Les Casuques (Siero) - Cerru Gaviu

26 de Marzu de 2011

Track: Les Casuques (Siero) - Cerru Gaviu

Dempués d'una selmana mirando pal tiempu, pa ver si podíemos colar pal ocidente d'Asturies y facer dalgo de monte pol conceyu del pueblu de mio ma, Cuaña, tuviemos que danos por vencíos, y enantes de que llegase'l mal tiempu, preparé una rutina de monte pol conceyu de Siero.

Entamu de la sienda en Les Casuques (404 ms)

Así que, fui buscar a Paula a Llugones, y garramos l'autovía hacia la capital de Siero, La Pola Siero, onde tomamos un cafetín pa espabilar y darréu metémonos pola As-248 que va pa Xixón, pasando pelos pueblos de La Cabaña y Muncó ondes de torcer a la mandrecha nel crucie hacia Bordiales. D'equí avanzaremos pela carretera pasando per La Teyera y nel siguiente crucie, al llau d'una marquesina del bus, podremos dexar el coche ya que'l pueblín de les Casuques ta pocu más alantre.

Cartelu de la sienda y un vistazu pal murniu día

Preparámonos y un pelín enantes de les 10, col cielu dalgo prietu ya, entamamos a caleyar travesando Les Casuques y garrando un camín bien marcáu con cartelu de ruta. Esti, llevarános nun sele ascensu pa lo postreru baxar, demientres dexamos a la mandrecha'l Picu Castiellu, hacia l'Arroyu la Collatrás.

Primer parte de la ruta col Cerru Gaviu siempre presente

De la Collatrás, va tocános tragar un bon tramu d'asfaltu siempre en xubida, pasando poles cases d'El Cantu, pa llueu garrar un camín rectu, con bones vistes hacia'l Valdornón xixonés, que n'ascensu dexarános al llau d'una especie de depósitu, onde pocu más alantre tomaremos un crucie a la manzorga, pasando a caleyar per una sienda más pindia.

Un par de momentos del senderu

Llevamos cuarenta minutinos de calecer pates, y paez qu'agora entama lo durino de la ruta, y tócame pasalu bien, porque veo a Paula poníendose coloradina col esfuerzu, anque como ye orgullosa nin gurguta, hasta que-y entrugo si paramos a echar un tragu y dizme que sí, jaja.

Un descansín, y metémenos pocu más alantre a unos 600 ms d'altor, nuna senduca señalada por un cartelu nel suelu, que paez que llévanos pel mediu la viesca hacia'l puntu más altu de la nuesa ruta, el Cerru Gaviu. Dicir que los mapes y rutes normales siguen de frente arrodiando'l cerru, pa xubilo pel colláu ente'l Fariu y el Gaviu.

Cerru Gaviu (716 ms) y Picu Fariu bien cerquino

Aún así, esti senderucu pela viesca, a pesar de tar señaláu con tan mala traza, como si fuera una trampa d'un atracador, llévanos fresquinos pente los árboles, hasta tener a vista les cabañes de piedra qu'hai no altu del Cerru Gaviu (716 ms).

El Sueve al fondu

Cumeee!!! Ya tamos nel finxu cimeru de la ruta, y pa cellebralu, sentámonos nel área recreativa aprovechando que'l tiempu nun amenazaba lluvia inda. Nuna horina y diez minutos tamos nel Cerru Gaviu, y podemos ver tola llanura de Siero al Sur, y al oriente destaca'l Sueve enriba del conceyu de Sariegu, el cual tamos pisando a la mesma vegada que Siero.

Como llevamos pocu más d'un hora, envede baxar pol mesmu itinerariu, vamos facer un pocu vuelta, col xacíu de facer una cota cercana del conceyu costeru de Villaviciosa. Pa ello, baxamos del Cerru Gaviu y empobinámonos pola pista que tira pal Fariu, pa desviános a la manzorga cuando vemos bien cerquino tol antenaxe que tien enriba.

Braña Ortigosa (cota de Villaviciosa) y el Llanu (cota de Sariegu)

Esta otra pista, fadrános pasar pol Llanu Fumaréa, onde meteréme nuna portiella a la manzorga, a la gueta d'esa cota que nun ye más que'l final d'un prau nuna viesca infumable. Paez ser qu'ente una montonera d'ocalitos, pasa la llende de Sariegu y Villaviciosa y ehí ta esi puntín d'altor que fai de cuarta cota de Villaviciosa.

Ensín más, marco la cota (Braña d'Ortigosa) a los 610 ms col gps, y torno so los mios pasos, pa baxar con Paula, al colláu Fumaréa, onde tomaremos durante bon ratu la As-331, que nos dexará nel pueblu sareganu de la Rimá con dos hores y media caleyaes.

Tornando a les Casuques con Sariegu embaxu y Peña Careses enriba

Travesaremos les sos cais, y colaremos de la carretera As-331 pa garrar otru camín asfaltáu, que nos llevará paralelos a la Peña Careses, la cual pensé que diba prestame xubir, pero ente que taba orbayando un puquiñín y que nun tenía muncho interés montañeru, preferimos dirnos de vuelta al coche y tomar una botellina sidre en Llugones.

Así que, siguiremos el camín hasta dar de nuevu na Collatrás, onde repetiremos senderu hasta Les Casuques, pa terminar los 12 kms de ruta y poco más 500 ms de desnivel acumuláu en 3 hores y cuartu clavaes.

Como anéudota, dicir que mercáremos fai pocu, un par de palos nuevos pa caleyar, y ún d'ellos al probalu, nun fuimos capaces a apretalu, por munches vueltes que-y diésemos. Solución, voi cagame na madre que los parió a estos delForum, un día pola selmana, col recibu y tal, y ponse la de recepción a da-y vueltes nel otru sentíu y cierra perfeutamente... Na, cara d'imbécil y pa casa y a deprender a tocar, jaja.

En fin, enxamás subestiméis lo mazcayu del ser humanu y menos si pues selo un mesmu, jajaja.

Camudando'l Camín con Valdornón detrás

Nesta ruta dimos preste a les segundes cotes de Siero y Sarigu: Cerru Gaviu (716 ms) y la cuarta cota de Villaviciosa: Braña Ortigosa (610 ms)

Ver progresos en: Retos montañeros