viernes, 3 de septiembre de 2021

L.lano (Quirós)

15 d'Agostu de 2021

Tornamos magar d'un añu, pela escuela de Quirós, nel L.lano, col envís de pasar el finde relaxaos, facer un pocu de bautismu escalador pa una collacia gallega y de pasu, ver si podíes apretar un pocu en dalgún regalín que me quedaba pendiente en forma de vía plaquera.

Bautismos esguiladores pel L.lano

Dempués d'una mañanina, de víes cencielles nel Escambelláu Inferior, vamos tornar al refuxu a tomar una cervecina y xubiremos de tarde hasta la Candela, onde vamos metenos Ruben y yo a Utopia, que la tenía pendiente dende cuantayá.

Kíla n'estáu de relax máximu na Candela

Esta vegada, tuve la suerte de dá-y un pegue coles cintes puestes por Rubén, lo cual sicolóxicamente aída enforma y pude llevámela al primer pegue, tachando una d'eses cosines que tenía pendiente dende visites d'antaño con Vane a Quirós.

L.lano (Seutores visitaos)

Croquis de la escuela d'escalada en: L.lano (Quirós) por mor de Mariño que m'empobinó a visitar la páxina de Piratas Free. Gracies y col so permisu.

----------------------------------------------------

29 de Xunu de 2021

Magar del finde per Llión y más en concretu pela fastera de Geras, siguí de viaxe hasta Teberga, onde ficimos parada pa durmir y al día siguiente continuamos hasta Quirós, col envís de trepar na so escuela más nomada, la del L.lano.

Les idegues taben clares, asína que xubimos hasta la Cubana, con un día murniu, nel que l'orpín y les ganes d'abrir dalgún claru diben xugando según pasaben les hores. Caún metióse a proyeutar na so vía, teniendo la idega d'enchufar la Brutus rapidín y xuntame a Iván ya Iso pa probar el Peregrino.

Semeyes del pegue d'encadene de la Brutus... a la fín

L'únicu problema, fue que namás meteme na vía, ya ví que nin físicamente nin de yemes diben les coses bien. Los díes anteriores, sufriendo na caliza llionesa pasaron factura y nun aidó muncho, tardar en sacar la secuencia de les 3 primeres chapes de la Brutus.

A la fín, al cuartu pegue del día, arrastrándome pela vía, con un sensaciones terribles, pudiéndome cayer a cada movimientu, fui capaz d'aportar a cadena y tachar esta vía, que tantos pegues costóme y ye que la Brutus, pesie a nun ser d'un grau perduru, ye fina y hai que dir convencíu y con ganes d'apretar pa encadenala.

Probando la Brutus en so día... hasta que salió

----------------------------------------------------

Añu 2020

Nun fue esti 2020 un añu nel qu'esguilase pela escuela del L.lano demasiáu. Pueu contar colos deos d'una man los díes qu'avereme per ellí, así que los encadenes tampoco ye que fueran mui significativos, poro espero nel 2021 apretar un pocu más na clásica escuela quirosana.

Anna encadenando la mítica placa del John

Magar d'un día de pegues infructosos a la Brutus, sí que pude llevame nel mes de Payares la mítica placa del John, al segundu pegue. Esta vía de regletes ínfimes y pasinos finos, probárala va dellos años, con Vane, pero hasta esti día soleyeru nun la pude enchufar, sacándola tamién al tercer pegue Anna.

Kíla esfrutando de los pies de vía na Candela

A final d'añu tamién pasara per ellí otru finde con ganes de xubir a la Cubana y encadenar la Brutus d'una vegada, pero quedámonos coles ganes por mor del petazu esistente en casi tolos seutores, asina que tuvimos que tirar d'imaxinación faciendo'l primer día, una clásica que me faltaba como ye Andrómeda (6b+), vía cabrona onde les haya.

Andrea esguilando sele al solín de la seronda
 
Al día siguiente, fuímonos hasta Asterix, cola intención de qu'Anna encadenase Asterix, lo cual fizo al segundu pegue, esguilando de luxo y yo tuve la oportunidá de pasar mieu, caleciendo deos en Patinas Plisi (6b de diedru) y probando Tentación, un 7a de bloque mui guapu d'escalar, que nun salió, pero que sí que me prestó muncho probar.

Gelu, Tolo y Santos apretando en Ardillas

Nel seutor un pelín más arriba, Ardillas, en branu, tuviera dándo-y un par de pegues a la Jabalí, vía perguapa a la que tengo intención de tornar y asediar si fai falta, ya que tolos movimientos préstenme y eses víes son les qu'al final faen aumentar el nivel de motivación, pero ya sedrá pal 2021.
----------------------------------------------------

Añu 2019

El 2019 fue un añu intensu en trepaes en Quirós, a la escontra d'otros años nos que tiraba más pa Teberga, esti añu, anduvimos trepando muncho tamién nel L.lano y aunque nun tuvimos a fueu con proyeutos mui duros, sí que fuimos a encadenar dalgunes víes a les que teníemos-y munches ganes.

La preciosa placa de la Asterix... un retu téunicu y mental

Una de les que más me prestó sacar, nun momentu nel que nun taba esguilando de cabeza mui bien, fue Asterix, ya que una placa vertical nesti estilu, téunica y con ciertos pires nos que nun presta muncho esnalar, volvíame un pocu la cabeza lloca... aún así ficímonos con ella nun pegue nel que disfruté un montón encadenándola.

Díes mui fríos probando Efectos Especiales nel Escalón

De seutores nos que nun paré muncho como Asterix y Ardillas, nel que tuve probando la homónima y viendo como dellos collacios, apretaben enforma nos sos respeutivos proyeutos, como Gelu, qu'en dalgún día de los que tuve per ellí, entamara a probar Balada de Otoño, un 7c increyíblemente estéticu de muncha fuercia y desplome na metá de la vía.

Gelu trabayando la potente vía Balada de Otoño

Más tarde, totalmente fanáticu yera a llevásela, mientres personalmente volvía a visitar seutores tan míticos como l'Escalón, onde tenía pendiente un par de víes a les que-y tenía bien de ganes, como'l Corner (7a) y sobretou Efectos Especiales (7a+), onde tuve una llucha perimportante de varios díes.

Pegue buenísimu nel primer día de prebes na vía

Aparte del encadene d'estes dos víes, tamién ficimos Depiedradores (6c+) a vista nel Escalón, ya intentamos volver a ganar confianza n'otros seutores como la Candela, onde les víes me siguen costando una barbaridá sobretou no mental.

Probando la Brutus... Quirós ye así... toca pisar y apretar regleta

Y como non, tamién tuviemos dándo-y a los guapes plaques de la Cubana, faciendo poniendo cintes Sol y Nieve, pero pringando la Brutus, na que rompí un cantu cuando diba encadenando y salí volando quedando l'encadene pa otra visita qu'espero nun seya a mui tardar.

L.lano (Seutores visitaos)

Croquis modificaos por mi de la escuela d'escalada en: L.lano (Quirós) por mor de Mariño que m'empobinó a visitar la páxina de Piratas Free. Gracies y col so permisu.

----------------------------------------------------


16, Setiembre, 29 d'Ochobre de 2017 y 14 d'Abril de 2018

Va tiempu que nun actualizaba les mios visites a la escuela de L.lano en Quirós y eso qu'en dalguna d'elles y too, acabé cola mió perillina, qu'acompañábame dende cuantayá. Sacante d'esto, tuvimos perbonos momentos y muncha escalada durante los díes pasaos per Quirós.

Día mediu espeyáu y parés secos pa la maratón quirosana

Quiciós de los más importante, destacar la tercer maratón d'escalada de Quirós, onde tuviera formando pareya con Vane y acabamos con una reventada épica, con 17 víes pa min y 21 pa Vane, inmersos nuna intentona de facer 23 víes caún pa llimpiar tres seutores completos.

Premios y comedia a partes iguales

Sicasí, nun lo algamamos, pero ficimos bones víes, en seutores como la Candela, L.lano y el Ventolín, nos que pocu o nada tenía esguilao. Poro, sacante de facer más o menos víes, prestóme conocer un pelín más esta mítica escuela.

Un pinchín de chorizu? Kíla atenta a la xugada

Como tábemos lluchando na categoria inferior, tampoco ye que tuviésemos enormes encadenes de grau, pero sí una xabaz paliza por encadenar al primer pegue toles víes, cosa que fue imposible acumulándose'l cansanciu de tantes víes.

Jose y Pepa apretando nel pañu de Ventolín

Otros díes de visita, tamién anduvimos per estos seutores conociendo dalguna vía más como Sensación Multicolor nel Ventolín, la cual encadené a vista, pudiendo dar llueu los collacios Pepa y Jose unos peguinos en top bien prestosos.

Kíla entretenida con vistes a los valles de Quirós

Per últimu, xubiéramos otru día que Teberga taba pingando hasta'l L.lano, col envís de facer dalguna vía más que nos motivase a Vane y a mí, calentando na imprescindible Candela, pa dempués enchufar la so variante y probar Utopía (7a) que como non me dexé nel tinteru como suel pasame nos últimos tiempos.


---------------------------------------------------------------------------------------------

11 de Febreru de 2017

Otru día sueltu per ehí con munchísimes ganes de salir a roca y como non, tiramos pa Quirós, sicasí les condiciones nun yeren les meyores pero pasar el día al aire llibre siempre ye un bon reclamu, anque temos col plumes enriba tol día.

Asína qu'ensin madrugar muncho, tiramos pa L.lano la xente davezu, decidiendo dir al Ventolín ya que ye un llugar soleyeru, anque cuando'l sol nun apaez pocu nos va importar finalmente. Enantes d'aportar al seutor decidimos parar a probar les víes de Pingadura.

Pasando un día fresquino pel L.lano

Metémonos na vía que da nome al seutor, cotáu de V+ y como non, un V+ que da nome a un seutor ye un V+ duru y perru, el cual pringo y tengo que da-y un segundu pegue y los collacios casi nun son a sacar en top... vamos, V+ clásicu y cabrón.

D'esti xeitu, quítanse-y les ganes a ún de too, poro pasamos de facer más el tuntu en Pingadura y tiramos pa Ventolín a ver si hai dalgo que pescar. Entamo faciendo la Ventolín y como non otru V+ que da nomatu... vía clásica de diedru y fisura... muncho más guapa pero que tamién díxome a les clares que nun yera'l mió día.

Kíla a lo suyo per Quirós

Pa terminar faigo la variante de 6a esta vegada cola calma y decido nun esguilar más ya que nun paga la pena marchar quemáu si me meto en dalgo más duro. Hai qu'apretar cola cabeza nel so sitiu y güei nun yera'l día.

Ensin más... nun día pocu favoratible pa grandes fazañes esguiladores... retirámonos a echar unes cerveces al refuxu y por n-enésima vegada dígome qu'hai qu'entamar a entrenar en serio, que ya llega la parte l'añu fuerte na escalada.

----------------------------------------------------------------------------

8 de Mayu, 4, 8 de Xunu, 17 de Setiembre, 15 d'Ochobre, 26 de Payares y 8 d'Avientu  de 2016

Como se puede ver, na cantidá de díes que tuviemos durante la segunda metá del añu, Quirós y la so escuela del L.lano, fue diríamos el llugar preferíu pa trepar pol grupín. La verdá, ye que tuviemos en milenta sitios, pero lloñe de los tiempos onde meneábame deprendiendo na Selva y el Escalón, pueu dicir qu'esti añu conocí muncho más, la grandeza d'esta escuela.

Richar apretando y Haritz y yo faciendo varios llargos

Y ye que nun sólo vive l'escalador d'estos dos seutores y con movese un pocu más arriba, pa un llau o pal otru, pues pasar d'un llugar masificáu a tar trepando colos tos collacios sin que naide más te moleste. Aún así, hai que dicir que les primeres visites, sí que fueron pa la Selva o el Escalón, pa que los que tan iniciándose pudieren trepar y por suerte pude aprovechar pa facer víes de varios llargos... facilines, pero de varios llargos.

Haritz arguyosu posando cola Pena Ruea detrás... y los collacios al pié de vía

Pero si dalgo fué importante esti añu y casi merecía un capítulu aparte, fué la maratón d'escaladores nel L.lano. Nunca fuí de participar nestes coses, pero animámonos Richar y yo, pasando un día brutal nel que nos dedicamos a conocer nuevos seutores.

Otru día trepando nel Escalón con dalgún llarguín qu'otru

Llevábemos un plan fechu, que nun sería'l meyor pa ganar, pero col que más díbemos disfrutar, poníendonos un grau máximu de 6b pa que pudieramos intentar les víes los dos. Entamaríemos por Gris, faciendo les víes que taben nel papel hasta esi grau y descendimos hacia la Invisible.

Esguilando n'Asterix nel maratón d'Escalada

Ellí, notóse'l cansanciu y Richar tuvo que repetir alguna pa enchufala, baxando un pocu más hasta Asterix, onde alcontrámonos con Marie y onde ya gastamos toles fuercies que nos quedaben. Nesti tiempu llegaron tolos collacios p'animanos ya intentao la OGIPO pa contentar al so aperturista y gran fotógrafu (Pedro José Cocho), acabé equivocándome faciendo la directa (Xareu - 6b).

Semeya de grupu nel L.lano

Llueu caería la propia OGIPO, col so primer llargu, faciendo tamién El Jardín de las Nueces y Encanto, dos 6b guapísimos. De Asterix, marchamos reventaos por si podíemos facer dalgo más nel seutor del L.lano, pero tan sólo nos daría pa un par de 6a's col tiempu pegáu al culu.

Nel L.lano probando víes plaqueres

Pasámoslo podre, pero tuviera cansáu casi tola selmana dempués, sobretou porque magar de tar de rises na espicha a posteriori, tiráremos a durmir a Entragu, onde continuamos un pelín más de comedia y al día siguiente tocara dir col grupu a los Picos del Fontán.

Otra visitina a la Cubana esta vegada

Les demás visites, ya cola seronda bien entrada, repartiéronse pente'l L.lano, onde finiquitáremos les víes facilines nesa segunda visita y la Cubana, seutorazu que tando a diez minutos más de la Selva, quita tola masificación del pié de vía, tando solos y trepando per unes víes de muncha calidá.

Tornando a facer varios llargos na Selva

En resume, en tantos díes tuviemos un pocu de too, faciendo víes de varios llargos, cosa que prestó enforma, tuviemos de maratón con grandísimu ambiente, trepamos en seutores desconocíos pa mi, pero fáltame un pequeñu detalle pa dir motivadísimu al L.lano... metéme en graos de sétimu y apretar.

De xuru, que pa la próxima visitina ponémonos a trabayar duro.

Despedímonos esti añu 2016 del L.lano

----------------------------------------------------
13 de Marzu de 2016
Nun domingu preciosu, espiértome y nun tengo plan dengún, asína que sondéu nel grupu d'esguilar del Xuan de la Borrina y alcuéntrome cola guapa sorpresa de que Richar y Zori apúntense a dir a trepar un ratín.

Día preciosu nel L.lano en Quirós... con L'Aramu ñeváu al fondu

Como tan entamando, decidimos tirar pa Quirós y que meyor llugar pa que Zori faiga les sos primeres víes de primera que nel Escambelláu Inferior. P'allá tiramos, con tola calma del mundiu, aportando al L.lano casi a la una de la tarde.

La pareya esguiladora nun día bien prestosu

Aprovechando la ocasión, tiramos de pequeñu cursín d'escalada y pente vía y vía, de primeros los dos, súbome hasta una reunión y enséño-yos un par de maniobres pa salir de dalgún marrón y de pasu rapelen tamién.

Zori y Richar col picu Gurrión detrás

Lo demás, trepar, trepar y trepar, con Zori algamando tolos IVs del seutor de primera y Richar sacándose aparte d'estos, un par de V+ de bon valir, pa colar d'ellí más qu'a gustu los tres. Nel mió casu, tocaba aselar y pasar el día al sol en bona compaña.

Apretando un pocu nel Escamelláu Inferior

----------------------------------------------------
23 d'Agostu de 2014

Un día d'Agostu, soleyeru y guapu como pocos, tiramos colos bocates, les mochiles y ganes d'apretar hasta'l L.lano onde va un añu que nun diba. Cada día que pasa, cuéstame más facer kilómetros pa dir a escueles enforma masificaes... quédome cola tranquilidá de mis escuelines de la redolada d'Uviéu.

Vistes de Valdemuriu dende'l seutor L'Escalón

Averámonos hasta la Selva, onde ente otres víes feches, destaca'l conocimientu a la fín del tercer llargu de les Ablanes, al cual tenía-y bien de ganes y nun defraudó. Anque dicir que como V+ ye bien durín, ya que tenemos un entamu desplomáu al que sigue una placa téunica na qu'hai filar fino p'aportar a los meyores agarres.
Saludando dende la reunión intermedia de les Ablanes

Echamos un ratu mui grande Alberto y yo, pa facer tola vía entera y al aportar al suelu de nuevu, Pau y Haritz taben ya cola xinta y casi cola siesta jeje. Con poques ganes, animamos a Pau a dir hasta L'Escalón onde ya a la solombra, metiéronse Hartiz y Alberto a probar tol garrapiellu de IV's o V's qu'hai equipaos.

Apretando nes víes de L'Escalón

A ellos xunióse Pau, que picóse al velos sofrir nes víes y allá metióse con mui bon xacíu, aportando hasta'l final de la vía que nin Hartiz nin Alberto fueren a sacar. Una pena, que tuve que pillala na barriga, porque yera un bon encadene.

En dificultaes colos V's del seutor

Personalmente, dediquéme a asegurar, con una especie de sensación de falta de ganes d'apretar y de meteme en nuevos proyeutos. El branu ta siendo malo, ensín avanzar nin en grau, nin n'estáu de forma... el declive taba siendo más fondu a cada día que diba esguilar y lo pior yera les poques ganes d'entrenar en víes asequibles tampoco.

 ----------------------------------------------------

18 d'Agostu de 2013

Más d'un añu facía que nun apaecíemos pol L.lano en Quirós. Otra vegada la pereza, llevónos a desdexar quiciás la escuela más nomada d'Asturies, por mor d'esos kilómetros de más hasta tan guapu llugar. La última vegada, sacara p'alantre un potente 6c como ye'l Timo.

Esta vegada venimos a recuperar sensaciones perdíes, sobretou Pau, qu'esti añu ta costándo-y ganar confianza a la hora d'esguilar y ta un pelín allancada pa con tirar de primera en delles víes. Poro, que meyor llugar que'l seutor del Escambelláu Inferior pa tirar víes de primera.

Pegándonos en distintes víes (Natalia, Paulina, Yo y Berto)

Como ye vezu esti añu, acompáñenmos Berto y Natalia, que tamién teníen ganes de tornar per equí, ya que ficieron los sos primeros pegues nesta escuela, a la man del mio hermanu. El problema d'esti seutor, ye que pega'l sol hasta'l mediudía y güei yera un día d'un calor casi insoportable.

Aún así, durante la mañana, pudimos facer delles víes, destacando l'encadene de Pau a una vía que tenía dalgo atragantada, el IV+ de la manzorga'l seutor. Natalia, tuviera faciendo delles víes de primera con mui bones sensaciones y Berto decidió reservase pa los V's.

Primeros pasos de Pepe no me des tormentos (6b)

Personalmente, venía con poques intenciones más que da-y a dalguna vía n'autoprotección, pero metíme namái nel IV+ de Pau, teniendo mui poques oportunidaes de cacharrear, así que nin siquiera eso. Menos mal, que día la vuelta al paré y alcontréme coles víes fuertes d'esti seutor.

N'alcordanza tenía los munchos pegues a Primera en Otoño (6a), la cual costárame una barbaridá sacar nos años anteriores. D'aquella nin siquiera veía posible facer les entraes a les sos compañeres, pero güei con solo mirales paecían asequibles.

Saliendo a la placa ensín baxar muncho la intensidá de la vía

Asína fue, que dempués d'estudiar un pelín la entrada a Pepe no me des tormentos (6b), encadené esta vía, casi ensín sabelo, ya que durante'l 80% de la vía, camentaba tar dándo-y dende un pasu intermediu envede dende baxo.

Dempués del entamu a bloque de fuercia, vien el restu de la placa, perguapa de tirar, teniendo un pasín de muncha confianza nos gatos, hasta aportar a la reunión. Dicir que la reunión ta puesta, con dos argoyes namái y que los equipadores ya podíen-y tirar unos metrinos hasta un nichu estupendo onde non morrer colos gatos puestos demientres faes la maniobra pa poder descolgase.

Kíla sofriendo los rigores del calor

Finalmente, Berto tuvo apretando y encadenando tamién el V a la manzorga d'estes víes. Dicir qu'hai como dos entamos, con chapes a la mandrecha de la vía inicial, pero que nun paga la pena metese nelles, ya que al tercer chape, toca facer travesía hasta la vía normal pa continuar hasta una reunión vieya y fea.

En resume, un bon día, demasiáu bon día, pa tar esguilando nesti seutor del L.lano, pero qu'esfrutamos tornando a esta escuela y albidro qu'a non mui tardar vendremos de nuevu a engolanos d'estos ablucantes parés calizos.




Actualización 2012

De los pocos años que llevo trepando y menos na roca, esti añu, foi claramente'l que menos tiempu pasé na escuela quirosana del L.lano. Quiciás, la pereza de facer más kilómetros qu'a otres escueles más cercanes llevónos a nun pasar tantos díes ellí.

Aún así, de lo poco nuevu que fice nesta escuela esti añu, siempre tendré na tiesta, los munchos pegues al Timo (6c) nel seutor de la Selva, qu'al final fui a faceme con ella nun segundu día d'intentos, colando de la escuela con tastu a vía guapa y dura anque seya cortina.

Sonia, Gus y Pepín apretando nel Escambelláu Inferior

Pal añu 2013, camiento que les visites al L.lano, van incrementase muncho, por mor, de trabayar les víes de varios llargos, qu'abunden más nesta escuela y tamos enfotaos, Pau y yo, en metenos más a fondu nel trastéu de reunión en reunión.

----------------------------------------------------------------------

Hestoria na escuela del L.lano (Quirós)

N'alcordanza de Sergio Breñas, escalador, monitor y refuxeru del L.lano

Que la tierra te seya lleve!!! (16-07-2011)
 


Ya son unos años los que llevo esguilando nesta escuela del L.lano en Quirós y nun hai más que satisfacción y bonos díes d'esguile. Poquín a pocu vamos progresando nestes parés en tolos sentíos.

Nun ye solo que vaya pegándome con graos más difíciles, sinon que cada día vamos siendo un bon garrapiellu de collacios, los que quedamos y pasamos unos díes o tardes de lo más entreteníu escolingaos de la caliza.
 

Vidios (2011)



Semeyes (2011)


Paula, Berto, Pangua y Silvia

Semeyes (2010)

Un par de semeyes de Silvia y yo esguilando nun V del Escambelláu Inferior

La hestoria mía con esta escuela d'escalada entamó así...

Taba yo naguando por facer un cursu más d'esguile, pero prestábame muncho más facelo en roca. Asína que tuve sollerte a los cursos de la federación asturiana de montaña, y dempués de que la xente animárase de primeres, casi quédome solu pa dir finalmente. Menos mal que Cesar acompangome y a él una collacia del so trabayu.

El cursu facíase nel pueblu quirosanu d'Aciera onde ya tuviéramos esti iviernu faciendo'l Cordal de Caranga enteru. Pa llegar a Aciera, facemos el míticu camín en coche dende Xixón, que nos lleva per direición Uviéu a Trubia, Proaza, y esta vegada envede tirar pa Teberga, garramos l'otru ramal de la senda l'Osu, hacia Bárzana de Quirós, y a l'altura del banzáu de Valdemurio, la carretera tien un cruce a la manzorga que llévanos rápidamente al pueblu d'Aciera.

Banzáu de Valdemurio y valle de Quirós


Más en concretu, les víes tan averaes al pueblu de L.lano, que ta penriba del pueblu d'Aciera, pero ye bien difícil dexar el coche ya que solu hai 8 places y "los verdes" tan al tantu, pa dexar recetes méliques, males dafechu pal bolsiellu. Entos el tema ta en aparcar n'Aciera onde hai un parking y caleyar hasta L.lano y d'ehí a les parés.

Otru problema ye que'l parking ye priváu del bar, asína qu'hai que consumir dalgo, enantes o dempués, pa "agradece-y" l'usu del parking. Eso sí, si vas durmir nel refuxu de L.lano, y el dueñu entérase, date por echáu, como me pasó a mi. Tuve la suerte de tener enriba, una d'eses places en L.lano y el anormal del dueñu del bar, quedóse ensín que baxáse a cenar al so bar. Coses d'un paisanu intelixente que mira pol so negociu. En fin,...

El casu ye que axúntamos tolos cursillistes y monitores nel parking d'Aciera y dempués de repartir el material xubimos al seutor nel que dibemos esguilar: La Selva




Seutor de La Selva


Ellí ponémonos bien ceo a esguilar, ya que dempués d'unes rápides clases de nudos y material (lo xusto pa ponése a esfrutar de la paré) ya pusímonos a facer víes hasta la hora de xintar daqué. Nesta parte ficímoslo en top-rope, ye dicir cola cuerda penriba en tou momentu, pa pola tarde ya enllazar víes de primeru, asegurando ún mesmu a cada tramu de vía.


Dos compañeros de cursu en les víes de los elfos


Esguilando nos Elfos


Aparte, del tema de material y seguros, lo que más me prestó d'esti día ye la importancia de los pies, de tirar de pata y de guetar los agarres, muncho menos nidios que nel roco. Taba yo demasiáu avezáu a facer el burru nos rocos faciendo búlder y tirando de brazu. Como non, la roca natural, l'altura y les vistes dan un puntu más a favor d'esti deporte.

Dempués de tol día esguilando, tocaba baxar al chigre a echar unes cerveces y comentar hestories d'escalada y de too en xeneral, con muncha xente que taba nes parés de Peña Caranga.


Seutor de L'Escalón



El segundu día, dempués de descansar lo xusto nel refuxu (nun soi a durmir demasiáu nunca), un bon desayunu y p'arriba. Esta vegada díbemos averanos al seutor de L'Escalón. Al mio parecer muncho más guapu que'l del día anterior ya que les vistes sobre'l valle Quirós son ablucantes.


Na guapa paré de L'Escalón


Dempués d'esperar un ratín a que dexáse d'orbayar y a que secáse la paré, tornamos a facer víes en top-rope con dalgo más de dificultá que les del día anterior nos Elfos, así qu'hasta la tarde nun se intentó facer dalgo de primeru, dempués de que deprendiésemos a rapelar y asegurar una reunión sin mosquetón.


Asegurando a los escaladores


Al final, dicir namái, que si quédome un día más per ellí, dexo too, y vivo na paré, jeje. Poques coses tan adictives hai como buscate la vida nuna paré y sacar alantre coles manes y los pies una vía, ya sea de menos o más dificultá, el sentir será siempre de superación d'un mesmu.

Esta entrada qu'entama como resumen d'un cursu quedará pa dir actualizando les dixebraes víes d'esta escuela que vaya faciendo, ya que nun pienso dexala nel escaezu y tornaré siempre que pueda a pegame coles sos parés.

6 comentarios:

  1. Estimáu amigu:

    Écho-y dacuando una miradina al to blog, que ye una rabasera d'aire fresco a los que nos presta'l monte y non siempre se nos fai fácil salir. Amás, dacuando triamos los mesmos caminos, polo que veo. Namás una pequeña observación toponímica: el llugar de Quirós onde ta la conocida escuela d'escalada nun ye "El L.lanu" (que ye una forma refecha sobre la castellanización oficial) ye "L.lano". Yá sé que suenen un poco pedantes estes puntualizaciones, pero ye nesti casu cónstame la batalla personal que tien ún de los últimos nacíos en pueblu (un paisanín mayor, de los de tola vida) en defensa del nome del so llugar y creo que merez la pena honrar esi enfotu.
    Dígotelo namás como información particular; nun fai falta que lo publiques si nun t'apetez.

    ResponderEliminar
  2. Na, tuvo buscando info toponímica y nun alcontré demasiáu, aparte de qu'inda nun ta fecha la revisión de la xunta toponímica. Voi camudalo agora mesmu.

    Mil gracies, por lleeme de xemes en cuando, y por puntualizar cosuques toponímiques. Nun tenía nada claro como yera'l nome'l pueblu.

    ResponderEliminar
  3. 92 entraes al blog nel primer día d'espublización de "Orbayu Seco". Tamos faciendo historia, gracies pola to collaboración. Blogsaludos.

    ResponderEliminar
  4. Finalmente la revisión toponímica del pueblu lu dexa como El L.lano, asína que collaciu anónimu.

    Tabes no ciertu, y el paisanu que lu lluchó, algamolu asína que norabona pa él.

    Saludos

    ResponderEliminar
  5. Sherpa, pa mi idega que ye la escuela más mítica de toda Asturies, y con tal cantidá de distintos grados y víes, que siempre ye un placer escalar allí.

    ResponderEliminar