena Bermecha (2038 ms)

Son casi les 4 la tarde, y tardamos más de lo camentáu, en facer esti picu, poro ponémonos casi a la carrera pa facer tola cresta de la Pena Bermecha, na que vemos a Simón y Canta dende va bona ya, esperando por nós.

El Cornón y los sos predecesores del día

Media horina dempués, aportamos ensín dificultá, sacante del cansanciu, al cumal de 2038 ms de la Pena Bermecha, onde alcontrámonos a Simón y Canta, sentadinos descansando y con cara de tar frayaucos tamién..., Pangua y yo, tábemos ya sin fala.

Un pocu chocolote y dalgo d'augua que nos quedaba, y baxamos sele de la Bermecha, empobinándonos al Altu de Fontarente, que fai colláu ente la propia pena Bermecha y el picu o pena L.lausecu (malnomáu Cansecu, ye nidiu qu'escribieron Chausecu, y en dalgún momentu convirtióse a Cansecu. L.lausecu (llagu secu) de caxón....)

Baxando hacia Fontarente dende la Bermecha

Ye increyible como pasa'l tiempu na montaña, ya que casi otra media hora más, llevónos la baxada hasta l'Altu Fontarente (1830 ms), faciendo un total de 7 hores y cuartu, más lo qu'inda faltaba de baxada hasta Braña Viecha y d'ehí a Vil.lare.... pero más ablucante ye tener fuercias, pa da-y preste a otru picu anque nun tea nos tos dosmiles de Somiedu.

Nel intre, llevábemos 6 dosmiles fusilaos, y paez mentira, pero durante tola baxada de la Bermecha, ya taba barruntando que sinon xubía a la pena L.lausecu, nun diba quedar tranquilu del too. Menos mal que siempre tengo a Pangua, que si me ve con duldes, les sos ganes de monte, llevánme a siguir alantre y a da-y preste a esti preciosu picu de 1948 ms.

Corte peligrosu nel cumal del Picu L.lausecu

Dicir qu'apesar de ser impresionante pola cara norte, dende l'Altu Fontarente, ye facilino, pero por si acasu dalguien nun conoz como ye esti cumal, tengo que cuntar, que munchísimu curiáu con él, en casu de xubilu con ñeve abondo o con ñebla, ya que'l cumal cimeru ta dividíu, per una rasqueta perfonda, que viniendo dende'l colláu cuando paez que tamos ya a unos metros de la cume, fainos arrodiala dafechu hasta l'aniciu d'esta.

Lo dicho, sollertes a esta trampa del L.lausecu que pa matáse la cuenta, y a ver quien t'alcuentra dempués, jeje. Polo demás, en media hora, como non, tábemos otra vegada nel colláu Fontarente, onde entamamos la baxada direutísima hacia la Braña Viecha, onde taben echando media siesta casi, Canta y Simón.

Baxando del Altu Fontarente pela canal

Cuando falo de baxada direutísima, ye que vamos facer en 30 minutinos más, un descensu por senderu marcáu de más de 400 ms de desnivel per una amplia canal, lo cual dióme a pensar, lo guapo, pindiu y duro, d'un ascensu direutu dende Braña Viecha al Altu Fontarente, pa facer el L.lausecu o la Bermecha.... afayaivos al retu.

Tornando a Vil.lar frayaos

Pocu más que dicir, sentámonos un ratín colos collacios a descansar, y entamamos una penosa y silenciosa baxada pel formigón de la pista, qu'aportónos de vuelta a Vil.lare, dempués de 9 hores y 38 minutos de ruta, na que percorrimos casi 28 kms y salvamos un desnivel acumuláu de 2090 ms... ehí queda eso.

Una vegada en Vil.lare, solo quedónos despedinos de Simón, que tornaba a Xixón con Paula y Olaya y que despedíase por un tiempu del monte, y meténos cerveza pola vena y una prestosísima cena na Pornacal a bas de filete de xatu somedán con patates frites y güevos, que remanecerá na mio tiesta durante munchu tiempu.

De la mesma forma, nun se m'escaecerá les charres colos paisanos ganaderos del pueblu y el so bon facer pa con xente foriata como nós, pero con ganes de deprender de cada requexu d'esti paraísu que ye Somiedu.

Pero esta ye otra hestoria....

Simón, Camudando'l so Camín dende Somiedu

Nesta ruta dimos preste a 6 dosmiles de Somiedu: Picu de Xerra Pelada (2043 ms), El Cornín (2062 ms), Gornín (2049 ms), Picu Asta (2079 ms), Pena Bermecha (2038 ms) y Cornón (2191 ms): vértice xeodésicu de Somiedu y picu prestosu d'Asturies

Ver progresos en: Retos montañeros