Cecea (Nava) - Casielles - Picu Múa - Piloños - La Maza - Picu Mayor

9 de Xunu de 2024

Track: Cecea (Nava) - Casielles - Picu Múa - Piloños - La Maza - Picu Mayor

Siempre decimos la másima qu'hai que salir al monte siempre, pero hai díes nos que la venta ye mínima o la seguridá de pasar un día murniu enforma, nun mos lo quita nin los más positivos montañeros. Pa esos díes, siempre hai que tener dalgún monte a conocer, dalgo nos llistaos a tachar y esta vegada, anque nun día más guapu, la ruta sedría encomendable, fuímonos hasta Nava, onde tenía pendiente conocer el cordalín de Ques.

Asina xuntámonos a almorzar cuatru valientes, con un día que les previsiones nun fueron a fallar, murniu a retorcer, orpinando y col borrín y la humedá metíes hasta lo fonderu'l valle. Aún así, cafetín, pinchucu y tiramos dende Nava a Cecea, onde dexamos los coches nel apeaderu'l tren y preparámonos pa caleyar y cuando digo caleyar, ye porque l'entamu la ruta diba ser de caleyar pero bien.

 

Partimos de les cercaníes de Cecea (205 m), nunca meyor dicho

Cruciaremos pel apeaderu de Cecea hasta la puente col rigu Piloña y xubiremos per carretera hasta La Veguca, onde vamos salir per pista de tierra al llau de la riega Fuensanta hasta La Cueva, pa dir pasando de barriu en barriu, averándonos hasta Cerecees, siguiendo siempre los cartelos que tienen que dir llevándonos hacia Casielles, alcontrándonos con dalgún avisu de zona ganadera con mastinos.

 

Ascendemos mayormente per pista hacia Casielles llueu travesar varios barrios de la Cueva

Dicir que vamos travesando barrios, xuniéndolos per pista de tierra unes vegaes y otres formigonaes o asfaltaes, hasta'l tramu final hacia Casielles, onde ya garraremos pista de formigón y pindia, na que Benjamín, nun acaba d'alcontrar el so ritmu y baxo un orbayu costante, al pie de les cabañes de Casielles, pa nun afondar nel so malestar, decide tornar so los sos pies y abandonar la ruta, que pretendía ser una bona xabazada en kilómetros.

 

Salimos de Casielles hacia la parte alta de la faldera de la xerra de Ques

Despedímonos tranquilamente y siguimos pista arriba, alcontrándonos con una ganadera pelín repunante pa colos perros ayenos al monte, cuando siempre llevamos a Ares al llau nuesu controláu. En fin, ente'l descontrol de foriatos pa col monte y los sos perros de ciudá y xente que llevamos pel monte con perros, pues bono, hai diferencia, pero entiéndese'l malestar que puen tener cola masificación que ta sofriéndose pel monte astur y lo que quédanos por aguantar sobretou nel branu.

 

Salimos a la parte alta de la xerra de Ques p'averanos pente'l borrín al picu La Mua

Llueu d'un pocu de tira y afloxa, salimos dende les caberes cabañes de Casielles per una pista de recién creación hasta Brañabernés, onde entamaremos la xubida a pinchu per una llomba, hasta salir al colláu Brañabernés, onde atopamos marques del percorríu hacia'l picu La Múa, siguiendo los evidentes senderos, col borrín yendo y viniendo, anque a la fín, l'orpín dexara de moyanos y podíemos dir en camiseta col envís de secar un pocu.

 

Ascendemos hacia'l picu La Múa dende Brañabernés

La parte alta hacia'l picu la Múa, dexonos dalgún pasu guapu al llau de la Llaguna la Múa, p'atacar al picu pela so faza norte, que nun día más curiosu daríanos vistes bien guapes de toles foces del Pendón, pero güei, malpenes abrió la xusto pa poder orientanos y ver el rigu a lo baxo, ensin ser a atopar siquiera la situación de la Varallonga.

 

Cumal del Picu La Múa (987 m) pente la borrina

Con pocu que ver, nun perdemos más tiempu, que sacar la semeya pente'l borrín y entamaremos el descensu pela arista Este hacia'l colláu d'Incosa, onde vienen a saludanos delles mastinos mozos, bordiando tola cabrada pa nun molestar y parándonos a echar una güeyada pa ver per onde tenemos que descender hacia'l camín que vien dende Les Cuerries.

 

Facemos un descensu pela vallina la Encima siempre con tendencia hacia la mandrecha

Garraremos senderín, a la vera d'una riega y siempre dexándola a la nuesa esquierda, diremos alcontrando traces de pisáu, siempre con cierta tendencia a la drecha, alloñándonos de la riega, ya que nel so tramu final, veremos como embarranca y tórnase más gafu, poro, tuvimos qu'empatar col camín de los Piloños, bastante a la mandrecha de la riega la Encima.

 

Garramos el camín de los Piloños que va llevanos con calma faldiando tola xerra de Ques

Colos pies en suelu firme na pista, entamaremos una llarga travesía, pel camín de los Piloños, que va facenos faldiar tola xerra de Ques, en primer llugar, baxo la cresta de Trapa hasta'l colláu Los Piloños, onde meterémonos nes pistes de desmonte madereru, qu'afeen el caminar hacia'l colláu de Maza, onde tendremos mui a la vista tamién, el nuesu siguiente oxetivu: el Picu Mayor o Maza.

 

Ascendemos a pinchu hacia'l Picu Mayor dende'l colláu Maza

Tenémoslu a la vista dende cuantayá y vemos eses pistes que lu traviesen, pero bono, yera finxu importante del día a tachar, asina que tiramos de Maza, pelos senderos más direutos na faza Sur, faciendo un ascensu a pinchu, bastante guapu, hasta los 775 m del Picu Mayor, que lloñe de ser guapu nesti momentu d'estrozu madereru, si tuviésemos un día más gayoleru diba aportanos vistes a tol oriente astur.

 

Cume nel Picu Mayor o Maza (770 m)

Col día más relaxáu y ensin aguantar ya al roncón de Charly que decía que nun-y gustaba esti monte, pudimos picar el pinchu aselaos, teniendo una vista mui agradecida, como ye ver Cecea xustu embaxu nuesa, asina que preparámonos a caleyar y baxomos hacia'l norte per un cortafueos, garrando dempués una cómoda pista que llueu d'una envuelta va llevanos penriba la riega los Cuervos hacia La Vega.

 

Tendremos un rápidu descensu per pista hasta Cecea

Cola comodidá de la pista de tierra, vamos baxar apriesa, faciendo los caberos casi 5 kilómetros en pocu más d'una hora, pasando en primer llugar pela Casa'l Monte, onde ya pasamos a pisar asfaltu, travesando dellos barrios de la Vega, hasta empobinanos finalmente hacia l'apeaderu de Cecea onde esperábanos los coches con muda llimpia y seca, pa terminar esta ruta pasada por agua na so mayor parte.

En resume, día de los pocu agradecíos, con moyadura inicial terminando más agradable, completando una circular de 19,5 km pel cordal de Ques, sumando un desnivel acumuláu de +/-1100 m nun total de 6 hores y 20 min, ensin ver na, pero esfrutando de patiar pel monte y echar un rises col grupu.