martes, 26 de julio de 2016

Travesera Picos 2015 - 2016

Del 8 al 11 de Xunetu de 2016

Track: Travesera Picos 2015 - 2016


Un añu más, dende casi la formación del GM Xuan de la Borrina, facemos la traca final montuna cola Travesera de los Picos d'Europa. Cuantayá, díbemos dando los nuesos primeros pasos serios per tan nomáu tarrén de xuegu y agora cuéstame decidir per onde trazar les distintes estayes pa conocer daqué nuevo.

Siempre hai problemes, baxes y altes por llesión, por problemes pa tener dalgún día nel trabayu,... pero esti añu superáronse con creces, volviéndome llocu colos refuxos, menos mal que portáronse y finalmente llibramos les perres adelantaes, sin mayores contratiempos.

Grupu de salida del sábadu... tou yera cares sonrrientes

Con too, con más o menos xente, con pior o meyor tiempu, salieron grandes xornaes de monte, esfrutando los pocos o munchos que ficimos la Travesera día tres día, anque hai que dicir que fízose dura y dalgunos pueden dar fe.
Equipín de sofitu furgoneteru... así presta pola vida

Tanto, que dalgunos avezaos al monte esti añu, como Benjamín, siendo de los más animosos pa cualesquier ruta que propongamos, el segundu día de Travesera daba saltos d'allegría por poder abandonala y dirse a la so casina, jaja.

Vista típica de les aguyes de Peñasanta dende Vegagüerta

Y ye qu'esti añu, tuviemos la "suerte" de contar con Fernan en mou de mochileru, llevando la furgo de coche escoba. Sólo fue'l finde, pero diónos la oportunidá de cargar con mochila d'ataque nes dos primeres xornaes y eso notóse enforma.

Segundu día saliendo dende Cordiñanes

El percorríu trazáu yera novedosu en dos coses: facelo completamente circular per primer vegada y la segunda que'l nuesu camín diba llevanos hacia'l cordal Cantábricu, lo qu'hasta'l momentu nunca pasara en tolos años de Travesera.

Aportando a Santa Marina... magar d'otra estaya bien dura

D'otra miente, esti añu nin raspiamos casi un centímetru de tarrén asturianu, lo que llevónos a patiar y conocer los conceyos llioneses de Sayambre y Valdión, teniendo los aloxamientos en Sotu y Vegabañu de Sayambre y en Cordiñanes y Santa Marina en Valdión.

Tres supervivientes... quedaben pel cordal cantábricu

Como nota perpositiva: dar les gracies a la Pensión El Tombo, qu'anque serios tuvieron a bien danos un pelín de marxe, ya que'l primer día llegamos a la cena polos pelos, al igual que nel refuxu de Vegabañu, teniendo que duchanos dempués de cenar incluso.

Vegabañu tarde y pente'l borrín

Casu aparte tenemos col Albergue La Ardilla Real de Santa Marina, el cual sorprendiónos gratamente, tanto nel tratu, la cena y el bon ambiente que vivíase nel bar, cola única pega del almuerzu que yera pelín tarde pa una xera montañera como la que teníemos per delantre al día siguiente.

Salíemos con bien de ganes de Vegabañu

La nota mui negativa, fué la xinta en Sotu, qu'aparte de ser más secos qu'una mierda diéronmos una comida que nin un refuxu a dosmil metros. Tien coyones, que la cena de Vegabañu fuera de restallu y que nun pueblu póngante nel menú del día (cobráu caru) les mítiques albóndigues de perru que pues topate n'Urriellu cuando aquello ta que nun s'entra.

Acabóse'l suañu... perdifícil les condiciones pa la traviesa

Ciertamente... de pena l'Hostal Peñasanta... nun me verán per ellí na vida y más dempués de tener qu'abandonar los nuesos oxetivos na última estaya por mor de les condiciones tan males pa facer el traveséu de Peña Beza.

D'esti xeitu, fináremos la Travesera, ensín traveséu del últimu día y con una xinta permala pa rematar. Pero bono, esto ye asína, dos díes tiempu inmeyorable y otros en que'l borrín xugónos una mala pasada y ficimos lo que pudimos siempre dientro d'unos mínimos de seguridá.

Cansaos pero contentos en Sotu de nuevu... anque con un pocu de mal tastu

Una vegada más... dar les gracies a los collacios que participaron y a los que finalmente nun pudieron por dellos motivos: Fernan (por ideala anque nun pudieras caleyar nin un día), Mariano, Feli y Oscar pol sofitu y Bittor, que cayóse de la convocatoria a última hora, toos dende Euzkadi.

Dende Asturies, gracies a Alberto, Natalia, Benjamín, Zori, Richar, Dani y Haritz. Sé qu'esfrutastes de xornaes perbones de monte, anque sufriérais polo llargu del camín. Una alcordanza pa Charly, que por motivos de trabayu nun pudo asistir y a Cesar que tamién quedó fuera de la convocatoria a última hora.

Como siempre, vamos dexar unos datos a mou resumen y les correspondientes entraes del blog (que diré escribiendo lo más ceo posible):

Estaya 1: Sotu (Sayambre) - Cordiñanes (Valdión)

Duración: 12 h
Llonxitú: 20.9 km
Ascensu: 2090 m
Descensu: 2140 m



Estaya 2: Cordiñanes (Valdión) - Santa Marina (Valdión)

Duración: 11 h
Llonxitú: 12.6 km
Ascensu: 1740 m
Descensu: 1420 m

Estaya 3: Santa Marina (Valdión) - Vegabañu(Sayambre)

Duración: 10 h  y 20 min
Llonxitú: 25.5 km
Ascensu: 1755 m
Descensu: 1590 m


Estaya 4: Vegabañu(Sayambre) - Sotu (Sayambre)

Duración:  2 h aprox
Llonxitú: 6,2 km
Ascensu: 210 m
Descensu: 570 m


Totales:
 
Duración: 35 h y 20 min
Llonxitú: 65.2 km
Ascensu: 5795 m
Descensu: 5720 m

jueves, 7 de julio de 2016

Peña'l Cadabal (Llangréu)

26, 28 d'Abril, 4 de Mayu y 27 de Xunu de 2016

Varios fueron los díes qu'anduve pel Cadabal entrenando un pocu col envís de recuperar nivel y ye qu'esta escuelina ye perfeuta por mor de les víes curties, pero dures de movimientos y téuniques, pa ponese en forma.

El primer día, los primeros díes alcuérdome de dir enseñásela a xente esguilador potente que nun la conocíen y colaron d'ellí encantaos anque de xuru que nun tornaron por milenta proyeutos nes sos escueles favorites.

Alberto probando'l 6a pa calecer

A mí, que préstame esguilar tranquilu ensin demasiaos xareos nin muncha xente nos pies de víes, ya que nun soi a tar concentráu y nun soi a sentime lo cómodu que debiera pa meteme nos mios proyeutos, siempre acabo tornando pel Cadabal pa dir finiquitando caxigalines por facer.

Esti añu, dióme más pola colchoneta y averéme pel Cadabal a la gueta de bloques duros pa garrar fuercia de deos, pero esa ye otra hestoria, que prestaríame cuntar aparte, axuntando dellos bloques d'esti llugarín pa los que tengan ganes de pasar un ratu apretón.

Llegando al top con esfuerzu

No qu'a da-y a la cuerda refierse, quedábame por encadenar Starway to Heaven, vía de la Trinchera'l Cadabal que taba a la manzorga del mió 7b (The Trooper). Camentaba qu'esta vía pudiera ser durina, casi más que The Troopper, pero a la fín alcontré un métodu con travesía a la manzorga ensin dirse de más de la vía.

Con esti pasu duru de travesía, alcánzase al traviés d'una ñapa ínfima la fisura que xurden pela manzorga les chapes y que da a algamar la vía, anque seya dalgo espuesta a vuelos llaterales... Nun me paeció tan dura magar del métodu nuevu... asína que dexela en 6b+/c como muncho.

A falta de más reequipamientos o nueves víes... la Peña'l Cadabal pasa a un segundu planu nes escueles completaes... al menos cola cuerda... col bloque siempre tendrá dalgo que facer.

Peña'l Cadabal
Croquis modificaos por mi de la escuela d'escalada de la Peña'l Cadabal, por mor de Pura Escalada Asturias. Gracies y col so permisu.


-------------------------------------------------------------------------

miércoles, 6 de julio de 2016

Trail de Portudera (Cabrales)

16 d'Abril de 2016

Track: Trail de Portudera (Cabrales)


Web del Trail: Trail de los Pastores de Portudera

Clasificaciones: Clasificaciones 2016  


Tornamos a les carreres pel monte col Trail de Portudera y el mieu invade'l nuesu cuerpu, ya que cola falta del mi hermanu, vamos xuntanos los Bertos, pudiendo animanos a xubir el ritmu de más, lo que pudiera llevanos a pasales putes al final.

Aportamos a Arenas, onde intentamos echar un cafetín tranquilu nel Cares, tando'l chigre a rebosar, anque esta vegada vinimos sobraos de tiempu y finalmente, podemos xintar un cafetín con un donut pa garrar dalgo azucre estra.

Caleciendo col día perruno