Páxines

martes, 27 de febrero de 2024

Manzanea (Uviéu)

20 de Marzu de 2024 

Esti últimu mes, siguimos con varies visites a la Aguya'l Moru, yendo'l primer día con Pepa, a facer unos guapos metrinos, faciendo la variante d'Amagüestu (6a) que saldría V+, quiciás un pelin más cenciella que la llínea cimera y ya pasámonos a les nueves víes abiertes por Javo, que fizo una llimpieza de bardial en paré increyible y sacó 4 llínees bien guapes con metrinos.

Esta vegada, andaba un pocu alloriáu l'abeyeru d'enriba la cueva, asina que tirámonos a les primeres víes nueves de la manzorga, pudiendo facer dos más bloqueres, que saldrán sobre'l 6a+ y la siguiente facilina pero mui guapa que sedrá V, pelín más cenciella que la so compañera de la mandrecha que sedría como V+.

Llueu d'un día infame que pillónos la lluvia con malpenes un pegue nel que ficiera la salida pela mandrecha la cueva hasta riba, baxo una lluvia intensa, pude volver al día siguiente y calecer de nuevu na variante Amagüestu y ya, Anna y yo punximonos manos a la obra a prebar les víes más dures a priori del seutor.

 
Resume de víes de l'Aguya'l Moru a mi entender

Entamamos con Yoyin, encadenándola los dos al primer pegue, pero teniendo qu'apretar bien, con una llarga secuencia intensa sobre presa pequeña y pies un pelín malos, que paeciónos un 6c nel sitiu. Llueu, siguimos ya cola Curva del Moro, vía ya más curtia que tien quiciás el bloque, como movimientu particular, más duro que Yoyin, pero menos intensa, paeciéndonos tamién 6c como la so compañera.

Pa terminar, metímonos col únicu sétimu del seutor, Venus de Milo, que tien un bloque mui marcáu con un pasu bastante raro, que costó-y a Anna descifrar nel primer pegue. Tocóme'l turnu a min y pudo salime bastante natural el bloque, continuando con unos pasinos guapos hacia cadena, teniendo llueu Anna tiempu a dar un segundu pegue pa llevásela tamién.

Con esto, finalizamos la nuesa andanza cola Aguya'l Moru, encadenando toles víes a vista, asína que vos dexo la mió opinión solos graos y vuelvo a dar les gracies a Javo pola reequipación y ampliación d'esti seutor, pudiendo dicir como crítica positiva, que quiciábes meter una primer chapa más en varies víes, sedría dalgo a tener en cuenta por seguridá, ya que veo que tan mui altes en munchos casos.

Manzanea (Seutores visitaos)
 
Croquis modificaos por mi de la escuela d'escalada de La Manzanea, por mor de Piratas Free y El Maquis. Gracies y col so permisu.
----------------------------------------------------------------

20 de Febreru de 2024

Más de tres años ensin pasar pola Manzanea, o al menos, ensin trepar curiosu nel roco particular uvieín, yendo ensin xeitu, acompañando a dalguien pa facer delles víes pa retomar esti deporte o tocando dalguna vía pero con poques ganes de centrame a proyeutar nel estilu, por exemplu, d'Arnea, ya que tocaría dir mui en serio nos meses ivierniegos pa llevame dalguna de les víes que queden por encadenar.

D'esti xeitu relaxáu, ficiera delles visites pa terminar d'encadenar les víes restantes qu'abriérense na Cantera, tanto les cencielles de la mandrecha pente'l IV y 6a y les de la manzorga siendo toes sestos baxos, compartiendo una cualidá, como ye'l trabayu y la calidá de les víes, asina que mil gracies a Javo pol grandísimu trabayu, dándo-y otra vida a esta escuela y faciendo hasta camín direutu al Central y Casa Ovidio.

Prebando una nueva vía onde la cuevina, quiciás V+ saldrá
 
Asina que nesti iviernu primaveral que tábemos teniendo averéme ya una tarde dempués de trabayar hasta la Manza, aprovechando que crecieron los díes, col envís de mirar que tal taba'l seutor de la Aguya'l Moru, ya qu'oyera que terminaren col reequipamientu ya inclusu abriera Javo víes nueves a la mandrecha onde la cuevina.

 
Faciendo un guapísimu y llargu 6a (Amagüestu) quiciás la clásica del seutor

Ficiera va tiempu una visitina llueu de completar Casa Ovidio y taba en procesu d'equipar, pero ya teníemos tanto penriba como pembaxo camín abiertu. Esta vegada fuimos dende la parte alta, dexando'l coche nel aparcaderu d'Arnea y baxamos pel camín con cuerdes afitaes hasta'l seutor, entamando coles víes de la manzorga antigües.

 
Croquis antiguos de Piratas Free

Nesta primer visita, entamamos por Amagüestu, la vía más llarga del seutor, V+ nos croquis antiguos, que vien merez un 6a, pero sacante d'esto, dicir que ye guapísima. Llueu, ficimos les dos de la manzorga d'ella (6a+ ambes pa min), que tienen la primer chapa altísima, lo que veo peligrosu si nun ties caña o nun faes como nós, que dexamos ya la primera chapada.

 
Kíla na parte nueva pente la Cantera y el Central
 
Y pa terminar, que se nos diba la lluz, tiramos a la mandrecha a facer un V+ xustu onde la cueva, saliendo pelín desplomadina pa siguir per canalizos y un festival de cazos increyible, faciendo unos metrinos mui guapos.

Lo dicho, viendo como taba de petada la Manza, nos seutores principales, qu'haya estes pequeñes ayalgues pa trepar más tranquilos, como pueden el Espolón, Casa Ovidio o l'Aguya'l Moru, ye mui d'agradecer, asína que tocarán más visites pa facer les víes que me queden nel tinteru.

Manzanea (Seutores visitaos)
 
Croquis modificaos por mi de la escuela d'escalada de La Manzanea, por mor de Piratas Free y El Maquis. Gracies y col so permisu.
----------------------------------------------------------------

7, 14 de Febreru de 2021

Siguimos rematando y lluchando coles víes que quédenmos per Arnea y tamién pasando dalguna tarde faciendo víes facilines na Cantera, más que nada, conociendo les víes nueves que nun tastara na mandrecha'l seutor.

Asina que dempués d'un día de lluvia, contando con qu'escamplaba pa la tarde, aportamos a Manzanea y tovía tuvimos qu'esperar, Lau y yo, tomando un cafetín a que parara d'orbayar, decidiendo dir a facer metros nes víes nueves de la cantera.

Finamos el plan d'aniciu nesta temporada n'Arnea con Asiesta'l Sol

Nun quiero ser pesáu, pero tengo que dicir que sorprendiéronme pa bien les víes nueves y siendo cuartos y quintos, nun son pa na víes nin fees nin curties, ye dicir, un ayalga pa la xente que quier facer metros o ta entamando a esguilar.

Semeyes en detalle de les apretaes de Iso en Manzaneda Rock

Polo demás, el gruesu de la esguilada nesta escuela carbayona ta siendo nesi seutor de la Peña L'Arnea, onde vamos finando tol plan d'entamu de temporada. Quedándome namái qu'otra variante de Cante Jondo, tamién de 7b, nomada Asiesta'l Sol, metímonos a probala Iso y yo, un miércoles fanáticu per selmana.
 
Dani dándo-y duru a la Higuera pa completar una tarde d'encadenes

El problema d'esta vía, aparte de tener que volver a encadenar la parte baxa de 7a+, ya de por sí, fue un bloque llargu, mui morfolóxicu, que tiróme hasta en tres ocasiones, raspiando colos deos la regleta salvadora, pero cayéndome, cola mala hostia y rabia davezu.

Ambiente xeláu en Arnea

A la fín, alcontré una mini presa llateral, que facíame poder averame y rebotar a la presa, demientres carraqueaba col pie zorgu. Una vegada qu'algame a garrala ya pude salir ensin problemes hasta la cadena, quitándome un pesu d'enriba, al encadenar toles variantes de Cante Jondo y nun tener que repetir más esa parte baxa tan fina y téunica.

Agora los oxetivos son un pelín mayores y dalgunos imposibles, quedándome namái que tres víes en tol seutor con graos de 7b+, 7c+ y 8b, qu'intentaremos la temporada que vien, quiciás probando Crisis de Conciencia (7b+) nel mes que queda hasta'l cierre por añeramientu.
 
---------------------------------------------------------------- 

17 y 29 d'Avientu de 2021

Continúamos en temporada n'Arnea, con visites casi programaes tolos vienres tarde y dalgún qu'otru día sueltu, poro los pegues fanáticos con poques hores de lluz, son el tonu davezu de cada día. Nesta xera, tengo que dicir que la infinita motivación d'Iso, fae que nun perdiéramos nin media oportunidá d'esguilar en cualesquier requexu que tuviésemos.

Nel "mega proyeutu" ensin nome

Tamién en menor medía, al salir más tarde de currar, averóse per ellí Anna o Suco, caún metíendose nos sos proyeutos, principalmente, Suco probando cosines pendientes y los matos onde andaba yo y Anna, decidiéndose con pegues de preba con Cante Jondo o Juego Audaz como'l so primer 7b.
 
Lo d'Iso ye tema aparte, porque tener tiempu pa trepar nel día a día, fae que tea nun picu de forma descomunal reventando en mui pocos pegues tolo que ye a probar, poro casi fue llimpiando nes dixebraes visites clásiques como La Escondida, Setastrón, Mundo Maravilloso, Juego Audaz y Cante Jondo, col que compartí dellos pegues.

Anna a la preba de Juego Audaz (7b)
 
Pela mió parte, siguí colos miós proyeutos personales, como yeren Cante Jondo y la Sin Nome d'Arnea, queriendo desvicunlame un pocu d'esta última, pero nun par de díes que Cante Jondo taba moyada, tuve que centrame nella y a la fín, llueu de milenta pegues pude facerme con esta infame vía, bloquera y regletera, que pol númberu de pegues y mi estáu de forma, nun me corto en dicir que paezme 7b+.

Secuencia durérrima de la Sin Nome d'Arnea
 
Col 2021 finando, tuve la suerte de poder encadenar tamién Cante Jondo, quiciás otra de les llínees imprescindibles d'Arnea, quedándome mui cerquina de piesllar la temporada de forma reonda, ya que con mes y mediu per delantre, la idega ye intentar facer Asiesta'l Sol (variante de Cante Jondo) y centrame en Crisis de Conciencia (7b+).
 
 --------------------------------------------------------------------------- 

Setiembre, Ochobre de 2021

Como tolos años, anque esti fuimos más perezosos, apaecemos pela Manzanea a intentar esguilar peles tardes, al contar con un accesu munchu más rápidu qu'a otros seutores. Como siempre, les visítes suelen ser a Arnea, anque tengo que dicir que debería tornar al Espolón a terminar les poques víes que me queden per ellí.

La novedá esti añu, fue conocer les nueves víes qu'equipara Javo na Cantera, poro un día que tábemos dalgo cansaos d'apretar duro fuimos hasta ellí pa dar unos peguinos tranquilos ya que'l día amenazaba lluvia.

Faciendo una de les víes de la manzorga de la Cantera
 
La verdá ye qu'hai que da-y les gracies pol trabayu una vegada más a Javo, ya que non sólo reequipó Casa Ovidio, esfrutando munchísimu de les víes en branu, sinon qu'equipó nueves víes a la manzorga y a la mandrecha del seutor La Cantera y tengo que dicir que les 4 qu'esguilamos en Setiembre, yeren bien guapes, llarguines y con una roca escelente independientemente del grau.

Como non, tamién cayeron unes cuantes visites a Arnea, onde Anna siguiendo llimpiando víes pendientes como Mundo Maravilloso o la Escondida, siguiendo'l so camín hacia'l 7b, probando tanto Juego Audaz como Cante Jondo, sólo falta centrar proyeutu y da-y duro hasta'l cierre por añeramientu.

Anna enchufando Mundo Maravilloso (7a)

Por mi parte, intenté abandonar el pequeñu water de 7b que me queda por facer, centrándome en Cante Jondo, del que ya fice la variante (7a+) y probé con cierta facilidá la parte d'arriba, asi que tocará centrase n'encadenalu tanto la orixinal como su otra variante Asiesta'l Sol de 7b tamién.

Lo que nun quita pa que siga dándo-y unos peguinos de xemes en cuando al 7b sin nome... el mega proyeutu regleteru jaja.

-------------------------------------------------------------------------------------------

12 Marzu de 2021

Dempués d'un par de vienres infructuosos d'escalada pela tarde, a la fín, pueu tornar per Manzanea acompañáu d'Andrea pa terminar de rematar el seutorín de Casa Ovidio. L'anterior visita, ventiláremos les 3 primeres víes de la manzorga y esta tarde, pudiera encadenar a vista'l restu, sumando un total de 7 víes.

Si ya dixera que les víes pareciáranme disfrutones, les dos primeres que probara fueren una pasada, curties como toes pero con pasinos de chorrera y de bon cantu. Mui guapes, les víes 4 y 5 si entamamos a contar pela manzorga, saliendo ambes como 6b y 6b+.

Ventilando'l seutorín de Casa Ovidio

La sesta vía del seutor Despegue Mortal, según croquis vieyos, paecióme más dura y tuve que lluchala enforma pa encadenala a vista, dándome sensación de rondar el 6c+ por mor, de la fisura roma y la salida del techu ensin ver mui bien onde sacar les manes.

Pa rematar, a la madrecha queda otra vía disfrutona que rondara'l 6b, asi que si miramos los croquis vieyos y los graos propuestos, nun tengo mui claro, cual ye la vía qu'amestáron-y más tarde al seutor, así que más menos los graos van asina, d'esquierda a drecha: 6c+/7a, 6b/+, 6a+,6b, 6b+,6c/+,6b

-------------------------------------------------------------------------------------------

19 de Febreru de 2021

Vienres tarde, con Arnea cerrada, nun sabemos mui bien pa onde tirar. El finde del puente d'Antroxu, xubiera per última vegada a Arnea, dando los dos meyores pegues n'otru d'esos wateres de vía, que tanto me gusten, 4 chapes de 7b de pasos y regletes infames.

Nun me la pude llevar, así que quedará pa la prósima temporada y nun sabíemos mui bien que facer, asina que tiramos hasta Casa Ovidio, un seutor de Manzanea escaecíu, hasta que Javo, llocal de la Manza, púnxose a desbrozar y reequipar esti seutorín.

Calculando los metros de vía a güeyu... diez a lo más jaja

Hasta ellí, fuimos Anna y yo, col envís de pasar la tarde, aportando hasta'l pie de vía, onde'l currazo de llimpieza ye más qu'evidente. El seutorín tien 7 víes (nel croquis antiguu sólo salen 6) y más menos tendrán un altor de 10 metrinos.

Nós, ficimos les 3 de la manzorga, entamando pola segunda, que pudiera salir 6b o 6b+ y la siguiente que comparte reunión, saliendo dalgo más cenciella, quiciás 6a+. Por últimu, dímos-y pegues a Conan (7a nos croquis, nun sé si llegará a tanto) que salióme al segundu pegue, desfaciendo yemes nel primeru ya que la roca ye dafechu abrasiva y cortante 

-------------------------------------------------------------------------------------------

20 de Payares de 2020

Como tolos años, unos cuantos vienres de tarde al salir de trabayar, tiramos corriendo pa Arnea, pa intentar al menos dar unos peguinos a cualesquier proyeutín que tengamos na tiesta. Esti añu, tuve dándo-y a un 7a+ curtiu, d'esos nos que nun se mete nunca naide ya que son de pasu, ñapa que desfae les yemes y mui pocu agradecíu.

Anna probando Mundo Maravilloso

Pero como montábase bien, demientres el restu collacios probaba dalguna otra vía, yo montaba esta vía y dába-y tres peguinos al día hasta que cayó. El día en cuestión, cuanto ties los pies y les manes superclares, paez que se fai hasta cenciello, pero los que la probaron alloriaron coles regletes qu'había que tocar

Enchufando Picos Pardos (7a+) cortu y de regletéu ínfimu

Nesi día, Anna nun pudo metese en Mundo Maravilloso al tar ocupada y acabó encadenando "contra too pronósticu" Galaxia 45, nun de los pegues más malos que ví en tiempu. Ye broma, fue un pegue tensu pero con final feliz, como se suel dicir nun puso un pié na vía, pero la fizo, jajaja. 
 
-----------------------------------------------

10, 18 Xineru y 7 de Febreru de 2020

Tres díes nel entamu l'añu, anduvimos per Manzanea col envís un pocu d'intentar zarrar dalgún miniproyeutu n'Arnea y tamién pel Espolón dando preste a víes que nos faltaben per encadenar y sobretou porque píllanos estupéndamente pa una mañana o tarde polo averao al coche.

Ún par de díes, tuviéramos nel Espolón, Suco y yo, dándonos tiempu a encadenar un 7a a la mandrecha'l seutor, coincidiendo no fino de la vía, con presa pequeña y dalgún distanciáu picantón, anque quiciás innecesariu pola morfoloxía de la roca, pero calteniendo la equipación anicial yera lo que tocaba.

Siguimos trabayando y encadenando víes nel Espolón

Otru día de mañana, enantes de que viniese un temporal, tuviemos la suerte de probar y encadenar pela mió parte, un 6c+ (Oxígeno IV) brutal, casi tan duro como'l 7a, pero menos a bloque, asína como un 6b+ (Variante asfixiante) a la so manzorga, tamién bien guapu, quedando d'alcuerdo que'l 6c d'enmediu quizás ta metíu a calzador (La placa de la Araña) y comparte pasos d'ambes teniendo pocu xacíu, pero ehí ta pa quien la quiera facer.

Con esto, dexo'l seutor del Espolón finiquitáu a falta de la nueva Lau Guapa y Aupa Eneko, vía de dos llargos que fáltame por probar, dexando aparte la reequipación del restu de sétimos que queden nel seutor, de la que contamos formar parte nun futuru.

Tamién les visites cayeron al seutor d'Arnea enantes de cierre temporalmente

Tamién, tuviemos varios díes esguilando per Arnea, centrándonos n'encadenar Imagíname, un 7a+ bloqueru de preses pequeñes, que fue resistiéndose, teniendo que moveme muncho de piés pa poder algamar les siguiente preses, costándome más que pa una persona con mayor envergadura.

Al final salió con un pegue al límite y tamién enantes del cierre de la escuela por añeramientu, pude probar dos víes del mesmu estilu, a la so manzorga, como son Picos Pardos (7a+) y una sin nombre (7a+/b), pero tendrán que quedar pa dempués del branu, asina como Cante Jondo, cola que tendremos que ponenos en serio.

Gandalf el blancu, digo Kíla viviendo fatal

-------------------------------------------------------------------------------------------


Branu 2019

Si nel iviernu, pasamos munchísimu tiempu nel seutor d'Arnea como comentáremos na anterior anovada de la entrada, en branu, enfotáramonos en dir a echar un güeyu al seutor Espolón, col envís, quiciás de llimpialu otra vegada, como va dos años y de reequipalu.

Pero por grata sorpresa, hubo xente qu'adelantóse y faciendo un trabayu increyible, llimpiaron y desbrozaron tola mandrecha de les víes que ya taben reequipaes años atrás. Pero nun sólo fue llimpiar y reequipar, sinon qu'añadieron al seutor 4 víes nueves, dos d'elles, con segundu llargu.

La verdá ye que tuviemos en contautu colos equipadores, pudiendo falar con ellos del trabayu enorme que ficieren. Nós, esguilamos un par de díes nes víes de la manzorga, de les cuales quedábame un 6c+ por encadenar, que costóme más pegues de lo pensáu, rompiéndome dalgún cantín y saliendo volando como resultáu.

 Paré llimpiáu y reequipáu del Espolón

Durante'l branu fuí con della xente per ellí, ya incluso recomendé'l seutor a varios, ya que pal branu, la solombra entra prontín de tarde y se suel tar cómodu. Güeyu, coles víes de la manzorga col pié de vía, que ye recomendable poner un cabu d'anclaxe a la cuerda que dexamos p'asegurar a mou de llínea de vida.

Pero lo demás ta estupendo y lo únicu que debemos tener cuidáu, aparte de coles víes nueves, que necesiten un pocu d'usu pa qu'acaben de romper dalgunos pies finos ye colos mosquitos a última hora de la tarde, ya que tan rabiosos jeje.

Polo demás, quédenme delles víes de les nueves por encadenar, ya que finalmente nun fuí tanto nel branu como quería y sí que pude facer les tres primeres reequipaes (Vida deportiva al Luqui Volador) quedando un montón de víes a la mandrecha que nun sé si tarán reequipaes o non, pero de xuru que n'otra temporada quedarán llistes pa da-y más vida a esti seutorín de roca increyíblemente nueva y pinchuda.

-------------------------------------------------------------------------------------------

Iviernu 2018-2019


Siempre hai temporaes nos qu'enfotámonos nuna escuela, nun seutor ya incluso nuna vía en cuestión. Defechu, los iviernos solíen dir acompangaos por munchos díes d'escalada na escuela de la Manzanea, hasta que pali pali, fuí faciéndome con toles víes de los seutores más visitaos.

Sacante del seutor del Espolón, al qu'espero volver pa intentar da-y más vida, repetir les víes reequipaes, facer un croquis actualizáu y llimpiar tolo posible les víes esistentes, tocaba metese nel paré duru de la escuela, que nun ye otru qu'Arnea.


Faciendo'l pasu de Manzaneda Rock a mi manera

N'Arnea, tenía mui poques víes encadenaes y probaes, asína que fuimos entamando pelo más cenciello, faciendo toles variantes posibles de LM y la Bella, repitiendo tamién Corto Maltés y el Regodón y alcuérdome que metíme como primer nueva vía, nel Agujero del Deseo, teniendo un mal vuelu saliendo a cadena y faciéndola al siguiente día que pasé per ellí pa quitar el mal tastu.

Esi mesmu día, sacara tamién Respeta la vida de la Higuera, que probara'l día anterior tamién col Agujero del Deseo, faciendo una xornada completísima, nos pocos minutos de lluz que teníemos al final del añu.

Últimu croquis qu'apaeció peles redes d'esti seutorazu

Los siguientes díes, tocó metese coles vies de la mandrecha y entamamos per Mundo Maravilloso, otru 7a bien guapu, con pasos dinámicos y un final un tantu intensu. Llueu, nun par de bonos pegues, me llevé otra vía bien prestosa como fue La Escondida, quiciás más del mi estilu que Mundo Maravilloso y por eso hasta costóme dalgo menos.

Pol mediu, tamién ficimos nun par de pegues preciosos, Supermatizado, una vía perguapa de 6c, faciendo los pasos como non, a la mí manera y tamién buscando'l mió métodu saqué otru 7a, como ye Setastrón que ya probara fai dellos años.

Siempre agradable'l nuesu tar nesti pié de vía

Poquín a pocu, diben quedándome menos díes d'escalada ya que la temporada pieslla'l 15 de Febreru y tocaba metese en xardinos más importantes como yera Juego Audaz (7b) anque, tovía entretúvime con Galaxia 45, otru 7a qu'enchufé tamién al segundu pegue, totalmente al límite y aguantando una puerta terrible.

Falando de puertas, quedábame por volver otra vegada a Manzaneda Rock, otru 7a, que pa mí, paecíame más duro que los demás, por mor d'un movimientu dinámicu llargu, que ya probara hai dellos años y paecíame duru pa mi estatura.

Nome de la vía que más trabayu me llevó nos munchos díes nel paré

Aún así, como se puede ver nel vidiu, fuimos a facer el movimientu aguantando un puertón, que lloñe de ser difícil al final, el mió métodu yera espeutacular abondo. Dempués d'esti encadene, que prestóme enforma, me metí de llenu a lo que paecía diba ser un encadene rápidu y acabó por ser una llucha continua y llarga con Juego Audaz.

Ye difícil centrar los pegues y los esfuerzos, cuando sientes que vas a sacar una vía en mui pocos pegues, ya que resuelves tolos pasos, ensin mayores dificultaes, pero la vía te pon nel to sitiu, un pegue tres otru, cayendo una vegada na metá de la vía y otres na parte alta, casi saliendo a cadena.

Despedímonos hasta la próxima temporada n'Arnea

A la fín, magar de munchos pegues y na última selmana enantes del cierre, algamamos la cadena al tercer pegue del día, xusto cuando nel pegue anterior cayera tamién saliendo a cadena, camudando un pié clave pa salir del pasu.

Munches vegaes, damos poca importancia a matizar en condiciones los detalles, cuando creemos que vamos sobraos per ella y un mínimu detalle fae que se te vaya un pié dos vegaes siguies que dibes perfectu de fuercia y ya creíes que salíes y encadenabes... coses que pasen na escalada y na vida.

------------------------------------------------------------------------------------------- 

Iviernu 2017-2018

Facía tiempu, que nun m'enfotaba tanto nuna vía, como esti iviernu con Tornillos Profundos. En tola escuela de Manzanea, sacante'l seutor d'Arnea, yera la única vía que me quedaba por encadenar y l'accesu rápidu al pie de vía, yera perfeutu pal iviernu, teniendo un par d'hores los vienres pa da-y unos peguinos.


Nel pasu clave... d'esti 7b plaquero

Alcuérdome, que'l primer día que fuimos n'Avientu, montéla dempués de facer el pocu amigable y perro 6b+ de la mandrecha, nel que tengo más menos un aciertu del 50% en pegues jaja. Nun contaba nin tan siquiera sacar los pasos y magar de colgar nel pasu clave y probar métodos, salí hacia la siguiente cinta y d'ehí resolviendo tol restu la vía.

Dellos momentos de la vía Tornillos Profundos

A partir d'equí, tocaba dir sumando pegues en distintos díes tando mui cerquino d'algamala en varies ocasiones, pero pa min, los peques son contaos al día, ya que les cerraes de regleta son dures y hai que dir con toles preses calcaes y los pies nel puntu esautu.

Kíla y Lolo a su puta bola... son así, hai que dexalos

A la fín, un 19 de Xineru en compañía del mió collaciu d'entrenos cayía la vía nel primer pegue del día, dempués de montala encadenando tamién el 6b+ perru. Son d'esos díes que nóteste fuerte y paez que sal too fácil y sin esfuerzu... pero tengo que dicir qu'otru día ensín esa motivación necesaria volvía probala y casi nun me movía, jaja.

La motivación nesta vida lo ye too... y pa volver al to másimu grau hai que dir motiváu al 100 %


---------------------------------------------


5, 19, 27 d'Ochobre, 11, 18, 25 de Payares, 2 d'Avientu de 2016 y 20 de Xineru y 10, 17 de Febreru

Como podéis ver, munchos fueron los díes que pasamos pela Manzanea dende'l branu hasta bien metíu l'iviernu y ye que cuando los díes acúrtiense, nun queda otra que tirar a la roca lo más cerquino posible y col mesmu averamientu al pié de vía posible.

Aparte, de dalgún día sueltu per Arnea, con encadene de dalguna variante la Bella y de LM, cruciando ambes víes ya inclusu cola parte superior de Manzaneda Rock y otros díes nel Espolón, encadenando varies víes, anque fai falta un bon repasu y actualización de los croquis que ya fadré, el restu fue nos seutores central y la Ruda.

Pasos de ñapa y desplome... que más se puede pedir

Nel central, pocu más qu'entrenar y repetir víes ya feches, mayormente 6b's y 6c's y na Ruda fué onde más trabayu fice yendo a pol 7a+ nomáu Lloréu. Fueron principalmente 3 díes de pruebas con mui pocos pegues pola lluz nos meses de Payares y Avientu.

Demientres Marie, diba probando y enchufando les víes que-y apetecía facer yo calecía con dalguna d'elles y metíame a sacar los pasos pocu a pocu. Hasta que l'últimu día de Payares ya tábemos los dos man a man dándo-y pegues, costándome sobretou salir hacia cadena nun paséu llarguísimu ensin asegurar.

Concentración total de pasos duros en pocos metros con agarres diversos

El 2 d'Avientu, dempués de matizar bien la salida pa pasar mieu de más y dir seguru nesti tramu, facía un pegue pasando pol tramu de ñapes y faciendo los movimientos peles pinces con muncha tranquilidá, pa llueu apretar na salida hacia cadena ensin pasalo mal y disfrutando muncho esta vía cortina pero mui intensa.

Camiento qu'esti tipu de víes, de placa, lixéramente desplomada y non mui llargues, ye l'estilu que meyor soi a facer, sobretou con pasos de ñapa. Nun sólo son les ñapes, sinon que tenemos dos dinámicos a pinces de fuercia y un llance un cantu dalgo irregular.

Marie probando la vía con xeitu

Llueu, toca'l típicu paséu con alloñes brutales de la Manza que te pon la piel de pita y sólo nel gran pegue d'encadene, dexes de pensar nun posible vuelu y apretes les preses y muéveste fino, fino hasta'l siguiente seguru.

La pena fué pa Marie, que tuvo pegues bonísimos pero nel tramu más bloqueru del pasu de les ñapes a les pinces nun lo tenía suficientemente matizáu y nun pudo llevásela tamién. Dicimos de volver a la selmana siguiente pero la lluvia y les fiestes navidiegues fizo que quedásemos ensin oportunidaes pal so encadene.

Dándo-y duru al tramu clave de la vía Lloréu

Supongo que pa la primavera, la Manza tornará a ser tarrén de xuegu, sobretou col cambeu d'hora col que dame tiempu a dir facer dalgunos pegues en díes de selmana. Los oxetivos son facer un croquis claro de les víes del Espolón y meteme a saco en Tornillos Profundos (7b) la única vía que falta na llibretina del seutor Central.

Ya vos contaré....



------------------------------------------------------------------------------------  

5, 9 de Mayu,  7 de Xunu y 22 de Xunetu de 2016

Pocu movimientu esti añu pela Manzanea y eso qu'en plenu Mayu ya tábemos con unes ganes horribles de trepar per ellí, pero al final, fuímos decidiéndonos per otres escueles y el mió intentu de recuperar el seutor del Espolón y atacar los dos proyeutos que me queden nos otros seutores quedaron pa prau.

Alberto probando delles víes cencielles

Con esto, dicir que nin tan siquiera probé esti añu Tornillos Profundos (7b) nel central y muncho menos xubí a la Ruda a ver que tal diba'l 7a+. Namái que tuve pel central con Richar, faciendo dellos clásicos populares como Río Negro, Hielo Brillante, la Nalona pa que afitase bien el grau Richar y asína lo fizo y nun tornamos per ellí más.

Richar sacándose un viote del Espolón

Los demás díes dedicámonos a llimpiar El Espolón y pente desbrozar y llimpiar fuimos catando tolos primeros llargos, de lo que puede considerase como reequipáu. Hai que dicir que toles reuniones y chapes alcuéntrense en perbon estáu y ye una pena que tea escaecíu esti seutor con tantes víes y roca de calidá.

Richar esfrutando del clásicu seutor central de la Manzanea

Agora que ta finando'l branu y entra la seronda y la Manza ye de los más cercano a Xixón, espero tornar pa probar los segundos llargos, modificar un pelín los croquis porque nun son mui esautos que se diga ya intentar que dalguien más anímese a trepar por allí, sobretou si acabamos de desbrozar les entraes a vía.

------------------------------------------------------------------------------------
 
9, 10, 20, 29 de Xunetu, 18, 27 d'Agostu, 23, 24 d'Ochobre  y 6 de Payares de 2015

Munchos fueron los díes qu'apaecimos pela Manzanea pa esguilar, siendo los seutores d'Arnea y el Central los escoyidos. Va un tiempín que tengo la mayor parte de les víes de los seutores principales de la Manza encadenaes quedándome tan sólo un par d'elles nel Central y una na Ruda.

Poro, tocaba dir ganando-y tarrén al más esixente seutor d'Arnea, nel que pude trepar con Orlando y Nico un día, trabayando la vía Manzaneda Rock (7a+), la cual tien un pasu dinámicu mui complicáu sobretou pa la mió estatura.

Nico y Orlando en Manzaneda Rock (7a+)

Sacante d'Arnea, averéme munchos díes pol Central col envís de siguir trabayando'l Cadenón (6c+) hasta que'l 24 d'Ochobre yera a encadenalu magar d'un pegue de calentamientu. La verdá que nun sé nin los pegues que-y dí a esta vía y a la so collacia El Peligroso... de 6c, pero tengo que dicir que Viaje Latino (7a) llevóme malpenes 4 pegues nel so momentu y de xuru que pa estes dos la docena más qu'asegurada.

Con esto, queda claro... que los graos son orientativos dafechu... y estes víes espuestes, polos alloñes pente seguros, améstan-y un toque mental a la vía qu'otres con pasos más duros y meyor protexíes nun son a danos tantos problemes.

Encadenando al fín el Cadenón (6c+)

Polo demás, como siguiente pasu la última visita a la Manzanea fue tamién nel Central, onde tuvi intentando dar un pasu más, probando Tornillos profundos, un 7b que va llevar, camiento, un procesu llentu hasta poder algamala... sobretou porque sigo sin alcontrame nel mió mayor nivel d'escalada.

El 2016... esperemos que seya meyor....

------------------------------------------------------------------------------------

9 de Mayu 2015

Pues bien.... equí van aportando los meses más interesantes pa la esguilada, poro tenemos que dir garrando confianza, poniendo la cabecina nel so sitiu y que meyor, que dir a entrenar un pocu hasta la Manzanea... onde los alloñes pente chapa y chapa, son un calter perimportante nesta escuela.

Haritz dándo-y al Barrio San Lázaro (V+)

Asína que Pau, Haritz y yo, fuimos hasta'l Central, a facer les más facilines pasando por Barrio San Lázaro (V+), Rio Negro, Hielo Brillante y una variante mui guapa que facía años que nun volvía a encadenar (6a+) pente dos víes de mayor cotación, Urriellu (6c) primer parte y Thor (6c) na segunda parte.

Pau trabayando tamién esta guapa vía

Con pocu más, qu'esfrutar del día, yo fice les vies de primeru y Pau y Haritz fueron en polea, garrando esa confianza y entrenu que toos necesitamos. Y como suel pasar, magar d'esta variante de 6a+ alcontrábame cola confianza necesaria pa probar de nuevu un proyeutu del añu pasáu, El Cadenón (6c+).

Apretando nos míticos Rio Negro y Hielo Brillante


Pero'l día dixo que nun había pa más... metióse la ñube y a la escontra de tou pronósticu entamó a orbayar de la que decidiéramos colar d'ellí. Menos mal, que nun me metí unos minutos enantes na vía, sinon diba veme enmarronáu saliendo pa riba de cualesquier manera o abandonando dalgo pa baxar.

------------------------------------------------------------------------------------


19 y 26 d'Avientu 2014 y 16, 18 de Xineru y 6 de Marzu de 2015

Tornamos delles vegaes a la escuela uvieína de Manzanea, col envís de finiquitar les víes pendientes nos seutores Central y la Ruda, pero viendo'l nivel col qu'aportamos al iviernu, más que nada dediquéme a facer vies cencielles ya intentar xubir dalgo de nivel y conocer más seutores.

Asína que magar del primer día pel Central, nel que nun me ví fuerte como pa dir a pol Cadenón (6c+), al día siguiente una selmana dempués, decidimos dir hasta Arnea, onde malpenes pude facer el V+ (Corto Maltés) con mui males sensaciones.

Faciendo dalgo d'entrenu nel Central

Esi día, metíme a por LM (6a/+) si xunimos ambos llargos y pa facer el primer dellos tuvi que facer tres pegues garrándome un rebote de los grandes y colando de la escuela coles piores sensaciones que podía tener... dar puta pena moviéndome pelos parés y cola cabeza pior que nunca.

Al día siguiente de pasar per Arnea, otra vegada con Alberto, metíme nel 6b más a la mandrecha d'esti guapu paré sacándolu a vista, algamando unes sensaciones dafechu distintes a lo que llevaba nos díes anteriores.

Con ello, fuímonos hasta la compañera de LM, La Bella (6a+) que comparte reunión hasta'l primer llargu tamién, teniendo que da-y un par de pegues ya qu'hai que facer un pasu finísimu hacia la mandrecha pa llibrar la placa más dura y llegar a un bon agarre.

Trepando un pelín nel seutor Arnea

L'últimu día que tuve enantes del cierre d'Arnea por añeramientu, averámonos Haritz y yo una mañana d'antes del vermú, faciendo'l V+ pa calecer y llueu tírome a por LM otra vegada faciendo perfácil los dos llargos del tirón con mui bones sensaciones.

Sensaciones que fueron afitaes dempués de facer en polea un 7a+ (Manzaneda Rock) sacando los pasos ún a ún, anque con un par de pillaes. Pero bono, magar de munchu tiempu ensín pegame con sétimos graos dióme confianza enforma pal futuru.

Vistes de los seutores Ovidio y Espolón

Magar de varios díes de mal tiempu, Alberto y yo vamos un vienres tarde hasta'l Central con ganes de metese caún nos sos proyeutos, pero nin ún tenía'l día fuerte (Alberto) nin l'otru anduvo mui espabiláu (yo) dexándome los gatos y la mochila d'escalada en casa... vaya empanada.

Asína que colos gatos vieyos (desdexaos ya p'alpina non pa plaques fines) monté les víes d'entrenu d'Alberto y pocu más, colando a conocer vieyos seutores hasta bien entráu l'atapecer. Pa más señes, fuimos a dar una vueltina hasta'l seutor del Espolón, al cual sí que-y vimos munches posibilidaes.

Echando una güeyada al seutor del Espolón

Munches posibilidaes, si llevamos ferramienta y llimpiamos aquello un pelín, asína como poner una cuerdina pa que l'asegurador puea tener un cabu d'anclaxe y non xugase la vida mientres el compañeru esguila.

Del Espolón, dimos un paséu pela parte baxa de la Ruda, alcontrando'l vieyu seutor de casa Ovidio, el cual tien la so entrada dafechu zarrada y fadría falta desbrozar pa facer una entradina hasta'l pié de vía, anque fadría falta reequipar tamién.

Finalmente, intentamos y digo intentamos llegar hasta l'aguya del Moro... pero dende la carretera agora mesmu vimos la sienda zarrada dafechu y dende riba, xubiendo pel GR, tamién vese complicáu llegar hasta'l paré... teniendo tamién que desbrozar fino.

Esto ye too pel momentu... siguiremos visitando la escuela de Manzanea col envís de siguir encadenando víes.

------------------------------------------------------------------------------------

30 de Xunetu, 12 d'Agostu, 17 d'Ochobre y 24 d'Avientu de 2014

Esti añu nun fué tan bayurosu n'encadenes nin en visites braniegues la escuela de Manzanea, pero bono nun fué un branu de muncho esguilar tampoco asína que nun se puede pedir más, qu'intentar dir quitando les víes que falten en cada seutor.

Na Cantera ya tengo toes tachaes, inclusu les nueves que son bien prestoses anque una d'elles, pol gran trabayu d'un desgraciáu, fálten-y les dos primeros chapes inutilizándola. Ésto, ye dalgo que nun m'entra na tiesta, al igual qu'un montón de chapes más en nueves víes hacia Rompegrado y Birmania, dándo-y un futuru d'iniciación bien prestosu a esti seutor qu'agora ta n'interrogante total.

César faciendo una de les nueves del seutor Cantera

Nel Central... pocu había qu'avanzar al faltame tan sólu, El Cadenón (6c+) y Tornillos Profundos (7b). Al Cadenón, malpenes-y cayeron dos pegues un día y nun tuve la oportunidá de meteme nella más, coincidiendo con un baxón perimportante físicu míu y poques visites en xeneral a la "Manza".

Onde sí, trabayé un par de díes más, tamién con pocu físicu y entrenu, fué na Ruda, onde encadené'l 6b que me faltaba (Conde Nosferatu) que tien un pasu realmente gafu de lleer y tamién llevé pal bolsiellu Cuenca Minera (6b+) la cual ye imprescindible dafechu nesti seutor... una vía preciosa per chorrera.

Entrenando na Nalona

Pocu más... na Manza, anque tamos en 2015 con visites a otru seutor... Arnea, nel qu'espero dir avanzando y xubiendo grau, motivación y forma física o al menos eso espero.

 ---------------------------------------------------------------------------

28 d'Abril de 2014

Segunda visitina al seutor de la Ruda na escuela de Manzanea. Enantes d'aportar al seutor, tuvimos caleciendo deos na Cantera coles dos nueves víes, pa que Vicen les probase y así ver si Celso pue esguilar per elles.

Magar de les probatures, colamos pa la Ruda, onde xubimos con cuidadín como siempre a Kíla, ya que'l pie de vía, nun ye pa menease muncho, nin los perros nin les persones. Ponémonos cómodos y entamamos l'ataque a los 6b's del seutor.

Como siempre vamos turnándonos pa poner les cintes. Entama Vicen con Campanile, sacándola a vista ensín mayores problemes. Llueu voi yo y más de lo mesmu, sólo tien un pasín duru y pelín llargu arriba, pero sácase bien.

Siguiente 6b, El Testeru. Tócame a mí y disfrútolo muncho, ya que ye una vía más continua pero mui guapa, sacándose a vista ensín problemes tamién. Vicen va detrás y más de lo mesmu, a vista... anque ya tenemos los dos la vista puesta nuna vía per una chorrera guapísima, 6b+... si da tiempu a por ella.

 Vicen dándo-y a Gasiapu (6b)

Tóca-y a Vicen el doblete, magar del Testeru vien Gasiapu. Métese a ella y na metá de la vía hai un pasu llateral con un chape gafu, ya que tas de mandrecha d'un romu y con un pié pelín malu, xugándote un vuelu llateral peligrosu.

Ye a poner la cinta, pero nun ye a pasar la cuerda, quedándo-y esta vía pa otru día. Yo que voi coles cintes puestes, sí que soi a chapame pasándoles un pelín putes igualmente. El restu de la vía de disfrute total sacándola a vista.

Vicen pasa de meté-y otru pegue, así que con tres 6b's a vista, tiramos a pol últimu, Conde Nosferatu. Too va bien, hasta una pancina de ñapes, onde nun soi de nenguna manera a salir, ya que nun soi atreveme col alexe qu'hai.

Dúelenme les yemes y tirar a un cuartu 6b con too per ñapes, faíseme imposible mentalmente col dolor de deos. Paso mil y dexo a Vicen intentalo y nun ye tampoco a ello, así que xube pel 6a col que comparte reunión y pa casa.

Nun daba nin tiempu, nin teníemos más fuercies, eso sí, ya tamos con ganes de tornar a la Ruda pa dir a pol Conde Nosferatu (6b), Cuenca Minera (6b+) y Lloréu que ye un 7a+, que tien pinta de ser un bon proyeutu pal futuru.

---------------------------------------------------------------------------


25 d'Abril de 2014

Vienres al sol, al menos hasta la tarde que venía la lluvia, así que tiramos hasta Manzanea, Pau y yo. Ya pasaron unos díes, dende la última visita y diba cola intención de forzar la compañera del Peligroso, el Cadenón (6c+) a vista.

Anque realmente, mui a vista nun sedrá, porque les 4 primeres chapes, col primer pasu duru, ye compartíu col Peligroso. Estes coses faenme duldar, nun se hasta que puntu, pudiera ser o non, al igual que xente faciendo a vista víes coles cintes puestes, lo cual ye más raru entá.

Una cosa son les intenciones y otra bien distinta, lo que te dexa'l día facer. Entamamos na Cantera, esfrutando a tope coles nueves víes d'esti seutor. Primeru tiramos a Ansiedad Vertical, que taba anunciada y cotada, nuna piedrona.

Abel a la baxada del nuevu V de la Cantera

Salió a vista, anque hai qu'apretar na parte final nel techu que va a reunión, ya que comparte col 6b+ (Quo Vadis). Pau fué detrás, en top y aportó hasta'l final, prestándo-y muncho tola vía tamién. Más tarde fuímonos hasta la nueva, entre la Cabra tira al monte y Gaiteru.

Perguapa vía, quiciás más disfrutona y tamién más cenciella qu'Ansiedad Vertical. Ye del estilu de Gaiteru, pero superando les barrigues, con mui bonos cazos. Poro, tanto a Pau como a mí, paeciónos perfeuta pa enllazar La Cabra... (V-) y Gaiteru (V+), quedando ésta al nuesu entender de V.

Encadenando tamién Ansiedad Vertical (V+)


Al ratín d'acabar ambes víes, llegó per ellí, Abel, que venía de currar n'Ayer. Tuvo tamién la oportunidá de facer les dos víes de primeru y comprobar que los graos andaben per ehí. Col bon tastu de les nueves víes na Cantera, tiramos hasta'l Central onde teníemos cosines pendientes.

Lo primeru y postreru, fué poner les cintes en Río Negro, dando pasu a un par de pegues de Pau y Abel, p'acabar recoyendo a toa priesa, porque l'agua escorriónos pa los coches. Menos mal, que nun me dió tiempu a meteme nel Cadenón...


---------------------------------------------------------------------------

12 d'Abril de 2014

Sábadu nel que dan un día realmente estupendu, así que decidimos dir hasta la Manzanea a siguir recuperando sensaciones de cara al branu. Aportamos hasta ellí, muncha xente: Gus, Sonia, Pau, Alberto, Diego y Haritz, que'l domingu nun pué dir de monte y apetez-y alcordar vieyos momentos na roca.

La primer sorpresa, lléganos nel seutor Cantera, onde vemos qu'acaben d'equipar una vía nueva a la mandrecha... Ansiedad Vertical (V+), ye lo que pon nun cantu rodáu al pié de vía. Como decidimos dir al Central, quedámonos con ganes, así qu'otru día será.

Gus y Diego nel míticu ya... Rio Negro

Llegamos al Central y dividímonos en cordaes, pa dir ganando tiempu y poder prebar delles víes. Vamos dir a los quintos, así que directamente, métome en Barrio San Lázaro (V+) que va mil años que nun la faigo, sacándola pel centru, que bien merez xubir a 6a.
Mi hermanu, como tien enfotu en encadenar al fin, Rio Negro, métese n'ella, fallando nel pasu míticu, pero con mui bones sensaciones, ya que na continuación salió ensín problemes. Así fueron, ún tres d'otru entrenando y ganando-y tarrén a cauna de les víes.

Pau en Rio Negro y Haritz garrando sensaciones dempués d'unos añinos

A los ya nomaos, xuniéronse Vicen y Celso, qu'apaecieron un pelín más tarde. Pa entos, ya ficiera yo mi primer pegue al Peligroso (6c), que lleva dándome dolores de tiesta dende'l branu pasáu, pero nesti soi a algamar el métodu pa superar el primer y más duru pasu de tola vía. 

Nel segundu pegue, fallo por fatu, pero sigo hasta'l segundu pasu duru nel alexe y déxome de tonteríes saliendo pela vía d'al llau (7a) y dexando una cintina llarga p'asegurame dende un pelín más baxo.

Celso esguilando cada día meyor y Alberto en Hielo Brillante

Cola vía preparada, dedícome a descansar y asegurar a tol mundiu. Cola suerte de poder ver a Gus, encadenar al fin Río Negro. Si lo pensamos bien, que sea V+, con un pasu tan duru, da que pensar, pero bono ye lo que tien Manzanea... que toca apretar sí o sí.

Descansáu, motiváu y cola barriga dalgo fartuca de la xinta, tiro p'arriba a pol Peligroso. Ta resistiéndose esti 6c y tien que cayer d'una vegada. Salgo con confianza y supero'l pasu, col métodu nuevu que va a les mil maraviyes.

Yo encadenando al fín el Peligroso (6c o 6c+?)

D'equí p'alantre, sigo apretando como un burru, hasta'l pasu del alexe, que cola cinta llargar chapo ensín problemes, saliendo de la manzorga a la mandrecha per ñapes pequeñes, hasta superar la barriga.

Ya ta, agora sí, sigo respirando como la llocomotora d'un tren y algamo la cadena, mui contentu. Nun ye que xubiera de grau nin na pol estilu, pero esta vía, si que fízome trabayar munchísimu más que la so compañera de 7a.

Nueves camisetes del GM Xuan de la Borrina

Con poques más ganes d'esguilar, fuimos acabando toos y decidimos retiranos con mui bon tastu, dempués d'apretar y conseguir xubir el nivel un pocu de cara al restu de la temporada braniega.


---------------------------------------------------------------------------

2 d'Abril de 2014

Ya pasaron unos mesinos dende que tuviera na Manzanea per última vegada. Tamos na primavera y esta escuela, ye mui prestosa pa recuperar el nivel perdíu, así que vamos conocer un nuevu seutor y encadenar el mayor númberu de sextos baxos pa entrenar un pelín esa cabeza que ye lo más importante.

Pié de vía de la Ruda pelín incómodu

La Ruda, ye un seutor a la mandrecha del Central y xúbese trepando per un incómodu y pelín peligrosu accesu. El pié de vía, nun ye nin ampliu nin cómodu, pero les víes son mui bones, faltando quiciás una reequipación de los chapaxes, anque les reuniones sí son nueves.

Brutales semeyes que fízonos Dani

Hasta la Ruda, fuimos Vicen y yo, acompañaos esta vegada por Dani Corripio, del blog Asturwaterman, el cual ye un bon aficionáu a los deportes al aire llibre, ya sea nel agua o na montaña y como podéis ver mui bon fotógrafu.

Asegurando a Dani pa facer dende la reunión delles semeyes

Deportívamente, como siempre que vamos a dalgún llugar nuevu, metímonos no más cenciellu, encadenando a vista: El cura de Piedramuelle (V+), Uviéu (6a), Queso (6a+) y tamién tuve que meté-y un segundu pegue pal encadene a Grisu (6a+) que tien un pasín arriba qu'atragantóseme.

 Perguapa semeya del seutor de la Ruda

La mañana ya nun dió pa más, ya que tuvimos relaxádamente charrando los tres y faciendo les víes con calma, demientres Kíla y el perrín de Dani, taben per ellí enredando. Fué una bona toma de contactu na Ruda, así que tornaríemos unos díes más tarde a apretar un pocu más.

---------------------------------------------------------------------------

23 d'Avientu de 2013

Siguimos cola temporada ivernal, na que como casi siempre, enantes de les navidaes fai bon tiempu. Poro, una mañanina más escapámonos Vicen y yo, a esguilar a la Manzanea, trayendo nesti casu, como compaña a Diego y Pilar, que van trepar un ratín, por segunda vegada na so vida.

Toi en plenu baxón mental y quiciás físicu tamién. Sacante, l'encadene del 6c+/7a de la Peñona, nun albidro nuna temporada llarga, tornar a sacar víes de máximu grau pa mí. Asína que, tiraremos de paciencia y tranquilidá y aprovecharemos pa mete-y el merucu d'esguilar a más xente.

Con estes premises, tuve tola mañana, trepando víes de V, V+,6a, pa que llueu-y diesen en toprope, Pilar y Diego, y tando na Manzanea, tuvimos asistiaos como non, nel seutor Cantera, onde digo y repito, delles víes son un auténticu peligru polos allexes de les chapes.

Delles semeyes de Diego, Pilar y Vicen na Cantera

Paezme del xéneru bobu, reequipar delles víes, colos graos más baxos del seutor, y cuando esistía una chapa intermedia, pente la 3ª y 4ª chapa actuales, decidir aforrase un parabolt, dexando a la xente d'iniciación con un posible vuelu peligrosu.

En fin, camiento qu'hai que ser responsables cuando reequipamos y anque esguilemos como llargatexes, y paézcanos cenciella una vía, a lo meyor a la xente qu'entama, nun-y lo paez tanto, y dígolo dende una visión d'esguilador, que nunca fué con naide que trepase más grau y tuve que comeme los graos con patatines echándo-y tolanos.

Cuando una persona, abre y equipa dalgo coles sos perres, allá caún que quiera trepar nes víes propuestes, pero nuna escuela con tanta xente, nuevo, vieyo, esperimentáo o non, de xuru que la FEMPA puso perres pal reequipamientu y dexalo pior de lo que taba nes víes d'aniciu.... tela.

 -----------------------------------------------------------------------------

30 d'Ochobre de 2013

Siguimos con un bon tiempu, pocu davezu pa Ochobre, anque'l mes de Payares suel ser un mes más malu con grandes ñevaes n'Asturies. Poro, tamos aprovechando lo más que podemos les salides a esguilar.

Esta vegada xuntámonos pola mañana, Berto, Vicen y yo, qu'andamos folgaos de tiempu, y vámonos hasta La Manzanea, a asoleyar un pelín, pa nun perder el collorín morenu del branu. Y calecemos, pero bien, y nun solo pol sol, sinón polo duro de les víes que prebamos caún.


Yo pegándome por enésima vegada con El Peligroso (6c/+)
Pa entamar, yo sigo con mi llucha continua nel Central y les dos víes ximielgues del Peligroso y el Calentón, que sigún los croquis que mires, ún ye 6c y l'otru 6c+. Ambes comparten un pasu duru y llargu pa la mio estatura ya inda nun fuí a encadenar esi pasu nun bon intentu.

Llueu, magar de posicioname correutu, salgo bien, ñapeando hasta'l siguiente pasu, onde ye la tiesta la que manda, ya que tengo que dexar bien abaxo'l caberu seguru y les duldes faen que nun me fie de les ñapes peles que tengo qu'aguantar pa chapar la siguiente.... ta siendo un retu perimportante esta vía pa mi.

Berto entrenando en Hielo Brillante (6a+)

Berto, a falta de 6a's nel Central, sigue trabayando los 6a+ presentes y esta vegada tocó-y dar cera, a Hielo Brillante, de la que la tien a puntu pa su versión curtia hasta la reunión central. Como pasu adelantre, aprovechando que tenía yo la cuerda dende riba, tiró unos cuantos metros pola versión llarga que sal de 6b, pero ehí, la resistencia xuega un papel perimportante.


Vicen encadenando Sinfonía de Paz (6b+)

Por últimu, pero más importante, Vicen, que llevaba tiempu tres de Sinfonía de Paz (6b+), al segundu o tercer pegue fízose con ella, dándonos al menos una allegría a los tres. Esta vía, qu'avanza pel cantu d'una chorrera hasta'l pasu más duru, foi de les más guapes que trabayamos esti branu y va ser una vía, mui usada, si quiero da-y dalgún día al 7b col que comparte reunión.


 -----------------------------------------------------------------------------

17 d'Ochobre de 2013

Casi un mes dempués tornamos hasta la Manzanea, pa siguir avanzando nel encadene de les víes del seutor Central. Esta vegada tan sólo pudimos venir Sonia y yo y na dómina na que tamos, l'atapecer ye'l mayor de los enemigos pa los encadenes.


Así qu'hai qu'andar sollerte y aprovechar los pegues al máximu, poro metíme esta vegada n'Erotismo, un 6c+ cortín pero mui duro, de ñapes ínfimes y pies malos. Fice un primer pegue poniendo les cintes bastante bono, pero llueu nun fui a siguir bien de pies y p'abaxo.

Semeya d'Erotismo (6c+) magar del encadene

Llueu de descansar un pocu, demientres Sonia metíase un pegue de primera en Hielo Brillante, dexándolo nel pasu clave, volví al ataque. Y esta vegada sí, a pesar de perder pies nel pasu duru, sufrí y aguanté pa encadenar la vía, llegando a la parte cenciella reventáu dafechu.

Sonia y Kíla descansando

Dende equí, al compartir reunión con Hielo Brillante, Sonia tuvo trabayando la vía un bon ratu en toprope y cuando cansó, decidimos que lo meyor yera dexalo y colar tomar unes botelles de sidre. Cuando les coses salen bien rápidu, a vegaes lo meyor ye nun forzar n'otra vía y colar con mal tastu d'un bon día.

 La Manzanea (Seutores visitaos)
 
Croquis modificaos por mi de la escuela d'escalada de La Manzanea, por mor de Piratas Free y El Maquis. Gracies y col so permisu.

-----------------------------------------------------------------------------  

19 y 21 de Setiembre de 2013

Siguimos recoyendo ésitos en delles escueles, anque'l mayor d'esti branu ye la cantidá de vegaes que salimos a la roca y eso ta notándose. Nesti casu tornábemos a la Manzanea dos díes siguíos: Xueves y Sábadu, nel qu'algamamos l'encadene de víes bien guapes.

Sonia encadenando Barrio San Lázaro (V+)

El Xueves la primera que dió na diana, foi Sonia, que fízose con Barrio San Lázaro (V+) nel Central. Esta vía namái que la probé una vegada na mió vida y ye bien guapa, lo que pasa que tien un pasu duru de la segunda a la tercer chapa y llibrando pela manzorga, sal meyor anque munchísimu más espuesta.

Berto faciendo más de lo mesmu con esi V+

Tamién Berto, siguió los sos pasos, al que la llibrada vien-y tamién bien, pola so llargura. Alcuérdome que Pau, nun pue sacala asina ya que nun llega a chapar la tercera y queda nuna posición mui comprometida, poro tendrá que trabayala saliendo de frente... más duru pero menos peligrosu de vuelu.

Sonia encadenando tamién l'otru y mui ansiáu V+ del seutor: Río Negro

La tan cacarexada Río Negro, a la fín, cayó tamién nel bolsiellu de Sonia, que d'esti xeitu, ya podía marchar más que contenta, colos dos encadenes nel central. La verdá, que si fizo cenciellu Barrio San Lázaro, Río Negro salió-y espeutacular con un manu-pié nel pasu clave.

Yo entrenando Escayos Malditos (6c+) y Vicen faciendo La Nalona (6a+)

Demientres, taba tamién per ellí Vicen, que vino a la preba d'un 6c+ que taba yo conociendo, Escayos Malditos, el cual comparte final con Urriellu, pero durante la vía, tien dos pasos duros hasta llegar ellí. El primeru ye un llance a un bon agarre que por mi altura faise duru y llueu un chapaxe perduru enantes del tramu final compartíu.
 
Primer parte d'Escayos Malditos (6c+)

El sábadu tornamos per ellí, con un día de calor cafiante, Berto, Gus, Sonia, Pau y yol, y el mi hermanu metióse a por Rio Negro, en varies embestíes anque finalmente, nun foi a sacar el pasu nes intentones d'encadene.

Pau tamién, tuvo con ello, entrenando cola cuerda penriba y saca'l pasu fácil, fácil. Tan sólo, tien qu'echá-y valor y recuperar eses sensaciones perdíes de primera. Nun hai pior cosa na escalada, que les torgues que nos pon la nuesa propia tiesta.

Segunda parte del 6c+ pasándolo fatal de resistencia

Personalmente, metí-y dos pegues a Escayos Malditos y nel primeru fallé nel llance, anque resolví dempués tolo demás del tirón. El segundu pegue, a plenu sol tamién, camudé los pies pal llance y aporté al agarre bien, pa siguir lluchando y muncho, tola segunda y tercer parte de la vía... llegando a la cadena mui mal de resistencia.



Como pué vese nel vidiu, la parte final correspondiente al final tamién d'Urriellu (6c), fízoseme perdura, llegando mui petáu y xugándome un vuelu de los finos sinon llego a lluchar l'agarre de dreches, el cual gárrolo de primeres pel pior sitiu qu'habia.... sufriendo y muncho.

Gus y Paulina probando Rio Negro (V+) y la Nalona (6a+)

Tanto Sonia, como Berto, tuvieron pegándose cola Nalona (6a+), a la que tol mundiu-y va ganando tarrén. Dempués d'encadenar Escayos Malditos, paseme a la reunión de la Nalona, pa dexá-yos la cuerda y tuvieron ya a la solombra esfrutando d'esta guapísima vía.

Apéname un pelín, ver a Pau, facer un 6a+ con muncha soltura en toprope, aportando a la cadena y nun ser capaz de sacar IV's de primera en dalguna escuela. Lo dicho, la cabeza ye'l pior enemigu que tenemos na escalada y un claru exemplu, ye lo que ta pasándo-y a Pau esti añu.

De xuru que ye a camudar esi camín pali que pali....


-----------------------------------------------------------------------------  


3 de Setiembre de 2013

Pues como suel pasar... dempués de semar... recoyer.... pero como non, esi día que va salir too bien y vas facer l'encadene que tanto tabes esperando, vas dos persones y nin semeyes nin vidios nin na, jeje. Aún así, pocu nos importó a Berto y a mi, ya que diéramonos 3 pegues a cada vía y sinon, colábemos pa casa y finalmente, fué nel terceru de caún, cuando algamamos la vía.

Entamé yo, dempués de tar baxo un árbol un ratín, pa ver si colaba'l sol, ya que nun s'aguantaba de calor. Metíme na vía, faciendo les 3 primeres chapes cencielles como siempre hasta'l pasu, nel que dempués de chapar la cuarta bien estiráu, metíme sobráu de fuercia al pasu y xubí tanto los pies, que ya nun fui a sacar denguna man... y p'abaxo. 

Así que p'abaxo dempués de prebar el pasín y resolvelu mediánamente bien, hasta la siguiente chapa. Turno pa Berto, que fai más de lo mesmu, hasta que sabiendo lo que tien que facer, liáse y na de na. De mala hostia baxa y ya véome otru día más, teniendo que facer la vía, pa recoyer les cintes, jeje. 

Turnu pa mi, mesmes sensaciones hasta'l pasu clave, nel qu'esta vegada equivócome y saco la mandrecha envede la manzorga y nun m'aguanto del agarre y p'abaxo. Equí sí, enfademe y prebé'l pasu varies vegaes, dándome cuenta que o saco la manzorga y dexo'l pie drechu al aire o nun hai más coyones. 


Berto feliz dempués de quitase al fin... Rio Negro (V+)

Esta vegada, tiro tamién el segundu pasín, dándome cierta sensación de que voi cansáu y llego al descansu, onde tengo tamién otru pasu de la segunda parte de la vía, que con agarres romos cúestame muncho tamién. Llibro esta parte y a dos chapes de la cadena decido si da-y otru pegue o recoyer, ya que nun me veo fuerte pa encadenala.


Descuélgome y turnu pa Berto, que métese con poca confianza, mosqueándose y baxando casi sin tentar el pasín. Nun queda otra, dígo-y que voi descansar un pocu más y que tien que facer él la última intentona, pa sinon al baxar de la mía, recoyé-y les cintes a la suya tamién.

Así que va a pol últimu pegue, Berto, llega'l pasu y sin facer les coses como debiera, sacando'l pie drechu, apreta duru na ñapa y quita esa mandrecha al fin del agarre bono, pa topase ganando'l siguiente agarre bono. Menos mal... allegría pa los dos, d'ehí p'arriba ta tan contentu que xube como un putu tiru hasta la cadena.


Cola cosa de qu'al menos, ún de los dos ganóse les cerveces, voi col envís de recoyer les cintes al menos. Métome na vía, con xente avezada a esta escuela animando y llego al pasu, colócandome bien, bloqueu de la ñapa d'esquierdes y de triceps de dreches y saco la manzorga y aguántome.

Segundu 7a con Viaje Latino


Equí casi la cago, por querer llanzar de dreches, pero doime cuenta y xubo'l pie drechu que ta nel aire a una ñapina y ya garro los agarres semibonos, p'aportar al cuernín onde chapo la siguiente. Agora calma, y nun cagala nel siguiente pasu, que tamién ye duro, anque sin pensalo demasiáu, apreto y resuelvo bastante bien, los pasos hasta'l descansu.


Esti segundu pasín, nun ye difícil, pero los cantos nun son demasiáu bonos, y cansáu del clave, faísete too más difícil. Magar de descansar un bon ratu, nos cazos del entamu de la segunda parte, veo que toi cansáu y que tengo unos movimientos en romos llaterales que nun me presten na.

Aún así, faigolos bien y aporto a la seguridá de los cazos na parte cimera de la vía. D'equí n'adelantre, intento descansar lo más que pueu pa nun cagala na reunión ya que si vas de frente, pues salir volando a la mínima por dir petáu, poro faigo la ya clásica travesía pembaxo hasta unos mui bonos agarres onde encadeno al fín.... mi segundu 7a.

Les cervezes y una pizza yera más que xostificáu pa cellebralo... 6c a vista y un nuevu 7a.... los dos oxetivos cumplíos d'esti branu, así que lo que venga de más, que s'afaye.


-----------------------------------------------------------------------------  


28 d'Agostu de 2013

Más de lo mesmu, nel únicu día qu'averéme a una escuela d'escalada esa selmana. Como non, tornábemos a la Manzanea a la gueta del tan ansiáu encadene de Rio Negro por Sonia y Berto. Pau venía con dolores nel psoas y venía más bien a pasar el día.

Namás llegar, con tal de nun tocar la vía maldita, Sonia metióse a eses dos víes que percorren un espolón, pente la Cantera y el Central... Rompegrado (V+) y Birmania (V), anque tan sólo pudo encadenar una d'elles ya que sofrió un ataque d'avispes qu'hai enantes de la reunión.

Sonia encadenando Birmania (V) y llevándose unos picotazos d'avispa

Sollertes a esto, que ya me pasara a mi, una vegada que taba faciéndola pa que les conociese Pau dempués. Así que, quedó tan sólo Sonia col encadene, ya que nin Pau nin Berto quisieron prebar suerte con tales amiguines en plena vía.

Poro, tocó tornar al Central, pa qu'ellos trabayasen Rio Negro, una vegada más ensín suerte, y pa que yo metíeseme con mui bon xeitu a pol 7a a vista. El día anterior, tuviera nes víes d'al llau y nun me pareciera pa tanto, pero una vegada en plena vía, hai un pasu nel que nun fui a moveme bien de pies y fallé.

Intentando'l 7a a vista.... nun pudo ser

Foi una pena, pero xugar con esos graos a vista pa mi, fai que tenga que ser tou perfectu y precisamente, nun taba yo nel día más fuerte. Aún así, fice dempués el V+ del infiernu, pa que viera como sacábase y paez ser que di-yos la solución, ya que nun veíen un pié que yo si uso y con él, el pasu queda reducíu a apretar un pelín de la ñapa más baxa.

En consecuencia, toos sacaron el V+ cola cuerda penriba y nun-yos queda otra qu'encadenala'l próximu día qu'averémonos per ellí. Con tol pescáu vendíu, nun me quedaba otra que xubir otra vegada'l 7a pa retirar les cintes así que metí-y un pegue a muerte, pero nun salió la cosa bien, teniendo la sensación que los pies siguen siendo lo más importante del pasu ya que'l bloquéu faígolo medianamente bien.

Nel pasu clave de Viaje Latino (7a)

Polo demás, otru día semando... y ya va tocando recoyera... a ver si pa esta selmana que vien, somo a algamalo.

----------------------------------------------------------------------------- 

23 d'Agostu de 2013

Nesti primer día, paez ser qu'entamamos un periodu de semar, pa poder recoyer dempués. Esto suel ser dalgo avezáu a posteriores encadenes, ya que pasamos d'unes víes trabayaes o d'unos díes increyibles de forma, a meténos en víes más difíciles o un baxonín de forma.

Nel mió casu, magar de bonos encadenes na Manzanea, tocóme siguir colos 6c's y esto fízome entrar nun pañu roca, que tien como protagonistes delles víes d'esquierda a drecha, coles cotaciones de 7a, 6c y 6c+, anque dependiendo de los croquis el 6c y el 6c+ camuden la posición.

A la preba los V+'s del Central

Otru casu ye, tar bordiando'l máximu grau, como-y pasa a Pau, Sonia y Berto y entos cada día que pasa ye una llucha continua, sobretou si una vía atragántase enforma como Rio Negro. Esta vegada, pa nun andar con desilusiones fonderes, tuvieron trabayando a la par en Barrio de San Lázaro qu'anque más llarga quiciás seya menos desesperante.

Entrenando un 6c nuevu y bien durín

Na parte que me toca, magar d'esi primer 6c a vista na mió vida, metíme con El Peligroso, otro 6c que ya dende'l pie de vía, fizome duldar del so percorríu, por compartir dellos metros col Cadenón (6c+) y pa más problemes, según el croquis una vía ye'l 6c+ y la otra'l 6c y así pues mal entamamos....


El Peligroso... faciéndome duldar en dellos pasos

El casu foi que metíme nel Peligroso, con un bon enfotu a pesar de los alexes entre chapes y alcontreme con un pasu bien duru nuna barriga, qu'hasta dellos intentos nun fui a desfrizar. D'ehí siguí fácil hasta otra barriga onde'l chapaxe del seguru, fízoseme un mundiu y nun m'atreví a arriesgame un mal vuelu... así que salí pela parte cenciella del 7a... quedándome un tastu murniu... pero como siempre un día esguilando ye un bon día d'entrenu pa otru d'encadene.

----------------------------------------------------------------------------- 

20 d'Agostu de 2013

Un día más, tornamos Sonia, Berto y yo, al que pol momentu ta siendo la escuela na que personalmente, más avancé durante esti branu. La Manzanea, magar del añu pasáu finar toles víes del seutor la Cantera, tenía que dir pasando por caxa nel seutor Central y asína taba siendo.

Pela parte de Sonia y Berto, tan encantaos con esta escuela, pero tienen en Río Negro una rellación d'amor y odiu, y entamo a albidrar más odiu qu'amor. Sigo ensín creyer qu'esta vía cortina de V+ tea dándo-yos tantísimos problemes, anque hai que dicir que muncha xente diz que ronda'l 6a.... paciencia que llegará l'encadene.

Berto y Sonia pegándose duramente con Río Negro 
Personalmente, si va un mes, daba por termináu el mio viaxe polos 6b+ del seutor y d'agasayu llevábame mi primer 6c del Central con Urriellu, del que podéis ver el vidiu embaxo, nel día de güei diba poner la cruz, a ún de los oxetivos d'esti branu.... sacar un 6c a vista.

Urriellu 6c nel seutor Central

La vía afortunada diba ser Thor y na realidá, nun tengo mui claru si diba enfotáu n'intentala a vista, pero'l casu ye que metíme mui relaxáu y sacante de les lluches pente Kíla y Rayo, un beegle vieyín al qu'aburrió hasta fartucase, saquela alantre, sofriendo en dellos momentos.


Nel vidiu d'abaxo, pue vese en varios cachinos, partes de la vía, anque Kíla y Rayo ficieron el so trabayu pa que quedase ensín grabar la llegada a la cadena. D'otra miente, un pasu nel que chapo mui jodíu y otru nel que dempués de chapar, xusto resbaríu del pie esquierdo y aguántome de dos ñapes de putu milagru, tan reflexaos.


Thor... el mió primer 6c a vista

Polo demás.... siguiremos poquin a pocu conociendo esos 6c's manzaneros y llegará'l día de trabayar el 7a d'esta escuela.... ta la próxima.


-----------------------------------------------------------------------------  


24 de Xunetu de 2013

Si'l día anterior nel Cadaval, fuera más bien, uno d'esos díes nos que semes entrenamientu pa otru día recoyer encadenamientos, güei ensín esperar gran cosa, salieron les coses perbien. Tornábemos otra vegada los mesmos tres: Sonia, Berto y yo y díbemos a la Manzanea nun día de calor insoportable.

Pa cuando aportamos al seutor Central, nin siquiera'l sol, tapecíase detrás de la Cantera y sólo con tar de pie, sudábase. Magar d'un bon día pa Sonia, col so primer 6a, diben Berto y ella, a por toes con Rio Negro (V+) que pel momentu taba resistiéndose al encadene y que dempués de munchos pegues durante'l día, incompresíblemente siguió resistiéndose.

Faciendo'l tramu que comparten hasta 3 víes distintes... Urriellu ye la más importante

Fuimos turnándonos, un pegue míu y unu d'ellos, lo malo ye qu'ellos siempre pegáronse cola mesma vía y siguía ensín salir. Por mi parte, entamé a esguilar yendo a pol últimu 6b+ que quedábame por facer en tol seutor.

Fice la primer parte, hasta un alexe perimportante, qu'aparte de marcar el desvíu hacia la vía de la esquierda faciendo un 6a+, pon un toque d'emoción y esposición a la vía. Magar del alexe, metémonos no nuevu pa mi, ya que'l 6a+ teníalu fechu y alcontreme con que desvíesen el 6b+ (Urriellu) y la variante 6c nun puntu, garrando ensín querer el 6c y perdiendo la concentración al dame cuenta.

Berto y Sonia pegándose por enésima vegada col V+ de Río Negro

Esto llevaríame a siguir col 6c, aportando hasta la cadena dempués d'unos movimientos duros. El siguiente pegue, por dalgún motivu, volví a facelo al 6c y quedóme claro, que los movimientos anteriores colos que llegué a la reu, nun fueron lo suficientemente bonos pal encadene.

Magar del descansu, torné a xubir la mesma vía, ya sabiéndola de memoria, hasta'l crucie de caminos del 6b+ y 6c y esta vegada metíme nel 6b+, que nun movimientu duru con un crucie de mandrecha penriba la manzorga, sacando "a vista" esti cachín de 6b+ col encadene consiguiente.

Finalmente, col subidón del 6b+, nun quedaba otra que da-y el pegue definitivu al 6c y será que tenía'l día, porque tamién quedó encadenáu, sacando los movimientos claves d'invertios ensína mayores problemes y quedándome esta prestosa vía como una de les meyores que fice nunca.
Felicidá perruna de Kíla


-----------------------------------------------------------------------------  

26 de Xunu y 3 de Xunetu de 2013

Dempués de la sobrada na Peñona, na que colé d'ellí coles yemes de los deos dafechu esaniciaes, al día siguiente, cansáu y con poques espectatives fui hasta la Manzanea con Berto y Sonia, que taben ehí con ganes d'apretar un pocu.

Berto en Río Negro (V+)

Tando la Cantera ocupada, decidimos averanos hasta'l Central, onde Vicen calienta con Barrio de San Lázaro pa poneila pa Celso y Berto y Sonia trabayen en Río Negro a la gueta l'encadene. Yo con asegurar tengo abondo, poro miro como Berto quédase nel pasín pal encadene y Sonia, va conociendo la vía cola cuerda penriba.

Sonia en Río Negro y Vicen en Sinfonía de Paz (6b+)

Dempués de ver trabayar a Vicen en Sinfonía de Paz, na que quédase na salida de la chorrera un pelín por falta de confianza, anímome a prebar Gatos Kamet (6b+), pero nun tengo los deos como facer na curiosu, sicasi, fuí a conocer los pasos y memorizar un pocu la vía pa otru día.

Pau en Gaiteru (V+) y Vicen nel Carnudu (V+)

Y esi día aportó, una selmana dempués, xuntándonos pa esguilar los mesmos protagonistes, más Paulina, que yo finó'l contratu de trabayu. Pa entamar, taben los tres enfotaos n'encadenar Gaiteru, esi V+ tan guapu y completu, que dempués de pasar dos barrigues tien el pasu más difícil nuna fisura con placa de malos pies cerquina la cadena.

Resultaos positivos pa los tres: con un pegue perbono hasta'l pasu clave de Pau, anque equivocose un pelín al salir a la placa y nun algamola esta vegada; Sonia, fizo un encadene de llibru, con calma y descansando onde taba cómoda p'aportar a la reu dando mui bona sensación; Berto, diba sobráu completamente hasta'l pasu onde al sacar los pies a la placa, nun afitó l'esquierdu en condiciones y salió volando p'abaxo, pero tamién ta a tiru.

Encadenamientu de Gatos Kamet (6b+) al primer pegue del día

Tantes foren les ganes que-y pusieron los 3 a Gaiteru, que pasósenos el tiempu mui ceo, yendo pal Central un pelín tarde. Aún así, tanto Vicen como yo, tuviemos la oportunidá de da-y a Sinfonía de Paz y Gatos Kamit respeutivamente.

Entamé yo con Gatos Kamet, tomándomelo con un tranquilidá rara en mí, y de lo más descansáu aporté al pasu clave. Ellí tenía yo, les mios duldes pa col chapaxe, pero xubiendo pies y bloqueando fuerte, puse cinta y pasé la cuerda, pa siguir el llance d'esquierdes al cantu, camudar pies y dende la ñapa superior de dreches, dar col cacín d'esquierdes y salir p'arriba.

Colgáu mirando pa Vicen en Sinfonía de Paz

Llueu un pequeñu descansu nel cazu grande de dreches y como taba bien, siguí p'arriba cruciando manes nunes ñapes que pinchen y sacando la manzorga al agarre bono, que dióme la oportunidá de chapar la siguiente y siguir a reunión sin más problemes.

Magar d'un encadene al primer pegue, con una sensación tan bona como la que tuve, solo quedábame colgar de la cuerda y esfrutar del pegue de Vicen a Sinfonía de Paz, nuna posición de privilexiu, jeje. Vilo perfeutu, falló nos pies o más bien nel pie, al llau de la chorrera y nun llegó a la laxa d'esquierdes... una pena, pero tienla más que de sobra.

La Manzanea sigue dando los sos frutos... semando día a día, pasando de mediu grau en mediu grau, vamos faciéndonos con toles víes d'esti seutor. Agora, vamos dir a pol 6b+ que quédame por sacar y pasaremos al guapu mundiu de los 6c's.

-----------------------------------------------------------------------------  



21 y 22 de Xunu de 2013

Raro ye, o quiciás mui raro, que vaya dos vegaes siguies y en díes siguios a la mesma escuela a esguilar. Tien qu'haber un motivu fuerte, casi una necesidá vital pa tornar al día siguiente al mesmu llugar. Esto pasóme, el vienres 21 y el sábadu 22 de Xunu.

De vienres fuimos, Berto, Pau y yo, a pasar la tarde tranquilamente na Manzanea. La primera intención yera, dir al seutor de la Cantera, pa que Berto y Pau, intentasen Gaiteru (V+) de primeros y taben bien convencios d'ello, pero cuando llegamos taba la vía de calecer ocupada y decidimos dir al Central.

Apretando'l vienres en Sinfonía de Paz (6b+)

 Ellí, dempués de calecer un pocu cola vía Rio Negro (V+) y que la probasen Pau y Berto, teníendola tamién pal próximu día como posible pa encadenar de primeru, metíme a por Sinfonía de Paz (6b+), que conociérala'l día anterior con un pegue a vista, fallando'l pasu clave, tanto Vicen como yo.

El tema tuvo, en que nun dió tiempu a meté-y otru pegue y colé de la escuela, camentando que ya taba pa encadenar, al tirar hasta riba, dempués de guetar la solución o eso albidraba yo. El vienres, dime con tola dureza d'una vía,que nun ties inda pa resolver y eso supuso 4 pegues frustrantes, marchando de la escuela col mal rollu, de nun saber como algamala.

Gus sacando la cabra tira al monte (V-) a vista

Pero como dizse per ehí... ensín semar nun se pue recoyer, asína que'l sábadu pela tarde, volvimos Berto, Gus recién llegáu d'Ibiza de vacas y yo hasta Manzanea. Con un día pelín más calurosu que l'anterior, metímonos con tranquilidá na Cantera, pa que'l mio hermanu ficiese a vista la Cabra tira al monte (V-) y casi sacase Gaiteru (V+) quedándose nel tramu clave na parte cimera de la vía.

Berto, tamién fizo de primeru'l V-, pasando dalgún nerviu qu'otru y llueu prefirió da-y cola cuerda penriba a Gaiteru, la cual en cuanto vaya garrando puxu en víes de primeru ya la tien pa encadenar ensín problemes. Yo personalmente, sigo a lo míu, dedicándome a asegurar, ya que noto'l cansanciu d'ayeri y van sobraos los dos, jeje.

Gus a tope nel Gaiteru (V+) que nun salió a vista por pocu

Con un bon trabayu fechu, decidimos tirar pal Central, onde ya diba siendo hora de meteme en farina. Ensín calentar en nenguna otra vía siquiera, métome en Sinfonía de Paz (6b+), faciéndo la parte inicial con tranquilidá hasta la chorrera, la cual supero chapando col cruce de dreches y caigo como siempre nel pasu clave por intentar garrar el cantu blancu de triceps y mover mal los pies.

Nun me desespero nin media, supongo que ya taba abondo desesperáu ayeri, jeje. Poro, prebo'l pasu xubiendo los pies tolo posible, de la ñapa d'esquierdes y del furacu de tres deos, pa bloquear nel cantu blancu n'invertiu y llanzar al cazu llateral d'esquierdes.... y fechu... ya tengo la secuencia de los tolanos.


7 pegue en total a la vía...

Hala, agora toca descansar un ratín, así que meto al mi hermanu y a Berto a pegarse con Rio Negro de primeros. A Gus nótase-y que vien relaxáu d'Ibiza y fálta-y un pelín pa sacar el pasín, pasándo-y lo mesmu a Berto tamién, sicasi, les sensaciones son bones anque nun me presta que salgan pela manzorga pasándose a la vía Hielo Brillante. 

Pa la próxima, a da-y con ganes y a salir pel sitiu correutu, poro dexamos les cintes y la cuerda pa que la repitan, demientres-y metó'l pegue definitivu a Sinfonía de Paz. Y cola relaxación, de saber como tengo que facer les coses, tiré con xeitu hasta la chorrera y chapé ensín problemes xubiendo pies y pegándome a la chorrera pa bloquear d'invertiu y llanzar cenciello al cazu vertical salvador.

Agora sí, ya la tenía... namái quedaba chapar la siguiente y descansar na fisura un ratín, pa dir algamando pasín a pasu de resistencia, superando les barrigues hasta la cabera a reunión. Nun diba ser cuestión de cagala, dempués de tanto esfuerzu, asína que descanso un ratín y métome pelos caberos cazos hasta chapar la cadena, muncho menos cansáu de lo camentáu.

... y Sinfonía de Paz (6b+) encadenada finalmente

Como me presten, les víes algamaes faciéndose les coses como les tenía metíes na tiesta. Llueu,... magar de sacar los pasos bien executaos, too paez más cenciello, pero na rialidá, tol procesu de deprendizaxe hasta l'encadene de la vía, ye lo que déxate meyor tastu si cabe.

Col trabayu fechu, agora tocaba pasalo bien y como non, a eso vinimos toos. Tanto Berto como Gus, quisieron prebar Sinfonía de Paz, pa conocer de la so man, que ye eso de garrase a una chorrera. Los dos cola cuerda penriba, pasáronlo de luxu, apretando pola chorrera p'arriba y volando un pelín nel pasu clave, pero asína tamién depréndese.

-----------------------------------------------------------------------------  

12 de Xunu de 2013 

Un día más, volvemos hasta la caliza de la Manzanea, pa siguir apretando un puquiñín. Nesti casu, a los ya avezaos, Sonia, Berto, Vicen, Celso, Pau y yo, va sumase Jandro, que dempués d'un día de montaña nel Monsacru, tuvo inda ganes de pasase a esguilar un ratín.

Pau caleciendo na Cabra tira'l monte

Con respeutu a la selmana pasada, siguimos avanzando y tanto Sonia como Berto, foron capaces d'encadenar de primeros la vía más cenciella de la Cantera, la Cabra tira al monte (V-). Tamién Jandro xubióla hasta riba cola cuerda penriba y nun digamos Celso que sábela de memoria ya, jeje.

Pau, tornó a tener bones sensaciones y magar del calentamientu na Cabra tira al monte, metióse con bon xeitu a pol V+ de Gaiteru cola cuerda penriba, algamando la cadena ensín dengún problema. Poro, ya tien un proyeutín d'encadene na próxima visita.

La verdá ye que préstame esguilar ensín más, pero nun soi mui amigu de repetir víes ensín xacíu. Sicasi nun tengo dengún problema en xubir les que seyan pa calecer deos, siempre préstame intentar dalguna vía nueva, dándome lo mesmu un grau qu'otru.

Vicen faciendo un de los V+ de la cantera

El casu ye que dempués de tener toles víes de la Cantera encadenaes, sólo quédame apurar un pocu a la xente a dir al Central, onde tengo mayores retos qu'intentar trepar. Dempués de sacar el día anterior, el 6b+ sin nome, al primer pegue poniendo les cintes, vime fuerte y ya tengo na tiesta sacar los otros dos 6b+ que queden nel seutor.

Así que, demientres Vicen, dába-y a Barrio San Lazaro (V+) pa que Sonia y Berto tuviesen trabayu que facer, Pau vino conmigo hasta Sinfonía de Paz (6b+) a ver que tal dábase. Y nun se dió mal, ya que nun salió a vista, ya que'l pasu clave, nun fuí a lleelo bien y tardé n'alcontrar la postura pa superalo.

Un par de pillaes de testerón y llueu camudé los agarres pa salir p'alantre hasta la cadena ya, eso sí lluchando cola mio falta de continuidá. Nun queda otra qu'encadenala otru día, porque'l turnu yera pa Vicen, que tamién llegó hasta la cadena, magar de dellos encamientos por mi parte y descansos na tirada.

Polo demás, otru guapu y calurosu día d'escalada en La Manzanea, onde siempre ye un placer venir. L'únicu problema d'esta escuela, ye la falta de chigre en pueblu... colo bien que diben entrar unes cerveces dempués d'apretar.

5 de Xunu de 2013

-----------------------------------------------------------------------------

Siguimos aprovechando'l bon tiempu, d'esta primer selmana de felicidá continua pol horariu y vamos facelo, llevando a Sonia y Berto a conocer la escuela de La Manzanea n'Uviéu. Tengo claro, qu'esta escuela va poné-yos un pocu nel so sitiu, ya que sabemos de lo bono d'entamar a esguilar n'Otura, en plaques tumbaes pero la verticalidá ye necesaria tamién, jeje.


Quedamos ellí con Vicen y Celso, que tamién anímense, poro cuando aportamos al pie de vía, preparamos la vía más cenciella pa que Celso esguile y como "La cabra tira'l monte", pues Celso p'arriba que foi, superando unu a unu, los problemes que-y diba dando la vía col sofitu del so pa, jeje. 

Apretando de primeros nos V+ de la Cantera (Gaiteru y el Carnudo)

Quiciás, facía tiempu que nun esguilara los V+ del Gaiteru y el Carnudo y animé a Pau, Sonia y Berto a metése de primeros nelles. Foi un error, ya qu'estes víes, tienen dellos pasos pelín duros y hai que conocelos pa saber salir p'arriba y la reciente reequipación nun foi lo que yo camentaba.

Ye más, nun soi mui a criticar, ya qu'estes coses faense munches vegaes "pol amor a la escalada", pero si foi con perres de la FEMPA, paezme una cagada pergrande, reequipar unes víes y facelo tan solo camudando unos parabolts por otros, ensín intentar ameyorar los fallos de seguridá d'estes víes.

Tamos en deportiva y el que quiera emoción y ambiente, tien na alpina a esgaya. Equí, nes víes "más asequibles" de tola escuela, nun podemos tener 4 metros pente les segundes y terceres chapes, anque hayamos pasado una primer barriga y tengamos una placa tumbada per delantre.

Mou asegurador ON!!


Pa entamar, nel Carnudo, la primer chapa ta n'escesu alta contando col escalonáu malu del pie de vía, poro si dalguien falla ensín llegar a chapar se calza una fostia bien guapa. Nesta mesma vía, pente la segunda y tercer chapa hai una auténtica barbaridá de distancia (unos 4 ms de xuru), sabiendo que si dalguien cae, va direuta a los bloques d'embaxo la primer barriga partiendo tolo partible.

Paezme, qu'al preciu de 2,65 euros les 5 unidaes de parabolt, nun ye una ruína asegurase, que xente que pue tar entamando a esguilar, vayan partise un tobiellu nuna mala cayida, metiendo un par de bolts más en cada vía.

Al menos, esto ye lo que deprendimos nel cursu d'equipamientu y colo que toi dafechu dalcuerdo. Munches vegaes camiento, que la xente qu'equipa, failo mirando dende'l so nivel y camienta que si esto ye fácil o tien un bon agarre y envede sobreasegurar les víes más cencielles pa los escolinos de la escalada, desprotéxelas enforma.

Vicen y yo a poneles en toprope

Magar d'esta "crítica", y coles cuerdes penriba tuvieron, Celso, Pau, Sonia y Berto, prebando y sacando hasta riba les dos víes, viendo qu'ambes son mui completes, con tou tipu d'agarres, pasos pelín de fuercia nes barrigues, placa tumbadina con ñapes y munchos pies a escoyer... vamos perfeutes pa la xente qu'entama, si tuvieren bien equipaes na so parte baxa, l'alta nun tien problema.

Polo demás, esti día tomémelu un pelín de descansu, dempués d'apretar fuerte ayeri nel Cadaval y tan solo quise dir prebar una vía que quedábame na tiesta dende'l branu pasáu, nel seutor Central. Yera un 6b+ ensin nomar, con unes ñapes gafiendes y pies piquiñinos, que facíen apretar y movese bien téunicu si queríemos salir de la placa clave.

Pau en toprope nel Carnudo, sacando perbien los pasinos de barriga

Metíme nella, ensín mayores premises que poner les chapes, pa llueu da-y un pegue a muerte y fui sacándola pasu a pasu, con cierta facilidá. Namái, tuve un momentín de motoreta cuando taba del agarre malu d'esquierdes pero nel intre, coloqué´l pie drechu nun piquín quedando equilibráu y saqué la mandrecha a la grieta que da fin a lo difícil de la vía.

Dempués, relaxase y esfrutar del restu hasta la cadena y baxar colgáu contándo-y a Vicen, lo sorprendente del encadene. Paez ser que tol iviernu, entrenando nel gym y nel roco como un burrín ta dando los sos frutos, ya que l'añu pasáu dempués d'un branu enteru esguilando nun fui a encadenala quedando pa prau col horariu ivernal.

Vicen, metióse nella con xeitu tamién y acabó llegando a la cadena, dempués de pillalu nun par de pasos. D'esta miente, ya tien una vía que-y dé ciertu picor, cada día que vengamos hasta La Manzanea. Sicasí, hai munchísimes más de sextu grau altín, a les que metese y siguir avanzando nesta escuela.

El próximu día muncho más...

-----------------------------------------------------------------------------

Hestoria na escuela de La Manzanea

Pues probáblemente, nun sepa contar les vegaes que tenemos visitada esta mítica escuela uvieína y lo más increyible, ye que nunca sacamos una semeya esguilando nella. Paez mentira pero ye asína, a ver si en posteriores actualizaciones somos a poné-y remediu.

Ye claramente'l llugar más afayaizu, pa entrenar práuticamente a diariu si vives na fastera central d'Asturies. Con un accesu rapidísimu, con bon aparcaderu pal coche y mirando pal sur, poro pue esguilase tol añu práuticamente con una temperatura agradable, tienlo too.

Asína ye, qu'en tardes de branu, seya como dir al roco, con bien de xente nes sos víes trepando. Eso sí, pa entamar quiciás nun ye'l meyor llugar, ya que práuticamente toles vies van del V+ p'arriba ya inclusu esos quintinos son duros de pelar.

Na última visita, Pau algamó la so primer vía de primera, con un V- esixente como dixe y si nun m'alcuerdo mal, yo taba trabayando los distintos 6b+ del seutor central, anque tengo como máximu grau un 6c+ del seutor cantera.

De lo que si m'alcuerdo bien, ye del picotazu d'una avispa nos quintos de la mandrecha na Cantera, que fízome baxar como un tiru de la cadena y a posteriori faceme les prebes d'alerxia al so velenu, por si les mosques y por un picor nel gargüelu al tar abaxo. Anque quedó en na, menos mal.

Polo demás, ye una maraviya dir xubiendo'l nivel nes sos víes, con un tactu de roca bonísimu, anque dalgo gastáu, por mor de tanta xente esguilando nes parés de La Manzanea.

2 comentarios:

  1. A ver si pones unas fotos para ver esas vías, con avispa y todo.

    Un abrazu

    ResponderEliminar
    Respuestas
    1. Ya te digo, paez mentira que teamos asína d'abandonaos coles semeyes. A ver si ponemos remediu pa la primavera.

      Un abrazu

      Eliminar